- >>
- FALSE
ព័ត៌មានក្លែងក្លាយផ្សាយថា គេរកឃើញបំណែកឧទ្ធម្ភាគចក្រដែលបាត់ខ្លួន
ឧទ្ធម្ភាគចក្រយោធាមួយគ្រឿងរបស់កម្ពុជា បានបាត់ការទាក់ទងជាមួយទីបញ្ជាការកងទ័ពអាកាសកាលពីថ្ងៃសុក្រកន្លងមកនេះ។ ពីរថ្ងៃក្រោយមក ព័ត៌មានដ៏ផុសផុលនៅលើបណ្ដាញសង្គម បានផ្សព្វផ្សាយព្រោងព្រាតថា គេបានរកឃើញបំណែកឧទ្ធម្ភាគចក្រនេះហើយនៅថ្ងៃអាទិត្យនេះ។ ព័ត៌មាននេះ ត្រូវបានចែករំលែកព្រោងព្រាតលើបណ្ដាញសង្គម និងមានការបញ្ចេញមតិជាច្រើនពីសំណាក់អ្នកប្រើប្រាស់បណ្ដាញសង្គម ក្នុងនោះមានមួយចំនួនជឿថា ជាការពិត។ ទោះជាយ៉ាងណា យើងរកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ព័ត៌មានដ៏ផុសផុលមួយនៅលើបណ្ដាញសង្គមនៅចុងសប្ដាហ៍នេះ បានលើកឡើងថា បំណែកឧទ្ធម្ភាគចក្រយោធាកម្ពុជាមួយគ្រឿងដែលបានបាត់ដាននៅតំបន់ជួរភ្នំក្រវ៉ាញភាគពាយព្យប្រទេសកម្ពុជានោះ ត្រូវបានរកឃើញហើយ ប៉ុន្តែ គេមិនទាន់រកឃើញមនុស្ស ២នាក់ដែលបាត់ខ្លួនជាមួយយាននេះនៅឡើយទេ។
ព័ត៌មាននេះត្រូវបានចែករំលែកយ៉ាងព្រោងព្រាតពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ព្រមទាំងការបញ្ចេញប្រតិកម្មចម្រុះបែប និងមតិយោបល់ដ៏ច្រើន ដែលជឿតាមព័ត៌មាននេះ បន្ទាប់ពីវាត្រូវបានបង្ហោះនៅលើបណ្ដាញសង្គម។ ខាងក្រោមនេះ គឺជារូបភាពផ្ដាមចេញពីព័ត៌មានទាំងស្រុងផ្សព្វផ្សាយលើបណ្ដាញសង្គមនៅថ្ងៃទី១៤ ខែកក្កដា ឆ្នាំ២០២៤ ដែលសរសេររៀបរាប់ថា “សង្ឃឹមថា គាត់ទាំងពីររួចផុតពីគ្រោះថ្នាក់ផងចុះ ពេលនេះរកឃើញបំណែកឧទ្ធម្ភាគចក្រហើយនៅថ្ងៃទី១៤នេះ ចំណែកមនុស្សពីរនាក់ទៀតនៅរកមិនទាន់ឃើញទេ”។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់បណ្ដាញសង្គមដទៃទៀតដែរ ហើយក៏ត្រូវបានចែករំលែកបន្តយ៉ាងច្រើន ព្រមទាំងប្រតិកម្ម និងមតិយោបល់ចម្រុះបែបពីអ្នកប្រើប្រាស់ហ្វេសប៊ុកនិយាយភាសាខ្មែរ។ ខាងក្រោមនេះ គឺជាព័ត៌មានទាំងស្រុងដែលត្រូវបានចម្លងទាំងស្រុងពីព័ត៌មានខាងលើ ហើយត្រូវបានបង្ហោះបន្តនៅលើបណ្ដាញសង្គមហ្វេសប៊ុកកាលពីថ្ងៃទី១៤ ខែកក្កដា ឆ្នាំ២០២៤ ដែលរៀបរាប់ថា “ដំណឹងបន្ទាន់ រកឃើញបំណែកឧទ្ធម្ភាគចក្រហើយនៅថ្ងៃទី១៤នេះ ចំណែកមនុស្សពីរនាក់ទៀតនៅរកមិនទាន់ឃើញទេ 14/7/2024/ RIP បឋម”។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មានដូចគ្នានេះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតនៅថ្ងៃទី១៤ ខែកក្កដា ឆ្នាំ២០២៤ ហើយក៏ត្រូវបានចែករំលែកបន្តរជាច្រើនដងទៀតពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីព័ត៌មានដូចគ្នានេះដែលបង្ហោះនៅលើបណ្ដាញសង្គមហ្វេសប៊ុកដោយអ្នកនយោបាយកម្ពុជាម្នាក់នៅថ្ងៃទី១៤ ខែកក្កដា ឆ្នាំ២០២៤។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរ។ សូមមើលព័ត៌មានដូចគ្នាតាមរយៈតំណភ្ជាប់មាននៅទីនេះ Link 1 (archived), Link 2 (archived), Link 3 (archived), Link 4 (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការស្វែងរកការបញ្ជាក់ពីអ្នកនាំពាក្យរាជរដ្ឋាភិបាលកម្ពុជា ដែលនាំឱ្យយើងរកឃើញការពិតដូចខាងក្រោមនេះ។
ដើម្បីបញ្ជាក់ការពិតអំពីព័ត៌មាននេះ Fact Crescendo បានស្វែងរកការបញ្ជាក់ពីអ្នកនាំពាក្យក្រសួងការពារជាតិ លោក ឈុំ សុជាតិ ដែលបានលោកបញ្ជាក់រឿងនេះតាមរយៈសំណេររបស់លោកបង្ហោះនៅលើទំព័រហ្វេសប៊ុករបស់លោកនៅល្ងាចថ្ងៃអាទិត្យនេះតែម្ដង។
នៅលើទំព័រហ្វេសប៊ុករបស់លោក អ្នកនាំពាក្យក្រសួងការពារជាតិ លោក ឈុំ សុជាត បញ្ជាក់ថា ព័ត៌មានដែលនិយាយថារកឃើញបំណែកឧទ្ធម្ភាគចក្រកំពុងបាត់ខ្លួននោះ គឺជាព័ត៌មាន “មិនពិត” ដែលត្រូវបានបង្កើតឡើងដោយក្រុមអ្នករកលុយតាមអនឡាញ។
អ្នកនាំពាក្យរូបនេះ បានបញ្ជាក់ទៀតថា ប្រតិបត្តិការរុករកឧទ្ធម្ភាគចក្រដែលបាត់ខ្លួននោះ កំពុងបន្តធ្វើឡើងនៅតំបន់ជួរភ្នំក្រវ៉ាញ ដោយមិនទាន់រកឃើញឧទ្ធម្ភាគចក្រនោះនៅឡើយទេ។ ខាងក្រោមនេះ គឺជារូបភាពផ្ដាមចេញពីការបញ្ជាក់របស់លោក ឈុំ សុជាត អ្នកនាំពាក្យក្រសួងការពារជាតិ ដែលបង្ហោះនៅលើទំព័រហ្វេសប៊ុករបស់លោកនៅល្ងាចថ្ងៃទី១៤ ខែកក្កដា ឆ្នាំ២០២៤។
ការបញ្ជាក់របស់អ្នកនាំពាក្យរូបនេះ ក៏ត្រូវបានបង្ហោះបន្តនៅលើទំព័រហ្វេសប៊ុកក្រសួងការពារជាតិផងដែរនៅល្ងាចថ្ងៃទី១៤ ខែកក្កដា ឆ្នាំ២០២៤ ដោយក្រសួងបានអំពាវនាវទៅមហាជនកុំឱ្យជឿតាមព័ត៌មាន “ក្លែងក្លាយ”នេះ ដែលនាំឱ្យមានការភាន់ច្រឡំ។
ដើម្បីបញ្ចាក់លើព័ត៌មាននេះបន្ថែមទៀត យើងបានដំណើរការផ្ទៀងផ្ទាត់រូបថតបំណែកឧទ្ធម្ភាគចក្រតាមរយៈ Google Reverse Image Search ដែលនាំឱ្យយើងរកឃើញរូបថតដូចគ្នាចុះផ្សាយដោយសារព័ត៌មានកម្ពុជាកាលពី ១០ឆ្នាំមុន។ ខាងក្រោមនេះ គឺជារូបថតឧទ្ធម្ភាគចក្រយោធាកម្ពុជាដែលធ្លាក់នៅជាយរាជធានីភ្នំពេញកាលពីថ្ងៃទី១៤ ខែកក្កដា ឆ្នាំ២០១៤ ហើយចុះផ្សាយដោយសារព័ត៌មានមួយ។
