- >>
- Political
ព័ត៌មានចាស់អំពីបញ្ហាព្រំដែនកម្ពុជា-ថៃតំបន់ព្រះវិហារ ត្រូវបានបង្ហោះឡើងវិញលើបណ្ដាញសង្គម
ខណៈដែលបញ្ហាព្រំដែនកម្ពុជា-ថៃនៅតំបន់ព្រះវិហារ នៅតែចំណុចរសើបនៃទំនាក់ទំនងកម្ពុជា-ថៃនោះ ប៉ុន្មានថ្ងៃថ្មីៗនេះ ព័ត៌មានដែលផុសផុលនៅលើបណ្ដាញសង្គម បាននិយាយថា ទាហានថៃបានកាត់សោរច្រកទ្វារចូលប្រាសាទព្រះវិហារនៅខាងដីថៃ។ ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម ហើយអ្នកប្រើប្រាស់បណ្ដាញសង្គមកម្ពុជាជាច្រើន បានជឿទៅតាមព័ត៌មាននេះ។ ទោះជាយ៉ាងណា យើងរកឃើញថា ការបង្ហោះរូបភាពទាំងនេះលើបណ្ដាញសង្គម មិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានដែលផុសផុលនៅលើបណ្ដាញសង្គមនៅដើមសប្ដាហ៍នេះ បានផ្សាយថា ទាហានថៃបានកាត់សោររបងដែក ដើម្បីបើកឡើងវិញនូវច្រកឡើងទៅកាន់ប្រាសាទព្រះវិហាររបស់ប្រទេសកម្ពុជា។
ព័ត៌មាននេះ ត្រូវបានចែករំលែកបន្តព្រោងព្រាតពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយក៏មានអ្នកប្រើប្រាស់ហ្វេសប៊ុកមួយចំនួន បានបញ្ចេញប្រតិកម្មផ្សេងៗ និងមតិយោបល់ជាច្រើន ដែលជឿថា វាជាហេតុការណ៍កើតឡើងថ្មីៗនៅសប្ដាហ៍នេះ។
ខាងក្រោមនេះ គឺជារូបភាពផ្ដាមចេញពីព័ត៌មានផ្សព្វផ្សាយនៅលើបណ្ដាញសង្គមហ្វេសប៊ុកកាលពីថ្ងៃទី៣០ ខែមីនា ឆ្នាំ២០២៤ ដែលសរសេររៀបរាប់ថា “ទាហានថៃបានកាត់បើកសោរនៅច្រកចូលឡើងទៅកាន់ប្រាសាទព្រះវិហាររបស់ខ្មែរ ក្រោយបានបិទអស់រយៈពេល ៧ឆ្នាំកន្លងទៅ។ ថៃបាននិយាយថា ខ្លួនបានកាត់បើកសោរតែខាងថៃទេ ព្រោះនោះជាសិទ្ធិរបស់ថៃ គ្មានពាក់ព័ន្ធស្អីនឹងខ្មែរឡើងយ។ ប្រភព Thai PBS”។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុកដទៃទៀតផងដែរនៅក្នុងរយៈពេលប៉ុន្មានថ្ងៃកន្លងមកនេះ ហើយក៏ទទួលបានការចែករំលែកបន្តព្រោងព្រាតផងដែរ។
ខាងក្រោមនេះ គឺជារូបភាពផ្ដាមចេញការបង្ហោះព័ត៌មាននៅលើបណ្ដាញសង្គមដោយទំព័រហ្វេសប៊ុកមួយ កាលពីថ្ងៃទី៣១ ខែមីនា ឆ្នាំ២០២៤ ដែលមានសំណេរដូចគ្នាទាំងស្រុងនឹងព័ត៌មានខាងលើ។
ខាងក្រោមនេះ គឺជារូបភាពផ្ដាមចេញពីព័ត៌មានដូចគ្នានេះដែលត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុកមួយទៀតកាលពីថ្ងៃសៅរ៍ចុងសប្ដាហ៍មុន។ ព័ត៌មានដែលបង្ហោះដោយទំព័រហ្វេសប៊ុកនេះ ក៏ត្រូវបានចែករំលែកបន្តទៀតដោយអ្នកប្រើប្រាស់បណ្ដាញសង្គមផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានក្នុងន័យដូចគ្នានៅលើបណ្ដាញសង្គមដោយទំព័រហ្វេសប៊ុកទៀតកាលពីថ្ងៃទី៣០ ខែមីនា ឆ្នាំ២០២៤។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលរូបថត និងព័ត៌មានដែលផ្សព្វផ្សាយដោយទូរទស្សន៍ថៃ Thai PBS និងការបកស្រាយរបស់អាជ្ញាធរខេត្តព្រះវិហារ ដែលនាំឱ្យយើងរកឃើញការពិតដូចខាងក្រោមនេះ។
