បន្ទាប់ពីហេតុការណ៍ភ្លើងឆាបឆេះរថយន្តដឹកកូនសិស្សសាលាថៃកាលពីថ្ងៃអង្គារកន្លងមកនេះ ស្រាប់តែមានវីដេអូឃ្លីបមួយ ដែលបង្ហាញកូនសិស្សច្រៀងលេងនៅលើរថយន្តក្រុងមួយ ត្រូវបានបង្ហោះនៅលើបណ្ដាញសង្គមជាមួយការអះអាងថា វាទិដ្ឋភាពនៅមុនពេលកើតហេតុការណ៍ដ៏រន្ធត់នោះ។ វីដេអូជាមួយសំណេរបែបនេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា យើងរកឃើញថា ការផ្សព្វផ្សាយវីដេអូនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយមានរយៈពេលជាង ១នាទីដែលបង្ហាញកុមារីតូចៗជាសិស្សសាលាថៃច្រៀងលេងនៅក្នុងឡានក្រុងមួយ ត្រូវបានគេបង្ហោះនៅលើបណ្ដាញសង្គមចាប់ពីថ្ងៃម្សិលមិញនេះ ដោយគេអះអាងថា វាជាវីដេអូសិស្សាថៃនៅមុនពេលត្រូវភ្លើងឆាបឆេះ។
វីដេអូនេះ ត្រូវបានចែករំលែកព្រោងព្រាតនៅលើបណ្ដាញសង្គមដោយអ្នកប្រើប្រាស់ហ្វេសប៊ុកនិយាយភាសាខ្មែរ ដែលបានបញ្ចេញប្រតិកម្មចម្រុះបែប និងមតិយោបល់ជាច្រើន ដោយជឿថា វីដេអូនេះពិតជាក្មេងៗសិស្សសាលាថៃដែលរងនៅក្នុងហេតុការណ៍ភ្លើងឆេះរថយន្តក្រុងមួយកាលពីថ្ងៃទី០១ ខែតុលា ឆ្នាំ២០២៤។
ខាងក្រោមនេះ គឺជាវីដេអូផ្ដាមចេញពីការអះអាងនៅលើបណ្ដាញសង្គមនាពេលថ្មីៗនេះ បន្ទាប់ពីហេតុការណ៍អគ្គិភ័យឆាបឆេះរថយន្តក្រុងដឹកសិស្សតូចៗនៅទីក្រុងបាងកក។
វីដេអូដូចគ្នានេះ ក៏ត្រូវបានបង្ហោះ និងចែករំលែកនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរចាប់តាំងពីហេតុការណ៍ដ៏រន្ធត់នេះបានកើតឡើង។
ខាងក្រោមនេះ គឺជាវីដេអូដែលបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី០២ ខែតុលា ឆ្នាំ២០២៤ ជាមួយសំណេររៀបរាប់ថា “ទិដ្ឋភាពសិស្សសាលាមត្តេយ្យថៃមុនមានព្រឹត្តិការណ៍ភ្លើងឆេះរថយន្ត!”។
ខាងក្រោមនេះ គឺជាវីដេអូដូចគ្នាដែលបង្ហោះនៅលើបណ្ដាញសង្គម ហើយទទួលបានការចាប់អារម្មណ៍ខ្លាំងពីសំណាក់អ្នកប្រើប្រាស់បណ្ដាញសង្គមកម្ពុជា។
ការត្រួតពិនិត្យការពិត
Fact Crescendo បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការរកមើលប្រភពដើមនៃវីដេអូ ដែលនាំឱ្យយើងរកឃើញការពិតដូចខាងក្រោមនេះ។
Our investigation traced the video’s origin to TikTok user “LukMhe2540” (Jirawan Mesan), a kindergarten teacher. She clarified that the video features students from Nakhon Sri Thammarat, not the students involved in the accident from Uthai Thani. The original post, now set to private, was uploaded days before the tragic incident.