ក្រៅពីការផ្សាយរបស់សារព័ត៌មានកម្ពុជា ហេតុការណ៍ធ្លាក់ឧទ្ធម្ភាគចក្រកាលពី ១០ឆ្នាំមុននោះ ក៏ត្រូវបានចុះផ្សាយដោយសារព័ត៌មានអន្តរជាតិផងដែរ។ ខាងក្រោមនេះ គឺជារូបថតមួយសន្លឹកនៅក្នុងចំណោមរូបថតជាច្រើនទៀតដែលត្រូវបានថតពីករណីធ្លាក់ឧទ្ធម្ភាគចក្រយោធាកម្ពុជាមួយគ្រឿងនៅជាយរាជធានីភ្នំពេញកាលពី ១០ឆ្នាំមុន។
នៅក្នុងសេចក្ដីជូនដំណឹងមួយដែលបង្ហោះនៅលើទំព័រហ្វេសប៊ុករបស់ខ្លួន ក្រសួងការពារជាតិបញ្ជាក់ថា ឧទ្ធម្ភាគចក្រយោធាមួយគ្រឿង បានបាត់ការទាក់ទងជាមួយទីបញ្ជាការកងទ័ពអាកាសនៅតំបន់ជួរភ្នំក្រវ៉ាញស្ថិតនៅចន្លោះខេត្តពោធិ៍សាត់ និងខេត្តកោះកុង កាលពីថ្ងៃទី១២ ខែកក្កដា ឆ្នាំ២០២៤។
ក្រសួងបញ្ជាក់ទៀតថា មនុស្ស ២នាក់ធ្វើដំណើរនៅក្នុងឧទ្ធម្ភាគចក្រដែលបាត់ខ្លួននោះ ក្នុងនោះមានប្រធានក្រុមម្នាក់ និងអាកាសយានិកម្នាក់ ដែលពួកគេស្ថិតក្នុងបេសកកម្មហោះហើរហ្វឹកហ្វឺនទៅតាមផែនការរបស់កងទ័ពអាកាស។
ក្រសួងការពារជាតិ បញ្ជាក់ថា ការហោះហើរហ្វឹកហ្វឺននេះ បានកើតឡើងចំពេលអាកាសធាតុមិនអំណោយផល ហើយក្រុមប្រតិបត្តិការរុករក ត្រូវបានបញ្ជូនទៅកាន់តំបន់ជួរភ្នំក្រវ៉ាញ ជាទីដែលសម្បូរព្រៃក្រាស់ និងមានអ័ព្ទខ្លាំង។ ខាងក្រោមនេះ គឺជារូបភាពផ្ដាមចេញពីសេចក្ដីជូនដំណឹងរបស់ក្រសួងការពារជាតិ ដែលត្រូវបានបង្ហោះនៅលើបណ្ដាញសង្គមនៅថ្ងៃទី១៤ ខែកក្កដា ឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីសេចក្ដីជូនដំណឹងរបស់ក្រសួងការពារជាតិនៅលើបណ្ដាញសង្គមកាលពីថ្ងៃទី១៣ ខែកក្កដា ឆ្នាំ២០២៤ ដែលនិយាយពីការបាត់ខ្លួនឧទ្ធម្ភាគចក្រមួយគ្រឿង។
ទោះជាយ៉ាងណា ក្រសួងការពារជាតិកម្ពុជាមិនបានបង្ហាញពីព័ត៌មានឧទ្ធម្ភាគចក្រ និងអត្តសញ្ញាណពេញលេញរបស់មនុស្ស ២នាក់ ដែលធ្វើដំណើរនៅលើឧទ្ធម្ភាគចក្រនោះទេ។
សន្និដ្ឋាន
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើ មិនត្រឹមត្រូវនោះឡើយ។ អ្នកនាំពាក្យក្រសួងការពារជាតិ លោក ឈុំ សុជាត បញ្ជាក់ថា ឧទ្ធម្ភាគចក្រដែលកំពុងបាត់ខ្លួននោះ មិនទាន់ត្រូវបានរកឃើញនៅឡើយទេ ហើយប្រតិបត្តិការរុករកកំពុងបន្តធ្វើនៅតំបន់ជួរភ្នំក្រវ៉ាញចន្លោះខេត្តពោធិ៍សាត់ និងកោះកុង ជាទីដែលយានមួយគ្រឿងនេះបានបាត់ការទាក់ទងជាមួយទីបញ្ជាការកងទ័ពអាកាស។
Title:ព័ត៌មានក្លែងក្លាយផ្សាយថា គេបានរកឃើញបំណែកឧទ្ធម្ភាគចក្រដែលបាត់ខ្លួន
Written By: Jay UdomResult: False
