ក្រោយរញ្ជួយដីវាយប្រហារប្រទេសភូមា និងប៉ះពាល់ដល់ថៃកាលពីសប្ដាហ៍មុន វីដេអូឃ្លីបមួយដែលបង្ហាញផ្លូវមួយកន្លែងបានបាក់ស្រុតនោះ ត្រូវបានគេបង្ហោះព្រោងព្រាតលើបណ្ដាញសង្គមជាមួយការអះអាងថា មហន្តរាយនេះបណ្ដាលមកពីការរញ្ជួយដី។ វីដេអូជាមួយការអះអាងបែបនេះ ត្រូវបានចែកចាយយ៉ាងផុសផុលនៅលើបណ្ដាញសង្គម ដែលនាំឱ្យមានការចោទសួរពីភាពត្រឹមត្រូវនៃវីដេអូទាំងនេះ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូដែលបង្ហាញនៃការបាក់ស្រុតផ្លូវមួយកន្លែង ត្រូវបានគេបង្ហោះព្រោងព្រាតនៅលើបណ្ដាញសង្គមជាមួយសំណេររៀបរាប់ថា ផ្លូវមួយកន្លែងនៅក្នុងទីក្រុងមួយ បានបាក់ស្រុតដោយសារតែគ្រោះរញ្ជួយដីនៅកណ្ដាលប្រទេសភូមាកាលពីសប្ដាហ៍មុន។
សំណេររៀបរាប់មិនបានបញ្ជាក់ថា វាកើតឡើងនៅទីណានោះឡើយ ប៉ុន្តែ សំឡេងរៀបរាប់នៅក្នុងវីដេអូមួយនេះ បានអះអាងថា មហន្តរាយនេះ បានកើតឡើងនៅកណ្ដាលទីក្រុងបាងកក ប្រទេសថៃ។
វីដេអូជាមួយសំណេរបែបនេះ ត្រូវបានចែកចាយយ៉ាងផុសផុលនៅលើបណ្ដាញសង្គម ព្រមទាំងការបញ្ចេញប្រតិកម្ម និងមតិយោបល់ពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរជាច្រើន។
ខាងក្រោម គឺជាវីដេអូឃ្លីប ផ្ដាមចេញពីការបង្ហោះនៅលើបណ្ដាញសង្គមហ្វេសប៊ុកកាលពីសប្ដាហ៍មុន ជាមួយសំណេររៀបរាប់ថា «ថ្ងៃនេះបាក់ថ្នល់អស់រលីងបងប្អូនអើយ រញ្ជួយផែនដី»។
ខាងក្រោម គឺជាវីដេអូឃ្លីបមួយផ្សេងទៀត ផ្ដាមចេញពីការបង្ហោះវីដេអូនេះ នៅលើបណ្ដាញសង្គមកាលពីពេលថ្មីៗនេះ ជាមួយសំណេររៀបរាប់ថា «ថ្ងៃនេះបាក់ថ្នល់អស់រលីងបងប្អូនអើយ រញ្ជួយផែនដីពីម្សិលមិញ»។
វីដេអូដូចគ្នាទាំងស្រុង ក៏ត្រូវបានរកឃើញ និងបង្ហោះនៅលើគេហទំព័រវីដេអូ YouTube ផងដែរកាលពីថ្ងៃទី៣០ ខែមីនា ឆ្នាំ២០២៥ ដោយចោទសំណួរជាភាសាអង់គ្លេសថា «Oh my god, is it real?» ឬប្រែជាភាសាខ្មែរថា «ព្រះអើយ តើនេះគឺជាការពិតឬ?»។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើ តាមរយៈការដំណើរការ Google Reverse Image Search និងពាក្យគន្លឹះ ដែលនាំឱ្យយើងរកឃើញការពិតដូចខាងក្រោម។
គិតត្រឹមថ្ងៃចេញផ្សាយអត្ថបទមួយនេះ មិនមានសេចក្ដីរាយការណ៍ផ្លូវការណាមួយអំពីការបាក់ស្រុតផ្លូវនៅក្នុងប្រទេសថៃនោះឡើយ ក្រោយពីមានគ្រោះរញ្ជួយដី។
