បន្ទាប់ពីមានសេចក្ដីរាយការណ៍ថា ប្រធានាធិបតីអ៊ុយក្រែន លោក Volodymyr Zelenskyy ធ្វើដំណើរទៅប្រទេសអារ៉ាប៊ីសាអ៊ូឌីតនោះ វីដេអូឃ្លីបមួយដែលបង្ហាញលោកលុតជង្គង់នៅចំពោះមុខក្រុមមន្ត្រីដែលទៅទទួលស្វាគមន៍លោកនោះ ត្រូវបានគេបង្ហោះព្រោងព្រាតនៅលើបណ្ដាញសង្គម។ វីដេអូនេះ ត្រូវបានបង្ហោះភ្ជាប់ជាមួយសំណេរថា មេដឹកនាំអ៊ុយក្រែនរូបនេះសុខចិត្តលុតជង្គង់ចំពោះមុខស្ដេចអារ៉ាប់ ដើម្បីដូរយកសន្តិភាពដោយមិនកាត់ទឹកដី។ ទោះជាយ៉ាងណា ការផ្ទៀងផ្ទាត់រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយដែលបង្ហាញប្រធានាធិបតីអ៊ុយក្រែន លោក Volodymyr Zelenskyy លុតជង្គង់នៅមុខមេដឹកនាំអារ៉ាប៊ីសាអ៊ូឌីត ត្រូវបានគេបង្ហោះនៅលើបណ្ដាញសង្គមជាមួយការអះអាងថា មេដឹកនាំអ៊ុយក្រែនរូបនេះសុខចិត្តលុតជង្គង់នៅចំពោះមុខព្រះមហាក្សត្រអារ៉ាប៊ីសាអ៊ូឌីត ដើម្បីដូរយកសន្តិភាពសម្រាប់ប្រទេសរបស់គាត់ដោយមិនកាត់ទឹកដី។
វីដេអូឃ្លីបជាមួយការអះអាងបែបនេះ ត្រូវបានចែកចាយយ៉ាងផុសផុលនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ដែលបញ្ជាក់ថា ពួកគេជឿថា មេដឹកនាំអ៊ុយក្រែនពិតជាបានធ្វើបែបនេះ។
ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី១១ ខែមីនា ឆ្នាំ២០២៥ ជាមួយសំណេររៀបរាប់ថា “ដើម្បីមិនចង់កាត់ទឹកដីដូរយកសន្តិភាព ប្រធានាធិបតីអ៊ុយក្រែនសុខចិត្តលុតជង្គង់នៅមុខស្ដេចអារ៉ាប់ ទឹកមុខលោកមើលទៅធ្វើឱ្យខ្ញុំទប់ទឹកភ្នែកមិនជាប់”។
វីដេអូឃ្លីបនេះ ក៏ត្រូវបានអ្នកប្រើប្រាស់ហ្វេសប៊ុកម្នាក់ទៀតបង្ហោះនៅលើបណ្ដាញសង្គមផងដែរកាលពីថ្ងៃម្សិលមិញនេះ ដោយសំណេររៀបរាប់ក្នុងន័យថា មេដឹកនាំអ៊ុយក្រែនសុខចិត្តលុតជង្គង់នៅចំពោះមុខស្ដេចអារ៉ាប់ ដើម្បីទឹកដីប្រទេសរបស់លោកស្ថិតនៅគង់វង់។
វីដេអូជាមួយសំណេរខ្លឹមសារបែបនេះ ត្រូវបានចែកចាយបន្តរហូតដល់ជាង ១៣០០ដង ព្រមជាមួយការបញ្ចេញមតិចម្រុះ និងប្រតិកម្មផ្សេងៗពីសំណាក់អ្នកប្រើប្រាស់បណ្ដាញសង្គមហ្វេសប៊ុក។
