ថ្មីៗនេះ ហាងលក់រាយផលិតផល JBL នៅកម្ពុជា បានប្រកាសបញ្ចុះតម្លៃផលិតផលយីហោ JBL ជាច្រើនមុខ។ ទន្ទឹមគ្នានេះ មានការផ្សាយពាណិជ្ជកម្មលើបណ្ដាញសង្គមថា ផលិតផល JBL មួយចំនួន ត្រូវបានដាក់លក់បញ្ចុះតម្លៃរហូតដល់ ៦០ភាគរយឯណោះ។ ការផ្សាយពាណិជ្ជកម្មបែបនេះ ត្រូវបានចែករំលែកជាច្រើនលើបណ្ដាញសង្គម។ ទោះជាយ៉ាងណា យើងបានរកឃើញថា ការផ្សព្វផ្សាយពាណិជ្ជកម្មនេះ មិនមែនជាការពិត គ្រាន់តែជាការបោកបញ្ឆោតតែប៉ុណ្ណោះ។
ការអះអាងលើបណ្ដាញសង្គម
ការផ្សាយពាណិជ្ជកម្មមួយនៅលើបណ្ដាញសង្គមដោយទំព័រហ្វេសប៊ុក JBL Cambodia បាននិយាយថា ផលិតផលស្ដាប់តន្ត្រីយីហោ JBL របស់ក្រុមហ៊ុន HARMAN ត្រូវបានដាក់លក់បញ្ចុះតម្លៃរហូតដល់ទៅ ៦០ភាគរយនៅពាក់កណ្ដាលឆ្នាំនេះ។
ពាណិជ្ជកម្មបាននិយាយទៀតថា ការបញ្ចុះតម្លៃលើផលិតផលយីហោ JBL នេះផ្ដល់ជូនដល់អតិថិជនតែ ២០០នាក់ដំបូងប៉ុណ្ណោះដែលបញ្ជាទិញតាមគេហទំព័រមួយដែលភ្ជាប់មកជាមួយនឹងសារពាណិជ្ជកម្មនេះ។
ការផ្សព្វផ្សាយនេះ ត្រូវបានចែករំលែកបន្តជាច្រើនដង រួមជាមួយការបញ្ចេញប្រតិកម្ម និងមតិយោបល់ជាច្រើនពីសំណាក់អ្នកប្រើប្រាសបណ្ដាញសង្គមកម្ពុជា។
ខាងក្រោមនេះ គឺជារូបភាពផ្ដាមចេញពីពាណិជ្ជកម្មនៅលើបណ្ដាញសង្គមហ្វេសប៊ុកកាលពីថ្ងៃទី២៩ ខែឧសភា ឆ្នាំ២០២៤ ដែលរៀបរាប់ថា “អ្នកត្រៀមខ្លួនជាស្រេចសម្រាប់អ្វីដែលនឹងមកដល់ រដូវក្ដៅនេះក៏ចូលរួមពិធីបុណ្យដ៏ក្ដៅគគុកជាមួយ JBL Cambodia ផងដែរ។ ឱកាសទទួលបានភ្លាមៗនូវលេខកូដបញ្ចុះតម្លៃរហូតដល់ ៦០%នៅពេលទិញឧបករណ៍បំពងសំឡេង JBL Xtreme 3 សម្រាប់តែអ្នកចុះឈ្មោះ ២០០នាក់ដំបូងនៅហាងអនឡាញរបស់យើង។ ចំណាំ៖ កម្មវិធីនេះអនុវត្តចំពោះអតិថិជន ២០០នាក់ដំបូងប៉ុណ្ណោះ។ ប្រញាប់ឡើងដើម្បីក្លាយជាអ្នកមានសំណាង” ។
ការផ្សាយពាណិជ្ជកម្មបែបនេះនៅលើបណ្ដាញសង្គម ត្រូវបានធ្វើឡើងជាបន្តបន្ទាប់ ហើយវាក៏ត្រូវបានផ្សព្វផ្សាយជាភាសាអង់គ្លេសផងដែរ ដែលនាំឱ្យមានការចែករំលែកបន្តរាប់សិបដង និងការបញ្ចេញមតិយោបល់ដ៏ច្រើនពីអ្នកប្រើប្រាស់បណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការផ្សាយពាណិជ្ជកម្មជាភាសាអង់គ្លេសនៅលើបណ្ដាញសង្គមហ្វេសប៊ុកកាលពីថ្ងៃទី២១ ខែឧសភា ឆ្នាំ២០២៤ ដែលរៀបរាប់ថា “Celebrating the 55th anniversary of the establishment of the JBL brand and the 9th anniversary of JBL opening its’ first store in Cambodia, JBL Cambodia would like to send to all Cambodians the biggest promotion of the year up to 70% discount when purchasing 2 products lines JBL Boombox 3, JBL Xtreme 3 when ordering online via website.”។
ក្រៅពីទំព័រហ្វេសប៊ុកខាងលើនេះ ទំព័រហ្វេសប៊ុកមួយទៀតឈ្មោះ JBL – Philippines ក៏បានផ្សព្វផ្សាយថា ឧបករណ៍បំពងសំឡេង JBL Xtrem 3 ត្រូវបានដាក់លក់បញ្ចុះតម្លៃរហូតដល់ ៨០ភាគរយឯណោះ។
ខាងក្រោមនេះ គឺជារូបភាពផ្ដាមចេញពីពាណិជ្ជកម្មលើបណ្ដាញសង្គមដោយទំព័រហ្វេសប៊ុក JBL – Philippines កាលពីថ្ងៃទី២៦ ខែមិថុនា ឆ្នាំ២០២៤។
ទំព័រហ្វេសប៊ុកដដែលនេះ ក៏បានផ្សព្វផ្សាយផងដែរថា កាសស្ដាប់ JBL Tour Pro 2 របស់យីហោ JBL ក៏ត្រូវបានបញ្ចុះតម្លៃមកនៅសល់ត្រឹម ៦៩ដុល្លារដែរកាលពីខែឧសភាកន្លងមកនេះ។
ពាណិជ្ជកម្មមួយនេះ ត្រូវបានចែករំលែកបន្តរាប់សិបដង និងមានការបញ្ចេញប្រតិកម្ម និងមតិយោបល់ចម្រុះបែបពីសំណាក់អ្នកប្រើប្រាស់បណ្ដាញសង្គមកម្ពុជា។
ខាងក្រោមនេះ គឺជារូបភាពផ្ដាមចេញពីពាណិជ្ជកម្មនៅលើបណ្ដាញសង្គមហ្វេសប៊ុកកាលពីថ្ងៃទី០៦ ខែឧសភា ឆ្នាំ២០២៤ ដែលរៀបរាប់ជាភាសាអង់គ្លេសថា “JBL brings you “legendary warm sound” – JBL Tour Pro 2 for only $69.00. To celebrate the 1 million JBL Tour Pro 2 speaker sold worldwide, we are discounting 1,000 JBL Tour Pro 2 units for just $69.00”។
ការផ្សាយពាណិជ្ជកម្មថា កាសស្ដាប់យីហោ JBL Tour Pro 2 មានការបញ្ចុះតម្លៃដ៏ច្រើនរហូតដល់ ៦០ភាគរយនោះ ក៏ត្រូវបានផ្សព្វផ្សាយដោយទំព័រហ្វេសប៊ុកមួយទៀតឈ្មោះ JBL UAE កាលពីចុងខែឧសភាកន្លងមកនេះ ដោយតម្រូវឱ្យអ្នកចូលរួមចុចលើតំណភ្ជាប់នៃវេបសាយដែលភ្ជាប់មកជាមួយនឹងពាណិជ្ជកម្មនេះ។
