- >>
- FALSE
ផ្ទាំងប៉ាណូធ្លាក់លើរថយន្តនៅតាមដងផ្លូវមួយជាហេតុការណ៍កើតឡើងនៅបរទេស
ស្របពេលផ្នែកមួយចំនួននៅប្រទេសកម្ពុជា មានភ្លៀងធ្លាក់ និងខ្យល់បក់ខ្លាំងតាមតំបន់នោះ វីដេអូឃ្លីបមួយដែលបង្ហាញ ការបាក់រលំផ្ទាំងប៉ាណូមួយ ត្រូវបានបង្ហោះលើបណ្ដាញសង្គមជាមួយការអះអាងថា ករណីមួយនេះកើតឡើងនៅខេត្តស្វាយរៀង ស្ថិតនៅភាគអាគ្នេយ៍នៃប្រទេសកម្ពុជា។ ការអះអាងភ្ជាប់ដោយវីដេអូខាងលើ ត្រូវបានចែកចាយបន្ដជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា វីដេអូនេះត្រូវបានបង្ហោះដោយភ្ជាប់ជាមួយព័ត៌មានមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយ ដែលបង្ហាញផ្ទាំងប៉ាណូបាក់ធ្លាក់សង្កត់រថយន្តនៅតាមដងផ្លូវមួយកន្លែង ត្រូវបានគេបង្ហោះនៅលើបណ្ដាញសង្គមហ្វេសប៊ុកជាមួយការអះអាងថា ហេតុការណ៍ដ៏គ្រោះថ្នាក់នេះ បានកើតឡើងនៅឯខេត្តស្វាយរៀង ប្រទេសកម្ពុជា។
វីដេអូឃ្លីបដែលមានសំណេរបែបនេះ ត្រូវបានចែករំលែកបន្ដជាច្រើនដង រួមជាមួយការបញ្ចេញមតិយោបល់ និងប្រតិកម្មចម្រុះបែបពីអ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជាវីដេអូឃ្លីបទាំងស្រុងត្រូវបានបង្ហោះនៅលើបណ្ដាញសង្គមជាមួយសំណេររៀបរាប់ថា «ករណីរលំផ្លាកប៉ាណូ នៅខេត្តស្វាយរៀង តើបងប្អូនមានអារម្មណ៍បែបណា ពេលឃើញវីដេអូរន្ធត់បែបនេះ»។
ការអះអាងដដែលនេះ ត្រូវបានបង្ហោះ និងចែករំលែកបន្ដទៅកាន់អ្នកប្រើប្រាស់ដទៃទៀតផងដែរ។ សូមមើលការអះអាងនេះ តាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived) និងតំណភ្ជាប់មួយទៀតមាននៅទីនេះ (archived)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
យើងបានរកឃើញវីដេអូឃ្លីបដូចគ្នាជាច្រើន បង្ហាញទិដ្ឋភាពនៃការធ្លាក់រលំផ្ទាំងប៉ាណូមួយខាងលើនេះ ហើយត្រូវបានបង្ហោះនៅលើបណ្ដាគេហទំព័រ និងសារព័ត៌មានជាច្រើន។
វីដេអូបង្ហាញទិដ្ឋភាពផ្ទាំងប៉ាណូធ្លាក់លើយានយន្តនៅតាមដងផ្លូវនេះ ត្រូវបានរកឃើញ និងផ្សព្វផ្សាយនៅលើគេហទំព័រ La FM ដែលជាគេហទំព័រវិទ្យុក្នុងស្រុកមួយរបស់ប្រទេសកូឡុំប៊ី កាលពីថ្ងៃទី១៩ ខែកក្កដា ឆ្នាំ២០២៣កន្លងទៅ មិនបានកើតឡើងនៅក្នុងខេត្តស្វាយរៀង ដូចការអះអាងនោះឡើយ។
ខាងក្រោម គឺជារូបភាពផ្ដាមចេញពីគេហទំព័រខាងលើ ដែលបានសរសេរជាភាសាអេស្ប៉ាញ ដែលប្រែសម្រួលជាភាសាខ្មែរ តាមរយៈកម្មវិធីបកប្រែ Google Translate មានន័យថា «ទិដ្ឋភាពនៃការរលំធ្លាក់ផ្ទាំងប៉ាណូដ៏រន្ធត់ បានកើតឡើងនៅ Quindio ប្រទេសកូឡុំប៊ី កាលពីថ្ងៃទី១៩ ខែកក្កដា ដោយពុំបង្កឱ្យមានជនរងគ្រោះដល់អាយុជីវិតនោះឡើយ»។
ដូចគ្នានេះ ហេតុការណ៍ខាងលើ ក៏ត្រូវបានផ្សព្វផ្សាយដោយគេហទំព័រវិទ្យុព័ត៌មាន Blu Radio ផងដែរកាលពីប៉ុន្មានថ្ងៃចុងក្រោយ។ គេហទំព័រដដែលខាងលើ បានបញ្ជាក់ថា ហេតុការណ៍នេះ បានកើតឡើងនៅ Quindio ប្រទេសកូឡុំប៊ី ដោយសារតែមានខ្យល់បក់ខ្លាំង។
Blu Radio Link | Archived Link
ខាងក្រោមនេះ គឺជាវីដេអូរាយការណ៍ព័ត៌មានពីទូរទស្សន៍ជាតិកូឡុំប៊ី Canal 1 កាលពីថ្ងៃទី២២ ខែកក្កដា ឆ្នាំ២០២៣កន្លងទៅ ដែលបានបញ្ជាក់ថា ករណីនេះបានកើតឡើងនៅ Quindio ប្រទេសកូឡុំប៊ី។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបនេះ គឺជាទិដ្ឋភាពនៃការដួលរលំផ្ទាំងប៉ាណូ នៅ Quindio ប្រទេសកូឡុំប៊ី កាលពីថ្ងៃទី១៩ ខែកក្កដា ឆ្នាំ២០២៣កន្លងទៅ ដោយពុំបង្កឱ្យមានជនរងគ្រោះដល់អាយុជីវិតនោះឡើយ។
Title: ផ្ទាំងប៉ាណូធ្លាក់លើរថយន្តនៅតាមដងផ្លូវមួយជាហេតុការណ៍កើតឡើងនៅបរទេស
Written By: Kakada SimResult: False
