គ្រាន់តែមួយថ្ងៃក្រោយគ្រោះរញ្ជួយដីបានកើតឡើងនៅក្នុងប្រទេសភូមា រូបថតបីសន្លឹកដែលបង្ហាញព្រះសង្ឃ និងពុទ្ធបរិស័ទភូមាសឹង និងដេកតម្រៀបជាជួរ ត្រូវបានបង្ហោះ និងចែកចាយព្រោងព្រាតនៅលើបណ្ដាញសង្គមជាមួយការអះអាងថា ពួកគាត់សុទ្ធតែជាជនរងគ្រោះនៃគ្រោះមហន្តរាយមួយនេះ។ រូបថតរួមជាមួយការអះអាងបែបនេះ ត្រូវបានចែកចាយយ៉ាងផុសផុលនៅលើបណ្ដាញសង្គម ទាក់ទាញបានក្ដីអាណិតអាសូរយ៉ាងច្រើនពីសំណាក់អ្នកប្រើប្រាស់បណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើងរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតបីសន្លឹកដែលបង្ហាញពលរដ្ឋភូមារួមទាំងព្រះសង្ឃស្ថិតនៅតម្រៀបជួរគ្នានៅលើដី ត្រូវបានគេបង្ហោះ និងចែកចាយព្រោងព្រាតនៅលើបណ្ដាញសង្គមកាលពីចុងសប្ដាហ៍មុន។ រូបថតទាំងនេះ ត្រូវបានបង្ហោះជាមួយព័ត៌មានថា ជាជនរងគ្រោះនៃហេតុការណ៍រញ្ជួយដីដ៏មហន្តរាយនៅភូមាកាលពីថ្ងៃសុក្រសប្ដាហ៍មុន។
ខាងក្រោមនេះ គឺជារូបភាពផ្ដាមចេញពីការបង្ហោះរូបថត និងសំណេរនៅលើបណ្ដាញសង្គមហ្វេសប៊ុកកាលពីថ្ងៃទី២៩ ខែមីនា ឆ្នាំ២០២៥ ពោលគឺត្រឹមតែ ១ថ្ងៃប៉ុណ្ណោះ បន្ទាប់ពីគ្រោះរញ្ជួយដីនៅភូមា។ ការបង្ហោះរូបថត និងព័ត៌មាននេះ ត្រូវបានចែកចាយបន្តជាង ១០០ដង រួមជាមួយការបញ្ចេញប្រតិកម្ម និងមតិចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
សំណេរនៅលើបណ្ដាញសង្គមរៀបរាប់ថា “ចូលរួមរំលែកទុក្ខព្រះសង្ឃភូមា មកដល់ពេលនេះបានដំណឹងថាសុគតអស់ ៨០អង្គជាង”។
ដោយសារតែការអះអាងនេះទទួលបានការចាប់អារម្មណ៍ដ៏ផុសផុលនៅលើបណ្ដាញសង្គមនោះ គេអាចរកមើលការអះអាងដូចគ្នា ឬប្រហាក់ប្រហែលគ្នានេះនៅលើបណ្ដាញសង្គមតាមរយៈតំណភ្ជាប់ដទៃទៀតនៅទីនេះ៖ Link 1 (archived), Link 2 (archived), Link 3 (archived), Link 4 (archived), និង Link 5 (archived)។
ជាងនេះទៅទៀត ការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមជាភាសាដទៃទៀតនៅក្នុងតំបន់ និងភាសាអង់គ្លេសផងដែរ ដែលនាំឱ្យមានការចែកចាយបន្ត និងទទួលបានការចាប់អារម្មណ៍កាន់តែច្រើនថែមទៀតពីអ្នកប្រើប្រាស់បណ្ដាញសង្គម។
ខាងក្រោមនេះ គឺជារូបភាពផ្ដាមពីការអះអាងជាភាសាអង់គ្លេស ដែលត្រូវបានបង្ហោះនៅលើបណ្ដាញសង្គមហ្វេសប៊ុកមួយថ្ងៃក្រោយហេតុការណ៍រញ្ជួយដីនៅភូមា។ ខ្លឹមសារសំណេរនេះចង់បង្ហាញថា រូបថតទាំងបីសន្លឹកនេះ គឺជាជនរងគ្រោះនៃហេតុការណ៍រញ្ជួយដីនៅភូមានាពេលថ្មីៗនេះ។
