បន្ទាប់ពីលោក Marco Rubio ឡើងកាន់តំណែងជារដ្ឋមន្ត្រីការបរទេសអាមេរិកជាផ្លូវការកាលពីសប្ដាហ៍មុន សារព័ត៌មានមួយបានចុះផ្សាយថា ប្រមុខការទូតអាមេរិករូបនេះបានប្រាប់អ្នកសារព័ត៌មានថា លោកនឹងទប់ស្កាត់ការរំលោភសិទ្ធិមនុស្សនៅកម្ពុជា។ ព័ត៌មាននេះ ត្រូវបានបង្ហោះចែករំលែកព្រោងព្រាតនៅលើបណ្ដាញសង្គម ក្នុងនោះមានទាំងមេដឹកនាំបក្សជំទាស់ផងដែរ។ ទោះជាយ៉ាងណា ការផ្ទៀងផ្ទាត់រកឃើញថា ព័ត៌មាននេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
សារព័ត៌មាន VOD បានចុះផ្សាយសេចក្ដីរាយការណ៍មួយថា រដ្ឋមន្ត្រីការបរទេសថ្មីរបស់អាមេរិក លោក Marco Rubio នឹងទប់ស្កាត់ការរំលោភបំពានសិទ្ធិមនុស្សនៅក្នុងប្រទេសកម្ពុជា។
នៅក្នុងសេចក្ដីរាយការណ៍នោះ សារព័ត៌មាន VOD ដែលត្រូវបានរដ្ឋាភិបាលកម្ពុជាបិទនៅដើមឆ្នាំ២០២៣នោះ បានដកស្រង់សម្ដីរបស់លោក Marco Rubio ដោយរៀបរាប់ថា ជាអ្វីដែលប្រមុខការទូតថ្មីរបស់អាមេរិកនិយាយសំដៅដល់បញ្ហាសិទ្ធិមនុស្សនៅកម្ពុជា។
នៅក្នុងសេចក្ដីរាយការណ៍របស់ខ្លួន សារព័ត៌មាន VOD បានដកស្រង់សម្ដីលោក Marco Rubio ដែលថ្លែងថា “I expect every nation on earth to advance their national interests. And in those instances – and I hope there will be many — in which our national interests and theirs align, we look forward to working with them. This is in many ways – and again, it was referenced by President Trump yesterday in his speech that he designs – that his overriding goal for global policy is the promotion of peace, the avoidance of conflict, and no agency will more – be more critical in that regard than this one.”
សារព័ត៌មាន VOD ដែលធ្វើប្រតិបត្តិការផលិតព័ត៌មាននៅឯក្រៅប្រទេសនោះ បានបង្ហោះសេចក្ដីរាយការណ៍ព័ត៌មាននេះនៅលើបណ្ដាញសង្គមហ្វេសប៊ុកកាលពីថ្ងៃទី២៩ ខែមករា ឆ្នាំ២០២៥ ហើយត្រូវបានអ្នកប្រើប្រាស់បណ្ដាញសង្គមកម្ពុជាចែករំលែកបន្តលើសពី ១ពាន់ដង។
