តើពលរដ្ឋវៀតណាមទទួលបានសញ្ជាតិកម្ពុជាមានចំនួនប៉ុន្មាន?

ចំនួនពលរដ្ឋវៀតណាមរស់នៅលើទឹកដីកម្ពុជា តែងតែជាប្រធានបទនៃការជជែកនៅក្នុងសង្វៀននយោបាយ និងបណ្ដាញសង្គមផងដែរ។ ថ្មីៗនេះ មានការអះអាងនៅលើបណ្ដាញសង្គមថា មានជនជាតិវៀតណាមជាង ១០ម៉ឺននាក់បានចូលសញ្ជាតិកម្ពុជាក្នុងមួយឆ្នាំៗ។ ការអះអាងនេះ ត្រូវបានចែករំលែកបន្តយ៉ាងច្រើន និងទទួលបានមតិយោបល់ចម្រុះពីអ្នកប្រើប្រាស់បណ្ដាញសង្គមនិយាយភាសាខ្មែរ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះមិនត្រឹមត្រូវនោះឡើយ។

ការអះអាងលើបណ្ដាញសង្គម

ការអះអាងមួយនៅលើបណ្ដាញសង្គមកាលពីសប្ដាហ៍មុន បានលើកឡើងថា ពលរដ្ឋវៀតណាមជាង ១សែននាក់ បានចូលសញ្ជាតិកម្ពុជាក្នុងមួយឆ្នាំៗ ហើយថា កម្ពុជានឹងរលាយប្រទេសនៅឆ្នាំ២០៥០ខាងមុខ។

ការអះអាងបែបនេះ ទទួលបានការចែករំលែកបន្តយ៉ាងច្រើនដង ហើយមានការបញ្ចេញមតិយោបល់ចម្រុះបែបពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។

ខាងក្រោមនេះ គឺជារូបភាពផ្ដាមពីការអះអាងដែលបង្ហោះនៅលើបណ្ដាញសង្គមកាលពីថ្ងៃទី២៩ ខែវិច្ឆិកា ឆ្នាំ២០២៣ ដែលរៀបរាប់ថា «យួនចូលសញ្ជាតិ១ឆ្នាំជាង១០ម៉ឺននាក់ ខ្មែរមានបារមីឡើងដល់ឋានសួគ៌ អ្នកគ្មានបារមីធ្លាក់ដល់ឋានរក ២០៥០រលាយល្មម សង្វេគប្រជាជាតិខ្លួនណាស់!»។

Facebook Post | Archived Link

ការត្រួតពិនិត្យការពិត

Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការស្នើសុំព័ត៌មាន និងការបកស្រាយពីមន្ត្រីពាក់ព័ន្ធនឹងបញ្ហានេះ និងការពិនិត្យមើលលើរបាយការណ៍នានា ដែលនាំឱ្យយើងរកឃើញការពិតដូចខាងក្រោមនេះ។

ទាក់ទងនឹងការអះអាងខាងលើនេះ អគ្គនាយកនៃអគ្គនាយកដ្ឋានអត្តសញ្ញាណកម្មរបស់ក្រសួងមហាផ្ទៃ លោក តុប នេត បានបញ្ជាក់តាមតេឡេក្រាមកាលពីសប្ដាហ៍មុនថា ជាព័ត៌មាន«មិនពិត»។

លោក តុប នេត បានបញ្ជាក់បន្ថែមថា ជនជាតិវៀតណាមសរុប ១៤២នាក់ហើយ ត្រូវបានផ្ដល់សញ្ជាតិកម្ពុជាគិតចាប់តាំងពីឆ្នាំ១៩៩៩មក ក្នុងនោះមានស្ត្រី ៣៨នាក់ផងដែរ។

សម្រាប់តួលេខនៅមុនឆ្នាំ១៩៩៩វិញ មន្ត្រីក្រសួងមហាផ្ទៃរូបនេះ បានបញ្ជាក់ថា គ្មានសេចក្ដីសម្រេចណាមួយផ្ដល់សញ្ជាតិកម្ពុជាដល់ជនបរទេសនោះឡើយនៅមុនឆ្នាំនេះ។

នៅពេលត្រូវបានសួរបញ្ជាក់អំពីវត្តមានជនជាតិវៀតណាមដ៏ច្រើននៅកម្ពុជា និងការកាន់កាប់ឯកសារអត្តសញ្ញាណប័ណ្ណកម្ពុជានោះ លោក តុប នេត បានបញ្ជាក់ថា ក្រៅពីតួលេខខាងលើ ពលរដ្ឋវៀតណាមរស់នៅក្នុងប្រទេសកម្ពុជាក្នុងឋានៈជាជនអន្តោប្រវេសន៍ និងកាន់កាប់ប័ណ្ណពណ៌លឿងជាឯកសារសម្គាល់ការស្នាក់នៅបណ្ដោះអាសន្ន។

