- >>
- FALSE
តើលោកយាយម្នាក់នេះ មានអាយុ៣០០ឆ្នាំមែនឬទេ?
រហូតមកដល់ពេលនេះ មានមនុស្សជាច្រើននាក់ បានរស់នៅលើផែនដីលើសពី ១០០ឆ្នាំ ដោយក្នុងចំណោមនោះ រូបថតមួយសន្លឹក បង្ហាញអំពីទិដ្ឋភាពលោកយាយចំណាស់ម្នាក់ បានធ្វើខួបកំណើតរបស់ខ្លួន ក្នុងអាយុ ៣០០ឆ្នាំ ត្រូវបានបង្ហោះឡើងដោយអ្នកប្រើប្រាស់ហ្វេសប៊ុកម្នាក់។ ការបង្ហោះខាងលើ ត្រូវបានចែកចាយ និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៩ ខែវិច្ឆិកា ឆ្នាំ២០២៣ថ្មីៗកន្លងទៅនេះ អ្នកប្រើប្រាស់បណ្ដាញសង្គមហ្វេសប៊ុកម្នាក់ បានបង្ហោះវីដេអូឃ្លីបខ្លីមួយ ដែលបានបង្ហាញទិដ្ឋភាពស្ដ្រីវ័យចំណាស់ បានអង្គុយនៅលើគ្រែមន្ទីរពេទ្យមួយ ដោយមាននំខួបកំណើត និងបានភ្ជាប់ដោយការអះអាងថា លោកយាយម្នាក់នេះ មានអាយុ ៣០០ឆ្នាំហើយ។ ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជាវីដេអូឃ្លីបខាងលើ ដែលអ្នកប្រើប្រាស់បានសរសេររៀបរាប់ថា «លោកយាយមានព្រះជន្ម ៣០០ឆ្នាំ ធ្វើខួបកំណើត»។
https://www.facebook.com/reel/248878071516109
រូបថតបែបនេះ ក៏ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុកជាច្រើនទៀតផងដែរ។ សូមមើលខ្លឹមសារអះអាងទាំងស្រុង តាមរយៈតំណភ្ជាប់មាននៅទីនេះ (archived link) និងតំណភ្ជាប់មួយទៀតនៅទីនេះ (archived link)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញ និងបង្ហោះដោយអ្នកប្រើប្រាស់ហ្វេសប៊ុកដែលមានឈ្មោះថា «Antonio Di Lernia» កាលពីថ្ងៃទី០៦ ខែវិច្ឆិកា ឆ្នាំ២០២៣កន្លងទៅ ដោយរូបភាពខាងលើនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ។
ខាងក្រោមនេះ គឺជារូបភាពផ្ដាមពីសំណេររបស់អ្នកប្រើប្រាស់បណ្ដាញសង្គមរូបនេះ បានរៀបរាប់ជាភាសាអ៊ីតាលីថា «Auguriiiiiii» ឬមានអត្ថន័យថា «សូមជូនពរ»។
Fact Crescendo Cambodia ក៏បានរកឃើញរូបភាពជាច្រើនដែលកែច្នៃដោយបច្ចេកវិទ្យាបញ្ញាសិប្បនិម្មិត (AI) ត្រូវបានបង្ហោះផងដែរ ដោយក្នុងនោះមានទាំងរូបភាពមេដឹកនាំមហាអំណាចពិភពលោក និងរូបភាពប្លែកៗជាច្រើនទៀត។
តាមរយៈកំណត់ត្រារបស់សៀវភៅហ្គីណេស ស្រ្តីមានអាយុវែងជាងគេនៅលើភពផែនដីយើងនេះ គឺបានទៅលើស្រ្តីជនជាតិបារាំង ដែលមានឈ្មោះថា Jeanne Louise Calment។ លោកយាយ Jeanne Calment បានកើតនៅថ្ងៃទី២១ ខែកុម្ភៈ ឆ្នាំ១៨៧៥ ហើយទទួលមរណភាពនៅទីក្រុង Arles ប្រទេសបារាំង ក្នុងអាយុដល់ទៅ ១២២ឆ្នាំ និង១៦៤ថ្ងៃ។ ខាងក្រោមនេះ គឺជាទិដ្ឋភាពលោកយាយ Jeanne Louise Calment ដែលបានទទួលមរណភាពកាលពីថ្ងៃទី០៤ ខែសីហា ឆ្នាំ១៩៩៧កន្លងទៅ។
Guinness World Records | Archived Link
ខាងក្រោមនេះ គឺជាបញ្ជីឈ្មោះស្ដ្រីមានអាយុវែងជាងគេបំផុតនៅលើពិភពលោក ដែលត្រូវបានកត់ត្រាទុក និងផ្ទៀងផ្ទាត់ ដែលគេអាចរកអានបានទាំងស្រុងនៅលើគេហទំព័រ Wikipedia។
Wikipedia Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ ដោយអ្នកប្រើប្រាស់ខាងលើនេះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺត្រូវបានបង្ហោះដោយអ្នកប្រើប្រាស់ហ្វេសប៊ុកឈ្មោះថា «Antonio Di Lernia» និងផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ។