ខាងក្រោមនេះ គឺវីដេអូនៃសេចក្ដីរាយការណ៍ព័ត៌មានរបស់សារព័ត៌មាន VOD ដែលបង្ហោះនៅលើទំព័រហ្វេសប៊ុកផ្លូវការរបស់ខ្លួន ដោយដាក់ចំណងជើងថា “រដ្ឋមន្រ្តីការបរទេស ត្រាំ ប្រាប់អ្នកសារព័ត៌មានថានឹងទប់ស្កាត់ការបំពានសិទ្ធិមនុស្សនៅកម្ពុជា” មុននឹងសរសេររៀបរាប់បន្តថា “រដ្ឋមន្រ្តីការបរទេសអាមេរិក លោក Marco Rubio បង្ហាញឆន្ទៈរបស់ខ្លួនក្នុងការជំរុញការស្តារប្រជាធិបតេយ្យនៅកម្ពុជាឡើងវិញ ខណៈលោកមើលឃើញថាលទ្ធិប្រជាធិបតេយ្យនៅកម្ពុជារងការបំផ្លាញយ៉ាងខ្លាំងពីសំណាក់មេដឹកនាំកម្ពុជា”។
បើតាមសេចក្ដីរាយការណ៍ព័ត៌មាននេះ សារព័ត៌មាន VOD បានចុះផ្សាយដូច្នេះដោយផ្អែកទៅតាមសំណេររបស់ទំព័រហ្វេសប៊ុកមួយឈ្មោះ SUN News Channel 7 Cambodia កាលពីថ្ងៃទី២៨ ខែមករា ឆ្នាំ២០២៥ ដែលរៀបរាប់ថា ប្រមុខការទូតអាមេរិកថ្មីប្ដេជ្ញាជំរុញឱ្យមានលទ្ធិប្រជាធិបតេយ្យពិតប្រាកដនៅកម្ពុជា និងដាក់ទណ្ឌកម្មលើរដ្ឋាភិបាលកម្ពុជាឱ្យដោះលែងអ្នកទោសនយោបាយ និងរៀបចំការបោះឆ្នោតដោយសេរី និងយុត្តិធម៌នៅកម្ពុជាឡើងវិញ។
ខាងក្រោមនេះ គឺជារូបភាពផ្ដាមចេញពីខ្លឹមសារសំណេរបង្ហោះនៅលើបណ្ដាញសង្គមដោយទំព័រហ្វេសប៊ុក SUN News Channel 7 Cambodia ដែលត្រូវបានសារព័ត៌មាន VOD យោងធ្វើជាប្រភពនៅក្នុងសេចក្ដីរាយការណ៍ព័ត៌មានរបស់ខ្លួនកាលពីថ្ងៃម្សិលមិញនេះ។
បន្ទាប់ពីសារព័ត៌មាន VOD បានចុះផ្សាយនូវព័ត៌មាននេះ មេដឹកនាំបក្សជំទាស់ លោក សម រង្ស៊ី ក៏បានទាញយកវីដេអូសេចក្ដីរាយការណ៍ព័ត៌មាននេះទៅបង្ហោះបន្តនៅលើទំព័រហ្វេសប៊ុកផ្លូវការរបស់លោកផងដែរនៅថ្ងៃនេះ។
ខាងក្រោមនេះ គឺជាវីដេអូសេចក្ដីរាយការព័ត៌មានទាំងស្រុងរបស់សារព័ត៌មាន VOD ដែលលោក សម រង្ស៊ី បានបង្ហោះនៅលើទំព័រហ្វេសប៊ុករបស់លោកថ្ងៃទី៣០ ខែមករា ឆ្នាំ២០២៥ ហើយត្រូវបានចែករំលែកបន្តរាប់រយដង។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ទៅលើព័ត៌មាននេះតាមរយៈការពិនិត្យមើលខ្លឹមសារដើមទាំងស្រុងនៃប្រសាសន៍របស់ប្រមុខការទូតអាមេរិក លោក Marco Rubio ដែលនាំឱ្យយើងរកឃើញការពិតដូចខាងក្រោមនេះ។
លោក Marco Rubio បានស្បថចូលកាន់តំណែងជារដ្ឋមន្ត្រីថ្មីនៃក្រសួងការបរទេសអាមេរិកកាលពីសប្ដាហ៍មុន តែប៉ុន្មានម៉ោងប៉ុណ្ណោះក្រោយពីការស្បថចូលកាន់តំណែងជាផ្លូវការរបស់ប្រធានាធិបតី Donald Trump កាលពីថ្ងៃទី២០ ខែមករា ឆ្នាំ២០២៥។
