ស្របពេលដែលលោក សម រង្ស៊ី បានរស់នៅនិរទេសខ្លួននៅក្រៅប្រទេសអស់រយៈពេលជាច្រើនឆ្នាំហើយនោះ រូបថតមួយសន្លឹក បង្ហាញទិដ្ឋភាពលោកអង្គុយកាន់សៀវភៅមួយមានចំណងជើងថា «ប្រវត្តិក្បត់ជាតិបីជំនាន់» ត្រូវបានបង្ហោះដោយអ្នកប្រើប្រាស់ហ្វេសប៊ុកម្នាក់។ ការបង្ហោះបែបនេះ ត្រូវបានទទួលការចែកចាយ និងបញ្ចេញមតិជាច្រើនពីសំណាក់អ្នកប្រើប្រាស់បណ្ដាញសង្គមកម្ពុជា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះដោយអ្នកប្រើប្រាស់ខាងលើនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៩ ខែមករា ឆ្នាំ២០២៣កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះរូបថតមួយសន្លឹកទៅក្នុងក្រុមហ្វេសប៊ុកមួយដែលមានឈ្មោះថា «ក្រុមការពារលទ្ធិប្រជាធិបតេយ្យ» ដោយបានបង្ហាញទិដ្ឋភាពលោក សម រង្ស៊ី អតីតមេដឹកនាំគណបក្សសង្គ្រោះជាតិ និងបាននិរទេសខ្លួនរស់នៅប្រទេសបារាំងនោះ បានកាន់សៀវភៅមួយក្បាល ដែលមានចំណងជើងសៀវភៅ គឺ «ប្រវត្តិក្បត់ជាតិបីជំនាន់»។ រូបថតបង្ហោះខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមទាំងស្រុង ចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «យមបាល នឹងត្រូវចាប់ខ្លួនយកទៅលាងបាបនៅក្នុងនរកអវចីក្នុងពេលឆាប់ខាងមុខតទៅរៀងអើយ សាធុ សាធុ សាធុ»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញ និងបង្ហោះនៅលើទំព័រហ្វេសប៊ុកផ្លូវការរបស់លោក សម រង្ស៊ី កាលពីថ្ងៃទី២០ ខែមេសា ឆ្នាំ២០២០កន្លងទៅ។ រូបថតច្បាប់ដើមរបស់លោក សម រង្ស៊ី ពុំបានកាន់សៀវភៅ ដែលមានចំណងជើងថា «ប្រវត្តិក្បត់ជាតិបីជំនាន់» នោះឡើយ។ ផ្ទុយទៅវិញ សៀវភៅដែលលោក កំពុងកាន់នោះ គឺមានឈ្មោះថា «សុបិន និង ការពិត»។ ខាងក្រោមនេះ គឺជារូបភាពផ្ដាម ចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «ត្រូវបង្ខាំងខ្លួនក្នុងផ្ទះ នៅទីក្រុងប៉ារីស»។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដូចដែលបានរៀបរាប់ខាងលើ ត្រូវបានកាត់ត មុននឹងបង្ហោះ និងចែករំលែកនៅលើបណ្ដាញសង្គមហ្វេសប៊ុក។ ការពិតលោក សម រង្ស៊ី បានអង្គុយ និងអានសៀវភៅមួយក្បាល ដែលមានឈ្មោះថា «សុបិន និង ការពិត» ដោយពុំមានរូបលោក ផ្ដាមនៅលើគម្របសៀវភៅនោះឡើយ។
Title:រូបថតលោក សម រង្ស៊ី អានសៀវភៅ «ប្រវត្តិក្បត់ជាតិបីជំនាន់» ជារូបថតកាត់ត
Fact Check By: Kakada SimResult: Altered
