វីដេអូស្វាធំ Gorilla លេងជាមួយមនុស្សមិនមែននៅតំបន់ព្រៃឡង់កម្ពុជាទេ
ខណៈដែលព្រៃឡង់កំពុងរងការគំរាមកំហែងដោយសារការកាប់ព្រៃឈើនោះ វីដេអូមួយដែលបង្ហាញស្វាធំប្រលែងលេងជាមួយមនុស្សមួយក្រុម ត្រូវបានគេបង្ហោះនៅលើបណ្ដាញសង្គមជាមួយការអះអាងថា សត្វកម្រនេះស្ថិតនៅក្នុងតំបន់ព្រៃឡង់របស់កម្ពុជា។ វីដេអូនេះ ត្រូវបានចែករំលែកព្រោងព្រាតលើបណ្ដាញសង្គម ហើយក៏មានអ្នកប្រើប្រាស់បណ្ដាញសង្គមកម្ពុជាជាច្រើនជឿតាមការអះអាងនេះ។ ទោះជាយ៉ាងណា យើងរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូមួយមានរយៈពេលជាង ១នាទីដែលបង្ហាញស្វាហ្កូរីឡាដ៏ធំទទួលចំណីពីមនុស្ស ត្រូវបានគេបង្ហោះនៅលើបណ្ដាញសង្គមជាមួយសំណេររៀបរាប់ថា ស្វានោះរស់នៅតំបន់ព្រៃឡង់ដែលជាដែនជម្រកសត្វព្រៃដ៏ធំមួយរបស់ប្រទេសកម្ពុជា។
វីដេអូមួយនេះ ទទួលបានការចូលទស្សនាដល់ទៅរាប់រយពាន់ដង និងមតិយោបល់ចម្រុះបែបយ៉ាងច្រើន បន្ទាប់ពីវាត្រូវបានបង្ហោះនៅលើបណ្ដាញសង្គម TikTok កាលពីចុងខែធ្នូកន្លងមកនេះ។
ខាងក្រោមនេះ គឺជាវីដេអូទាំងស្រុងនៅលើបណ្ដាញសង្គម TikTok ដែលមានសំណេរថា “នៅស្រុកខ្មែរយើងហ្នឹង នៅបឹងព្រៃឡង់ in Cambodia”។
វីដេអូដូចគ្នានេះ ក៏ត្រូវបានបង្ហោះនៅលើបណ្ដាញសង្គមហ្វេសប៊ុកផងដែរ ដែលនាំឱ្យមានការចែករំលែកបន្តដល់ទៅជាង ២ពាន់ដង ហើយមានការបញ្ចេញមតិយោបល់ដ៏ច្រើនពីអ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជាវីដេអូទាំងស្រុងនៃការអះអាងនោះដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០៣ ខែមករា ឆ្នាំ២០២៣ ជាមួយសំណេររៀបរាប់ថា “ប្រភពពី TikTok មិនដឹងជានៅបរទេស ឬក៏នៅស្រុកខ្មែរយើងទេ បើសិនជាមាននៅស្រុកខ្មែរយើងមិនជាល្អយ៉ាងណាទេ”។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការផ្ទៀងផ្ទាត់ដោយ Google Reverse Image Search និងការសម្ភាសប្រភពពាក់ព័ន្ធ ដែលនាំឱ្យយើងរកឃើញការពិតដូចខាងក្រោមនេះ។
វីដេអូដូចគ្នាទាំងស្រុងនេះ ត្រូវបានរកឃើញនៅក្នុងបណ្ដាញសង្គម TikTok ដែលបង្ហោះដោយគណនីអ្នកប្រើប្រាស់ TikTok ឈ្មោះ Deux Nuits Avec កាលពីថ្ងៃទី១៨ ខែធ្នូ ឆ្នាំ២០២៣កន្លងមកនេះ។ Deux Nuits Avec គឺជាបណ្ដាញសង្គមរបស់អ្នកបង្កើតមាតិកាផ្សព្វផ្សាយលើប្រព័ន្ធបណ្ដាញសង្គម។
សំណេររបស់គណនីអ្នកប្រើប្រាស់ TikTok ភ្ជាប់ជាមួយវីដេអូនេះ បានបញ្ជាក់ថា ស្វាធំ Gorilla នៅក្នុងវីដេអូនេះ ស្ថិតនៅក្នុងសាធារណរដ្ឋកុងហ្កូ (កុំច្រឡំ Republic of Congo និងប្រទេសមួយទៀតឈ្មោះថា Democratic Republic of Congo ឬហៅខ្លីថា DR Congo) ជាប្រទេសមួយស្ថិតនៅតំបន់កណ្ដាលនៃទ្វីបអាហ្វ្រិក។
ខាងក្រោមនេះ គឺជាវីដេអូទាំងស្រុងដែលបង្ហោះលើបណ្ដាញសង្គម TikTok កាលពីថ្ងៃទី១៨ ខែធ្នូ ឆ្នាំ២០២៣ ជាមួយសំណេររៀបរាប់ថា “Gorilla in Congo” ហើយបញ្ជាក់ទីតាំងនៅរដ្ឋធានី Brazzaville ដែលជារដ្ឋធានីរបស់សាធារណរដ្ឋកុងហ្កូ។