នៅក្នុងដំណើរពិនិត្យផ្ទៀងផ្ទាត់ទៅលើសម្រង់សម្ដីដែលចុះផ្សាយដោយសារព័ត៌មាន VOD ដូចដែលត្រូវបានរៀបរាប់ខាងលើនេះ យើងបានរកឃើញសម្រង់សម្ដីនេះនៅក្នុងសេចក្ដីប្រកាសព័ត៌មានមួយចេញផ្សាយដោយវេបសាយរបស់ក្រសួងការបរទេសអាមេរិកកាលពីថ្ងៃទី២១ ខែមករា ឆ្នាំ២០២៥។
សេចក្ដីប្រកាសព័ត៌មានមួយ បង្ហាញថា សម្រង់សម្ដីនេះគឺជាមួយផ្នែកនៃសម្ដីដើមទាំងស្រុងរបស់លោក Marco Rubio ដែលបានថ្លែងទៅកាន់បុគ្គលិកក្រសួងការបរទេស នៅពេលលោកធ្វើដំណើរទៅដល់ក្រសួងមួយនេះ ដើម្បីកាន់តំណែងជារដ្ឋមន្ត្រីការបរទេសជាផ្លូវការ។
ក្រៅពីថ្លែងនិយាយថ្លែងអរគុណដល់ក្រុមគ្រួសាររបស់លោក និងមនុស្សសំខាន់ដែលជួយគាំទ្រដល់រូបលោកនោះ លោក Marco Rubio បានបញ្ជាក់ប្រាប់ទៅបុគ្គលិកក្រសួងការបរទេសអាមេរិកថា នៅក្រោមរដ្ឋបាលលោកប្រធានាធិបតី Donald Trump គោលនយោបាយការបរទេសដ៏ច្បាស់លាស់របស់ គឺផ្ដោតទៅលើរឿងមួយប៉ុណ្ណោះ នោះគឺផលប្រយោជន៍របស់ជាតិ។
លោកបញ្ជាក់បន្ថែមថា គោលនយោបាយការបរទេសរបស់លោក Trump ដែលតម្កល់ផលប្រយោជន៍អាមេរិកជាចម្បងនេះ នឹងធ្វើឱ្យអាមេរិកកាន់តែខ្លាំងក្លាជាងមុន មានសុវត្ថិភាពជាងមុន និងកាន់តែមានវិបុលភាព។
ដោយពិនិត្យមើលសម្ដីដើមទាំងស្រុងរបស់គាត់ យើងបានរកឃើញថា ប្រមុខការទូតថ្មីរបស់អាមេរិកគ្មានបាននិយាយដល់ទាល់តែសោះអំពីឈ្មោះប្រទេសកម្ពុជា ឬរដ្ឋាភិបាលកម្ពុជា ឬបញ្ហានានារបស់កម្ពុជា។
លោក Marco Rubio មិនបានថ្លែងបែបនេះទៅកាន់អ្នកសារព័ត៌មានដូចដែលសារព័ត៌មាន VOD ចុះផ្សាយនោះឡើយ។ ផ្ទុយទៅវិញ លោកថ្លែងទៅកាន់បុគ្គលិកក្រសួងការបរទេសតែប៉ុណ្ណោះ នៅពេលលោកចូលកាន់តំណែងជារដ្ឋមន្ត្រីការបរទេសអាមេរិកនៅថ្ងៃដំបូង។
សម្រាប់សម្ដីដើមទាំងស្រុងរបស់លោក Marco Rubio ត្រូវបានគេកត់ត្រាទុកទាំងស្រុង ហើយក៏ត្រូវបានផ្សព្វផ្សាយជាសាធារណៈនៅលើវេបសាយរបស់ក្រសួងការបរទេសអាមេរិកផងដែរ។ គេអាចចូលទៅមើលបានតាមរយៈតំណភ្ជាប់ទៅទីនេះ។
