មនុស្សតម្រង់ជួររង់ចាំទិញទឹកអប់ Dior នៅផ្សារអ៊ីអន គឺជារូបភាពកាត់ត
រូបថតមួយសន្លឹកដែលបង្ហាញឱ្យឃើញមនុស្សកកកុញនៅខាងមុខហាងទឹកអប់ DIOR ក្នុងផ្សារទំនើបមួយកន្លែង ត្រូវបានបង្ហោះនៅលើបណ្ដាញសង្គមជាមួយនឹងការអះអាងថា នេះគឺជាហេតុការណ៍នៃការកកកុញរយៈពេលជាង៥ម៉ោង នៅក្នុងផ្សារទំនើបអ៊ីអន (Aeon Mall)។ ការអះអាងបែបនេះ ត្រូវបានចែកចាយ និងប្រតិកម្មចម្រុះពីសំណាក់អ្នកប្រើប្រាស់យ៉ាងផុសផុល។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា ការអះអាងខាងលើនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៩ ខែមករា ឆ្នាំ២០២៤កន្លងទៅនេះ ទំព័រហ្វេសប៊ុកមួយ បានបង្ហោះរូបថតចំនួន ៤សន្លឹក ដែលក្នុងនោះ មួយសន្លឹកបង្ហាញឱ្យឃើញមនុស្សកកកុញជាច្រើន។ រូបថតទាំងឡាយនេះ ត្រូវបានភ្ជាប់ទៅនឹងការអះអាងថា នោះគឺជាហេតុការណ៍ដែលបានកើតឡើងនៅផ្សារទំនើបអ៊ីអន។
ទំព័រហ្វេសប៊ុកដដែលនេះ ក៏បានបញ្ជាក់មូលហេតុថា បណ្ដាលមកពីមនុស្សជាច្រើនបានតម្រង់ជួរជាច្រើនម៉ោង ដើម្បីទិញទឹកអប់ម៉ាក Dior។ ការអះអាងមួយនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមដែលបានរៀបរាប់ថា «ខ្ញុំធុញខ្លាំងណាស់ 🤬🤬 តម្រង់ជួរអស់រយៈពេល ៥ម៉ោងនៅផ្សារទំនើប Aeon ដើម្បីទិញទឹកអប់ Dior Sauvage»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
រូបថតដែលមានទម្រង់ និងសណ្ឋានដូចគ្នាទាំងស្រុងនោះ ត្រូវបានរកឃើញគេហទំព័រ Getty Images ដែលជាគេហទំព័រសោតទស្សន៍ដ៏ធំមួយ។ គេហទំព័រខាងលើនេះ ពុំបានបញ្ជាក់ និងបង្ហាញថា នោះគឺជាទិដ្ឋភាពនៃហាងទឹកអប់ DIOR នៅក្នុងផ្សារទំនើបអ៊ីអននោះឡើយ។ ផ្ទុយទៅវិញ នោះគឺជាទិដ្ឋភាពនៃហាង Chanel ដែលមានទីតាំងនៅទីក្រុងប៉េកាំង (Beijing) ប្រទេសចិន កាលពីអំឡុងថ្ងៃទី១៨ ខែមេសា ឆ្នាំ២០២១កន្លងទៅ។
ទិដ្ឋភាពដូចគ្នានេះ ក៏ត្រូវបានរកឃើញនៅលើគេហទំព័រ Financial Times ផងដែរ ដែលមិនបានជាប់ពាក់ព័ន្ធទៅនឹងការឈរទិញទឹកអប់ DIOR ដូចការអះអាងរបស់ទំព័រខាងលើនោះឡើយ។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានសរសេរបញ្ជាក់ជាភាសាអង់គ្លេស ឬប្រែសម្រួលជាភាសាខ្មែរមានន័យថា «ការវិលត្រឡប់យ៉ាងឆាប់រហ័សរបស់អតិថិជនចិន ចំពោះការប្រើប្រាស់របស់របរប្រណីត»។
Financial Times | Archived Link
ខាងក្រោមនេះ គឺជារូបថតមួយសន្លឹកផ្សេងទៀត ដែលបានចុះផ្សព្វផ្សាយដោយគេហទំព័រសារព័ត៌មាន China Daily កាលពីថ្ងៃទី៣១ ខែមករា ឆ្នាំ២០២២កន្លងទៅ ដោយបានបង្ហាញនូវទិដ្ឋភាពនៃការតម្រង់ជាជួរ របស់អតិថិជននៅខាងមុខហាង Chanel ផងដែរ។
China Daily News Report | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្ដាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ការពិត ច្បាប់ដើមនៃរូបថតមនុស្សកកកុញនេះ គឺជាទិដ្ឋភាពនៃការតម្រង់ជាជួរនៅខាងមុខហាង Chanel នៅក្នុងទីក្រុងប៉េកាំង ប្រទេសចិន កាលពីថ្ងៃទី១៨ ខែមេសា ឆ្នាំ២០២១កន្លងទៅ។
Title:មនុស្សតម្រង់ជួររង់ចាំទិញទឹកអប់ Dior នៅផ្សារអ៊ីអន គឺជារូបភាពកាត់ត
Written By: Kakada SimResult: False