តើអាហ្សង់ទីននឹងបោះពុម្ពរូបិយប័ណ្ណមានរូបកីឡាករ Messi មែនដែរឬទេ?

បន្ទាប់ពីកីឡាករ Lionel Messi បានជួយឲ្យក្រុមបាល់ទាត់ជម្រើសជាតិអាហ្សង់ទីន យកឈ្នះបារាំងនៅប្រទេសកាតា និងគ្រងតំណែងជើងឯកពិភពលោកជាលើកទីបីនៅក្នុងប្រវត្តិសាស្ត្ររបស់ពួកគេនោះ រូបថតមួយសន្លឹក បង្ហាញទិដ្ឋភាពរូប Messi ផ្តិតនៅលើក្រដាសប្រាក់ ១០០០ ប៉េសូ (Peso) ត្រូវបានបង្ហោះឡើង ដោយភ្ជាប់ជាមួយនឹងការអះអាងថា ប្រទេសអាហ្សង់ទីន ត្រៀមផលិតលុយដែលមានរូបលោក Messi។ ការអះអាងបែបនេះ ត្រូវបានចែកចាយ និងប្រតិកម្មជាច្រើនដងពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរយ៉ាងផុសផុល។

ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដែលអ្នកប្រើប្រាស់ហ្វេសប៊ុកបង្ហោះនៅលើបណ្តាញសង្គមនោះ គឺមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី២២ ខែវិច្ឆិកា ឆ្នាំ២០២២ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក បង្ហាញទិដ្ឋភាពកីឡាករបាល់ទាត់ដ៏ល្បីឈ្មោះលោក Lionel Messi ដោយផ្ដិតនៅលើក្រដាសប្រាក់ ១០០០ ប៉េសូ។ អ្នកប្រើប្រាស់ដដែលខាងលើនេះ បានអះអាងនៅក្នុងសំណេររបស់ខ្លួនថា ប្រទេសអាហ្សង់ទីន កំពុងត្រៀមផលិតលុយដែលមានរូបកីឡាករម្នាក់នេះផងដែរ។

រូបថតបង្ហោះដោយភ្ជាប់ទៅនឹងការអះអាងខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែប។

ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «ប្រទេសអាហ្សង់ទីនកំពុងត្រៀមផលិតលុយដែលមានរូប Messi »។

Facebook Post | Archived Link

ការអះអាងខាងលើនេះ ក៏ត្រូវបានចែកចាយ និងបង្ហោះដោយទំព័រហ្វេសប៊ុកដទៃទៀតផងដែរ កាលពីថ្ងៃទី២២ ខែធ្នូ ឆ្នាំ២០២២កន្លងទៅនេះ ដោយបានបញ្ជាក់ដូចគ្នាថា ប្រទេសអាហ្សង់ទីនកំពុងត្រៀមផលិតលុយដែលមានរូបកីឡាករបាល់ទាត់ Messi។

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

តាមរយៈគេហទំព័រ Bloomberg Línea ចុះផ្សព្វផ្សាយកាលពីថ្ងៃទី២២ ខែធ្នូ ឆ្នាំ២០២២ បានបញ្ជាក់ និងច្រានចោលដោយអាជ្ញាធរប្រទេសអាហ្សង់ទីនថា ពុំមានការត្រៀមផលិតលុយ ដែលមានរូបកីឡាករបាល់ទាត់លោក Messi នោះឡើយ។ ការលើកឡើងបែបនេះ គឺគ្រាន់តែជាការលើកឡើងលេងសើច ដែលបានធ្វើឡើងមុនពេលប្រទេសអាហ្សង់ទីនបានឈ្នះពានបាល់ទាត់ពិភពលោក នៅប្រទេសកាតា មកម្ល៉េះ។

ខាងក្រោមនេះ គឺជារូបភាពផ្ដាមចេញពីគេហទំព័រខាងលើ បានសរសេរជាភាសាអង់គ្លេស ឬប្រែសម្រួលជាភាសាខ្មែរមានន័យថា «អាជ្ញាធរប្រទេសអាហ្សង់ទីន បានបដិសេធថា វាស្ថិតនៅក្រោមការពិចារណា»។

Bloomberg Línea Report | Archived Link

ការអះអាងខាងលើ ក៏ត្រូវបានផ្ទៀតផ្ទាត់ និងត្រួតពិនិត្យផងដែរ ដោយក្រុមការងារ Fact Crescendo ជាភាសាអង់គ្លេសកាលពីថ្ងៃទី២៩ ខែធ្នូ ឆ្នាំ២០២២កន្លងទៅថ្មីៗនេះ ដែលបានបញ្ជាក់នៅក្នុងអត្ថបទរបស់ខ្លួនថា នេះគ្រាន់តែជាការលើកឡើងលេងសើចតែប៉ុណ្ណោះ មិនមែនជាការពិតនោះឡើយ។ សូមមើលអត្ថបទទាំងស្រុងនៅទីនេះ។

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia រកឃើញថារូបថត និងការលើកឡើងដោយទំព័រហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ការពិតអាជ្ញាធរប្រទេសអាហ្សង់ទីន បានបដិសេធ ដោយមិនមានការត្រៀមផលិតលុយដែលមានរូបកីឡាករបាល់ទាត់លោក Lionel Messi នោះឡើយ។