ខណៈដែលប្រជាជនកម្ពុជាប្រារព្ធពិធីបុណ្យចូលឆ្នាំថ្មីនៅទូទាំងប្រទេសនៅពាក់កណ្ដាលខែមេសានេះ រូបថតសខ្មៅមួយសន្លឹកដែលបង្ហាញមនុស្សមួយក្រុមជះទឹកទៅលើអ្នកដំណើរតាមរថយន្តដឹកជញ្ជូនមួយគ្រឿង ត្រូវបានគេបង្ហោះព្រោងព្រាតលើបណ្ដាញសង្គម។ រូបថតនេះ ត្រូវបានគេជឿថា ជាការលេងជះទឹកនៅកម្ពុជាកាលពីអតីតកាល។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការបង្ហោះខ្លឹមសារជាមួយរូបថតមួយសន្លឹកនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតសខ្មៅមួយសន្លឹកដែលបង្ហាញមនុស្សមួយក្រុមជះទឹកទៅលើអ្នកដំណើរតាមរថយន្តមួយគ្រឿង ត្រូវបានគេបង្ហោះនៅលើបណ្ដាញសង្គមជាមួយសំណេររៀបរាប់ក្នុងន័យថា រូបថតមួយសន្លឹកនេះគឺជាការលេងជះទឹករបស់ប្រជាពលរដ្ឋកម្ពុជាកាលពីជាង ៥០ឆ្នាំមុន។
រូបថតមួយសន្លឹកនេះ ទទួលបានការចែករំលែកបន្តដល់ទៅជាង ៥ពាន់ដងនៅលើបណ្ដាញសង្គម ខណៈមានការបញ្ចេញមតិចម្រុះបែប និងប្រតិកម្មជាច្រើនទៅនឹងការបង្ហោះរូបថតនេះផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកឈ្មោះ នរៈ ឧរង្គៈ Nakrak Urunga កាលពីថ្ងៃទី២៤ ខែមីនា ឆ្នាំ២០២៣។
រូបថតមួយសន្លឹកនេះ ក៏ត្រូវបានបង្ហោះលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកដទៃទៀតផងដែរនៅអំឡុងពេលកម្ពុជាប្រារព្ធពិធីបុណ្យចូលឆ្នាំថ្មី ឬសង្ក្រាន្តនៅពាក់កណ្ដាលខែមេសានេះ។ សូមមើលខ្លឹមសារទាំងស្រុងតាមរយៈតំណភ្ជាប់នៅទីនេះ (១, ២, ៣, ៤)។
រូបថតសខ្មៅមួយសន្លឹកនេះ ក៏ត្រូវបានចុះផ្សាយ និងចែករំលែកដោយប្រព័ន្ធផ្សព្វផ្សាយនៅកម្ពុជាផងដែរចំពេលប្រជាជនកម្ពុជាប្រារព្ធពិធីចូលឆ្នាំថ្មីប្រពៃណីជាតិពាក់កណ្ដាលខែមេសានេះ។
ខាងក្រោមនេះ គឺជារូបភាពផ្ដាមពីទំព័រហ្វេសប៊ុករបស់សារព័ត៌មាន Thmey Thmey 25 ដែលបានចុះផ្សាយរូបថតមួយសន្លឹកនេះនៅក្នុងអត្ថបទរបស់ខ្លួនកាលពីថ្ងៃទី១៥ ខែមេសា ឆ្នាំ២០២៣។
Thmey Thmey’s Facebook Post | Archived Link
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកសារព័ត៌មាន Khmer Today ដែលបានបង្ហោះរូបថតនេះកាលពីថ្ងៃទី១៦ ខែមេសា ឆ្នាំ២០២៣។
Khmer Today’s Facebook Post | Archived Link
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់រូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតចាស់មួយសន្លឹកនេះ ត្រូវបានរកឃើញនៅក្នុងចំណោមរូបថតសខ្មៅជាច្រើនសន្លឹកទៀត ដែលត្រូវបានបង្ហោះនៅលើទំព័រហ្វេសប៊ុកមួយឈ្មោះ History of Laos ປະຫວັດສາດລາວ កាលពីថ្ងៃទី២៣ ខែមេសា ឆ្នាំ២០២១កន្លងមក។