ខាងក្រោមនេះ គឺជារូបភាពផ្ដាមចេញពីពាណិជ្ជកម្មនៅលើបណ្ដាញសង្គមហ្វេសប៊ុកកាលពីថ្ងៃទី៣១ ខែឧសភា ឆ្នាំ២០២៤ ដែលរៀបរាប់ជាភាសាអង់គ្លេសថា “Good news for JBL followers in the UAE. This June we will open a new store at Dubai Mall with many great products and features, discount codes and many surprise gifts. This will be our 10th store in the UAE, marking an important milestone in the development process in the UAE. To celebrate this special event, we are offercing a discount of up to 60% on JBL Tour Pro 2 headphones. Order now on our website to receive additional free shipping code [JBL Tour Pro 2]”។
ក្រៅពីការផ្សព្វផ្សាយលក់បញ្ចុះតម្លៃដ៏ច្រើនដូចរៀបរាប់ខាងលើនេះ យើងបានក៏ប្រទះឃើញផងដែរនូវការផ្សព្វផ្សាយលក់កាសស្ដាប់ JBL Tour Pro 2 ជាមួយតម្លៃដ៏ទាបរហូតចន្លោះ ២០ ទៅ ៤០ដុល្លារតែប៉ុណ្ណោះ។ ទំព័រហ្វេសប៊ុកដែលផ្សព្វផ្សាយលក់បែបនេះ អះអាងថា ផលិតផលដែលពួកគាតដាក់លក់នោះ សុទ្ធតែជាផលិតផលសុទ្ធនាំចូលពីប្រទេសជប៉ុន។
ខាងក្រោមនេះ គឺជាវីដេអូនៃការផ្សព្វផ្សាយលក់ផលិតផល JBL Tour Pro 2 របស់ទំព័រហ្វេសប៊ុកមួយកាលពីថ្ងៃទី១៣ ខែមិថុនា ឆ្នាំ២០២៤ ដែលអះអាងថា កាសស្ដាប់របស់ខ្លួន ជាផលិតផលសុទ្ធ និងនាំចូលពីប្រទេសជប៉ុន។
https://web.facebook.com/JBL168/videos/446803394959307
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយលក់ផលិតផល JBL Tour Pro 2 របស់ទំព័រហ្វេសប៊ុកមួយកាលពីពាក់កណ្ដាលខែឧសភាកន្លងមកនេះ ដែលដាក់ត្រឹមតែជាង ២០ដុល្លារប៉ុណ្ណោះ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការស្វែងរកការបញ្ជាក់ពីក្រុមហ៊ុន JBL ឬតំណាងចែកចាយផលិតផល JBL ប្រចាំនៅកម្ពុជា ដែលនាំឱ្យយើងរកឃើញការពិតដូចខាងក្រោមនេះ។
ជាដំបូង យើងបានពិនិត្យមើលទៅលើតំណភ្ជាប់ដែលត្រូវបានបង្ហោះភ្ជាប់មកជាមួយនឹងពាណិជ្ជកម្មបែបនេះ ហើយរកឃើញថា តំណភ្ជាប់នេះ មិនមែនជាតំណភ្ជាប់ទៅកាន់វេបសាយផ្លូវការរបស់ក្រុមហ៊ុន JBL នោះឡើយ។
តាមរយៈកម្មវិធីត្រួតពិនិត្យភាពត្រឹមត្រូវរបស់តំណភ្ជាប់របស់ Google យើងបានរកឃើញថា តំណភ្ជាប់ដែលត្រូវបានភ្ជាប់មកជាមួយពាណិជ្ជកម្មនោះ មិនមាននៅលើប្រព័ន្ធម៉ាស៊ីនរុករករបស់ Google នោះឡើយ។
