រូបថតមួយសន្លឹកត្រូវបានភ្ជាប់មិនត្រឹមត្រូវនឹងការបោះបង់ជំនឿសាសនារបស់បុរសប៉ាឡេស្ទីន
ខណៈដែលសង្គ្រាមបង្ហូរឈាមអ៊ីស្រាអែល-ហាម៉ាស់ប៉ាឡេស្ទីនបន្តកើតមានជាហូរហែរនោះ រូបថតមួយសន្លឹកត្រូវបានបង្ហោះលើបណ្ដាញសង្គមជាមួយសំណេររៀបរាប់ថា បុរសមូស្លីមជាង ២០០នាក់នៅតំបន់កាហ្សា បានទទួលយកព្រះយេស៊ូ បន្ទាប់ពីពួកគេយល់សប្តិឃើញព្រះយេស៊ូក្នុងយប់តែមួយដូចគ្នា។ រូបថតជាមួយសំណេរបែបនេះ ត្រូវបានចែករំលែកយ៉ាងផុសផុលលើបណ្ដាញសង្គមរួមជាមួយការបញ្ចេញមតិយោបល់ចម្រុះបែប។ ទោះជាយ៉ាងណា យើងរកឃើញថា ការអះអាងទៅលើរូបថតនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលកំពុងផុសផុលនៅលើបណ្ដាញសង្គមនាពេលថ្មីៗនេះ បានបង្ហោះរូបថតមួយសន្លឹកនៅលើបណ្ដាញសង្គមកាលពីថ្ងៃពុធកន្លងមកនេះជាមួយសំណេររៀបរាប់ថា មូស្លិមសាសនិកជាង ២០០នាក់នៅតំបន់កាហ្សា បានទទួលយកព្រះយេស៊ូ ដោយសារតែពួកគេទាំងនោះសុបិន្តឃើញព្រះយេស៊ូដូចគ្នានៅយប់តែមួយ។
រូបថតមួយសន្លឹកនេះ ត្រូវបានចែករំលែកបន្តជាច្រើនដង និងទទួលបានមតិយោបល់ចម្រុះបែបពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមកាលពីថ្ងៃទី២២ ខែវិច្ឆិកា ឆ្នាំ២០២៣ ដែលមានសំណេរនៅលើរូបថតជាភាសាអង់គ្លេសមានខ្លឹមសារ «បុរសមូស្លិមជាង ២០០នាក់ បានទទួលយកព្រះយេស៊ូននាពេលថ្មីៗនេះ ដោយសារតែពួកគេទាំង ២០០នាក់នោះ បានសុបិន្តឃើញព្រះយេស៊ូដូចគ្នានៅក្នុងយប់តែមួយ។ សូមសរសើរដល់ព្រះជាម្ចាស់!»។
រូបថតជាមួយសំណេរបែបនេះ ត្រូវបានចែករំលែកបន្តពីការអះអាងជាភាសាអង់គ្លេសដែលត្រូវបានបង្ហោះ និងចែករំលែកព្រោងព្រាតនៅលើបណ្ដាញសង្គមហ្វេសប៊ុកនៅក្នុងរយៈពេលពីរបីថ្ងៃចុងក្រោយនេះ។
ខាងក្រោមនេះ គឺជារូបភាពផ្ដាមចេញពីការអះអាងជាភាសាអង់គ្លេសដែលត្រូវបានបង្ហោះនៅលើបណ្ដាញសង្គមដែលមានសំណេរនៅលើរូបថតថា «More than 200 Muslim men in Gaza received Jesus recently because all 200 had dreams of Jesus in the same night. Praise God! »។
គេអាចមើលការអះអាងដដែលនេះដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតតាមរយៈតំណភ្ជាប់នៅទីនេះ (archived) ឬតាមរយៈតំណភ្ជាប់មួយទៀតនៅទីនេះ (archived) ឬតាមរយៈតំណភ្ជាប់មួយទៀតនៅទីនេះ (archived)។
FACT CHECK
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹកដែលបង្ហាញមនុស្សមួយក្រុមស្ថិតក្នុងសម្លៀកបំពាក់បែបមូស្លីម និងឱបគ្នាទៅវិញទៅមកនោះ ត្រូវបានរកឃើញនៅក្នុងគេហទំព័រសោតទស្សន៍ឌីជីថល shutterstock ដែលជាប្រព័ន្ធផ្គត់ផ្គង់រូបថត វីដេអូ តន្ត្រី និងរូបភាពឌីជីថលផ្សេងៗមានមូលដ្ឋាននៅសហរដ្ឋអាមេរិក។
ព័ត៌មានដែលនៅក្នុងគេហទំព័រខាងលើនេះ បានឱ្យដឹងថា រូបថតមួយសន្លឹកនេះបង្ហាញក្រុមបុរសជនជាតិប៉ាឡេស្ទីនដែលត្រូវបានបញ្ជូនទៅដល់តំបន់កាហ្សា ក្រោយពីទទួលបានការជួយសង្គ្រោះចេញពីតំបន់ហែកហួរដោយសង្គ្រាមនៅក្នុងប្រទេសស៊ូដង់កាលពីថ្ងៃទី២៨ ខែមេសា ឆ្នាំ២០២៣។
ខាងក្រោមនេះ គឺជារូបភាពផ្ដាមចេញពីគេហទំព័រ shutterstock ជាមួយសំណេររៀបរាប់ជាភាសាអង់គ្លេសដែលមានខ្លឹមសារថា «ជនជាតិប៉ាឡេស្ទីនដែលត្រូវបានគេជួយសង្គ្រោះចេញពីតំបន់ហែកហួរដោយសង្គ្រាមនៅក្នុងប្រទេសស៊ូដង់ ទទួលបានការស្វាគមន៍នៅពេលធ្វើដំណើរទៅដល់តំបន់កាហ្សាស្ត្រីបតាមព្រំដែន Rafah ជាប់ប្រទេសអេហ្ស៊ីប កាលពីថ្ងៃទី២៨ ខែមេសា ឆ្នាំ២០២៣»។
រូបថតដដែលនេះ ក៏ត្រូវបានចុះផ្សាយនៅក្នុងអត្ថបទមួយនៃគេហទំព័រ Palestine Deep Dive កាលពីចុងខែកក្កដាកន្លងមកផងដែរ ដោយរក្សាខ្លឹមសារដូចគ្នាទៅនឹងខ្លឹមសារនៅក្នុងគេហទំព័រ shutterstock។
Palestine Deep Dive | Archived Link
CONCLUSION
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាក្រុមបុរសប៉ាឡេស្ទីនដែលបានបោះបង់សាសនាឥស្លាមទៅជឿលើព្រះយេស៊ូនោះឡើយ។ តាមការពិត រូបថតមួយសន្លឹកនេះ បង្ហាញក្រុមជនជាតិប៉ាឡេស្ទីនដែលត្រូវបានជួយសង្គ្រោះចេញពីតំបន់សង្គ្រាមក្នុងប្រទេសស៊ូដង់ និងធ្វើដំណើរទៅដល់តំបន់កាហ្សាកាលពីចុងខែមេសា ឆ្នាំ២០២៣។
Title:រូបថតមួយសន្លឹកត្រូវបានភ្ជាប់មិនត្រឹមត្រូវនឹងការបោះបង់ជំនឿសាសនារបស់បុរសប៉ាឡេស្ទីន
Written By: Jay UdomResult: False