ខាងក្រោមនេះ គឺជាវីដេអូឃ្លីបទាំងស្រុងដែលត្រូវបានចម្លងចេញពីការបង្ហោះនៅលើបណ្ដាញសង្គមកាលពីថ្ងៃទី១១ ខែមីនា ឆ្នាំ២០២៥ ជាមួយសំណេរថា “នៅចំពោះមុខស្តេចអារ៉ាប់ លោកអាចធ្វើបាន ដើម្បីទឹកដីនៅគង់វង់”។
វីដេអូដូចគ្នានេះក៏ត្រូវបានគេបង្ហោះនៅលើបណ្ដាញសង្គម TikTok និងបណ្ដាញកម្សាន្ត YouTube ផងដែរ ដែលនាំឱ្យមានការចែកចាយបន្តយ៉ាងច្រើនពីសំណាក់អ្នកប្រើប្រាស់បណ្ដាញសង្គម។
ខាងក្រោមនេះ គឺជាវីដេអូដូចគ្នាដែលត្រូវបានបង្ហោះនៅលើបណ្ដាញសង្គម TikTok ជាមួយសំណេររៀបរាប់ជាភាសាអ៊ុយក្រែនដែលមានន័យថា មេដឹកនាំអ៊ុយក្រែន លោក Zelenskyy បានលុតជង្គង់ចំពោះមុខស្ដេចអារ៉ាប៊ីសាអ៊ូឌីត។
ខាងក្រោមនេះ គឺជាវីដេអូដូចគ្នានេះ ដែលត្រូវបានបង្ហោះនៅលើបណ្ដាញកម្សាន្ត YouTube ជាភាសាអារ៉ាប់កាលពីថ្ងៃម្សិលមិញនេះ។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងដូចដែលត្រូវបានរៀបរាប់ខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
ផ្អែមតាមការផ្សាយរបស់សារព័ត៌មាន Al Jazeera ប្រធានាធិបតីអ៊ុយក្រែន លោក Volodymyr Zelenskyy បានធ្វើដំណើរទៅដល់ប្រទេសអារ៉ាប៊ីសាអ៊ូឌីតកាលពីថ្ងៃទី១០ ខែមីនានេះ តែប៉ុន្មានថ្ងៃប៉ុណ្ណោះមុនជំនួបជាមួយក្រុមមន្ត្រីការទូតអាមេរិក ដែលផ្ដោតលើការចរចាអំពីរឿងរ៉ែកម្រ និងការបញ្ចប់សង្គ្រាមជាមួយរុស្ស៊ី។
រូបថតមួយសន្លឹកដែលត្រូវបានចុះផ្សាយជាមួយអត្ថបទព័ត៌មានខាងលើ បង្ហាញលោក Zelenskyy ស្ថិតក្នុងសម្លៀកបំពាក់បែបយោធា ជួបជាមួយអភិបាលរងតំបន់ Makkah ព្រះអង្គម្ចាស់ Saud bin Mishal bin Abdulaziz។
សារព័ត៌មាន Al Jazeera បានផ្សាយបែបនេះដោយផ្អែកលើព័ត៌មានផ្សព្វផ្សាយដោយទូរទស្សន៍អារ៉ាប៊ីសាអ៊ូឌីត ដែលបង្ហាញលោក Zelenskyy ធ្វើដំណើរទៅដល់ទីក្រុង Jeddah ជាទីក្រុងកំពង់ផែស្ថិតនៅមាត់សមុទ្រក្រហម។
ខាងក្រោមនេះ គឺជារូបភាពផ្ដាមចេញពីរូបថតចុះផ្សាយដោយសារព័ត៌មាន Al Jazeera កាលពីថ្ងៃទី១០ ខែមីនា ឆ្នាំ២០២៥ ដែលនិយាយអំពីលោក Zelenskyy ធ្វើដំណើរទៅដល់ប្រទេសអារ៉ាប៊ីសាអ៊ូឌីត។
