បន្ទាប់ពីឈុតឆាតសម្ដែងភាពយន្តបែបស្រើបស្រាលរបស់ក្រុមហ៊ុន Sastra Film ត្រូវបានចែកចាយព្រោងព្រាតលើបណ្ដាញសង្គមមក ទំព័រហ្វេសប៊ុកមួយ បានបង្ហោះការអះអាងមួយថា នាយិកាក្រុមហ៊ុនផលិតភាពយន្តមួយនេះ និយាយថា អ្នកស្រីចង់ឃើញភាពយន្តស្រើបស្រាលរីកលូតលាស់ប្រកួតប្រជែងជាមួយភាពយន្តបរទេស។ ការបង្ហោះខ្លឹមសារនេះ ត្រូវបានអ្នកប្រើប្រាស់បណ្ដាញសង្គមនិយាយភាសាខ្មែរចែករំលែកបន្តព្រោងព្រោត ហើយក៏ទទួលបានមតិរិះគន់យ៉ាងច្រើនផងដែរ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ខ្លឹមសារដែលត្រូវបានបង្ហោះលើបណ្ដាញសង្គមនោះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា ថ្នាក់ដឹកនាំក្រុមហ៊ុនផលិតភាពយន្តក្នុងស្រុកមួយ ចង់ឃើញឧស្សាហកម្មភាពយន្តស្រើបស្រាល ឬភាពយន្ត ១៨បូក អាចឈរជើងប្រកួតប្រជែងនឹងភាពយន្តអន្តរជាតិ និងស្នើមហាជនកម្ពុជា ឱ្យលើកស្ទួយឧស្សាហកម្មភាពយន្តមួយប្រភេទនេះ។
ការបង្ហោះនូវការនេះបែបនេះ ទទួលបានការចែករំលែកយ៉ាងព្រោងព្រាតនៅលើបណ្ដាញសង្គមហ្វេសប៊ុក ខណៈដែលអ្នកប្រើប្រាស់បណ្ដាញសង្គមនិយាយភាសាខ្មែរជាច្រើន បានបញ្ចេញមតិយោបល់ចម្រុះបែប និងប្រតិកម្មផ្សេងៗផងដែរ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គម ដែលរៀបរាប់ថា «អ្នកនាង ប៊ុន ចាន់និមល ម្ចាស់ផលិតកម្ម Sastra Film មានក្ដីស្រម៉ៃចង់ឱ្យវិស័យភាពយន្ត 18+ខ្មែរ ប្រកួតប្រជែងជាមួយភាពយន្តបរទេសលើឆាកអន្តរជាតិ។ ហើយជាពិសេសអ្នកនាងបានសំណូមពរឱ្យមហាជនខ្មែរ កុំជាន់ពន្លិចភាពយន្តខ្មែរខ្លួនឯង ហើយទៅគាំទ្រភាពយន្តជប៉ុន»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការស្វែងរកការបកស្រាយពីតំណាងក្រុមហ៊ុនផលិតភាពយន្ត Sastra Film ដែលនាំឱ្យយើងរកឃើញការពិតដូចខាងក្រោមនេះ។
ទំព័រហ្វេសប៊ុកក្រុមហ៊ុន Sastra Film បានច្រានចោលនូវការផ្សព្វផ្សាយនៅលើបណ្ដាញសង្គម ដោយនិយាយថា ទំព័រហ្វេសប៊ុក Khmer Thmey បានផ្សព្វផ្សាយខ្លឹមសារ«ក្លែងក្លាយ»។
ក្រុមហ៊ុនផលិតភាពយន្តមួយនេះ បានបញ្ជាក់ទៀតថា ខ្លឹមសារដែលផ្សព្វផ្សាយនៅលើបណ្ដាញសង្គមនោះ គ្មានប្រភពច្បាស់លាស់នោះឡើយ។
