ខណៈដែលកម្ពុជាកាន់តែខិតជិតដល់ការបោះឆ្នោតជាតិនៅថ្ងៃទី២៣ ខែកក្កដាហើយនោះ ឥស្សរជនជាន់ខ្ពស់នៃគណបក្សកាន់អំណាចមួយចំនួន បានក្លាយទៅជាប្រធានបទនៃការជជែក និងការអះអាងនានានៅលើបណ្ដាញសង្គម។
ក្នុងនោះ វីដេអូមួយដែលបង្ហាញសមាជិកព្រឹទ្ធសភា លោក ម៉ុង ឫទ្ធី ជូតទឹកភ្នែកអំឡុងពេលអង្គុយស្ដាប់ប្រសាសន៍លោកនាយករដ្ឋមន្ត្រី ហ៊ុន សែន និយាយអំពីបញ្ហាព្រំដែនជាមួយប្រទេសវៀតណាមនោះ ត្រូវបានគេបង្ហោះលើបណ្ដាញសង្គម ហើយរៀបរាប់ថា ឧកញ៉ា ម៉ុង ឫទ្ធី បង្ហាញអការស្ដាយទឹកដីក្រោយស្ដាប់លឺដូច្នេះ។ វីដេអូនេះ កំពុងទទួលបានការចាប់អារម្មណ៍ខ្លាំងពីសំណាក់អ្នកប្រើប្រាស់បណ្ដាញសង្គមរយៈពេលប៉ុន្មានថ្ងៃកន្លងមកនេះ។ ទោះជាយ៉ាងណា ការផ្ទៀងផ្ទាត់របស់យើង បានរកឃើញថា ការអះអាងទៅលើវីដេអូនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូមួយមានរយៈពេល ១នាទី ដែលបង្ហាញសមាជិកព្រឹទ្ធសភា លោក ម៉ុង ឫទ្ធី យកដៃជូនភ្នែកអំឡុងពេលអង្គុយស្ដាប់លោកនាយករដ្ឋមន្ត្រី ហ៊ុន សែន ថ្លែងអំពីបញ្ហាខ្សែបន្ទាត់ព្រំដែនជាមួយវៀតណាមនោះ ត្រូវបានបង្ហោះនៅលើបណ្ដាញសង្គមក្នុងរយៈពេលប៉ុន្មានថ្ងៃចុងក្រោយនេះ។
វីដេអូនោះ ត្រូវបានគេអះអាងថា លោក ម៉ុង ឫទ្ធី ដែលមានងារជាឧកញ៉ាមួយរូបផងនោះ បានសម្ដែងការសោកស្ដាយចំពោះជាតិមាតុភូមិ ក្រោយពីលោកបានស្ដាប់លឺលោក ហ៊ុន សែន ថ្លែងពីជម្រើសកាត់ភូមិកំណើតរបស់ប្រធានសភាលោក ហេង សំរិន ទៅឱ្យប្រទេសវៀតណាមនៅក្នុងដំណើរការគូសខ្សែបន្ទាត់រវាងប្រទេសទាំងពីរ។
វីដេអូជាមួយនឹងការអះអាងបែបនេះ ត្រូវបានចែករំលែកបន្តព្រោងព្រាតនៅលើបណ្ដាញសង្គម និងមានការបញ្ចេញមតិចម្រុះបែបផងដែរនៅក្នុងរយៈពេលប៉ុន្មានថ្ងៃចុងក្រោយនេះ។
ខាងក្រោមនេះ គឺជាវីដេអូដែលបានផ្ដាមចេញពីបណ្ដាញសង្គមជាមួយសំណេររៀបរាប់ថា «ឧកញ៉ា ម៉ុង ឫទ្ធី ជូតទឹកភ្នែកស្ដាយទឹកដីខ្មែរ ពេលលឺលោក ហ៊ុនសែន និយាយថា ភូមិកំណើតលោក ហេង សំរិន ស្ថិតក្នុងប្រទេសវៀតណាម។ ឧកញ៉ា ម៉ុង ឫទ្ធី ធ្លាប់ហៅលោកបណ្ឌិត សុខ ទូច ថាជាបណ្ឌិតក្រៀវជ្រូកព្រោះលោកបណ្ឌិត សុខ ទូច គ្មានជំនាញខាងព្រំដែន ប៉ុន្តែ បែរជាបកស្រាយរឿងព្រំដែនការពាររដ្ឋាភិបាលទៅវិញ»។
វីដេអូដដែលនេះ ក៏ត្រូវបានបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកដទៃទៀតដែរនៅក្នុងរយៈពេលប៉ុន្មានកន្លងមកថ្មីៗនេះ។
ខាងក្រោមនេះ គឺជាវីដេអូដែលបង្ហោះដោយអ្នកប្រើប្រាស់ហ្វេសប៊ុកមួយ ដែលទទួលបានការចែករំលែកបន្តដល់ទៅរាប់ពាន់ដង និងមានការបញ្ចេញមតិចម្រុះបែបផងដែរ។
សម្រាប់វីដេអូដដែលនេះ ដែលត្រូវបានបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកដទៃទៀត សូមចូលទៅមើលតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ។
វីដេអូដដែលនេះ ក៏ត្រូវបានបង្ហោះព្រោងព្រាតនៅលើបណ្ដាញសង្គម Tik Tok ផងដែរនៅក្នុងរយៈពេលប៉ុន្មានថ្ងៃកន្លងមកថ្មីៗនេះ។