ទំព័រហ្វេសប៊ុកដដែលនេះ បានសរសេររៀបរាប់ជាភាសាឡាវ និងអង់គ្លេសថា រូបថតមួយសន្លឹកនេះ គឺជាការលេងជះទឹកនៅអំឡុងពេលប្រារព្ធពិធីបុណ្យចូលឆ្នាំថ្មីរបស់ប្រជាជនឡាវកាលពីឆ្នាំ១៩៧១។
ទំព័រហ្វេសប៊ុកខាងលើនេះ បានបញ្ជាក់ថា រូបថតសខ្មៅមួយសន្លឹកនេះ ត្រូវបានចម្លងយកមកពីទំព័រហ្វេសប៊ុករបស់លោក Gonzalo Cancino ដែលតែងតែបង្ហោះរូបថតជាច្រើនដែលបង្ហាញពីទិដ្ឋភាពប្រជាជនឡាវ និងប្រទេសមួយនេះ។
នៅក្នុងគណនីហ្វេសប៊ុករបស់លោក Gonzalo Cancino យើងបានរកឃើញរូបថតសខ្មៅ ៦សន្លឹក ដែលអ្នកប្រើប្រាស់ហ្វេសប៊ុករូបនេះរៀបរាប់ថា ការប្រារព្ធពិធីបុណ្យចូលឆ្នាំថ្មីនៅក្នុងប្រទេសឡាវ។ រូបថតទាំងនេះ ត្រូវបានបង្ហោះលើបណ្ដាញសង្គមកាលពីថ្ងៃទី១៣ ខែមេសា ឆ្នាំ២០២១។
នៅក្នុងផ្នែកបញ្ចេញមតិនៅខាងក្រោមរូបថតទាំងប៉ុន្មានសន្លឹកនេះ លោក Gonzalo Cancino បានបន្ថែមនូវរូបថតសខ្មៅមួយសន្លឹកទៀត ដែលដូចទៅនឹងរូបថតមួយសន្លឹកដែលត្រូវបានអ្នកប្រើប្រាស់បណ្ដាញសង្គមនៅកម្ពុជាអះអាងថា ជាការលេងជះទឹកនៅកម្ពុជាកាលពីអតីតកាល។
កាលពីដើមខែមេសានេះ គណនីហ្វេសប៊ុក Gonzalo Cancino ក៏បានបង្ហោះជាថ្មីម្ដងទៀតនូវរូបថតដែលបង្ហាញមនុស្សមួយក្រុមជះទឹកទៅលើអ្នកដំណើរនៅក្នុងរថយន្តដឹកជញ្ជូនមួយគ្រឿង ហើយសំណេរជាភាសាឡាវបានឱ្យដឹងថា រូបថតមួយសន្លឹកនេះ បង្ហាញឱ្យឃើញការលេងជះទឹករបស់ប្រជាជនឡាវអំឡុងពិធីបុណ្យចូលឆ្នាំថ្មីកាលពីអតីតកាល។
យើងក៏បានរកឃើញរូបថតសខ្មៅមួយសន្លឹកនេះចុះផ្សាយដោយគេហទំព័រចិន zgmh.net កាលពីខែមេសា ឆ្នាំ២០២២កន្លងមកផងដែរ ដែលបញ្ជាក់ថា រូបថតមួយនេះ គឺជាការលេងជះទឹកនៅក្នុងពិធីបុណ្យចូលឆ្នាំថ្មីនៅក្នុងប្រទេសឡាវកាលពីឆ្នាំ១៩៧១។ សូមមើលខ្លឹមសារទាំងស្រុងនៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
សន្និដ្ឋាន
Fact Crescendo Cambodia រកឃើញថា រូបថតជាមួយនឹងការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតសខ្មៅមួយដែលបង្ហាញមនុស្សមួយក្រុមជះទឹកទៅលើអ្នកដំណើរក្នុងរថយន្តដឹកជញ្ជូនមួយគ្រឿង មិនមែនជាការលេងជះទឹកអំឡុងពិធីបុណ្យចូលឆ្នាំថ្មីនៅប្រទេសកម្ពុជាកាលពីអតីតកាលនោះឡើយ។ រូបថតមួយសន្លឹកនេះ គឺជាទិដ្ឋភាពនៃការប្រារព្ធពិធីបុណ្យចូលឆ្នាំថ្មីនៃប្រជាជនឡាវនៅក្នុងឆ្នាំ១៩៧១។
Title:តើរូបថតចាស់មួយសន្លឹកនេះជាការលេងជះទឹកបុណ្យចូលឆ្នាំថ្មីនៅកម្ពុជានាអតីតកាលមែនឬទេ?
Fact Check By: Jay UdomResult: Misleading