ក្រៅពីបង្ហោះនៅលើបណ្ដាញសង្គម TikTok វីដេអូដូចគ្នានេះ ក៏ត្រូវបានបង្ហោះនៅលើបណ្ដាញសង្គម Instagram កាលពីខែតុលា ឆ្នាំ២០២២ ដោយគណនីឈ្មោះ Deux Nuits Avec ដែលបង្ហោះវីដេអូជាមួសំណេររៀបរាប់ជាភាសាបារាំង។
សំណេរជាភាសាបារាំងរបស់អ្នកប្រើប្រាស់ Instagram ដដែលនេះ បានបញ្ជាក់ថា គាត់បានថតវីដេអូស្វាធំ Gorilla នេះដោយផ្ទាល់នៅសាធារណរដ្ឋកុងហ្កូ នៅពេលគាត់ធ្វើដំណើរទេសចរណ៍ទស្សនាស្វាធំ Gorilla នៅតំបន់ជម្រកសត្វព្រៃមួយ។
សំណេរររបស់អ្នកប្រើប្រាស់បណ្ដាញសង្គមដដែលនេះ បានឱ្យដឹងទៀតថា ស្វាធំ Gorilla នៅក្នុងវីដេអូនេះ ត្រូវបានគេនាំយកពីឧទ្យានថែរក្សាសត្វនៅអង់គ្លេស ឱ្យទៅរស់នៅតាមធម្មជាតិនៅតំបន់ការពារសត្វព្រៃក្នុងប្រទេសសាធារណរដ្ឋកុងហ្កូ។
ខាងក្រោមនេះ គឺជាវីដេអូទាំងស្រុងដែលបង្ហោះលើ Instagram ដោយ Deux Nuits Avec កាលពីថ្ងៃទី១៣ ខែតុលា ឆ្នាំ២០២២កន្លងមក។
Instagram Post | Archived Link
សំណេរខាងលើ បានឱ្យដឹងទៀតថា អ្នកប្រើប្រាស់ Instagram រូបនេះ បានធ្វើដំណើរទៅទស្សនាស្វាធំ Gorilla នៅសាធារណរដ្ឋកុងហ្កូតាមរយៈក្រុមហ៊ុនទេសចរណ៍ Lawanda Tours & Adventure។
ឆ្លើយតបមកកាន់ Fact Crescendo Cambodia តាមរយៈប្រព័ន្ធផ្ញើសារ WhatsApp នៅថ្ងៃនេះ សហស្ថាបនិកក្រុមហ៊ុនទេសចរណ៍ Lawanda Tours & Adventure លោក Gilles Mpion បានបញ្ជាក់ថា ស្វាធំ Gorilla នៅក្នុងវីដេអូនោះ ពិតជាស្វាធំ Gorilla នៅក្នុងប្រទេសរបស់លោក។
លោក Gilles Mpion បានឱ្យដឹងទៀតថា ស្វាធំ Gorilla នេះ កំពុងរស់នៅក្នុងដែនជម្រកសត្វព្រៃ Lesio Louna Wildlife Reserve។ ដែនជម្រកសត្វព្រៃមានទំហំ ៤៤០គីឡូម៉ែត្រក្រឡានេះ ដែលស្ថិតនៅតំបន់ភាគខាងជើងសាធារណរដ្ឋកុងហ្កូនោះ ត្រូវបានបង្កើតឡើងនៅក្នុងឆ្នាំ១៩៩៣ ក្នុងគោលបំណងការពារស្វាធំ Gorilla។
លោក Gilles Mpion បញ្ជាក់ទៀតថា លោកផ្ទាល់ជាអ្នកជូនអ្នកបង្កើតមាតិកា Deux Nuits Avec ទៅទស្សនាស្វាធំនៅក្នុងដែនជម្រកសត្វព្រៃ Lesio Louna Wildlife Reserve កាលពីខែតុលា ឆ្នាំ២០២២កន្លងមក។
ខាងក្រោមនេះ គឺជាវីដេអូទាំងស្រុងរបស់លោក Gilles Mpion និងអ្នកបង្កើតមាតិកាអនឡាញ Deux Nuits Avec ដែលបង្ហោះនៅលើទំព័រហ្វេសប៊ុកក្រុមហ៊ុន Lawanda Tours & Adventure កាលពីថ្ងៃទី២៧ ខែធ្នូ ឆ្នាំ២០២២។
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ វីដេអូប៉ុន្មានវិនាទីដែលបង្ហាញស្វាធំ Gorilla ធ្វើសកម្មភាពតបនឹងមនុស្សមួយក្រុមនេះ មិនមែនថតនៅក្នុងតំបន់ព្រៃឡង់របស់កម្ពុជានោះឡើយ។ ការពិត ស្វាធំ Gorilla វីដេអូនេះ កំពុងរស់នៅក្នុងតំបន់ជម្រកសត្វព្រៃ Lesio Louna Wildlife Reserve ស្ថិតក្នុងសាធារណរដ្ឋកុងហ្កូ។
Title:វីដេអូស្វាធំ Gorilla លេងជាមួយមនុស្សមិនមែននៅតំបន់ព្រៃឡង់កម្ពុជាទេ
Written By: Jay UdomResult: False