លោក ផែង វណ្ណៈ ដែលជាអ្នកប្រើប្រាស់ហ្វេសប៊ុកដ៏ល្បីឈ្មោះម្នាក់ តែងតែត្រូវបានអ្នកគាំទ្រគណបក្សប្រឆាំងរិះគន់ និងប្រើប្រាស់ពាក្យមិនសមរម្យជារឿយៗ។ ក្នុងចំណោមនោះ រូបថតមួយសន្លឹក បង្ហាញទិដ្ឋភាពរបស់លោក សម្រាកព្យាបាលនៅក្នុងមន្ទីរពេទ្យមួយកន្លែង ត្រូវបានទំព័រហ្វេសប៊ុកបង្ហោះឡើង ដោយភ្ជាប់ទៅនឹងការអះអាងថាលោកបានទទួលមរណភាពហើយ។ ការអះអាងបែបនេះ ត្រូវបានអ្នកប្រើប្រាស់បញ្ចេញមតិប្រតិកម្ម និងចែកចាយជាច្រើនដងនាពេលថ្មីៗនេះ។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដែលទំព័រហ្វេសប៊ុកបង្ហោះនៅលើបណ្តាញសង្គមហ្វេសប៊ុកនោះ គឺជាមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២៤ ខែធ្នូ ឆ្នាំ២០២២ ទំព័រហ្វេសប៊ុកមួយដែលមានឈ្មោះថា «News Fast» បានចែករំលែកនូវរូបថតមួយសន្លឹក បង្ហាញទិដ្ឋភាពលោក ផែង វណ្ណៈ គេងសម្រាកនៅក្នុងមន្ទីរពេទ្យមួយកន្លែង រួមជាមួយនឹងការអះអាងថាលោក បានទទួលមរណភាពហើយ។ ការអះអាងមួយនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «ចូលរួមរំលែកទុក្ខ ផែង វណ្ណៈ RIP»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យ និងផ្ទៀងផ្ទាត់ទៅលើព័ត៌មានអះអាងខាងលើនេះ តាមរយៈព័ត៌មានថ្មីចុងក្រោយ និងការបំភ្លឺបកស្រាយរបស់លោក ផែង វណ្ណៈ ដោយផ្ទាល់។
រូបថតដែលមានទម្រង់ដូចគ្នានេះ ត្រូវបានបង្ហោះដើមនៅលើគណនីហ្វេសប៊ុកផ្លូវការរបស់លោក ផែង វណ្ណៈ កាលពីថ្ងៃទី២៣ ខែធ្នូ ឆ្នាំ២០២២ថ្មីៗនេះ ដោយពុំបានអះអាង ឬបញ្ជាក់នៅក្នុងសំណេររបស់ខ្លួនថា លោកបានទទួលមរណភាពនោះឡើយ។ ផ្ទុយទៅវិញ នៅក្នុងសំណេររបស់លោក ផែង វណ្ណៈ ខាងលើ បានបង្ហាញ និងលើកទឹកចិត្តឲ្យអ្នកប្រើប្រាស់បណ្ដាញសង្គម ត្រូវឆ្លៀតពេលពិគ្រោះជំងឺជាមួយគ្រូពេទ្យជាប្រចាំ ដើម្បីថែរក្សាសុខភាព។
ខាងក្រោមនេះ គឺជារូបភាពផ្ដាមចេញពីគណនីហ្វេសប៊ុកខាងលើ ដែលបានសរសេររៀបរាប់ថា «ជំងឺឈឺថ្កាត់មិនសំដៅលេីវ័យចាស់ ឬវ័យក្មេង មាន ឬក្រ ហេីយក៏មិនសំដៅលេីភេទ ពណ៌ សំបុរជំនឿសាសនាដែរ បេីរវល់ប្រឹងធ្វើការរកលុយដោយមិនបានពិនិត្យសុខភាពជាប្រចាំ នោះលុយរបស់អ្នកលែងមានតម្លៃហេីយនៅពេលដែលជំងឺរបស់អ្នកវិវត្តដល់ស្ថានភាពមិនអាចកែបាន»។
ខាងក្រោមនេះ គឺជាការបដិសេធ និងទាត់ចោលរបស់លោក ផែង វណ្ណៈ ទៅនឹងការបង្ហោះ និងអះអាងថាលោកបានទទួលមរណភាពហើយ។
ការអះអាងស្រដៀងគ្នាខាងលើនេះ ក៏ធ្លាប់ត្រូវបានស្ថាប័នត្រួតពិនិត្យការពិត Fact Crescendo Cambodia ផងដែរ កាលពីថ្ងៃទី១២ ខែកក្កដា ឆ្នាំ២០២២កន្លងទៅ ដោយរកឃើញថា ការអះអាងទាំងឡាយនោះ គឺមិនត្រឹមត្រូវនោះឡើយ។ សម្រាប់ព័ត៌មានលម្អិត សូមអានអត្ថបទ «រូបថតលោក ផែង វណ្ណៈ ជាប់ខ្នៅដៃ គឺជារូបភាពកាត់តតែប៉ុណ្ណោះ»។
Fact Crescendo Cambodia Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថារូបថត និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ការពិតលោក ផែង វណ្ណៈ ពុំបានទទួលមរណភាពដូចការអះអាងនោះទេ ហើយលោកទើបតែបង្ហាញខ្លួនបដិសេធកាលពីព្រឹកថ្ងៃទី២៤ ខែធ្នូ ឆ្នាំ២០២២ថ្មីៗនេះ។
Title:លោក ផែង វណ្ណៈ ពុំបានទទួលមរណភាពដូចការអះអាងនោះឡើយ
Fact Check By: Kakada SimResult: False