ខាងក្រោមនេះ គឺជារូបភាពផ្ដាមចេញពីមួយផ្នែកនៃសម្ដីដើមរបស់ លោក Marco Rubio អំឡុងពេលថ្លែងទៅកាន់បុគ្គលិកក្រសួងការបរទេសអាមេរិក ហើយដែលត្រូវបានសារព័ត៌មាន VOD ដកស្រង់យកមកចុះផ្សាយ។
U.S. State Department’s Press Release | Archived Link
ខាងក្រោមនេះ គឺជាការប្រែសម្រួលសម្រង់សម្ដីរបស់លោក Marco Rubio នៅត្រង់កថា១២ និង ១៣ នៃសម្ដីដើមទាំងស្រុងរបស់លោកដែលត្រូវបានផ្សព្វផ្សាយនៅលើវេបសាយរបស់ក្រសួងការបរទេសអាមេរិក៖
“ខ្ញុំគឺជាអ្នកថ្មីនៅក្នុងក្រសួងនេះ។ ថ្ងៃនេះ គឺជាថ្ងៃដំបូងរបស់ខ្ញុំនៅក្នុងតួនាទីនេះ ប៉ុន្តែ ខ្ញុំមិនមែនជាមនុស្សប្លែកមុខនោះទេ។ ខ្ញុំធ្លាប់ប្រាស្រ័យទាក់ទងជាមួយមនុស្សជាច្រើនក្នុងចំណោមអ្នកទាំងអស់គ្នា ទាំងអំឡុងពេលដំណើររបស់ខ្ញុំនៅក្រៅប្រទេស និងនៅក្នុងពេលបំពេញតួនាទីប្រចាំថ្ងៃរបស់ពួកយើង។ ការងារខ្ញុំនាពេលនេះ ខុសប្លែកពីមុនហើយ។ ហើយការងាររបស់យើងនៅពេលខ្លះ ក៏នឹងប្រែប្រួលដែរ។ នៅក្នុងរបបសាធារណរដ្ឋរបស់យើង អ្នកបោះឆ្នោតសម្រេចលើទិសដៅរបស់ប្រជាជាតិយើង ទាំងរឿងក្នុងប្រទេស និងកិច្ចការបរទេស ហើយពួកគេបានបោះឆ្នោតជ្រើសរើសលោក Donald J. Trump ធ្វើជាប្រធានាធិបតីរបស់យើង ដោយសារតែគោលនយោបាយការបរទេសស្ថិតនៅលើបេសកកម្មដ៏ច្បាស់លាស់។ ហើយបេសកកម្មនោះ គឺត្រូវធានាថា គោលនយោបាយការបរទេសរបស់យើង គឺផ្ដោតលើរឿងមួយប៉ុណ្ណោះ ហើយនោះគឺតម្កល់ផលប្រយោជន៍របស់ជាតិយើង ដែលត្រូវបានកំណត់ច្បាស់តាមរយៈយុទ្ធនាការបោះឆ្នោតរបស់លោកថា ផលប្រយោជន៍ណាមួយដែលធ្វើឱ្យយើងកាន់តែរឹងមាំ ឬកាន់តែមានសុវត្ថិភាព ឬកាន់តែមានវិបុលភាព ដែលនោះហើយជាបេសកកម្មរបស់យើង។ នោះហើយជាតួនាទីរបស់ពួកយើងនៅទូទាំងពិភពលោក គឺត្រូវធានាថា យើងមានគោលនយោបាយការបរទេសមួយដែលតម្កល់ផលប្រយោជន៍ជាតិអាមេរិក។”
“ខ្ញុំរំពឹងថា គ្រប់ប្រជាជាតិលើផែនដីនេះនឹងតម្កល់ផលប្រយោជន៍ជាតិរបស់ខ្លួន។ ហើយនៅករណីទាំងនោះ – ហើយខ្ញុំសង្ឃឹមថានឹងមានប្រជាជាតិជាច្រើនដែលស្របនឹងផលប្រយោជន៍របស់ជាតិយើង និងរបស់ពួកគេ យើងសម្លឹងឆ្ពោះទៅរកការធ្វើការជាមួយពួកគេ។ រឿងនេះស្ថិតនៅក្នុងដំណើរជាច្រើន ហើយជាថ្មីម្ដងទៀត លោកប្រធានាធិបតី Trump បានលើកឡើងកាលពីថ្ងៃម្សិលមិញនៅសុន្ទរកថារបស់លោកថា