សំណេរមានឈ្មោះ «យឹម តន» ត្រូវបានគេប្រទះឃើញនៅតាមកន្លែងជាច្រើនក្នុងខេត្តកំពង់ស្ពឺ និងតាកែវ។ ថ្មីៗនេះ រូបថតមួយសន្លឹកដែលបង្ហាញតម្រួតថៃព្យាយាមឃាត់ខ្លួនបុរសម្នាក់ដែលសរសេរអក្សរខ្មែរលើជញ្ជាំងរបងព្រះបរមរាជវាំងថៃ ត្រូវបានបង្ហោះព្រោងព្រាតលើបណ្ដាញសង្គម។ រូបថតនេះ ក៏ត្រូវបានចែករំលែកបន្តយ៉ាងច្រើនផងដែរ ហើយអ្នកប្រើប្រាស់បណ្ដាញសង្គមួយចំនួន ជឿថាជារូបថតពិតប្រាកដ។ ទោះជាយ៉ាងណា ការផ្ទៀងផ្ទាត់របស់យើងរកឃើញថា រូបថតនេះ គ្រាន់តែជារូបកាត់តតែប៉ុណ្ណោះ។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញសមត្ថកិច្ច២នាក់បម្រុងឃាត់បុរសម្នាក់ដែលសរសេរអក្សរខ្មែរនៅលើជញ្ជាំងរបងខ្ពស់មួយកន្លែងនោះ ត្រូវបានគេបង្ហោះលើបណ្ដាញសង្គមជាមួយសំណេរចោទសួរថា តើហេតុអ្វីបានជាសមត្ថកិច្ចចាប់ខ្លួនបុរសម្នាក់នោះ។
រូបថតរួមជាមួយសំណេរបែបនេះ ទទួលបានការចែករំលែកជាច្រើនដង និងការបញ្ចេញមតិចម្រុះបែបផងដែរ ខណៈអ្នកប្រើប្រាស់បណ្ដាញសង្គមជាច្រើន បានបញ្ចេញប្រតិកម្មទៅនឹងការបង្ហោះរូបថតនេះ។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតនៅលើបណ្ដាញសង្គមកាលពីថ្ងៃទី២៨ ខែមីនា ឆ្នាំ២០២៣ ជាមួយសំណេររៀបរាប់ថា «ម្ដេចចាប់គាត់អញ្ចឹង»។
រូបថតដដែលនេះ ក៏ត្រូវបានបង្ហោះលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកមួយទៀត ដែលសរសេររៀបរាប់ថា «ខណៈនេះ ប្រជារាស្ត្រនៅទីក្រុងភ្នំពេញ នៃព្រះនគរ យឹម តន ខ្លះកំពុងប្រឈមបត់ជើងធំតូច អត់ទឹកលាង»។
ចំណែកអ្នកប្រើប្រាស់ហ្វេសប៊ុកមួយទៀត បានបង្ហោះរូបថតដដែលនេះដែលមានសំណេរជាអក្សរខ្មែរ «របងផ្ទះ យឹម តន រាជបុត្រ យឹម តឿក» ហើយអ្នកប្រើប្រាស់ហ្វេសប៊ុកសរសេរថា «យឹម តន ពង្រីកសាខាដល់បាងកកហើយ»។
សម្រាប់ការបង្ហោះរូបថតដដែលនេះនៅលើបណ្ដាញសង្គមហ្វេសប៊ុក សូមចូលទៅមើលតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់លើរូបថតនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញរូបថតដូចគ្នានេះ ត្រូវបានចុះផ្សាយដោយសារព័ត៌មានាអន្តរជាតិមួយចំនួន។
អត្ថបទព័ត៌មានចេញផ្សាយដោយសារព័ត៌មាន Coconuts បានឱ្យដឹងថា សកម្មជនថៃម្នាក់ ត្រូវបានតម្រួតថៃកាលពីថ្ងៃអង្គារកន្លងមកនេះ នៅពេលសកម្មជនរូបនោះបានព្យាយាមបាញ់ថ្នាំពណ៌នៅលើជញ្ជាំងព្រះរាជវាំងថៃ។ សូមមើលខ្លឹមសារលម្អិតនៅទីនេះ។
បើតាមសារព័ត៌មានដដែលនេះ រូបថតច្បាប់ដើម បង្ហាញឱ្យឃើញតម្រួតថៃឃាត់ខ្លួនសកម្មជនថៃម្នាក់ ដែលបានបាញ់ថ្នាំលើជញ្ជាំងរបងព្រះបរមរាជវាំងថៃ កាលពីថ្ងៃទី២៨ ខែមីនា ឆ្នាំ២០២៣ ពោលមិនមានសំណេរអក្សរខ្មែរនោះឡើយ។
Coconuts Bangkok | Archived Link
រូបថតមួយសន្លឹកនេះ ក៏ត្រូវបានចុះផ្សាយជាមួយនឹងអត្ថបទមួយទៀតរបស់សារព័ត៌មាន Coconuts កាលពីថ្ងៃទី២៩ ខែមីនា។ សូមមើលខ្លឹមសារលម្អិតនៅទីនេះ។
សារព័ត៌មានថៃ Prachatai ជាភាសាអង់គ្លេស ក៏បានផ្សាយអំពីការចាប់ខ្លួនសកម្មជនម្នាក់អាយុ ២៥ឆ្នាំ ដោយសារតែសកម្មជនរូបនោះ បានបាញ់ថ្នាំគូសវាសលើជញ្ជាំងរបងព្រះបរមរាជវាំងថៃ។ សូមមើលខ្លឹមសារលម្អិតនៅទីនេះ។
យើងក៏បានរកឃើញវីដេអូនៃការឃាត់ខ្លួនសកម្មជនថៃរូបនោះផងដែរ ដែលវីដេអូនោះត្រូវបានចែករំលែកនៅលើបណ្ដាញសង្គមផ្សេងៗក្នុងរយៈពេលប៉ុន្មានថ្ងៃថ្មីៗនេះ។
ខាងក្រោមនេះ គឺជាការប្រៀបធៀបរវាងរូបភាពកាត់ត និងរូបថតច្បាប់ដើម ដែលត្រូវបានរកឃើញនៅក្នុងអត្ថបទសារព័ត៌មានអន្តរជាតិនានា។
សន្និដ្ឋាន
Fact Crescendo Cambodia រកឃើញថា រូបថតដូចដែលត្រូវបានរៀបរាប់ខាងលើនេះ ត្រូវបានកាត់ត។ រូបថតច្បាប់ដើម បង្ហាញឱ្យឃើញតម្រួតថៃពីររូបចូលទៅឃាត់ខ្លួនសកម្មជនថៃម្នាក់អាយុ២៥ឆ្នាំ ដែលបានយកថ្នាំពណ៌បាញ់ទៅលើជញ្ចាំងរបងព្រះបរមរាជវាំង Grand Palace នៅទីក្រុងបាងកក កាលពីថ្ងៃទី២៨ ខែមីនា។
Title:រូបថតតម្រួតថៃចាប់ខ្លួនបុរសម្នាក់សរសេរអក្សរខ្មែរលើរបងរាជវាំងថៃ គឺជារូបភាពកាត់ត
Fact Check By: Jay UdomResult: Altered
