រូបភាពបីសន្លឹកដែលបង្ហាញយន្តហោះចម្បាំងគ្របដោយទង់ជាតិជប៉ុននោះ ត្រូវបានគេបង្ហោះនៅលើបណ្ដាញសង្គមព្រោងព្រាតជាមួយការអះអាងថា វាជាយន្តហោះចម្បាំងជំនាន់ថ្មីបំផុតរបស់ជប៉ុនដែលធ្វើឱ្យពិភពលោកភ្ញាក់ផ្អើល។ អ្នកប្រើប្រាស់បណ្ដាញសង្គមជាច្រើន បានចែកចាយបន្តនូវរូបភាពជាមួយព័ត៌មានបែបនេះ។ ទោះជាយ៉ាងណា ការផ្ទៀងផ្ទាត់របស់យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបភាពយន្តហោះចម្បាំងគ្របដោយទង់ជាតិជប៉ុននៅផ្នែកខាងមុខនោះ ត្រូវបានបង្ហោះព្រោងព្រាតនៅលើបណ្ដាញសង្គមជាមួយការអះអាងថា វាជាយន្តហោះចម្បាំងជំនាន់ថ្មីរបស់ជប៉ុនដែលផលិតឡើងដោយក្រុមហ៊ុន Mitsubishi Heavy Industries។
រូបភាពជាមួយនឹងសំណេរបែបនេះ ត្រូវបានចែកចាយយ៉ាងផុសផុលនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ដោយបានបញ្ចេញមតិកោតសរសើរដល់ទំនើបកម្មក្នុងវិស័យយោធារបស់ប្រទេសនេះ បើធៀបនឹងវិស័យយោធារបស់កម្ពុជា។
ខាងក្រោមនេះ គឺជារូបភាពផ្ដាមចេញពីអះអាងដែលបង្ហោះនៅលើបណ្ដាញសង្គមហ្វេសប៊ុកលកាលពីថ្ងៃទី២០ ខែកុម្ភៈ ឆ្នាំ២០២៥ រៀបរាប់ថា “យន្តហោះចម្បាំង UFO ជំនាន់ទី៦ថ្មីបំផុតរបស់ជប៉ុនធ្វើឱ្យពិភពលោកភ្ញាក់ផ្អើលខ្លាំងតែម្ដង” និងសំណេរជាភាសាអង់គ្លេសថា “Japan’s new 6th gen UFO fighter jet shocks the aviation world”។
រូបភាពជាមួយសំណេរបែបនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតដែរនៅក្នុងរយៈពេលប៉ុន្មានថ្ងៃកន្លងមកនេះ ដែលនាំឱ្យមានការចែកចាយបន្តកាន់តែច្រើនថែមទៀត។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានេះនៅលើបណ្ដាញសង្គមកាលពីថ្ងៃទី២០ ខែកុម្ភៈ ឆ្នាំ២០២៥ រៀបរាប់ថា “យន្តហោះចម្បាំង UFO ជំនាន់ទី៦ថ្មីបំផុតរបស់ជប៉ុន ធ្វើឱ្យពិភពលោកភ្ញាក់ផ្អើលខ្លាំងតែម្ដង…”។
គេក៏អាចរកមើលការអះអាងជាភាសាខ្មែរដូចគ្នានេះដែលត្រូវបានបង្ហោះនៅលើបណ្ដាញសង្គមតាមរយៈតំណភ្ជាប់មាននៅទីនេះ៖ Link 1 (archived), Link 2 (archived), Link 3 (archived), និង Link 4 (archived)។
ក្រៅពីការអះអាងជាភាសាខ្មែរហើយនោះ ក៏មានដែរការអះអាងជាភាសាអង់គ្លេសដែលនិយាយថា រូបភាពទាំងបីសន្លឹកនេះ គឺជាយន្តហោះចម្បាំងដ៏ទំនើបជំនាន់ទី៦របស់ជប៉ុន។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី២២ ខែកុម្ភៈ ឆ្នាំ២០២៥ ដែលមានខ្លឹមសារដូចគ្នាទាំងស្រុងទៅនឹងការអះអាងខាងលើ ហើយវាត្រូវបានចែកចាយជាច្រើនដងបន្ថែមទៀត។
ខាងក្រោមនេះ គឺជារូបភាពផ្ដាមចេញពីការបង្ហោះការអះអាងដូចគ្នានេះនៅលើបណ្ដាញសង្គម Threads កាលពីថ្ងៃទី១៩ ខែកុម្ភៈ ឆ្នាំ២០២៥ ជាមួយសំណេរជាភាសាអង់គ្លេសដូចគ្នាទាំងស្រុង។