លោកបង្កើតគោលនយោបាយការបរទេស ដែលជាគោលដៅធំរបស់លោកសម្រាប់គោលនយោបាយពិភពលោក គឺការលើកកម្ពស់សន្តិភាព បញ្ចៀសជម្លោះ ហើយនឹងគ្មានភ្នាក់ងារណាដើររតួសំខាន់ជាងស្ថាប័នមួយនេះឡើយ។ ជាការពិត វាជាគោលការណ៍ និងគោលបំណងដើមរបស់ស្ថាប័ន។ ហើយនោះហើយគឺជាអ្វីដែលយើងត្រូវធ្វើ ដើម្បីលើកកម្ពស់សន្តិភាពជុំវិញពិភពលោក ដោយសារវាស្ថិតនៅក្នុងផលប្រយោជន៍របស់យើង។ បើគ្មានសន្តិភាពទេ វាពិបាកក្លាយជាប្រជាជាតិដ៏ខ្លាំងក្លាយមួយ វាពិបាកក្លាយជាប្រជាជាតិប្រកបដោយវិបុលភាពមួយ ហើយប្រជាជាតិមួយដែលកាន់តែប្រសើរ”។
ក្រៅពីកំណត់ហេតុដែលកត់ត្រាសម្ដីរបស់គាត់ទាំងស្រុងដែលត្រូវបានផ្សព្វផ្សាយនៅលើវេបសាយរបស់ក្រសួងការបរទេសអាមេរិកហើយនោះ ក្រសួងការបរទេសអាមេរិកក៏បានផ្សព្វផ្សាយសម្ដីរបស់លោក Marco Rubio ដែលថ្លែងទៅកាន់បុគ្គលិកក្រសួងការបរទេសនៅលើឆាណែល YouTube របស់ក្រសួងផងដែរ។
U.S. Department of State’s YouTube Channel | Archived Link
នៅលើវេបសាយរបស់ក្រសួងការបរទេសអាមេរិក Fact Crescendo រកពុំឃើញមានសេចក្ដីប្រកាសព័ត៌មានណាមួយដែលនិយាយថា ប្រមុខការទូតអាមេរិកលើកឡើងពីបញ្ហាប្រទេសកម្ពុជានោះឡើយ។
ខាងក្រោមនេះ គឺជារូបភាពផ្ដាមចេញពីវេបសាយក្រសួងការបរទេសអាមេរិកនៅថ្ងៃទី២១ ខែមករា ឆ្នាំ២០២៥ ដែលបង្ហាញនូវកំណត់ត្រាផ្សេងៗ ដូចជា សេចក្ដីប្រកាសព័ត៌មាន កំណត់ហេតុសម្រាប់សារព័ត៌មាន កំណត់ត្រាសម្ដីដើមរបស់លោក Marco Rubio និងកិច្ចសម្ភាសជាដើម។
U.S. Department of State | Archived Link
ការថ្លែងរបស់លោក Marco Rubio បែបនេះ ក៏ត្រូវបានសារព័ត៌មាននានាដកស្រង់យកទៅចុះផ្សាយនៅក្នុងអត្ថបទព័ត៌មានរបស់ពួកគេ ដែលនិយាយថា ការថ្លែងរបស់ប្រមុខការទូតអាមេរិករូបនេះ សំដៅទៅដល់ផលប្រយោជន៍របស់អាមេរិកនៅក្រោមរដ្ឋបាលលោក Trump។
ខាងក្រោមនេះ គឺជារូបភាពផ្ដាមចេញពីអត្ថបទព័ត៌មានរបស់ទីភ្នាក់ងារព័ត៌មាន AFP ដែលត្រូវបានចុះផ្សាយដោយសារព័ត៌មាន បាងកក ប៉ុស្តិ៍ ថ្ងៃទី២២ ខែមករា ឆ្នាំ២០២៥ ពោលគឺ២ថ្ងៃក្រោយលោក Marco Rubio ចូលកាន់តំណែងជាផ្លូវការ។
Bangkok Post’s Report | Archived Link