ខាងក្រោមនេះ គឺជារបាយការណ៍ត្រួតពិនិត្យ និងវាយតម្លៃដោយ Google ដែលបញ្ជាក់ថា គ្មានតំណភ្ជាប់នោះទេនៅលើប្រព័ន្ធរុករុករបស់ Google ឬហៅថា Google Search Engine។
ខាងក្រោមនេះ គឺជារូបភាពផ្ដាមចេញពីលទ្ធផលនៃការវិភាគដោយវេបសាយ URLVOID ដែលបង្ហាញថា តំណភ្ជាប់មិនមែនមានប្រភពនៅក្នុងប្រទេសកម្ពុជាទេ ប៉ុន្តែ វាមានប្រភពចេញមកពីសហរដ្ឋអាមេរិក ហើយគ្មានការចុះបញ្ជីឈ្មោះ Domain ត្រឹមត្រូវនោះទេ។
សូមមើលរបាយការណ៍ខាងក្រោមនេះដែលត្រូវបានផ្ដាមចេញពីការវិភាគដោយវេបសាយ URLVOID កាលស្នើសុំការវិភាគនេះនៅថ្ងៃទី២៧ ខែមិថុនា ឆ្នាំ២០២៤។
យើងបានរកឃើញថា www.jbl.com គឺជាគេហទំព័រផ្លូវការរបស់ក្រុមហ៊ុន JBL ហើយវេបសាយនេះមានខ្នែងសម្រាប់បន្តទៅកាន់វេបសាយរបស់ក្រុមហ៊ុនសំដៅកាន់ទីផ្សារប្រទេសណាមួយ។ សម្រាប់ប្រទេសកម្ពុជា វេបសាយរបស់ JBL គឺ https://www.kh.jbl.com ហើយសម្រាប់ប្រទេសថៃ គឺ www.thai.jbl.com ។
ជាងនេះទៅទៀត យើងបានរកឃើញថា ទំព័រហ្វេសប៊ុក Apple Cambodia មិនមែនជាទំព័រហ្វេសប៊ុកផ្លូវការរបស់ក្រុមហ៊ុន JBL ឬក្រុមហ៊ុនទទួលបានសិទ្ធិលក់ និងចែកចាយផលិតផល JBL នោះឡើយ ព្រោះថា ទំព័រហ្វេសប៊ុកនេះគ្មានការទទួលស្គាល់ (verified)ដោយក្រុមហ៊ុន Meta ដែលជាក្រុមហ៊ុនមេរបស់ Facebook។
យើងបានពិនិត្យឃើញថា ទំព័រហ្វេសប៊ុកនេះទើបត្រូវបានបង្កើតឡើងកាលពីថ្ងៃទី០៦ ខែឧសភា ឆ្នាំ២០២៤នេះ និងមានអ្នកតាមដាន (followers)ត្រឹមតែ ១៣នាក់ប៉ុណ្ណោះ។
ដោយបានផ្ទៀងផ្ទាត់តាមវិធីដូចខាងលើនេះ យើងបានរកឃើញថា ទំព័រហ្វេសប៊ុក JBL – Philippines ទើបតែត្រូវបានបង្កើតឡើងកាលពីថ្ងៃម្សិលមិញនេះ ហើយតំណភ្ចាប់ដែលភ្ជាប់ជាមួយការផ្សាយពាណិជ្ជកម្មនោះ ក៏មិនមែនជាវេបសាយផ្លូវការរបស់ JBL ប្រចាំប្រទេសហ្វីលីពីនដែរ។
រីឯទំព័រហ្វេសប៊ុក JBL UAE ត្រូវបានបង្កើតឡើងកាលពីចុងឆ្នាំ២០២៣កន្លងមក និងមានអ្នកតាមដានត្រឹមតែជាង ១០០នាក់ប៉ុណ្ណោះ។ ដូចគ្នាទៅនឹងទំព័រហ្វេសប៊ុក ២ខាងលើដែរ តំណភ្ជាប់ដែលគេភ្ជាប់មកជាមួយការផ្សាយពាណិជ្ជកម្មនោះ សុទ្ធតែមិនមានប្រភពច្បាស់លាស់។
ទំព័រហ្វេសប៊ុកផ្លូវការរបស់ក្រុមហ៊ុន JBL មានឈ្មោះថា JBL ដែលត្រូវបានបង្កើតឡើងកាលពីខែមេសា ឆ្នាំ២០១៨ ត្រូវបានទទួលស្គាល់ដោយក្រុមហ៊ុន Meta ឬមានសញ្ញាគូសពណ៌ខៀវ និងមានអ្នកតាមដាន ៣.៥លាន។
