វីដេអូរលកស៊ូណាមិជាង១០ឆ្នាំមុនត្រូវបានភ្ជាប់មិនត្រឹមត្រូវនឹងគ្រោះរញ្ជួយដីនៅជប៉ុនថ្មីៗនេះ
ស្របពេលប្រទេសជប៉ុនបានរងគ្រោះរញ្ជួយដី ដែលមានកម្រិតរហូតដល់ ៧,៥រ៉ិចទ័រ កាលពីដើមសប្ដាហ៍មកនោះ វីដេអូឃ្លីបមួយបង្ហាញទិដ្ឋភាពគ្រោះទឹកជំនន់យ៉ាងខ្លាំង បានហូរកាត់ផ្លូវមួយកន្លែង ត្រូវបានបង្ហោះ និងផ្សព្វផ្សាយឡើងដោយទំព័រហ្វេសប៊ុក និងបានភ្ជាប់ទៅនឹងគ្រោះធម្មជាតិរញ្ជួយដីដែលបានកើតឡើងនាពេលថ្មីៗនេះ។ ការអះអាងលើវីដេអូឃ្លីបនេះ ទទួលបានការចែកចាយ និងប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរជាច្រើនយ៉ាងផុសផុល។ ទោះជាយ៉ាងណា Fact Crescendo Cambodia ការត្រួតពិនិត្យការពិតរបស់ បានរកឃើញថា ការអះអាងដោយភ្ជាប់ទៅនឹងវីដេអូឃ្លីបខាងលើ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយដែលបង្ហាញទឹកជំនន់ហូរកាត់លំនៅឋានប្រជាជនមួយកន្លែង ត្រូវបានបង្ហោះនៅលើបណ្ដាញសង្គមកាលពី ៤ថ្ងៃមុន ជាមួយនឹងការអះអាងថា វាជាគ្រោះមហន្តរាយស៊ូណាមិដែលបានវាយប្រហារប្រទេសជប៉ុននាពេលថ្មីៗនេះ។
វីដេអូដែលភ្ជាប់ជាមួយសំណេរបែបនេះ ត្រូវបានចែករំលែកដល់ទៅរាប់ពាន់ដង ប្រតិកម្មចម្រុះ និងមតិយោបល់ជាច្រើនពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជាវីដេអូឃ្លីបទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០២ ខែមករា ឆ្នាំ២០២៤ ជាមួយសំណេររៀបរាប់ «ស៊ូណាមិ (shunami) រញ្ជួយដីកម្រិត ៧.៤រ៉ិចទ័របានកើតឡើងនៅ Shunoto, Ishikawa ប្រទេសជប៉ុន នៅវេលាម៉ោងប្រហែល ៤:១០ នាទីល្ងាច ហើយនាយកដ្ឋានឧតុនិយមបានចេញការព្រមានពីការប៉ាន់ស្មាន ៥ម៉ែត្រសម្រាប់រលកធំ»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
វីដេអូឃ្លីបមួយដូចគ្នាទាំងស្រុងនេះ ត្រូវបានរកឃើញបង្ហោះនៅលើបណ្ដាញកម្សាន្ត YouTube កាលពីឆ្នាំ២០១៥កន្លងមក ដែលត្រូវបានរៀបរាប់ថា ជាគ្រោះមហន្តរាយរលកយក្សស៊ូណាមិវាយប្រហារតំបន់ Ishinomaki ស្ថិតក្នុងខេត្ត Miyagi ប្រទេសជប៉ុន កាលពីថ្ងៃទី១១ ខែមីនា ឆ្នាំ២០១១កន្លងមក។
គ្រោះរញ្ជួយដីកម្រិត ៩រ៉ិចទ័រ ដែលកើតឡើងនៅឯមហាសមុទ្រប៉ាស៊ីហ្វិក បានវាយប្រហារតំបន់ Tohoku ស្ថិតនៅភាគខាងកើតប្រទេសជប៉ុន ដែលបង្កឱ្យមានរលកយក្សស៊ូណាមិកម្ពស់រហូតដល់ ៤០.៥ម៉ែត្រ។ គ្រោះមហន្តរាយស៊ូណាមិនេះ បានសម្លាប់មនុស្សខ្ទង់ ២ម៉ឺននាក់ និងបំផ្លិចបំផ្លាញហេដ្ឋារចនាសម្ព័ន្ធយ៉ាងធំធេង។
ខាងក្រោមនេះ គឺជាវីដេអូទាំងស្រុងនៃគ្រោះមហន្តរាយរលកយក្សស៊ូណាមិដែលបានវាយប្រហារប្រទេសជប៉ុនកាលពីឆ្នាំ២០១១កន្លងមក ហើយត្រូវបានបង្ហោះលើបណ្ដាញកម្សាន្ត YouTube កាលពីថ្ងៃទី៣១ ខែឧសភា ឆ្នាំ២០១៥។
វីដេអូឃ្លីបដូចគ្នានេះ ក៏ត្រូវបានផ្សព្វផ្សាយ និងបង្ហោះនៅលើគេហទំព័រ Dailymotion ផងដែរកាលពី ៤ឆ្នាំមុន ដែលរៀបរាប់ថា វីដេអូនេះជាផ្នែកមួយនៃរលកយក្សស៊ូណាមិ ដែលបានវាយប្រហារទីក្រុង Ishinomaki កាលពីជិត ១៣ឆ្នាំមុន។
Dailymotion Link | Archived Link
ស្ថាប័នត្រួតពិនិត្យព័ត៌មានក្លែងក្លាយនៅឯប្រទេសដទៃ ក៏បានផ្ទៀងផ្ទាត់ទៅលើវីដេអូនេះផងដែរ ដោយរកឃើញថា វាជាហេតុការណ៍នៃគ្រោះមហន្តរាយរលកយក្សស៊ូណាមិកាលពីជិត ១៣ឆ្នាំមុន។ សូមមើលអត្ថបទទាំងស្រុងនៅទីនេះ (archived link)។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបមួយនេះ មិនមែនជាហេតុការណ៍គ្រោះរញ្ជួយដីវាយប្រហារប្រទេសជប៉ុននាពេលថ្មីៗនេះទេ។ ការពិត វីដេអូឃ្លីបនេះ គឺហេតុការណ៍គ្រោះមហន្តរាយបង្កឡើងដោយរលកយក្សស៊ូណាមិទៅលើទីក្រុង Ishinomaki ប្រទេសជប៉ុនកាលពីថ្ងៃទី១១ ខែមីនា ឆ្នាំ២០១១មកម្ល៉េះ។
Title:វីដេអូរលកស៊ូណាមិជាង១០ឆ្នាំមុនត្រូវបានភ្ជាប់មិនត្រឹមត្រូវនឹងគ្រោះរញ្ជួយដីនៅជប៉ុនថ្មីៗនេះ
Written By: Kakada SimResult: False