បន្ទាប់ពីជំនួបដ៏តានតឹងជាមួយប្រធានាធិបតីអាមេរិក លោក Donald Trump កាលពីចុងខែកុម្ភៈកន្លងមកនេះ វីដេអូមួយដែលបង្ហាញប្រជាជនលុតជង្គង់តាមដងផ្លូវ ត្រូវបានគេអះអាងថា វាជាវីដេអូប្រជាជនលុតជង្គង់គោរពប្រធានាធិបតី Volodymyr Zelenskyy វិលត្រឡប់ពីសហរដ្ឋអាមេរិកវិញ។ ការអះអាងនេះ ត្រូវបានចែកចាយព្រោងព្រាតលើបណ្ដាញសង្គម ហើយអ្នកប្រើប្រាស់បណ្ដាញសង្គមជាច្រើនបញ្ចេញមតិចម្រុះបែបដោយជឿតាមការអះអាងនេះ។ ទោះជាយ៉ាងណា ការផ្ទៀងផ្ទាត់រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយដែលបង្ហាញមនុស្សម្នាលុតជង្គង់នៅតាមដងផ្លូវមួយចំពោះក្បួនរថយន្តមួយខ្សែ ត្រូវបានគេបង្ហោះនៅលើបណ្ដាញសង្គមជាមួយការអះអាងថា ប្រធានាធិបតីអ៊ុយក្រែន លោក Volodymyr Zelenskyy ទទួលបានការគោរពពីប្រជាជនអ៊ុយក្រែនក្នុងនាមជាវីរបុរសនៅពេលលោកត្រឡប់ពីសហរដ្ឋអាមេរិកវិញ ក្រោយពីមានជំនួបតានតឹងជាមួយប្រធានាធិបតីអាមេរិក លោក Donald Trump។
វីដេអូឃ្លីបមានរយៈពេលខ្ទង់ ១នាទីនេះ ទាក់ទាញអ្នកប្រើប្រាស់បណ្ដាញសង្គមចូលទស្សនារហូតដល់ជិត ៥សែនដង ការចែកចាយបន្តរហូតដល់ជាតិ ២ពាន់ដង និងការបញ្ចេញចម្រុះបែបក្នុងន័យជឿតាមខ្លឹមសារសំណេរនេះ។
ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី២ ខែមីនា ឆ្នាំ២០២៥ ជាមួយសំណេររៀបរាប់ថា “វីរបុរសអ៊ុយក្រែនចូលផ្ទះវិញក្រោយជំនួបម៉ាកងាយពីគ្រូជោគជ័យនៅអាមេរិក យ៉ាប់ណាស់យកទ្រឹស្ដីរកស៊ីមកដឹកនាំនយោបាយ! ជំនួយឥតសំណងក៏ទាមទារប្ដូរយកកម្រៃជារ៉ែកម្រ! ចង់ចំណេញដាច់ចំណង សូម្បីតែអឺរ៉ុប ណាតូ ក៏ត្រៀមពង្រឹងខ្លួនមិនពឹងលើអាមេរិក! (ខាតទាំងអស់គ្នា) ចិនស្ងាត់ជ្រៀបសម្ងំដើរទៅមុខ”។
ខាងក្រោមនេះ គឺជាវីដេអូដូចគ្នានេះដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀត ដែលនាំឱ្យមានការចែកចាយបន្តរហូតដល់ជិត ១ពាន់ដង។
ខាងក្រោមនេះ គឺជាវីដេអូដូចគ្នានេះដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកម្នាក់ទៀតកាលពីថ្ងៃ៣ ខែមីនា ឆ្នាំ២០២៥។
