វីដេអូផលិតកម្មដបកែវមួយត្រូវបានអះអាងថាជាដំណើរការផលិតអង្ករក្លែងក្លាយ
វីដេអូប្លែកៗជាច្រើន ត្រូវបានបង្ហោះនៅលើបណ្ដាញសង្គមជាមួយការរៀបរាប់មិនត្រឹមត្រូវ។ ក្នុងនោះ វីដេអូនៃដំណើរការផលិតកម្មកែច្នៃមួយនៅឯបរទេស ត្រូវបានអ្នកប្រើប្រាស់ហ្វេសប៊ុកកម្ពុជាអះអាងថា ជារោងចក្រផលិតអង្ករក្លែងក្លាយ។ វីដេអូជាមួយការអះអាងបែបនេះ ត្រូវបានចែករំលែកព្រោងព្រាតលើបណ្ដាញសង្គម ហើយទទួលបានប្រតិកម្ម និងមតិយោបល់ជាច្រើនពីអ្នកប្រើប្រាស់ហ្វេសប៊ុក។ ទោះជាយ៉ាងណា យើងបានរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយបានបង្ហោះវីដេអូនៃសង្វាក់ផលិតកម្មមួយនៅលើបណ្ដាញសង្គមកាលពីថ្ងៃម្សិលមិញនេះ ហើយរៀបរាប់ថា វីដេអូនោះបង្ហាញពីដំណើរការផលិតអង្ករក្លែងក្លាយ ដែលត្រូវបានកែច្នៃចេញពីបំណែកកម្ទេចកម្ទីកែវដោយរោងចក្រមួយ។
វីដេអូនេះ ត្រូវបានចែករំលែកបន្តរហូតដល់ទៅជាង ១ម៉ឺនដងនៅក្នុងរយៈពេលត្រឹមតែ ២៤ម៉ោងប៉ុណ្ណោះ ហើយវីដេអូនេះក៏ទទួលបានផងដែរនូវប្រតិកម្មយ៉ាងច្រើន និងមតិយោបល់ចម្រុះបែបពីអ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី១៣ ខែកុម្ភៈ ឆ្នាំ២០២៤ ជាមួយការរៀបរាប់ថា វាជារោងចក្រផលិតអង្ករក្លែងក្លាយដែលត្រូវបានកែច្នៃពីវត្ថុ ឬគ្រឿងផ្សំផ្សេងៗ។
វីដេអូមានការអះអាងបែបនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់បណ្ដាញសង្គមដទៃទៀតដែរ ដែលនាំឱ្យមានការចែករំលែកបន្តរហូតទៅដល់ជាង ១ពាន់ដង ព្រមទាំងមានការបញ្ចេញមតិ និងប្រតិកម្មចម្រុះពីអ្នកប្រើប្រាស់ហ្វេសប៊ុកកម្ពុជា។
ខាងក្រោមនេះ គឺជារូបភាពផ្ដាមចេញពីការអះអាងដដែលនេះ ដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតកាលពីថ្ងៃម្សិលមិញនេះ។
ខាងក្រោមនេះ គឺជាវីដេអូ និងការអះអាងដូចគ្នាទាំងស្រុងដែលត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុកមួយទៀត ដែលត្រូវបានចែករំលែកបន្តជាច្រើន។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធីផ្ទៀងផ្ទាត់រូបថត និងវីដេអូ ដែលនាំឱ្យយើងរកឃើញការពិតដូចខាងក្រោមនេះ។
តាមរយៈកម្មវិធីផ្ទៀងផ្ទាត់រូបថត ឬវីដេអូ យើងបានរកឃើញវីដេអូដូចគ្នាទាំងស្រុងនៅលើបណ្ដាញកម្សាន្តយក្ស YouTube ដែលត្រូវបានបង្ហោះដោយឆាណែលមួយឈ្មោះថា “All Process of World” កាលពី ៨ខែមុន។
សំណេររៀបរាប់អំពីវីដេអូនេះ បញ្ជាក់ថា សកម្មភាពផលិតកម្មក្នុងវីដេអូនេះ គឺជាដំណើរការផលិតដបធំៗធ្វើពីកែវដោយរោងចក្រកែច្នៃមួយរបស់កូរ៉េខាងត្បូង។
ខាងក្រោមនេះ គឺជាវីដេអូទាំងស្រុងនៃដំណើរការផលិតដបធំៗពីអំបែងកែវ ដែលត្រូវបានបញ្ជាក់ថា ផលិតឡើងដោយក្រុមហ៊ុនកែវធម្មជាតិ Yongcheon របស់កូរ៉េខាងត្បូង។
ខាងក្រោមនេះ គឺជាវីដេអូមួយទៀតនៃដំណើរការផលិតផលិតផលធ្វើពីអំបែងកែវរបស់ក្រុមហ៊ុនកូរ៉េខាងត្បូងមួយនេះ ដែលត្រូវបានបង្ហោះនៅលើបណ្ដាញ YouTube ដោយឆាណែលមួយទៀតកាលពីខែកក្កដាឆ្នាំ២០២៣កន្លងមកនេះ។
ក្រុមហ៊ុន Yongcheon Natural Glass Co., Ltd ដែលត្រូវបានបង្កើតឡើងកាលពីឆ្នាំ២០០១នោះ បានផលិតផលិតផលធ្វើពីអំបែងកែវ និងនាំយកទៅលក់នៅលើទីផ្សារអន្តរជាតិ ដូចជាប្រទេសអ៊ូបេគីស្ថាន ចិន កោះតៃវ៉ាន់ វៀតណាម ថៃ និងប្រទេសដទៃទៀតនៅតំបន់អាស៊ីអាគ្នេយ៍។
ក្រុមហ៊ុនកូរ៉េខាងត្បូងមួយនេះ បានផលិតកែវតូចធំ កែវសម្រាប់ដាក់អង្ករ និងផលិតផលកែវទៅតាមសំណើ និងតម្រូវការរបស់អតិថិជនរបស់ពួកគេ។ សូមមើលប្រវត្តិក្រុមហ៊ុននៅត្រង់នេះ។
សន្និដ្ឋានFact Crescendo Cambodia
បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ សង្វាក់ផលិតកម្មនៅក្នុងវីដេអូនេះ មិនមែនជាដំណើរការផលិតអង្ករក្លែងក្លាយនោះឡើយ។ វីឌេអូដើម បង្ហាញថា វាជាសកម្មភាពផលិតដបពីអំបែងកែវរបស់ក្រុមហ៊ុនមួយនៅកូរ៉េខាងត្បូង។
Title:វីដេអូផលិតកម្មដបកែវមួយត្រូវបានអះអាងថាជាដំណើរការផលិតអង្ករក្លែងក្លាយ
Written By: Jay UdomResult: Misleading
