- >>
- FALSE
បុរសម្នាក់ត្រូវបាននគរបាលចាប់ខ្លួន ក្រោយនិយាយលើបណ្ដាញសង្គមប៉ះពាល់ស្ដេច
បន្ទាប់ពីការបោះឆ្នោតជាតិ ២៣ កក្កដា បានបញ្ចប់ទៅ ការអះអាងមួយបានលើកឡើងថា បុរសម្នាក់ត្រូវបានសមត្ថកិច្ចនៅខេត្តកំពង់ស្ពឺចាប់ខ្លួន ដោយសារតែបានទទួលលុយពីនមេដឹកនាំបក្សប្រឆាំងនៅឯក្រៅប្រទេស។ ការអះអាងនេះ ត្រូវបានចែករំលែកជាច្រើនដង បន្ទាប់ពីលោកនាយករដ្ឋមន្ត្រី ហ៊ុន សែន បានព្រមានចាប់ខ្លួនបុគ្គលដែលគូសសន្លឹកចោល ប្រសិនបើពួកគេមិនចេញសារភាពទេនោះ។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលកំពុងផុសផុលនៅលើបណ្ដាញសង្គម បានលើកឡើងថា បុរសម្នាក់នៅឯខេត្តកំពង់ស្ពឺ ត្រូវបានសមត្ថកិច្ចចាប់ខ្លួនដាក់ពន្ធនាគារ បន្ទាប់ពីទទួលលុយពីលោក សម រង្ស៊ី មេដឹកនាំបក្សប្រឆាំងដែលកំពុងរស់នៅឯក្រៅប្រទេស។
ការអះអាងនេះ ក៏បានបង្ហោះមកជាមួយនូវរូបថតរបស់បុរសរូបនោះមានឈ្មោះ ស្វាយ សុផាត ដែលដៃរបស់គាត់ជាប់ខ្នោះ និងឈរនៅកន្លែងវាស់កម្ពស់។
ការអះអាងនេះ ត្រូវបានចែករំលែកបន្តជាច្រើនដង មានការបញ្ចេញមតិផ្សេងៗ និងប្រតិកម្មចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃចន្ទដើមសប្ដាហ៍នេះ ដែលរៀបរាប់ថា «លុយរបស់អាក្បត់ជាតិបីជំនាន់ សម រង្ស៊ី ផ្ដល់ឱ្យទៅបុគ្គលម្នាក់នេះឱ្យចូលដេកគុក ហើយក៏ជាជោគជ័យមួយទៀតរបស់ទណ្ឌិតក្បត់ជាតិបីជំនាន់សម្រាប់ការបោះឆ្នោតឆ្នាំ២០២៣នេះ 
រូបថតបុរសរូបនេះដែលមានសំណេរថា«ទទួលលុយពីជនអគតិលុយ ១៥០០០០០» ក៏ត្រូវបានបង្ហោះ និងចែករំលែកនៅក្នុងក្រុមបណ្ដាញសង្គមផងដែរ។
ការត្រួតពិនិតុ្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការដំណើរការ Google Reverse Image Search ការស្នើសុំការបញ្ជាក់ពីនគរបាល និងអ្នកបានបង្ហោះការអះអាងខាងលើនេះ ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reserve Image Search យើងបានរកឃើញអត្ថបទព័ត៌មានចុះផ្សាយដោយសារព័ត៌មានក្នុងស្រុកCEN ពាក់ព័ន្ធនឹងការចាប់ខ្លួនបុរសម្នាក់នៅឯខេត្តកំពង់ស្ពឺ កាលពីរសៀលថ្ងៃសៅរ៍សប្ដាហ៍មុន ឬមួយថ្ងៃមុនការបោះឆ្នោតថ្ងៃអាទិត្យ ២៣ កក្កដា ឆ្នាំ២០២៣។
បើតាមការចុះផ្សាយរបស់សារព័ត៌មានមួយនេះដែលផ្អែកតាមសមត្ថកិច្ចខេត្តកំពង់ស្ពឺនោះ បុរសម្នាក់ឈ្មោះ ស្វាយ សុផាត ដែលមានតួនាទីជាអ្នកសារព័ត៌មានមួយរូបផងនោះ ត្រូវបាននគរបាលខេត្តកំពង់ស្ពឺ ចាប់ខ្លួននៅរសៀលថ្ងៃទី២២ ខែកក្កដា បន្ទាប់ពីគាត់បានបង្ហោះវីដេអូខ្លួនឯងដែលនិយាយប៉ះពាល់ដល់ព្រះមហាក្សត្រ។