គេអាចស្វែងរកការអះអាងជាភាសាអង់គ្លេសដូចគ្នានេះតាមរយៈតំណភ្ជាប់ផ្សេងទៀតនៅទីនេះ៖ Link 1 (archived), Link 2 (archived), Link 3 (archived), Link 4 (archived), Link 5 (archived), និង Link 6 (archived)។
ការត្រួតពិនិត្យការពិត
Fact Crescendo បានផ្ទៀងផ្ទាត់ទៅលើការអះអាងនេះតាមរយៈការដំណើរការ Google Reverse Image Search និងការស្វែងរកព័ត៌មានតាមរយៈពាក្យគន្លឹះ ដែលនាំឱ្យយើងរកឃើញការពិតដូចខាងក្រោមនេះ។
ការស្វែងរកព័ត៌មានតាមរយៈពេលគន្លឹះនៅលើ Google បាននាំឱ្យយើងដឹងថា ជប៉ុនបានសហការគ្នាជាមួយចក្រភពអង់គ្លេស និងអ៊ីតាលី ដើម្បីផលិតយន្តហោះច្បាំងជំនាន់ថ្មី។
គម្រោងផលិតយន្តហោះចម្បាំងរួមគ្នានេះ ត្រូវបានចុះផ្សាយព្រោងព្រាតដោយសារព័ត៌មាននានាជុំវិញពិភពលោកកាលពីឆ្នាំ២០២៤កន្លងមកនេះ ដូចជាសារព័ត៌មានជប៉ុន Japan Times (archived) សារព័ត៌មានបារាំង France 24 និងទីភ្នាក់ងារព័ត៌មានអាមេរិក AP ជាដើម។
បើតាមការចុះផ្សាយរបស់ទីភ្នាក់ងារព័ត៌មាន AP គម្រោងផលិតយន្តចម្បាំងរួមគ្នានេះ ឬហៅថា Global Combating Air Program (GCAP) របស់ប្រទេសទាំងបីនេះ មានផែនការដាក់បញ្ចេញយន្តហោះដំបូងរបស់ពួកគេនៅឆ្នាំ២០៣៥ខាងមុខ។
ផ្អែមតាមសេចក្ដីរាយការណ៍របស់ AP ដដែលនេះ គិតមកទល់ពេលនេះ មិនទាន់មាននៅឡើយទេការដាក់បង្ហាញជាផ្លូវការនៃយន្តហោះចម្បាំងជំនាន់ថ្មីដែលរួមសហការផលិតដោយប្រទេសទាំងបីនេះ។
ប៉ុន្តែ អ្វីដែលគេបានដឹងនោះ គឺរូបគំរូយន្តហោះចម្បាំងដែលត្រូវបានគេដាក់តាំងបង្ហាញនៅក្នុងពិពណ៌អន្តរជាតិវិស័យអវកាសជប៉ុននៅទីក្រុងតូក្យូ កាលពីខែតុលាកន្លងមក។
ខាងក្រោមនេះ គឺរូបគំរូមួយនៅក្នុងចំណោមគំរូទាំង ១០ នៃយន្តហោះចម្បាំងជំនាន់ថ្មី ដែលជប៉ុន ចក្រភពអង់គ្លេស និងអ៊ីតាលី គ្រោងផលិតរួមគ្នា និងគ្រោងដាក់ពង្រាយនៅ ១០ឆ្នាំខាងមុខ។
ខាងក្រោមនេះ គឺជារូបភាពផ្ដាមចេញពីសារព័ត៌មានបារាំង France 24 ដែលចុះផ្សាយនូវរូបថតនៃគំរូយន្តហោះចម្បាំងជំនាន់ទី៦ ដែលគ្រោងផលិតឡើងរួមគ្នាដោយជប៉ុន អង់គ្លេស និងអ៊ីតាលី។ គំរូយន្តហោះនេះ ត្រូវបានដាក់តាំងបង្ហាញនៅ Farnborough International Airshow កាលពីឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីសារព័ត៌មាន Japan Times ដែលបង្ហាញរូបថតគំរូយន្តហោះចម្បាំងជំនាន់ថ្មីស្ថិតនៅក្រោមគម្រោងនៃការផលិតរួមគ្នារវាងក្រុមហ៊ុន Mitsubishi Heavy Industries របស់ប្រទេសជប៉ុន ក្រុមហ៊ុន Leonardo របស់អង់គ្លេស និងក្រុមហ៊ុន BAE Systems របស់អ៊ីតាលី។