បើតាមព័ត៌មាននៅលើវេបសាយរបស់ក្រុមហ៊ុន JBL យើងបានរកឃើញថា ក្រុមហ៊ុន NANO SOUND និងក្រុមហ៊ុនលក់គ្រឿងអេឡិចត្រូនិច Kfour Group Ltd ទទួលបានសិទ្ធិចែកចាយ និងលក់រាយនូវផលិតផលយីហោ JBL និងយីហោដទៃទៀតរបស់ក្រុមហ៊ុន HARMAN ដែលជាបុត្រសម្ព័ន្ធនៃក្រុមហ៊ុន Samsung Elecronics របស់កូរ៉េខាងត្បូង។
Fact Crescendo Cambodia បានផ្ញើអ៊ីម៉ែលទៅកាន់ក្រុមហ៊ុន JBL ដើម្បីស្នើសុំព័ត៌មានបន្ថែមផងដែរ ប៉ុន្តែ យើងពុំទាន់ទទួលបានការឆ្លើយតបទេរហូតមកដល់ថ្ងៃចេញផ្សាយអត្ថបទនេះ។ យើងនឹងធ្វើបច្ចុប្បន្នភាពបន្ថែមទៀត ប្រសិនបើមានការឆ្លើយតបពីក្រុមហ៊ុន JBL។
ដោយទាក់ទងតាមលេខទូរស័ព្ទដែលមានបង្ហាញនៅលើវេបសាយ នារីម្នាក់បម្រើការផ្នែកផ្ដល់ព័ត៌មានដល់អតិថិជនរបស់ក្រុមហ៊ុនលក់រាយគ្រឿងអេឡិចត្រូនិច Kfour Group Ltd បានឆ្លើយតបតាមសារក្នុងតេឡេក្រាមថា រាល់ការផ្សព្វផ្សាយដែលធ្វើឡើងក្រៅពីទំព័រហ្វេសប៊ុកផ្លូវការរបស់ក្រុមហ៊ុន សុទ្ធតែជាផលិតផលក្លែងក្លាយ និងហើយក្រុមហ៊ុនមិនពាក់ព័ន្ធនោះឡើយ។
ចំណែកអ្នកស្រី លាង រតនា ម្ចាស់ក្រុមហ៊ុន NANO SOUND បានឱ្យដឹងថា ផលិតផល JBL ដែលលក់ដោយហាងលក់រាយរបស់ក្រុមហ៊ុនអ្នកស្រី សុទ្ធតែផ្គត់ផ្គង់ដោយក្រុមហ៊ុន HARMAN ដែលជាបុត្រសម្ព័ន្ធនៃក្រុមហ៊ុន Samsung Electronics។
បន្ទាប់ពីបានឃើញការផ្សព្វផ្សាយលក់បញ្ចុះតម្លៃរហូតដល់ ៦០% ឬ ៨០%បែបនេះ អ្នកស្រី លាង រតនា បញ្ជាក់ថា ការផ្សព្វផ្សាយទាំងនោះ ហួសពីការពិតទាំងអស់ ហើយរាល់ផលិតផល JBL មិនត្រូវបានលក់បញ្ចុះតម្លៃដ៏ច្រើនបែបនោះទេ។
អ្នកស្រី រតនា បានចង្អុលបង្ហាញទៅដល់ការលក់បញ្ចុះតម្លៃពាក់កណ្ដាលឆ្នាំនៅក្នុងខែមិថុនានេះនៅតាមហាងរបស់អ្នកស្រី ដែលត្រូវបានផ្សព្វផ្សាយផងដែរនៅលើទំព័រហ្វេសប៊ុកឈ្មោះថា Nano Sound Cambodia។
ផលិតផល JBL ដែលត្រូវបានដាក់លក់លើទីផ្សារប្រទេសកម្ពុជា គឺជាតម្លៃដូចគ្នាទៅនឹងការលក់រាយនៅលើទីផ្សារប្រទេសដទៃទៀត ហើយតម្លៃនេះអាចរកមើលឃើញនៅលើវេបសាយផ្លូវការរបស់ JBL។