រញ្ជួយដីកម្រិត ៧.៧រ៉ិចទ័រ បានកើតឡើងនៅភាគកណ្ដាលនៃប្រទេសភូមា ខណៈកម្លាំងញ័របានជះឥទ្ធិពលដល់ប្រទេសថៃ វៀតណាម និងចិនកាលពីថ្ងៃទី២៨ ខែមីនា ឆ្នាំ២០២៥កន្លងទៅនេះ។
កម្លាំងរញ្ជួយនេះ បានញ័ររញ្ជួយ និងអង្រួនអគារនានានៅក្នុងទីក្រុងបាងកក ប្រទេសថៃ និងបានបណ្ដាលមានស្នាមប្រះជាច្រើនកន្លែង។
ខាងក្រោម គឺជាវីដេអូឃ្លីបបង្ហាញទិដ្ឋភាពនៃការប៉ះពាល់នៃការរញ្ជួយនៅក្នុងទីក្រុងបាងកកនាពេលថ្មីៗនេះ ដោយមិនមានហេតុការណ៍ជាក់ស្ដែងនៃការបាក់ស្រុតផ្លូវនោះឡើយ។
The Indian Express | Archived Link
សំណង់អគារមួយរបស់រដ្ឋាភិបាលមានកម្ពស់ ៣០ជាន់នៅកណ្ដាលទីក្រុងបាងកក ដែលស្ថិតក្នុងដំណើរការសាងសង់ បានបាក់រលំដល់ដី ដែលបណ្ដាលឱ្យកម្មករជាច្រើនជាប់នៅក្រោមគំនរបាក់បែក បន្ទាប់ពីការអង្រួនដោយកម្លាំងរញ្ជួយដីមានប្រភពនៅកណ្ដាលប្រទេសភូមា។
ខាងក្រោម គឺជារូបភាពផ្ដាមចេញពីគេហទំព័រសារព័ត៌មាន The Straits Times បង្ហាញគំនរអគារដួលរលំក្រោយពីមានការរញ្ជួយដី។
The Straits Times | Archived Link
ខាងក្រោមនេះ គឺជាវីដេអូឃ្លីបរាយការណ៍ដោយសារព័ត៌មាន CNN អំពីគ្រោះរញ្ជួយដីដ៏ខ្លាំងមួយ នៅក្នុងប្រទេសមីយ៉ាន់ម៉ា ដោយធ្វើឱ្យមានការរញ្ជួយរហូតដល់ទីក្រុងបាងកក ប្រទេសថៃ។
ដើម្បីបញ្ជាក់ថា រូបភាពទាំងនេះត្រូវបានបង្កើតឡើងដោយកម្មវិធីបញ្ញាសិប្បនិម្មិតឬយ៉ាងណានោះ យើងយករូបភាពទាំងនេះ ដាក់ឱ្យកម្មវិធីវិភាគមាតិកា AI មួយចំនួន ហើយលទ្ធផលបង្ហាញថា រូបភាពទាំងនេះពិតជាត្រូវបានបង្កើតឡើងដោយ AI ពិតប្រាកដមែន។
ខាងក្រោម គឺជារូបភាពផ្ដាមចេញពីលទ្ធផលនៃការវាយតម្លៃដោយវេបសាយវិភាគមាតិកា AI ដែលបង្ហាញថា រូបភាពទាំងនេះត្រូវបានបង្កើតឡើងដោយ AI។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook | Twitter | Telegram | Google News | TikTok | WhatsApp
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើ មិនត្រឹមត្រូវទេ។ វីដេអូឃ្លីបដែលបង្ហាញការបាក់ស្រុតផ្លូវមួយកន្លែងនោះ មិនមែនជាហេតុការណ៍ជាក់ស្ដែងកើតឡើងនៅក្នុងទីក្រុងបាងកកនោះឡើយ។ វីដេអូទាំងនេះ ត្រូវបានបង្កើតឡើងដោយកម្មវិធីបញ្ញាសិប្បនិម្មិត (AI) តែប៉ុណ្ណោះ។
Title:វីដេអូផ្លូវបាក់ស្រុតនៅកណ្ដាលក្រុងបាងកក ត្រូវបានបង្កើតឡើងដោយបញ្ញាសិប្បនិម្មិត
Fact Check By: Kakada SimResult: Altered