ការបង្ហោះរូបថតជាមួយសំណេរបែបនេះ ទទួលបានការចែកចាយបន្តដល់ទៅជាង ២០០ដង រួមជាមួយការបញ្ចេញប្រតិកម្ម និងមតិយោបល់ចម្រុះបែបពីអ្នកប្រើប្រាស់បណ្ដាញសង្គម ដែលបង្ហាញក្ដីអាណិតអាសូរចំពោះជនរងគ្រោះនៅប្រទេសភូមា។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមជាភាសាស៊ិនហាឡាកាលពីថ្ងៃទី២៩ ខែមីនា ឆ្នាំ២០២៥ ដែលរៀបរាប់ថា រូបថតទាំងនេះបង្ហាញឱ្យឃើញជនរងគ្រោះរញ្ជួយដីនៅភូមា។
រូបថតរួមជាមួយសំណេរមានខ្លឹមសារដូចគ្នា ក៏ត្រូវបានបង្ហោះនៅលើបណ្ដាញសង្គមហ្វេសប៊ុកដោយសមាគមព្រះពុទ្ធសាសនាពិភពលោកនៅប្រទេសបង់ក្លាដែសផងដែរ។
រូបថតរួមជាមួយការអះអាងប្រហាក់ប្រហែលគ្នានេះ ក៏ត្រូវបានបង្ហោះព្រោងព្រាតលើបណ្ដាញសង្គមដទៃទៀតដូចជា Threads និង Instagram ដែលជាបណ្ដាញសង្គមរបស់ក្រុមហ៊ុន Meta និងបណ្ដាញសង្គម X (អតីត Twitter)។
ខាងក្រោមនេះ គឺជារូបភាពផ្ដាមចេញពីការអះអាងជាភាសាថៃដែលត្រូវបានបង្ហោះនៅលើបណ្ដាញសង្គម Threads កាលពីថ្ងៃទី២៩ ខែមីនា ឆ្នាំ២០២៥ ជាមួយសំណេរក្នុងន័យថា ព្រះសង្ឃក្នុងរូបថត គឺជាជនរងគ្រោះរញ្ជួយដីនៅភូមា។
ខាងក្រោមនេះ គឺជារូបភាពផ្ដាមចេញពីបណ្ដាញសង្គម Instagram កាលពីថ្ងៃទី២៩ ខែមីនា ឆ្នាំ២០២៥ ដែលរៀបរាប់ក្នុងន័យថា ព្រះសង្ឃក្នុងរូបថតគឺជាជនរងគ្រោះនៃហេតុការណ៍រញ្ជួយដីនៅភូមា។
Instagram Post | Archived Link
ខាងក្រោមនេះ គឺជារូបភាពផ្ដាមចេញពីការអះអាងជាភាសាហិណ្ឌីដែលត្រូវបានបង្ហោះនៅលើបណ្ដាញសង្គម X កាលពីថ្ងៃទី២៩ ខែមីនា ឆ្នាំ២០២៥ ជាមួយសំណេរក្នុងន័យថា ព្រះសង្ឃ និងពុទ្ធបរិស័ទក្នុងរូបថត គឺជាជនរងគ្រោះរញ្ជួយដីនៅភូមា។
ក្រៅពីការអះអាងដូចដែលត្រូវបានរៀបរាប់ខាងលើ គេអាចរកមើលការអះអាងដូចគ្នានេះនៅលើបណ្ដាញសង្គមតាមរយៈតំណភ្ជាប់ដទៃទៀតនៅទីនេះ៖ Link 1 (archived), Link 2 (archived), Link 3 (archived), និង Link 4 (archived)។
ការត្រួតពិនិត្យការពិត
Fact Crescendo បានត្រួតពិនិត្យ និងផ្ទៀងផ្ទាត់ការអះអាងនេះតាមរយៈការដំណើរការ Google Reverse Image Search ដែលជួយឱ្យយើងបើកបង្ហាញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញប្រភពដើម និងព័ត៌មានត្រឹមត្រូវនៃរូបថតទាំងបីសន្លឹក ដែលត្រូវបានបង្ហោះព្រោងព្រាតនៅលើបណ្ដាញសង្គម។