ឧទាហរណ៍ កាសស្ដាប់ JBL Tour Pro 2 ត្រូវបានដាក់លក់ក្នុងតម្លៃ ២៤៩ដុល្លារ មុនវាត្រូវបានលក់បញ្ចុះតម្លៃមកនៅត្រឹម ១៩៩ដុល្លារសម្រាប់សម្រាប់ឱកាសបញ្ចុះតម្លៃពាក់កណ្ដាលឆ្នាំ ហើយផលិតផលនេះក៏ត្រូវបានដាក់លក់ក្នុងតម្លៃដូចគ្នាផងដែរនៅលើវេបសាយរបស់ JBL នៅសហរដ្ឋអាមេរិក។
JBL គឺជាស្លាកយីហោអន្តរជាតិដ៏ល្បីឈ្មោះមួយរបស់អាមេរិកមានអាយុកាលជិត ៨០ឆ្នាំហើយ ដែលមានជំនាញលើការផលិតឧបករណ៍សំឡេង និងតន្ត្រីសម្រាប់បំពាក់តាមលំនៅឋាន យានយន្ត ឧបករណ៍បំពងសំឡេង និងកាសស្ដាប់ត្រចៀក។
សព្វថ្ងៃនេះ ស្លាកយីហោមួយនេះ គឺជាផ្នែកមួយនៃក្រុមហ៊ុន Harman International Industries Inc. ដែលជាក្រុមហ៊ុនបុត្រសម្ព័ន្ធរបស់ Samsung Electronics របស់កូរ៉េខាងត្បូង បន្ទាប់ពីការទិញយកទាំងស្រុងនៅក្នុងឆ្នាំ២០១៧។
ភាពល្បីល្បាញ និងគុណភាពសំឡេងដ៏ល្អរបស់ JBL បានជំរុញឱ្យមានការលួចបង្កើតឧបករណ៍តន្ត្រី និងសំឡេងដាក់ឈ្មោះតាម JBL ដែលភាគច្រើនមានប្រភពចេញពីប្រទេសចិន។ អត្ថបទទាំងស្រុងនៅទីនេះ
ក្រុមហ៊ុន Harman បានណែនាំអតិថិជន និងសាធារណជនឱ្យកត់សម្គាល់ចំណុចខុសគ្នារវាងផលិតផល JBL ពិតប្រាកដ និងផលិតផលក្លែងក្លាយ ដោយកត់សម្គាល់ទៅភាពខុសប្លែកនៃសំបក ឬប្រអប់ ស្លាកយីហោ ពណ៌សម្បុរ តម្លៃ និងគុណភាពសំឡេង។
ក្រុមហ៊ុននេះ ក៏បានណែនាំទៅអតិថិជន និងមហាជនឱ្យស្វែងរកទិញផលិតផល JBL ពីហាងលក់រាយ និងក្រុមហ៊ុនចែកចាយដែលទទួលបានសិទ្ធិពីក្រុមហ៊ុន Harman។ សូមមើលការណែនាំរបស់ក្រុមហ៊ុននៅទីនេះ
ខាងក្រោមនេះ គឺជាវីដេអូណែនាំពីរបៀបកត់សម្គាល់ផលិតផល JBL ក្លែងក្លាយ ដែលត្រូវបានបង្ហោះនៅលើឆាណែល YouTube របស់ក្រុមហ៊ុន JBL។
សន្និដ្ឋាន
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើ មិនត្រឹមត្រូវនោះឡើយ។ ក្រុមហ៊ុនទទួលបានសិទ្ធិលក់រាយ និងចែកចាយផលិតផលយីហោ JBL នៅកម្ពុជា មិនបានលក់បញ្ចុះតម្លៃរហូតដល់ ៦០ភាគរយដូចដែលត្រូវបានផ្សព្វផ្សាយលើបណ្ដាញសង្គមដោយទំព័រហ្វេសប៊ុកមួយចំនួននោះឡើយ។ សម្រាប់ឱកាសពាក់កណ្ដាលឆ្នាំនេះ ក្រុមហ៊ុន Nano Sound និងក្រុមហ៊ុន Kfour Group Ltd លក់បញ្ចុះតម្លៃត្រឹម ៣០ភាគរយប៉ុណ្ណោះសម្រាប់ផលិតផល JBL។
Title:ពាណិជ្ជកម្មបោកបញ្ឆោតផ្សព្វផ្សាយថា ផលិតផល JBL លក់បញ្ចុះតម្លៃដល់៦០ភាគរយ
Written By: Jay UdomResult: False