ខាងក្រោមនេះ គឺជាវីដេអូដែលទទួលបានការចាប់អារម្មណ៍ខ្លាំងជាងគេនៅលើបណ្ដាញសង្គម Tik Tok នៅក្នុងរយៈពេលប៉ុន្មានចុងក្រោយនេះ។
សូមមើលវីដេអូនោះតាមរយៈតំណភ្ជាប់មាននៅទីនេះ ឬតំណភ្ជាប់មួយទៀតមាននៅទីនេះ ឬតំណភ្ជាប់មួយទៀតនៅទីនេះ ឬតំណភ្ជាប់មួយទៀតនៅទីនេះ។
ការត្រួតពិនិតុ្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការស្នើសុំការបញ្ជាក់ពីសាមីបុគ្គលដែលត្រូវបានលើកឡើងនៅក្នុងការអះអាងខាងលើនេះ។ ជាលទ្ធផល យើងបានរកឃើញការពិតដូចខាងក្រោមនេះ។
ស្ថាប័នផ្ទៀងផ្ទាត់ព័ត៌មានក្លែងក្លាយ Fact Crescendo បានស្នើសុំការបញ្ជាក់ពីសមាជិកព្រឹទ្ធសភា លោក ម៉ុង ឫទ្ធី កាលពីថ្ងៃម្សិលមិញនេះតាមរយៈការផ្ញើសារទៅកាន់បណ្ដាញសង្គមតេឡេក្រាមរបស់លោក ហើយលោកក៏បានឆ្លើយតបមកវិញផងដែរ។
បើទោះជាលោកមិនបានបញ្ជាក់មកកាន់ Fact Crescendo ដោយផ្ទាល់ លោក ម៉ុង ឫទ្ធី បានបង្ហោះការបកស្រាយរបស់លោកនៅលើទំព័រហ្វេសប៊ុករបស់កាលពីថ្ងៃម្សិលមិញនេះ។
លោក ម៉ុង ឫទ្ធី បានសរសេររៀបរាប់ថា វីដេអូនោះ ត្រូវបានគេយកទៅបញ្ចូលអក្សរដើម្បី«ញុះញង់» និងយកចំណេញផ្នែកនយោបាយតែប៉ុណ្ណោះ ខណៈដែលកម្ពុជាខិតជិតដល់ការបោះឆ្នោតសកល។
សមាជិកព្រឹទ្ធសភាបក្សកាន់អំណាចរូបនេះ បានបញ្ជាក់ថា លោកបានយកដៃជូតភ្នែក ដោយសារលោកឈឺភ្នែក និងចាញ់ពន្លឺថ្ងៃបណ្ដាលឱ្យហូរទឹកភ្នែក។
ខាងក្រោមនេះ គឺជារូបភាពផ្ដាមចេញពីការបកស្រាយរបស់លោក ម៉ុង ឫទ្ធី នៅលើទំព័រហ្វេសប៊ុកផ្លូវការរបស់លោកកាលពីថ្ងៃទី១២ ខែកក្កដា ឆ្នាំ២០២៣។
លោក ម៉ុង ឫទ្ធី បានចូលរួមអង្គុយនៅលើវេទិកាកិត្តិយសនៅខាងក្រោយលោកនាយករដ្ឋមន្ត្រី ហ៊ុន សែន នៅក្នុងពិធីសម្ពោធសួនទឹកឯកជនមួយនៅក្នុងខណ្ឌជ្រោយចង្វា ក្នុងរាជធានីភ្នំពេញកាលពីខែសីហា ឆ្នាំ២០២០កន្លងមក។
ថ្លែងក្នុងពិធីនោះ លោក ហ៊ុន សែន បាននិយាយដល់ការគូសវាស់បន្ទាត់ព្រំដែនកម្ពុជាជាមួយប្រទេសវៀតណាម ដោយលោកបញ្ជាក់ថា ភូមិមួយចំនួនបានស្ថិតនៅក្នុងបន្ទាត់ព្រំដែនដែលបន្សល់ទុកដោយបារាំង។
សូមទស្សនាវីដេអូនៃការថ្លែងរបស់លោក ហ៊ុន សែន ដែលត្រូវបានបង្ហោះនៅក្នុងបណ្ដាញ YouTube ដោយសារព័ត៌មាន Fresh News កាលពីថ្ងៃទី១៦ ខែសីហា ឆ្នាំ២០២០។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សមាជិកព្រឹទ្ធសភាបក្សកាន់អំណាច លោក ម៉ុង ឫទ្ធី បានបញ្ជាក់ថា កាយវិការរបស់លោកនៅក្នុងវីដេអូនោះ មិនដូចទៅនឹងអ្វីដែលត្រូវបានអះអាងឡើងនៅលើបណ្ដាញសង្គមនោះឡើយ។ លោក ម៉ុង ឫទ្ធី បញ្ជាក់ថា លោកយកដៃជូតទឹកភ្នែកដែលបណ្ដាលមកពីលោកឈឺភ្នែកដោយសារចាំងនឹងពន្លឺថ្ងៃតែប៉ុណ្ណោះ។
Title: លោក ម៉ុង ឫទ្ធី បកស្រាយប្រាប់មហាជន ក្រោយមានវីដេអូមួយត្រូវបានបរិយាយមិនត្រឹមត្រូវ
Written By: Jay UdomResult: False