ក្រៅពីការអះអាងជាភាសាខ្មែរហើយនោះ វីដេអូនេះក៏ត្រូវបានបង្ហោះនៅលើបណ្ដាញសង្គម TikTok ជាមួយការអះអាងជាភាសាអង់គ្លេសផងដែរថា ប្រជាជនអ៊ុយក្រែនលុតជង្គង់គោរព និងទទួលស្វាគមន៍ប្រធានាធិបតីរបស់ពួកគេ បន្ទាប់ពីវិលត្រឡប់ពីជំនួបជាមួយប្រធានាធិបតី Donald Trump នៅសេតវិមាន។
ខាងក្រោមនេះ គឺជាវីដេអូដូចគ្នាដែលត្រូវបានបង្ហោះនៅលើបណ្ដាញសង្គម TikTok កាលពីថ្ងៃទី៣ ខែមីនា ឆ្នាំ២០២៥ ជាមួយសំណេរជាភាសាអង់គ្លេសថា “Ukraine welcoming back President Zelenakyy after The White HouseMeeting with President Trump!”។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើការអះអាងដូចដែលត្រូវបានរៀបរាប់ខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
ជំនួបប្រធានាធិបតីអាមេរិក លោក Donald Trump និងប្រធានាធិបតីអ៊ុយក្រែន លោក Volodymyr Zelenskyy បានប្រែក្លាយជាមានភាពតានតឹងនឹងគ្នានៅចំពោះមុខក្រុមអ្នកសារព័ត៌មាននៅឯសេតវិមានកាលពីថ្ងៃទី២៨ ខែកុម្ភៈកន្លងមកនេះ។
លោក Zelenskyy បានចាកចេញពីសេតវិមានដោយមិនបានចុះហត្ថលេខាលើកិច្ចព្រមព្រៀងរ៉ែកម្រនោះឡើយ បន្ទាប់ពីមេដឹកនាំទាំងពីរជជែកតឹងសរសៃកដាក់គ្នាទៅវិញទៅមកនោះ។
ទោះជាយ៉ាងណា តាមរយៈ Google Reverse Image Search វាបង្ហាញថា វីដេអូដែលបង្ហាញមនុស្សម្នាលុតជង្គង់នៅតាមដងផ្លូវនៅពេលក្បួនរថយន្តស៊ីរ៉ែនមួយខ្សែឆ្លងកាត់នោះ ត្រូវបានបង្ហោះនៅលើបណ្ដាញសង្គម TikTok តាំងពីដើមខែកុម្ភៈកន្លងមកនេះ។
នេះបញ្ជាក់ថា ហេតុការណ៍នេះ បានកើតឡើងមុនពេលប្រធានាធិបតីអ៊ុយក្រែន លោក Volodymyr Zelenskyy ជួបប្រធានាធិបតីអាមេរិក លោក Donald Trump នៅសេតវិមានកាលពីថ្ងៃទី២៨ ខែកុម្ភៈ ឆ្នាំ២០២៥ទៅទៀត។
ខាងក្រោមនេះ គឺជាវីដេអូដែលត្រូវបានបង្ហោះនៅលើបណ្ដាញសង្គម TikTok កាលពីថ្ងៃទី១ ខែកុម្ភៈ ឆ្នាំ២០២៥ ដោយគ្រាន់តែសំណេរលើវីដេអូនោះថា “Hero Ukraine” តែប៉ុណ្ណោះ។
ថ្វីបើយើងមិនអាចរកឃើញប្រភពដើមនៃវីដេអូនេះ ប៉ុន្តែ វីដេអូដទៃទៀតនៅលើបណ្ដាញសង្គមដែលបង្ហាញមនុស្សម្នាលុតជង្គង់អមសងខាងផ្លូវអំឡុងពេលក្បួនរថយន្តមួយខ្សែឆ្លងកាត់នោះ គឺជាការលុតជង្គង់គោរពដល់វីរភាពទានហានអ៊ុយក្រែនដែលបានពលីជីវិតនៅលើសមរភូមិប្រឆាំងនឹងការឈ្លានពានរបស់រុស្ស៊ី។