ទំព័រហ្វេសប៊ុកស្នងការដ្ឋាននគរបាលខេត្តកំពង់ស្ពឺ ក៏បានផ្សព្វផ្សាយអំពីការចាប់ខ្លួនបុរសរូបនេះផងដែរ ដោយសង្ស័យថាបានបង្ហោះព័ត៌មាន«ញុះញង់ បង្កចលាចល និងប៉ះពាល់ដល់ព្រះមហាក្សត្រកម្ពុជា» កាលពីយប់ថ្ងៃសៅរ៍សប្ដាហ៍មុន។
ខាងក្រោមនេះ គឺជាខ្លឹមសារទាំងស្រុងនៃរបាយការណ៍របស់នគរបាលខេត្តកំពង់ស្ពឺ ដែលផ្សព្វផ្សាយលើទំព័របណ្ដាញសង្គមហ្វេសប៊ុកកាលពីថ្ងៃទី២២ ខែកក្កដា ឆ្នាំ២០២៣។
រូបថតដែលបង្ហោះនៅលើបណ្ដាញសង្គមដោយទំព័រហ្វេសប៊ុកស្នងការដ្ឋាននគរបាលខេត្តកំពង់ស្ពឺ បានបង្ហាញថា លោក ស្វាយ សុផាត បានបង្ហោះវីដេអូមានរយៈពេល ១:៤៦នាទីដែលបង្ហោះនៅលើគណនីហ្វេសប៊ុកឈ្មោះ សឹម ផាន។ សូមមើលវីដេអូខាងក្រោមនេះ
នៅពេលត្រូវបានស្នើសុំការបញ្ជាកពី Fact Crescendo Cambodia លោក ញូង សារឿន ទទួលស្គាល់ថា លោកពិតជាបានបង្ហោះការអះអាងនោះនៅលើគណនីហ្វេសប៊ុករបស់លោក ប៉ុន្តែ លោកគ្មានប្រភពច្បាស់លាស់នោះឡើយទាក់ទងនឹងលុយដែលលោក ស្វាយ សុផាត កាន់នោះ។
ប៉ុន្តែ ស្នងការនគរបាលខេត្តកំពង់ស្ពឺ លោក សម សាមួន បានប្រាប់ Fact Crescendo Cambodia ថា ការអះអាងដោយអ្នកប្រើប្រាស់ហ្វេសប៊ុកឈ្មោះ ញូង សារឿន ដែលថា លោក ស្វាយ សុផាត បានទទួលលុយពីមេបក្សប្រឆាំងនោះ មិនមែនជាការពិតនោះឡើយ។
កម្ពុជាបានរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៧កាលពីថ្ងៃអាទិត្យចុងសប្ដាហ៍កន្លងមកនេះ ដោយគណបក្សភ្លើងទៀនដែលជាបក្សប្រឆាំងដ៏ធំនៅកម្ពុជា មិនត្រូវបានអនុញ្ញាតឱ្យចូលរួមប្រកួតប្រជែងនោះឡើយ។
ក្រុមមេដឹកនាំបក្សប្រឆាំង លោក សម រង្ស៊ី និងថ្នាក់ដឹកនាំជាន់ខ្ពស់ដទៃទៀតដែលកំពុងរស់នៅឯក្រៅប្រទេស បានអំពាវនាវអ្នកបោះឆ្នោតឱ្យគូសសន្លឹកឆ្នោតចោល ដើម្បីបង្ហាញការជំទាស់ទៅនឹងការបោះឆ្នោតនេះ។
បន្ទាប់ពីការបោះឆ្នោតហើយ លោកនាយករដ្ឋមន្ត្រី ហ៊ុន សែន បានបញ្ជាក់ថា លោកបានស្គាល់អត្តសញ្ញាណអ្នកគូសសន្លឹកឆ្នោតចោលមួយចំនួនដែលបានផ្ញើសន្លឹកឆ្នោតខូចទៅក្នុងក្រុមតេឡេក្រាម ហើយលោកណែនាំឱ្យពួកគេចេញសារភាពកំហុស ប្រសិនបើមិនចង់ប្រឈមមុខនឹងការចាប់ខ្លួន។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ លោក ស្វាយ សុផាត ដែលមានតួនាទីជាអ្នកសារព័ត៌មានមួយរូបនោះ ត្រូវបានសមត្ថកិច្ចចាប់ខ្លួន បន្ទាប់ពីគាត់បាននិយាយនៅក្នុងវីដេអូបង្ហោះលើបណ្ដាញសង្គមកាលពីថ្ងៃសៅរ៍សប្ដាហ៍មុន ដែលនគរបាលខេត្តកំពង់ស្ពឺចាត់ទុកជាការញុះញង់ និងប្រមាថព្រះមហាក្សត្រ។
Title:បុរសម្នាក់ត្រូវបាននគរបាលចាប់ខ្លួនក្រោយទទួលលុយពីមេបក្សប្រឆាំងដើម្បីអុកឡុកការបោះឆ្នោត
Written By: Jay UdomResult: False