សូមមើលខ្លឹមសារទាំងស្រុងនៃសេចក្ដីជូនដំណឹងរបស់ក្រុមហ៊ុន Sastra Film ដែលបានផ្សព្វផ្សាយនៅលើទំព័រហ្វេសប៊ុករបស់ខ្លួនកាលពីថ្ងៃទី១៦ ខែធ្នូ។
នាយិកាប្រតិបត្តិនៃក្រុមហ៊ុន Sastra Film អ្នកស្រី ប៊ុន ចាន់និមល បានបកស្រាយនៅលើបណ្ដាញសង្គមផ្ទាល់ខ្លួនរបស់អ្នកស្រីផងដែរកាលពីសុក្រសប្ដាហ៍មុន ដោយបានច្រានចោលនូវខ្លឹមសារផ្សព្វផ្សាយលើបណ្ដាញសង្គមផងដែរ។
Fact Crescendo Cambodia បានស្នើសុំការបកស្រាយបន្ថែមពីខាងក្រុមហ៊ុន Sastra Film ផងដែរ ប៉ុន្តែ ខាងក្រុមហ៊ុនបានបដិសេធបកស្រាយបន្ថែម ហើយប្រាប់ឱ្យយោងទៅតាមការបកស្រាយរបស់អ្នកស្រី ចាន់និមល នៅលើបណ្ដាញសង្គម។
ក្នុងវីដេអូជាង ៣នាទី អ្នកស្រី ចាន់និមល បាននិយាយទាំងខ្សឹបខ្សួលថា ខ្លឹមសារដែលផ្សព្វផ្សាយដោយទំព័រហ្វេសប៊ុក Khmer Thmey បានធ្វើឱ្យប៉ះពាល់ផ្លូវអារម្មណ៍របស់អ្នកស្រី ហើយអ្នកស្រីទាមទារឱ្យទំព័រហ្វេសប៊ុកមួយនេះលុបចោលនូវខ្លឹមសារមួយនេះ។
ក្រុមហ៊ុន Sastra Film ក៏បានចេញសេចក្ដីស្រាយបំភ្លឺមួយផងដែរកាលពីថ្ងៃព្រហស្បតិ៍សប្ដាហ៍មុន ដោយឱ្យដឹងថា ខ្សែភាពយន្តរឿង «ស្នេហាល្ងង់+ល្ងង់» ត្រូវបានដាក់បញ្ចាំងតាំងពីចុងឆ្នាំ២០២១កន្លងមកនោះ។ ក្រុមហ៊ុនបានបញ្ជាក់ទៀតថា ខ្សែភាពយន្តមួយនេះដែលមានឈុតឆាតស្នេហារួមរ័ក្សផងនោះ ត្រូវបានដាក់ឱ្យទស្សនាតែនៅលើ App របស់ក្រុមហ៊ុនតែប៉ុណ្ណោះ ហើយថា ខ្សែភាពយន្តនេះបើកឱ្យទស្សនាបានសម្រាប់តែមនុស្សមានវ័យចាប់ពី ១៨ឆ្នាំឡើងតែប៉ុណ្ណោះ។
សន្និដ្ឋាន
Fact Crescendo Cambodia រកឃើញថា ខ្លឹមសារផ្សព្វផ្សាយលើបណ្ដាញសង្គមដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ក្រុមហ៊ុនផលិតភាពយន្តកម្ពុជា Sastra Film បញ្ជាក់ថា ខ្លឹមសារផ្សព្វផ្សាយដោយទំព័រហ្វេសប៊ុក Khmer Thmey គឺជាព័ត៌មានក្លែងក្លាយ ហើយក្រុមហ៊ុនចាត់ទុកការផ្សព្វផ្សាយដោយមិនត្រឹមត្រូវបែបនេះ ធ្វើឱ្យប៉ះពាល់ដល់កិត្តិយសរបស់ក្រុមហ៊ុន។
Title:ក្រុមហ៊ុន Sastra Film ច្រានចោលព័ត៌មានលើបណ្ដាញសង្គមជុំវិញការផលិតរឿង១៨បូក
Fact Check By: Jay UdomResult: Misleading