ខាងក្រោមនេះ គឺជាវីដេអូបង្ហាញពលរដ្ឋអ៊ុយក្រែនលុតជង្គង់គោរពដល់ទាហានពលីលើសមរភូមិដែលត្រូវបានបញ្ជូនត្រឡប់មកប្រទេសវិញ ដែលវីដេអូនេះត្រូវបានបង្ហោះលើបណ្ដាញសង្គម X (អតីត Twitter) កាលពីថ្ងៃទី១ ខែមេសា ឆ្នាំ២០២២កន្លងមក។
ខាងក្រោមនេះ គឺជារូបភាពផ្ដាមចេញពីរូបថតផ្សាយដោយ CNN ដែលបង្ហាញប្រជាជន និងទាហានអ៊ុយក្រែនលុតជង្គង់គោរពនៅតាមដងផ្លូវអំឡុងពិធីបុណ្យសព លោក Oleksandr Savchenko ទាហានម្នាក់ដែលបានពលីជីវិតនៅលើសមរភូមិចម្បាំងប្រឆាំងនឹងការឈ្លានពានរបស់រស្ស៊ី កាលពីខែកុម្ភៈ ឆ្នាំ២០២៤កន្លងមក។
ផ្អែកតាមរបាយការណ៍តាមដានជើងហោះហើររបស់មេដឹកនាំអ៊ុយក្រែននោះ សារព័ត៌មាន The Kyiv Independent (archived) បានរាយការណ៍ថា កាលពីថ្ងៃទី១ ខែមីនា ប្រធានាធិបតី Zelenskyy បានធ្វើដំណើរតាមយន្តហោះពីសហរដ្ឋអាមេរិកត្រង់ទៅចក្រភពអង់គ្លេសតែម្ដង បន្ទាប់ពីជំនួបជាមួយលោក Trump ដែលបញ្ចប់ទៅដោយទំនាស់ពាក្យសម្ដីនឹងគ្នា។
ខាងក្រោមនេះ គឺជារូបភាពផ្ដាមចេញពីវេបសាយ Flight Aware ដែលបង្ហាញយន្តហោះប្រធានាធិបតីអ៊ុយក្រែន ហោះហើរចាកចេញពីព្រលានយន្តហោះកងទ័ពអាកាសអាមេរិក Joint Base Andrews នៅម៉ោងជិត ១១យប់ ថ្ងៃទី២៨ ខែកុម្ភៈ ឆ្ពោះទៅព្រលានយន្តហោះ Stansted Airport ស្ថិតនៅទីក្រុងឡុងដ៍ នៅថ្ងៃទី០១ ខែមីនា ឆ្នាំ២០២៥។
Flight Aware Reports | Archived Link
បន្ទាប់មក មេដឹកនាំអ៊ុយក្រែនរូបនេះ ត្រូវបានស្វាគមន៍ពេញទំហឹងពីសំណាក់នាយករដ្ឋមន្ត្រីអង់គ្លេស លោក Keir Starmer នៅឯវិមាន Downing Street នៅមុនជំនួបកំពូលថ្នាក់ដឹកនាំអឺរ៉ុបនៅចុងសប្ដាហ៍នេះ ដើម្បីពិភាក្សាពីវិបត្តិអ៊ុយក្រែន។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូនេះបង្ហាញប្រជាជនអ៊ុយក្រែនលុតជង្គង់គោរពដល់ទាហានអ៊ុយក្រែនពលីនៅលើសមរភូមិ ហើយត្រូវបានបញ្ជូនត្រឡប់ពីសមរភូមិវិញ។ វីដេអូនេះ មិនបានបង្ហាញថា ប្រជាជនអ៊ុយក្រែនលុតជង្គង់គោរពដល់ប្រធានាធិបតី Volodymyr Zelenskyy វិលត្រឡប់ចូលប្រទេសវិញ ក្រោយមានជំនួបតានតឹងជាមួយលោក Donald Trump នោះឡើយ។
Title:ការអះអាងមិនត្រឹមត្រូវថា ពលរដ្ឋអ៊ុយក្រែនលុតជង្គង់ទទួលមេដឹកនាំក្រោយជំនួបជាមួយ Trump
Fact Check By: Jay UdomResult: False