Al Jazeera’s Report | Archived Link
តាមរយៈ Google Reverse Image Search យើងបានរកឃើញរូបថត និងវីដេអូលោក Zelenskyy ធ្វើដំណើរទៅដល់ទឹកដីប្រទេសអារ៉ាប៊ីសាអ៊ូឌីត និងត្រូវទទួលបានស្វាគមន៍ដោយថ្នាក់ដឹកនាំជាន់ខ្ពស់របស់ប្រទេសនេះ។
ទោះជាយ៉ាងណា គ្មានរូបថត ឬវីដេអូណាបង្ហាញមេដឹកនាំអ៊ុយក្រែនរូបនេះលុតជង្គង់ចុះនៅចំពោះមុខមន្ត្រីជាន់ខ្ពស់អារ៉ាប៊ីសអ៊ូឌីតដែលទៅទទួលលោកនៅឯអាកាសយានដ្ឋានអន្តរជាតិនោះឡើយ។
វីដេអូនៃដំណើរទៅដល់ទីក្រុង Jeddah របស់លោក Zelenskyy ដែលត្រូវបានទទួលស្វាគមន៍ដោយថ្នាក់ដឹកនាំជាន់ខ្ពស់អារ៉ាប៊ីសាអ៊ូឌីតនៅច្រកទ្វារចេញពីយន្តហោះនោះ ត្រូវបានផ្សព្វផ្សាយដោយសារព័ត៌មាននានា ក្នុងនោះមានទីភ្នាក់ងារព័ត៌មានអាមេរិក AP និងប្រព័ន្ធផ្សព្វផ្សាយបារាំង France24 ជាដើម។
ខាងក្រោមនេះ គឺជាវីដេអូបង្ហាញលោក Zelenskyy ធ្វើដំណើរទៅដល់ទីក្រុង Jeddah និងត្រូវបានស្វាគមន៍ដោយមន្ត្រីជាន់ខ្ពស់អារ៉ាប៊ីសាអ៊ូឌីត ដែលព័ត៌មាននេះផ្សាយទីភ្នាក់ងារព័ត៌មាន AP កាលពីថ្ងៃទី១១ ខែមីនា ឆ្នាំ២០២៥។
AP News Report | Archived Link
បើបៀបធៀបគ្នា យើងឃើញថា វីដេអូឃ្លីបដែលត្រូវបានចែកចាយព្រោងព្រាតលើបណ្ដាញសង្គមថាលោក Zelenskyy លុតជង្គង់នៅចំពោះមុខស្ដេចអារ៉ាប់នោះ មិនមែនដំណើរទៅដល់ទីក្រុង Jeddah របស់លោកនាពេលថ្មីៗនេះឡើយ។
តាមរយៈ Google Reverse Image Search យើងបានរកឃើញថា លោក Zelenskyy ដែលស្ថិតក្នុងសម្លៀកបំពាក់ប្រយុទ្ធពណ៌ប្រផេះនោះ បានធ្វើដំណើរទៅអារ៉ាប៊ីសាអ៊ូឌីតកាលពីឆ្នាំ២០២៣កន្លងមក ដែលនៅពេលនោះទទួលបានស្វាគមន៍ដោយក្រុមមន្ត្រីជាន់ខ្ពស់អារ៉ាប៊ីសាអ៊ូឌីតផងដែរ។
បើតាមការផ្សាយរបស់សារព័ត៌មានអង់គ្លេស Telegraph មេដឹកនាំអ៊ុយក្រែនបានធ្វើដំណើរទៅដល់ទីក្រុង Jeddah កាលពីឆ្នាំ២០២៣ ដើម្បីចូលរួមប្រជុំកិច្ចប្រជុំកំពូលសម្ព័ន្ធអារ៉ាប់ (Arab League)នាពេលនោះ។
