ខណៈដែលរូបថតជាច្រើនត្រូវបានបង្ហោះលើបណ្ដាញសង្គមជារៀងរាល់ថ្ងៃនេះ រូបថតព្រះសង្ឃមួយអង្គ ត្រូវបានគេបង្ហោះ និងចែករំលែកព្រោងព្រាតជាមួយការអះអាងថា ព្រះអង្គមានជន្មាយុ ១០២វស្សាហើយ។ រូបថតជាមួយនឹងការអះអាងបែបនេះ ត្រូវបានចែករំលែកយ៉ាងផុសផុលលើបណ្ដាញសង្គមហ្វេសប៊ុកប៉ុន្មានថ្ងៃចុងក្រោយនេះ។ ទោះជាយ៉ាងណា បន្ទាប់ពីបានត្រួតពិនិត្យតាមរយៈ Google Reverse Image Search ហើយ យើងបានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយដែលផុសផុលនៅលើបណ្ដាញសង្គម បានបង្ហោះរូបថតព្រះសង្ឃមួយអង្គមានរូបកាយស្គម និងលើកឡើងថា ព្រះសង្ឃមួយមានជន្មាយុ ១០២វស្សាហើយ។
ការអះអាងនេះ ត្រូវបានចែករំលែកព្រោងព្រាតលើបណ្ដាញសង្គមហ្វេសប៊ុករយៈពេលប៉ុន្មានថ្ងៃមកនេះ ហើយក៏មានអ្នកប្រើប្រាស់បណ្ដាញសង្គមជាច្រើនបានបញ្ចេញមតិយោបល់ទៅលើការអះអាងនេះ ក្នុងនោះមានអ្នកប្រើប្រាស់ហ្វេសប៊ុកមួយចំនួន បានចោទសួរពីសុក្រឹតភាពនៃព័ត៌មាននេះ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃម្សិលមិញ ដែលរៀបរាប់ថា «លោកតាមានព្រះជន្ម ១០២ឆ្នាំ ឃើញហើយជួយស៊ែរម្នាក់មួយឱ្យអ្នកផ្សេងបានឃើញផង សាធុសាធុ»។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតកាលពីថ្ងៃម្សិលមិញនេះ។
ការអះអាងដដែលនេះ ត្រូវបានបង្ហោះលើបណ្ដាញសង្គមតាំងពីជាង ៦ខែមុនមកម៉្លេះ ហើយរូបថតជាមួយនឹងសំណេរបែបនេះ នៅតែត្រូវបានបង្ហោះនៅលើបណ្ដាញសង្គម និងចែករំលែកជាបន្តបន្ទាប់។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកមួយដែលបានបង្ហោះការអះអាងនេះកាលពីជាង ៦ខែមុន និងត្រូវបានចែករំលែកបន្តជាច្រើនដង។
ចំណែកខាងក្រោមនេះ គឺជារូបភាពផ្ដាមចេញពីការអះអាងដូចគ្នាដែលត្រូវបានបង្ហោះលើបណ្ដាញសង្គមហ្វេសប៊ុកកាលពីចុងខែឧសភាកន្លងមក ហើយទទួលបានការចែករំលែកបន្តរហូតដល់ជាង ២៣០០ដង និងមានការបញ្ចេញមតិយ៉ាងច្រើន។
រូបថតជាមួយសំណេរបែបនេះ ត្រូវបានបង្ហោះព្រោងព្រាតលើបណ្ដាញសង្គមហ្វេសប៊ុក ហើយក៏ត្រូវបានចែករំលែកបន្តយ៉ាងផុសផុលផងដែរ។ សូមមើលការអះអាងនេះតាមរយៈតំណភ្ជាប់នៅទីនេះ ១ (archived), ២ (archived), និង ៣ (archived),។
ការផ្ទៀងផ្ទាត់ការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញរូបថតព្រះសង្ឃអង្គនេះ ដែលត្រូវបានចុះផ្សាយដោយប្រព័ន្ធផ្សព្វផ្សាយថៃកាលពីឆ្នាំ២០២០កន្លងមក។