យើងរកឃើញថា រូបថតទាំងបីសន្លឹកនេះ ត្រូវបានបង្ហោះនៅលើបណ្ដាញសង្គមយ៉ាងហោចណាស់ ៤ឆ្នាំមុន នេះបើផ្អែកតាមសារបង្ហោះនៅលើបណ្ដាញសង្គមហ្វេសប៊ុកកាលពីចុងឆ្នាំ២០២៤ ដែលបញ្ជាក់ថា ព្រះសង្ឃ និងប្រជាជនភូមាចូលរួមក្នុងពិធីតាំងសមាធិ។
សារបង្ហោះនៅលើបណ្ដាញសង្គមនាពេលនោះ បញ្ជាក់ថា រូបថត និងសំណេរជាភាសាភូមានេះ ត្រូវបានចែកចាយនៅលើបណ្ដាញសង្គមដោយអ្នកប្រើប្រាស់បណ្ដាញសង្គមឈ្មោះ Ko Min Myat ដែលបានបង្ហោះរូបថតនេះតាំងពីដើមឆ្នាំ២០២១ម៉្លេះ។
ខាងក្រោមនេះ គឺជាសារបង្ហោះនៅលើបណ្ដាញសង្គមកាលពីថ្ងៃទី៣១ ខែធ្នូ ឆ្នាំ២០២៤ ពោលគឺ ៣ខែមុនកើតគ្រោះរញ្ជួយដីវាយប្រហារប្រទេសភូមាកាលពីថ្ងៃ២៨ ខែមីនាទៅទៀត។
ខាងក្រោមនេះ គឺជារូបភាពគូសបញ្ជាក់ឱ្យឃើញអ្នកប្រើប្រាស់ហ្វេសប៊ុកមានឈ្មោះជាភូមា បានផ្ដល់តម្លៃដល់ម្ចាស់ស្នាដៃដែលបានបង្ហោះរូបថតទាំងនេះកាលពីថ្ងៃទី១៣ ខែមករា ឆ្នាំ២០២១។
ជាងនេះទៅទៀត រូបថតទាំងនេះត្រូវបានដាក់លាយបញ្ចូលទៅក្នុងវីដេអូមួយដែលត្រូវបានបង្ហោះនៅលើបណ្ដាញ YouTube កាលពីជាង ២ឆ្នាំមុន។ សំណេរជាភាសាភូមាភ្ជាប់នៅក្រោមវីដេអូនេះ រៀបរាប់ថា ព្រះសង្ឃ និងពលរដ្ឋភូមាតាំងសមាធិតាមវិធីសម្រានសម្រាកកាយ។
ខាងក្រោមនេះ គឺជាវីដេអូមួយទៀតដែលត្រូវបានបង្ហោះនៅលើបណ្ដាញ YouTube ដែលបង្ហាញការតាំងសមាធិតាមបែបសម្រានសម្រាកកាយនៅប្រទេសភូមា។
រញ្ជួយដីកម្រិត ៧.៧រ៉ិចទ័រ បានវាយប្រហារប្រទេសភូមា និងញ័ររញ្ជួយដល់ប្រទេសថៃកាលពីថ្ងៃទី២៨ ខែមីនា ឆ្នាំ២០២៥ ដោយបានសម្លាប់ជីវិតមនុស្សជាង ២,០០០នាក់ហើយគិតត្រឹមថ្ងៃទី៣១ ខែមីនា។ គ្រោះរញ្ជួយដីនេះក៏បណ្ដាលឱ្យមនុស្សរាប់សិបពាន់នាក់រងរបួស និងបង្កការខូចខាតយ៉ាងធំធេងទៅដល់អគារលំនៅឋាន និងផ្ទះសម្បែងក្នុងប្រទេសទាំងពីរផងដែរ នេះដោយផ្អែកតាមសេចក្ដីរាយការណ៍របស់សារព័ត៌មាន BBC។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតព្រះសង្ឃ និងពុទ្ធបរិស័ទភូមា ស្ថិតនៅតម្រៀបជួរគ្នានៅលើកម្រាលឥដ្ឋ មិនពាក់ព័ន្ធនឹងគ្រោះរញ្ជួយដីនៅភូមាកាលពីសប្ដាហ៍មុនឡើយ។ រូបថតទាំងនេះ បង្ហាញការតាំងសមាធិតាមបែបសម្រានសម្រាកកាយដែលប្រតិបត្តិដោយព្រះសង្ឃ និងពុទ្ធបរិស័ទភូមាកាលពីជាង ៤ឆ្នាំមុន។
Title:ការអះអាងមិនត្រឹមត្រូវថា ព្រះសង្ឃ និងពុទ្ធបរិស័ទភូមាធ្វើសមាធិជាជនរងគ្រោះរញ្ជួយដីថ្មីៗ
Written By: Jay UdomResult: False