សារព័ត៌មាននានានៅលើពិភពលោក បានចុះផ្សាយព្រាតអំពីរឿងនេះ ក្រោយពីប្រមុខការទូតអាមេរិកបានជួបពិភាក្សាជាមួយប្រមុខការទូតជប៉ុន អូស្ត្រាលី និងឥណ្ឌា ដែលជាដៃគូនៅក្នុងក្របខណ្ឌឥណ្ឌូ-ប៉ាស៊ីហ្វិក (Indo-Pacific Quad Ministers) នៅទីក្រុងវ៉ាស៊ីងតោន កាលពីថ្ងៃទី២១ ខែមករា ឆ្នាំ២០២៥។
ដើម្បីផ្ទៀងផ្ទាត់បន្ថែមទៀត Fact Crescendo បានស្វែងរកព័ត៌មានថ្មីបំផុតទាក់ទងនឹងលោក Marco Rubio និងប្រទេសកម្ពុជាតាមរយៈ Google Search ប៉ុន្តែ គ្មានព័ត៌មានថ្មីណាមួយចេញផ្សាយនោះឡើយនៅក្នុងរយៈពេលជាង ១សប្ដាហ៍មកនេះ។
ព័ត៌មានថ្មីបំផុតដែលភ្ជាប់ការតែងតាំងលោក Marco Rubio និងបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ត្រូវបានចុះផ្សាយតាំងពីចុងឆ្នាំមុនដោយសារព័ត៌មាន The Diplomat ដែលនោះគឺជាអត្ថបទទស្សនៈរបស់បុគ្គលម្នាក់តែប៉ុណ្ណោះ។
ខាងក្រោមនេះ គឺជាព័ត៌មានទាក់ទងនឹងលោក Marco Rubio និងប្រទេសកម្ពុជា បន្ទាប់ពីការរុករកនៅលើ Google Search តាមរយៈពាក្យគន្លឹះ “Marco Rubio” និង “Cambodia”។
កាលនៅក្នុងតំណែងជាសមាជិកព្រឹទ្ធសភាអាមេរិក លោក Marco Rubio ត្រូវបានគេដឹងថា សមាជិកព្រឹទ្ធសភាអាមេរិកឈានមុខម្នាក់ដែលបានស្នើច្បាប់ដាក់ទណ្ឌកម្មលើរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជារបស់លោក ហ៊ុន សែន ជុំវិញការធ្លាក់ចុះនៃការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។ សូមមើលអត្ថបទទាំងស្រុងនៅទីនេះ
សន្និដ្ឋាន
Fact Crescendo រកឃើញថា ព័ត៌មានចុះផ្សាយដោយសារព័ត៌មាន VOD ដូចដែលត្រូវបានរៀបរាប់ខាងលើ មិនត្រឹមត្រូវនោះឡើយ។ សារព័ត៌មាននេះ បានដកស្រង់ដោយមិនត្រឹមត្រូវនូវសម្ដីដើមរបស់លោក Marco Rubio ដែលថ្លែងទៅកាន់បុគ្គលិកក្រសួងការបរទេសនៅថ្ងៃដំបូងដែលលោកឡើងកាន់តំណែងជាផ្លូវការជារដ្ឋមន្ត្រីការបរទេស។ ប្រមុខការទូតថ្មីរបស់អាមេរិករូបនេះ គ្មានបានលើកឡើងទាល់តែសោះអំពីឈ្មោះប្រទេសកម្ពុជា។ សម្ដីដើមរបស់លោកសំដៅដល់ផលប្រយោជន៍អាមេរិកតែប៉ុណ្ណោះ។
Title:សារព័ត៌មានមួយដកស្រង់សម្ដីប្រមុខការទូតអាមេរិកមកចុះផ្សាយដោយមិនត្រឹមត្រូវ
Written By: Jay UdomResult: False