ខាងក្រោមនេះ គឺជារូបភាពផ្ដាមចេញពីរូបថតចុះផ្សាយដោយសារព័ត៌មាន Telegraph ដែលបង្ហាញលោក Zelenskyy ធ្វើដំណើរទៅដល់ទីក្រុង Jeddah និងទទួលស្វាគមន៍ដោយក្រុមមន្ត្រីអារ៉ាប៊ីសាអ៊ូឌីត កាលពីឆ្នាំ២០២៣កន្លងមក។
Telegraph’s Report | Archived Link
ដំណើររបស់លោក Zelenskyy នាពេលនោះ ក៏ត្រូវបានចុះផ្សាយដោយទីភ្នាក់ងារព័ត៌មានបារាំង AFP ផងដែរ ដែលបង្ហាញឱ្យឃើញថា មេដឹកនាំអ៊ុយក្រែនរូបនេះ មិនបានលុតជង្គង់នៅចំពោះមុខក្រុមមន្ត្រីជាន់ខ្ពស់អារ៉ាប៊ីសាអ៊ូឌីតដែលរង់ចាំទទួលស្វាគមន៍រូបលោកនៅព្រលានយន្តហោះនោះឡើយ។
ខាងក្រោមនេះ គឺជាវីដេអូទាំងស្រុងចុះផ្សាយដោយទីភ្នាក់ងារព័ត៌មានបារាំង AFP កាលពីថ្ងៃទី១៩ ខែឧសភា ឆ្នាំ២០២៣ ដែលបង្ហាញលោក Zelenskyy ធ្វើដំណើរទៅដល់ព្រលានយន្តក្នុងទីក្រុង Jeddah និងទទួលស្វាគមន៍ដោយមន្ត្រីជាន់ខ្ពស់អារ៉ាប៊ីសាអ៊ូឌីត។
AFP’s News Report | Archived Link
ម្យ៉ាងវិញទៀត វីដេអូឃ្លីបដែលបង្ហាញលោក Zelenskyy លុតជង្គង់នៅចំពោះមុខក្រុមមន្ត្រីអារ៉ាប៊ីសាអ៊ូឌីតនោះ បានភ្ជាប់មកជាមួយនូវប្រភពនៃវីដេអូនេះ ដែលបញ្ជាក់ថា វាត្រូវបានបង្កើតឡើងដោយកម្មវិធីបញ្ញាសិប្បនិម្មិតមួយឈ្មោះ Hailuo AI។
Hailuo AI គឺជាកម្មវិធីបញ្ញាសិប្បនិម្មិតសម្រាប់ឆ្លើយតបនឹងសំណើបង្កើតវីដេអូ។ កម្មវិធីបញ្ញាសិប្បនិម្មិតនេះ ត្រូវបានបង្កើតឡើងដោយក្រុមហ៊ុន MiniMax ដែលជាក្រុមហ៊ុនបច្ចេកវិទ្យារបស់ប្រទេសចិន។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ប្រធានាធិបតីអ៊ុយក្រែន លោក Volodymyr Zelenskyy បានចាប់ដៃជាមួយក្រុមមន្ត្រីជាន់ខ្ពស់អារ៉ាប៊ីសាអ៊ូឌីតដែលបានទៅទទួលស្វាគមន៍រូបលោកនៅឯព្រលានយន្តហោះ។ វីដេអូផ្សព្វផ្សាយដោយសារព័ត៌មាននានា បង្ហាញថា មេដឹកនាំអ៊ុយក្រែនរូបនេះ មិនបានលុតជង្គង់នៅចំពោះមុខក្រុមមន្ត្រីជាន់ខ្ពស់អារ៉ាប៊ីសាអ៊ូឌីតដែលទទួលស្វាគមន៍រូបលោកនោះឡើយ។
Title:វីដេអូ AI បង្ហាញលោក Zelenskyy លុតជង្គង់នៅមុខមន្ត្រីជាន់ខ្ពស់អារ៉ាប៊ីសាអ៊ូឌីត
Fact Check By: Jay UdomResult: False