ពលរដ្ឋវៀតណាមរស់នៅក្នុងប្រទេសកម្ពុជា ត្រូវបានប៉ាន់ប្រមាណថាមានចំនួនប្រហែល ១៥៦,០០០នាក់ នេះបើយោងតាមសេចក្ដីរាយការណ៍មួយរបស់សារព័ត៌មានវៀតណាម NGAY NAY កាលពីឆ្នាំ២០១៦កន្លងមក ដែលផ្អែកតាមរបាយការណ៍មួយមានចំណងជើងថា «Potential and Distribution of Vietnamese People Abroad» ចេញផ្សាយដោយ Diplomatic Academy កាលពីឆ្នាំ២០១២កន្លងមក។ [archived]

សេចក្ដីរាយការណ៍មួយរបស់ទីភ្នាក់ងារព័ត៌មានរ៉យទ័រដែលផ្អែកតាមទិន្នន័យរបស់រដ្ឋាភិបាលកម្ពុជា បានដាក់ថា ពលរដ្ឋវៀតណាមនៅកម្ពុជាមានចំនួនប្រហែល ១៨ម៉ឺននាក់ ឬស្មើនឹង ១ភាគរយនៃចំនួនប្រជាជនកម្ពុជាសរុប។ [archived]

អ្នកនាំពាក្យអគ្គនាយកដ្ឋានអន្តោប្រវេសន៍ លោក កែវ វណ្ណថន បានបញ្ជាក់ប្រាប់ Fact Crescendo Cambodia តាមតេឡេក្រាមកាលពីសប្ដាហ៍មុនថា ជនបរទេសអន្តោប្រវេសន៍ដែលកំពុងស្នាក់នៅក្នុងប្រទេសកម្ពុជា មានចំនួនជាង ៨ម៉ឺននាក់នៅក្នុងចំណោម ១១សញ្ជាតិផ្សេងគ្នា។

ចំពោះការអះអាងខាងលើនេះ អ្នកនាំពាក្យរូបនេះ បានចាត់ទុកជាព័ត៌មាន«មិនពិត» ដែលត្រូវបានបង្កើតឡើងដើម្បីធ្វើឱ្យមហាជនយល់ច្រឡំ និងបង្កភាពវឹកវរក្នុងសង្គម។

ទោះជាយ៉ាងណា គ្មានតួលេខឯកភាពគ្នានោះឡើយទាក់ទងនឹងចំនួនពលរដ្ឋវៀតណាមដែលកំពុងរស់នៅក្នុងប្រទេសកម្ពុជា។ ក្នុងសេចក្ដីរាយការណ៍មួយរបស់ខ្លួនកាលពីឆ្នាំ២០១៦កន្លងមក សារព័ត៌មាន Asia Sentinel បានបញ្ជាក់ថា ពលរដ្ឋវៀតណាមនៅកម្ពុជា ត្រូវបានគេជឿជាក់ថា មានចំនួនរហូតដល់ ៧៥ម៉ឺននាក់។ [archived]

របាយការណ៍របស់អង្គការ Minority Rights Group International ដែលបានរួបរួមទិន្នន័យមកពីស្ថាប័នផ្សេងៗ បានដាក់ការប៉ាន់ប្រមាណថា ចំនួនជនជាតិវៀតណាមរស់នៅក្នុងប្រទេសកម្ពុជា ស្ថិតនៅចន្លោះពី ៤០ម៉ឺន ទៅ ៧០ម៉ឺននាក់នៅទូទាំងប្រទេស។ អង្គការដដែលនេះ បានលើកឡើងថា ៩០ភាគរយនៃជនជាតិវៀតណាមរស់នៅក្នុងប្រទេសកម្ពុជា ពុំមានឯកសារអត្តសញ្ញាណដូចជា សំបុត្រកំណើត ឬអត្តសញ្ញាណប័ណ្ណនោះឡើយ។ [archived]

សន្និដ្ឋាន

Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ មន្ត្រីក្រសួងមហាផ្ទៃ បានបញ្ជាក់ថា ជនជាតិវៀតណាមទទួលបានសញ្ជាតិកម្ពុជាមានចំនួន ១៤២នាក់គិតចាប់ពីឆ្នាំ១៩៩៩មក។ ក្រៅពីចំនួននេះ ជនជាតិវៀតណាមផ្សេងទៀត កំពុងរស់នៅកម្ពុជាដោយកាន់ប័ណ្ណស្នាក់នៅពណ៌លឿង។