ដោយពិនិត្យទៅព័ត៌មាននេះ យើងបានរកឃើញថា វាត្រូវបានផ្សព្វផ្សាយដោយប្រព័ន្ធផ្សព្វផ្សាយថៃ Thai PBS ហើយ Fact Crescendo Cambodia ក៏បន្តចូលទៅពិនិត្យមើលការផ្សាយព័ត៌មានរបស់សារព័ត៌មានថៃមួយនេះនៅក្នុងរយៈពេលប៉ុន្មានថ្ងៃមកនេះ។
ដោយចូលទៅកាន់វេបសាយ Thai PBS យើងរកពុំឃើញព័ត៌មានថ្មីបំផុតដែលរាយការណ៍បែបនេះនោះឡើយ ហើយនៅក្នុងប្រព័ន្ធ YouTube របស់សារព័ត៌មាននេះទៀតសោត យើងក៏ពុំឃើញមានព័ត៌មានបែបនេះនោះដែរនៅក្នុងរយៈពេលជិតមួយសប្ដាហ៍មកនេះ។
ទោះជាយ៉ាងណា យើងបានរកឃើញព័ត៌មាននេះត្រូវបានផ្សព្វផ្សាយដោយសារព័ត៌មានថៃមួយនេះតាំងពី ៩ឆ្នាំមុន ដែលនិយាយអំពីទាហានថៃសម្រេចកាត់សោររបងដែកខាងផ្នែកទឹកដីថៃ ដែលនៅជាប់នឹងព្រំដែនខេត្តព្រះវិហាររបស់កម្ពុជា។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍ព័ត៌មានជាភាសាថៃរបស់សារព័ត៌មាន Thai PBS កាលថ្ងៃទី១៨ ខែធ្នូ ឆ្នាំ២០១៥ ដែលនិយាយថា ទាហានថៃបានកាត់សោរទ្វាររបងឡើងភ្នំព្រះវិហារ បន្ទាប់ពីទ្វាររបងឡើងទៅកាន់ប្រាសាទព្រះវិហារខាងដីថៃ ត្រូវបានចាក់សោរបិទទ្វារអស់រយៈពេល ៧ឆ្នាំហើយនោះ។
Thai PBS Report | Archived Link
ក្រៅពីសេចក្ដីរាយការណ៍ព័ត៌មានខាងលើនេះ Fact Crescendo Cambodia បានរកឃើញសេចក្ដីរាយការណ៍ព័ត៌មាននេះជាវីដេអូ ដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពី ៩ឆ្នាំមុនផងដែរ។
ជាងនេះទៅទៀត អាជ្ញាធរព្រះវិហារបានច្រានចោលព័ត៌មានដោយចាត់ទុកជាព័ត៌មានមិនពិត បន្ទាប់ពីវាត្រូវបានបង្ហោះនៅលើបណ្ដាញសង្គមបានប៉ុន្មានថ្ងៃមក។
នៅក្នុងសេចក្ដីប្រកាសព័ត៌មានរបស់ខ្លួន អាជ្ញាធរជាតិព្រះវិហារបាននិយាយថា ព័ត៌មាននេះ គឺជាព័ត៌មានចាស់កាលពីឆ្នាំ២០០៨ យកមកផ្សព្វផ្សាយឡើងវិញនៅលើបណ្ដាញសង្គម ដែលធ្វើឱ្យមហាជនយល់ច្រឡំ។
ទោះជាយ៉ាងណា ការបញ្ជាក់របស់អាជ្ញាធរជាតិព្រះវិហារបែបនេះ ក៏មិនត្រឹមត្រូវដែរ ដោយសារតែព័ត៌មាននេះ មិនកើតឡើងនៅឆ្នាំ២០០៨ទេ ពោលគឺវាកើតឡើងនៅឆ្នាំ២០១៥ ឬក៏ ៧ឆ្នាំក្រោយពីច្រកទ្វារឡើងទៅប្រាសាទព្រះវិហារពីខាងដីថៃ ត្រូវបានបិទទាំងស្រុង។
ខាងក្រោមនេះ គឺជាសេចក្ដីប្រកាសព័ត៌មានទាំងស្រុងរបស់អាជ្ញាធរជាតិព្រះវិហារ ដែលត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុក “រដ្ឋបាលខេត្តព្រះវិហារ” កាលពីថ្ងៃទី០១ ខែមេសា ឆ្នាំ២០២៤។
បន្ទាប់ពីអាជ្ញាធរជាតិព្រះវិហារបានបកស្រាយបែបនេះមក អ្នកប្រើប្រាស់បណ្ដាញសង្គមដែលបានបង្ហោះព័ត៌មាននេះមុនគេនោះ បានលុបចោលទៅវិញ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ព័ត័មាននេះ គឺសេចក្ដីរាយការណ៍ចាស់របស់សារព័ត៌មានថៃកាលពីចុងឆ្នាំ២០១៥កន្លងមក។ វាមិនមែនជាព័ត៌មានទើបតែកើតឡើងថ្មីៗនោះឡើយ។
Title:ព័ត៌មានចាស់អំពីបញ្ហាព្រំដែនកម្ពុជា-ថៃតំបន់ព្រះវិហារ ត្រូវបានបង្ហោះឡើងវិញលើបណ្ដាញសង្គម
Written By: Jay UdomResult: Misleading