នៅក្នុងដំណើរការផ្ទៀងផ្ទាត់នេះ យើងពិនិត្យឃើញថា វីដេអូឃ្លីបមួយនេះ ត្រូវបានយកចេញពីគណនីបណ្ដាញសង្គម TikTok មួយឈ្មោះ Lukmhe2540 ដែលជាគណនីរបស់អ្នកនាង Jirawan Mesan ដែលជាគ្រូបង្រៀនថ្នាក់មត្តេយ្យមួយរូបនៅសាលារៀនមួយនៅខេត្តណាខនស៊ីធម្មរ៉ាត់ ប្រទេសថៃ។
អ្នកគ្រូ Jirawan Mesan បានបង្ហោះវីដេអូនេះជាមួយសំណេរបញ្ជាក់ថា ឃ្លីបវីដេអូនេះគឺជាកូនសិស្សមកពីខេត្តណាខនស៊ីធម្មរ៉ាត់ ដែលត្រូវបានបង្ហោះនៅលើបណ្ដាញសង្គមជាច្រើនថ្ងៃមកហើយ ហើយអ្នកគ្រូបានស្នើទៅអ្នកប្រើប្រាស់បណ្ដាញសង្គមឱ្យពិនិត្យវិនិច្ឆ័យសិនមុននឹងបញ្ចេញមតិភ្ជាប់វីដេអូនេះទៅនឹងហេតុការណ៍ដ៏រន្ធត់កើតឡើងនាពេលថ្មីៗនេះ។
Moreover, according to the report, the students involved in the accident were mostly in elementary grades, with only six kindergarten students. This differs from the viral video showing only kindergarten students on the bus. We also found discrepancies in the uniforms of the students in the viral video and those who escaped from the tragic accident, confirming that the incidents were different.
បើតាមសេចក្ដីរាយការណ៍របស់សារព័ត៌មានថៃ បានឱ្យដឹងថា កូនសិស្សដែលជាប់ពាក់ព័ន្ធនឹងគ្រោះថ្នាក់ភ្លើងឆេះរថយន្តក្រុងនោះ ភាគច្រើនជាសិស្សថ្នាក់បឋម ដោយមានសិស្សថ្នាក់មត្តេយតែ ៦នាក់ប៉ុណ្ណោះ។
យើងក៏បានរកឃើញផងដែរថា ឯកសណ្ឋានកូនសិស្សនៅក្នុងវីដេអូឃ្លីបកំពុងផ្ទុះនេះ មិនដូចទៅនឹងឯកសណ្ឋានដែលស្លៀកពាក់ដោយកូនសិស្សជាប់ពាក់ព័ន្ធហេតុការណ៍ដ៏រន្ធត់នោះដែរ។
សេចក្ដីរាយការណ៍ព័ត៌មានរបស់ប្រព័ន្ធផ្សព្វផ្សាយនានា បានឱ្យដឹងថា មនុស្ស ២៣នាក់ បានស្លាប់នៅក្នុងហេតុការណ៍ភ្លើងឆាបឆេះរថយន្តក្រុងមួយនៅជាយរាជធានីបាងកក កាលពីថ្ងៃទី០១ ខែតុលា ឆ្នាំ២០២៤។
រថយន្តក្រុងដែលត្រូវភ្លើងឆាបឆេះនោះ បានដឹកមនុស្សកូនសិស្ស និងគ្រូជាង ៤០នាក់មកពីសាលាបឋមសិក្សាមួយនៅខេត្តឧថៃថានី ស្ថិតនៅភាគខាងជើងប្រទេសថៃ ដើម្បីធ្វើដំណើរទស្សនកិច្ចសិក្សា។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបដែលបង្ហាញកូនសិស្សថៃច្រៀងលេងនៅក្នុងរថយន្តក្រុងមួយ មិនមែនជាកូនសិស្សដែលជួបហេតុការណ៍ភ្លើងឆាបឆេះរថយន្តក្រុងដ៏រន្ធត់នៅទីក្រុងបាងកកនៅដើមសប្ដាហ៍នេះឡើយ។ វីដេអូឃ្លីបនេះ គឺជាកូនសិស្សថ្នាក់មត្តេយមកពីសាលារៀនមួយស្ថិតនៅក្នុងខេត្តណាខនស៊ីធម្មរ៉ាត់។
Title:ព័ត៌មានមិនត្រឹមត្រូវភ្ជាប់វីដេអូកូនសិស្សច្រៀងលេងទៅនឹងហេតុការណ៍ភ្លើងឆេះឡានក្រុងនៅថៃ
Fact Check By: Jay UdomResult: Misleading
