លោកនាយករដ្ឋមន្ត្រី ហ៊ុន សែន តែងតែទទួលរងនូវការរិះគន់ និងការវាយប្រហារជាពាក្យសម្តីជាច្រើនលើក ជាច្រើនសារ ពីសំណាក់ក្រុមអ្នកជំទាស់ ឬអ្នកនយោបាយប្រឆាំងនឹងលោក ជាពិសេសនៅលើបណ្តាញសង្គមនានាយ៉ាងផុសផុល។
ក្នុងចំណោមនោះ រូបថតមួយសន្លឹកដែលបង្ហាញអំពីទិដ្ឋភាពរូបលោក ជាមួយនឹងលោកស្រី ធី សុវណ្ណថា កំពុងអង្គុយក្បែរគ្នានៅក្នុងរថយន្តនោះ ត្រូវបានបង្ហោះ ចែកចាយនៅលើបណ្តាញហ្វេសប៊ុកដោយអ្នកប្រើប្រាស់ម្នាក់។
ទោះជាយ៉ាងណា ការត្រួតពិនិត្យការពិត និងផ្ទៀងផ្ទាត់របស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បង្ហោះនៅលើបណ្តាញសង្គមហ្វេសប៊ុកនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃទី១៨ ខែមិថុនា ឆ្នាំ២០២១កន្លងទៅនេះ អ្នកប្រើប្រាស់ហ្វេសប៊ុកម្នាក់បានបង្ហោះរូបថតមួយសន្លឹក ដោយបានបង្ហាញរូបរបស់ថ្នាក់ដឹកនាំកម្ពុជាលោកនាយករដ្ឋមន្ត្រី ហ៊៊ុន សែន ជាមួយនឹងលោកស្រី ធី សុវណ្ណថា កំពុងអង្គុយនៅក្នុងរថយន្ត។ លោកស្រី ធី សុវណ្ណថា ត្រូវបានគេស្គាល់ជាទូទៅថា គឺជាអតីតសកម្មជននយោបាយអតីតគណបក្សប្រឆាំង និងជាអ្នកប្រើប្រាស់បណ្តាញសង្គមហ្វេសប៊ុកដ៏ល្បីល្បាញម្នាក់ ដែលក្រោយមកលោកស្រីបានងាកចូលរួមជាមួយនឹងគណបក្សប្រជាជនកម្ពុជាវិញ។
រូបថតនេះត្រូវបានចែករំលែកតៗគ្នាជាច្រើនដង និងប្រតិកម្មពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុកដែលបានសរសេរអក្សរនៅលើរូបថតដូច្នេះថា «ចៅលោកតាពិត»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបភាពនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
រូបថតដែលមានទម្រង់ និងសណ្ឋានដូចគ្នារបស់លោកនាយករដ្ឋមន្ត្រី ហ៊ុន សែន នេះ ត្រូវបានរកឃើញ និងបង្ហោះនៅក្នុងទំព័រហ្វេសប៊ុកផ្លូវការរបស់លោកផ្ទាល់កាលពីថ្ងៃទី១៤ ខែមិថុនា ឆ្នាំ២០១៩កន្លងមក។ រូបថតដដែលនេះ បានបង្ហាញអំពីទិដ្ឋភាពរវាងលោកនាយករដ្ឋមន្ត្រី និងចៅស្រីច្បងរបស់លោកនៅក្នុងរថយន្តមួយ។
រូបភាពផ្តាមចេញពីទំព័រហ្វេសប៊ុកដែលបានសរសេររៀបរាប់ថា «ចៅស្រីខ្ញុំនឹកជីតាពេកខំជិះយន្តហោះ មករង់ចាំជីតានៅប្រទេសហុងគ្រី។ ព្រឹកនេះនាំចៅចូលក្នុងគណៈប្រតិភូសម្តែងការគួរសមជាមួយប្រធានាធិបតី និងប្រធានសភាហុងគ្រី ដើម្បីឲ្យចៅស្គាល់ពីរបៀបធ្វើការរបស់ថ្នាក់ដឹកនាំប្រទេស»។
តាមរយៈសេចក្តីរាយការណ៍នៅក្នុងគេហទំព័រសារព័ត៌មានក្នុងស្រុកមួយ Fresh News បានចុះផ្សាយផងដែរ កាលពីថ្ងៃទី១៤ ខែមិថុនា ឆ្នាំ២០១៩កន្លងមកនេះ ដោយមានបង្ហាញអំពីរូបថតរបស់លោកនាយករដ្ឋមន្ត្រី ហ៊ុន សែន ជួបជាមួយនឹងចៅស្រីរបស់លោកនៅក្នុងប្រទេសហុងគ្រី។ រូបថតផ្សាយដោយគេហទំព័រមួយនេះ ពុំបានបង្ហាញទិដ្ឋភាពរូបថតរបស់លោកកំពុងអង្គុយជាមួយនឹងលោកស្រី ធី សុវណ្ណថា ដូចទៅនឹងការបង្ហោះរបស់អ្នកប្រើប្រាស់ខាងលើនោះឡើយ។
រូបភាពផ្ដាមចេញពីគេហទំព័រសារព័ត៌មាន Fresh News បានសរសេររៀបរាប់ចំណងជើងថា «ចៅស្រីច្បងរបស់សម្តេចតេជោ ហ៊ុន សែន នឹករលឹកជីតាពេក ខំស្កាត់ពីប្រទេសបារាំងមកជួបនៅប្រទេសហុងគ្រី»។
Fresh News’s Report | Archived Link
ករណីស្រដៀងគ្នានេះដែរ ក៏ធ្លាប់បានត្រួតពិនិត្យដោយក្រុមការងារ Fact Crescendo Cambodia កាលពីថ្ងៃ២៨ ខែឧសភា ឆ្នាំ២០២១កន្លងមកផងដែរ។ នៅក្នុងសេចក្តីរាយការណ៍ដដែលនេះ បានបង្ហាញរូបថតរវាងលោក ហ៊ុន សែន ដែលកំពុងជួបជុំជាមួយចៅស្រីច្បងរបស់លោកនៅក្នុងអំឡុងពេលលោកបំពេញទស្សនកិច្ចជាផ្លូវការនៅប្រទេសហុងគ្រីកាលពីខែមិថុនា ឆ្នាំ២០១៩កន្លងទៅនេះ។
Fact Crescendo Cambodia’s Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ និងអះអាងដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិត ច្បាប់ដើមនៃរូបថតនេះ គឺលោកនាយករដ្ឋមន្ត្រី ហ៊ុន សែន បានថតជាមួយនឹងចៅស្រីច្បងរបស់លោក អំឡុងពេលដែលលោកកំពុងបំពេញទស្សនកិច្ចជាផ្លូវការនៅក្នុងប្រទេសហុងគ្រីកាលពីថ្ងៃទី១៤ ខែមិថុនា ឆ្នាំ២០១៩កន្លងមកនេះ។
Title:រូបថតលោកនាយករដ្ឋមន្ត្រី ហ៊ុន សែន ត្រូវបានកាត់តជាមួយ ធី សុវណ្ណថា
Fact Check By: Kakada SimResult: Altered