សេចក្ដីរាយការណ៍របស់វេបសាយថៃ Khaosod កាលពីថ្ងៃទី០៦ ខែធ្នូ ឆ្នាំ២០២០ បានឱ្យដឹងថា ព្រះសង្ឃក្នុងរូបថតនេះ មានព្រះនាមថា ហ្លួងពូថង ដែលជាព្រះសង្ឃមានកេរ្តិ៍ឈ្មោះនៅក្នុងខេត្តស៊ីសាកេត នៃតំបន់ឦសានឆៀងខាងត្បូងរបស់ប្រទេសថៃ។
សារព័ត៌មានថៃមួយនេះ បានឱ្យដឹងទៀតថា ព្រះសង្ឃ ហ្លួងពូថង បានសុគតនៅព្រឹកថ្ងៃទី៣០ ខែវិច្ឆិកា ឆ្នាំ២០២០ ក្នុងជន្មាយុ ១១៥វស្សា នៅឯវត្តបានឃូប ស្ថិតក្នុងស្រុកណាំឃ្លៀង ខេត្តស៊ីសាកេត។ សូមមើលអត្ថបទទាំងស្រុងនៅទីនេះ (archived)។
ដំណឹងមរណភាពរបស់ព្រះសង្ឃអង្គនេះ ក៏ត្រូវចុះផ្សាយដោយវេបសាយ Sanook របស់ថៃ បានចុះផ្សាយកាលពីចុងខែវិច្ឆិកា ក្នុងឆ្នាំ២០២០ផងដែរ។
សេចក្ដីរាយការណ៍របស់វេបសាយ Sanook បានដឹងថា ព្រះសង្ឃ ហ្លួងពូថង បានសុគតយ៉ាងស្ងប់សុខ បន្ទាប់ពីបួសជាសង្ឃក្នុងព្រះពុទ្ធសាសនាអស់រយៈពេល ២១វស្សា។
បើតាមសេចក្ដីរាយការណ៍របស់វេបសាយដដែលនេះ ព្រះសង្ឃហ្លួងពូថង ប្រសូត្រនៅថ្ងៃទី០៤ ខែមករា ឆ្នាំ១៩០៦ នៅក្នុងរជ្ជកាលរាមាទី៥ នៃរាជវង្សចក្រីរបស់ប្រទេសថៃ។ ហ្លួងពូថង បានសាងភ្នួសជាសង្ឃនៅឆ្នាំ១៩៧០ ឬនៅអាយុ ៤៩ឆ្នាំ នៅឯវត្តបានឃូប ហើយបន្ទាប់មកបានលាចាកភ្នួសទៅប្រកបជីវិត។
វេបសាយថៃ បានឱ្យដឹងទៀតថា ហ្លួងពូថង បានសាងភ្នួសជាថ្មីនៅឆ្នាំ១៩៩៩ ឬនៅក្នុងជន្មាយុ ៧២ឆ្នាំ នៅឯវត្តស្វាងវ៉ារីរតនារាម ស្ថិតក្នុងស្រុកណាមឃ្លៀង ក្នុងខេត្តស៊ីសាកេតដដែល។
ព្រះសង្ឃអង្គនេះបាននិមន្តទៅតាំងសមាធិនៅក្នុងព្រៃជ្រៅស្ថិតនៅតាមបណ្ដោះព្រំដែនកម្ពុជា-ថៃ និងព្រំដែនថៃ-ឡាវ ហើយត្រូវបានគណៈសិស្សចាត់ទុកជាព្រះសង្ឃមានចំណេះជ្រៅជ្រះខាងព្រះពុទ្ធសាសនា និងមានចិត្តល្អ។
នៅក្នុងអត្ថបទមួយរបស់វេបសាយ Ban Khub Temple យើងបានឃើញអត្តសញ្ញាណប័ណ្ណ ឬប័ណ្ណប្រជាជនរបស់ព្រះសង្ឃហ្លួងពូថង ដែលបញ្ជាក់ឆ្នាំកំណើតរបស់ព្រះអង្គនៅឆ្នាំ១៩០៦។ សូមមើលអត្ថបទទាំងស្រុងនៅទីនេះ។
Ban Khub Temple | Archived Link
បើតាមការចុះផ្សាយរបស់សារព័ត៌មានថៃ ហ្លួងពូថងមានព្រះជន្មរហូតដល់ ១១៨វស្សាហើយ ប្រសិនបើព្រះសង្ឃអង្គនេះនៅមានព្រះជន្មមកដល់ឆ្នាំ២០២៣នេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សារព័ត៌មានថៃ បានរាយការណ៍ថា ព្រះសង្ឃនាមហ្លួងពូថងបានសុគតនៅខែវិច្ឆិកាឆ្នាំ២០២០ នៅក្នុងជន្មាយុ ១១៥វស្សា។ ប្រសិនបើព្រះអង្គមានជន្មាយុមកដល់ឆ្នាំ២០២៣ ព្រះអង្គមានជន្មាយុ ១១៨វស្សា មិនមែន ១០២វស្សាដូចការអះអាងនោះឡើយ។
Title:តើព្រះសង្ឃមួយអង្គក្នុងរូបថតនេះមានជន្មាយុ ១០២វស្សាមែនទេ?
Written By: Jay UdomResult: Missing Context
