តើព្រះតេជគុណ ប៊ុត ប៊ុនតិញ ធ្លាក់ខ្លួនជាអ្នកដឹកខ្សែលក់តាមភូមិមែនឬទេ?

ខណៈដែលព្រះសង្ឃព្រះនាម ប៊ុត ប៊ុនតិញ គង់នៅវត្តភ្នំសេរីនៅឯប្រទេសស្វីសនោះ រូបថតមួយសន្លឹកត្រូវបានបង្ហោះនៅលើបណ្ដាញសង្គមហ្វេសប៊ុក ក្នុងន័យថា ព្រះសង្ឃអង្គនេះបានធ្លាក់ខ្លួនជាអ្នកលក់ខ្សែនីឡុងតាមដងផ្លូវ។ រូបថតនេះ ត្រូវបានអ្នកប្រើប្រាស់បណ្ដាញសង្គមចែករំលែកបន្តជាច្រើនដង រួមជាមួយការបញ្ចេញមតិចម្រុះបែបផងដែរ។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia រកឃើញថា រូបថតមួយសន្លឹកនេះ ត្រូវបានកាត់ត។

ការអះអាងលើបណ្ដាញសង្គម

រូបថតមួយសន្លឹកដែលបង្ហាញសកម្មជនគាំទ្រគណបក្សសង្គ្រោះជាតិ ព្រះតេជគុណ ប៊ុត ប៊ុនតិញ បណ្ដើរកង់ដឹកសម្ភារៈផ្សេងៗលក់នៅតាមដងផ្លូវ ត្រូវបានបង្ហោះនៅលើបណ្ដាញសង្គមកាលពីដើមសប្ដាហ៍នេះ។ រូបថតនេះ បង្ហាញថា ព្រះតេជគុណ ប៊ុត ប៊ុនតិញ បានធ្លាក់ខ្លួនទៅជាអ្នកលក់ខ្សែតាមកង់នៅតាមភូមិនានា។

រូបថតមួយសន្លឹកនេះ ត្រូវបានអ្នកប្រើប្រាស់បណ្ដាញសង្គមចែករំលែកបន្តជាច្រើនដង រួមជាមួយការបញ្ចេញមតិផ្សេងៗ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីការបង្ហោះរូបថតនៅលើបណ្ដាញសង្គម ដែលមានសំណេរថា «ទំនិញនាំចូលពី Cambodia 100%»។

Facebook Post | Archived Link

រូបថតដដែលនេះ ក៏ត្រូវបានគេចែករំលែកទៅកាន់ក្រុមបណ្ដាញសង្គមហ្វេសប៊ុកដែលមានគណនីហ្វេសប៊ុករាប់សែនជាសមាជិកនៅក្នុងក្រុមផងដែរ។

Facebook Post | Archived Link

Fact Check

Fact Crescendo Cambodia បានផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

រូបថតដែលបង្ហាញបុរសម្នាក់ដឹកសម្ភារៈផ្សេងៗតាមកង់មួយគ្រឿងនោះ ត្រូវបានរកឃើញនៅបង្ហោះនៅលើទំព័រហ្វេសប៊ុករបស់អ្នកថតរូបឈ្មោះ Phanith Um កាលពីថ្ងៃព្រហស្បតិ៍សប្ដាហ៍មុន។

ព័ត៌មានអំពីរូបថតមួយសន្លឹកដែលបង្ហោះដោយអ្នកថតរូបខាងលើ បានឱ្យដឹងថា បុរសម្នាក់បណ្ដើរកង់មួយគ្រឿងផ្ទុកទៅដោយខ្សែជាច្រើន ដើម្បីយកទៅលក់បន្ត។

បើតាមព័ត៌មានបង្ហោះដោយទំព័រហ្វេសប៊ុកខាងលើនេះ រូបថតបុរសម្នាក់នេះ ត្រូវបានថតនៅឯទឹកដីខេត្តកំពង់ចាម ដោយប្រើម៉ាស៊ីនថត LUMIX S1។

Facebook Post | Archived Link

ខាងក្រោមនេះ គឺជាការប្រៀបធៀបរវាងរូបថតដែលត្រូវបានអះអាងថា ជាព្រះតេជគុណ ប៊ុត ប៊ុនតិញ និងរូបថតច្បាប់ដើមដែលត្រូវបានបង្ហោះដោយអ្នកថតរូប Phanith Um កាលពីថ្ងៃទី០៦ ខែតុលា។

សន្និដ្ឋាន

Fact Crescendo Cambodia រកឃើញថា រូបថតដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ បុរសនៅក្នុងរូបថតមួយសន្លឹកនេះ មិនមែនជាព្រះតេជគុណ ប៊ុត ប៊ុនតិញ នោះឡើយ។ រូបថតច្បាប់ដើម បង្ហាញឱ្យឃើញបុរសម្នាក់ដឹកខ្សែជាច្រើនតាមកង់មួយគ្រឿង ដើម្បីលក់បន្ត ហើយរូបថតមួយសន្លឹកនេះ ត្រូវបានថតនៅឯទឹកដីខេត្តកំពង់ចាម។