- >>
- Social
កម្មវិធីបញ្ញាសិប្បនិម្មិតបានបន្ថែមសំណង់អគារខ្ពស់ជាច្រើនម្ដុំអគារកាណាឌីយ៉ា
ខណៈដែលសំណង់ខ្ពស់ៗជាច្រើន ត្រូវបានសាងសង់ឡើងព្រោងព្រាតនៅរាជធានីភ្នំពេញក្នុងរយៈមួយទសវត្សរ៍ចុងក្រោយមកនេះ រូបថតមួយសន្លឹកដែលបង្ហាញអគារខ្ពស់ៗជាច្រើនអគារនាពេលរាត្រីនៅតំបន់ផ្សារធំថ្មី ត្រូវបានបង្ហោះនៅលើបណ្ដាញសង្គមជាមួយការអះអាងថា វាជាបច្ចុប្បន្នភាពរាជធានីភ្នំពេញនាឆ្នាំ២០២៤។ ការបង្ហោះខាងលើ ត្រូវបានចែកចាយ និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៧ ខែមករា ឆ្នាំ២០២៤កន្លងទៅ រូបថតថតពីលំហរមួយសន្លឹកដែលបង្ហាញសំណង់អគារខ្ពស់ៗនៅសង្កាត់ពាណិជ្ជកម្មម្ដុំអគារពាណិជ្ជកម្មវឌ្ឍនៈ និងកាណាឌីយ៉ានោះ ត្រូវបានបង្ហោះនៅលើបណ្ដាញសង្គមជាមួយសំណេរថា វាជាសំណង់អគារខ្ពស់នៅរាជធានីភ្នំពេញនាឆ្នាំ២០២៤នេះ។
ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ជាភាសាអង់គ្លេស ឬប្រែសម្រួលជាភាសាខ្មែរថា «ទីក្រុងភ្នំពេញឆ្នាំ២០២៤ វាហាក់ដូចជាទីក្រុងមួយនេះ បានឈានចូលយុគសម័យថ្មី»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
រូបថតដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានបង្ហោះ និងរកឃើញនៅលើទំព័រហ្វេសប៊ុកមួយ Jeremie Montessuis/Photography កាលពីថ្ងៃទី៣០ ខែធ្នូ ឆ្នាំ២០២៣កន្លងទៅ។
ទំព័រហ្វេសប៊ុកដដែលនេះ ក៏បានភ្ជាប់ជាមួយនឹងសំណេរអំពីការផ្លាស់ប្ដូរដោយបច្ចេកវិទ្យាបញ្ញាសិប្បនិម្មិត (AI) នៅក្នុងសង្គមបច្ចុប្បន្នផងដែរ។
ខាងក្រោមនេះ គឺជារូបថតផ្ដាមចេញពីទំព័រហ្វេសប៊ុកខាងលើនេះ ដែលមានសំណេរបញ្ជាក់នៅលើរូបថតផ្នែកខាងក្រោមថា «A.I. VISION LAB»។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ជាភាសាអង់គ្គេស ឬប្រែសម្រួលជាភាសាខ្មែរថា «ឆ្នាំនេះ យើងបានមើល AI ផ្លាស់ប្តូរពិភពលោកក្នុងពេលវេលាជាក់ស្តែង។ ពីអ្វីដែលបានកើតឡើង វាមិនមានការងឿងឆ្ងល់ទេថា ឆ្នាំខាងមុខនឹងក្លាយជារយៈពេលផ្លាស់ប្តូរច្រើនបំផុតក្នុងប្រវត្តិសាស្ត្រមនុស្សជាតិ»។
រូបថតមួយសន្លឹកខាងលើ ដែលត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) នេះ ក៏ត្រូវបានបង្ហោះ និងចែកចាយនៅបណ្ដាញសង្គម Instagram ក្រោមគណនីរបស់ j.montessuis ផងដែរកាលពីថ្ងៃទី៣០ ខែធ្នូ ឆ្នាំ២០២៣កន្លងទៅ។
Instagram Post | Archived Link
ខាងក្រោមនេះ គឺជារូបភាពផ្ដាមចេញពីគណនីរបស់អ្នកប្រើប្រាស់ Instagram ដែលបានបង្ហាញទិដ្ឋភាពជ្រុងមួយទៀត នៃរាជធានីភ្នំពេញ។
Instagram Post | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានផលិតដោយបច្ចេកវិទ្យាបញ្ញាសិប្បនិម្មិត (AI) និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្ដាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតមួយសន្លឹកដែលទំព័រហ្វេសប៊ុក បានអះអាងថានោះជាទិដ្ឋភាពទីក្រុងភ្នំពេញ ឆ្នាំ២០២៤នោះ គឺធ្វើឱ្យមានការយល់ច្រឡំ និងមិនមែនជាការពិតនោះឡើយ។ រូបថតនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ។
Title:កម្មវិធីបញ្ញាសិប្បនិម្មិតបានបន្ថែមសំណង់អគារខ្ពស់ជាច្រើនម្ដុំអគារកាណាឌីយ៉ា
Written By: Kakada SimResult: Altered