បើប្រៀបធៀបទៅនឹងរូបគំរូនៃយន្តហោះចម្បាំងដែលគេបានដាក់តាំងបង្ហាញ Fact Crescendo កត់សម្គាល់ឃើញថា រូបភាពនៃយន្តហោះចម្បាំងដែលត្រូវបានគេបង្ហោះនៅលើបណ្ដាញសង្គមនោះ មិនដូចទៅនឹងគំរូយន្តហោះដែលប្រទេសទាំងបីគ្រោងផលិតរួមគ្នានោះឡើយ។
ដោយពិនិត្យទៅលើរូបភាពដែលត្រូវបានគេបង្ហោះនៅលើបណ្ដាញសង្គមនោះ Fact Crescendo បានកត់សម្គាល់ចំណុចមិនប្រក្រតីជាច្រើននៅលើរូបភាពទាំង ដោយសង្ស័យថា វាត្រូវបានបង្កើតឡើងដោយកម្មវិធីបញ្ញាសិប្បនិម្មិតតែប៉ុណ្ណោះ។
ចំណុចមិនប្រក្រតីមួយ គឺមនុស្សទាំងអស់នៅក្នុងរូបភាព ស្ថិតនៅក្នុងជំហរ ឬឥរិយាបថដូចគ្នាទាំងអស់ ពោលគឺដាក់ដៃទាំងពីរនៅក្នុងហោប៉ៅអាវរបស់ពួកគេទាំងអស់។ សូមពិនិត្យមើលរូបខាងក្រោមនេះ
ដោយសង្ស័យទៅលើរូបភាពនេះ Fact Crescendo បានប្រើប្រាស់កម្មវិធីវិភាគមាតិកា AI របស់វេបសាយ sightengine ដែលបង្ហាញវា រូបភាពនេះមិនមែនជារូបភាពនៃព្រឹត្តិការណ៍ជាក់ស្ដែងនោះឡើយ។ ផ្ទុយទៅវិញ លទ្ធផលវិភាគបង្ហាញថា វាត្រូវបានបង្កើតឡើងដោយកម្មវិធីបញ្ញាសិប្បនិម្មិតតែប៉ុណ្ណោះ។
ខាងក្រោមនេះ គឺជារូបភាពផ្ដាមចេញពីការវិភាគដោយវេបសាយ sightengine ដែលបង្ហាញថា រូបភាពនេះត្រូវបានបង្កើតឡើងដោយកម្មវិធី AI។
ខាងក្រោមនេះ គឺជារូបភាពផ្ដាមចេញពីលទ្ធភាពនៃការវិភាគទៅលើរូបភាពមួយសន្លឹកទៀតដោយវេបសាយ sightengine ដែលបង្ហាញថា រូបភាពនេះក៏ត្រូវបានបង្កើតឡើងដោយកម្មវិធីបញ្ញាសិប្បនិម្មិត AI ផងដែរ។
អត្ថបទមួយរបស់ទស្សនាវដ្ដី Defense News របស់អាមេរិក បានឱ្យដឹងថា ក្រុមហ៊ុន Mitsubishi Heavy Industries កំពុងដំណើរការផលិតយន្តហោះចម្បាំងជំនាន់ទី៦សម្រាប់កងទ័ពអាកាសជប៉ុន។ យន្តហោះចម្បាំងជំនាន់ថ្មីនេះ ដែលមានឈ្មោះថា Mitsubishi F-X នឹងត្រូវបញ្ចេញនៅឆ្នាំ២០៣៥ខាង ដើម្បីជំនួសយន្តហោះចម្បាំង Mitsubishi F-2។ សូមអានអត្ថបទទាំងស្រុងនៅទីនេះ(archived)
សន្និដ្ឋាន
Fact Crescendo រកឃើញថា ការអះអាងខាងលើនេះ មិនត្រឹមត្រូវនោះឡើយ។ រហូតមកដល់ពេលនេះ គ្មានរូបថតផ្លូវការណាមួយនៃយន្តហោះចម្បាំងជំនាន់ថ្មីរបស់ប្រទេសជប៉ុន ត្រូវបានគេបញ្ចេញជាផ្លូវការនៅឡើយទេ។ រូបភាពដែលគេបង្ហោះនៅលើបណ្ដាញសង្គមនោះ ត្រូវបានបង្កើតឡើងដោយកម្មវិធីបញ្ញាសិប្បនិម្មិត AI តែប៉ុណ្ណោះ។ ក្រុមហ៊ុន Mitsubishi Heavy Industries ដែលទទួលបានកិច្ចសន្យាពីរដ្ឋាភិបាលជប៉ុន កំពុងដំណើរការផលិតយន្តហោះចម្បាំងជំនាន់ទី៦សម្រាប់កងទ័ពអាកាសជប៉ុន ហើយគ្រោងបញ្ចេញនៅឆ្នាំ២០២៣៥ខាងមុខ។
Title:ព័ត៌មានមិនពិតថា ជប៉ុនបានបញ្ចេញយន្តហោះចម្បាំងជំនាន់ថ្មីធ្វើឱ្យផ្អើលពិភពលោក
Fact Check By: Jay UdomResult: False
