Suzuki ច្រានចោលព័ត៌មានថា ក្រុមហ៊ុនគ្រោងបញ្ឈប់ប្រតិបត្តិការនៅថៃ
កាលពីពេលថ្មីៗនេះ ព័ត៌មានផ្សព្វផ្សាយព្រោងព្រាតនៅលើបណ្ដាញសង្គម បាននិយាយថា ក្រុមហ៊ុនផលិតរថយន្តរបស់ជប៉ុន Suzuki នឹងបិទរោងចក្ររបស់ខ្លួននៅក្នុងប្រទេសថៃ ដោយសារការលក់ធ្លាក់ចុះដែលបណ្ដាលមកពីការហូរចូលដ៏ច្រើននៃរថយន្តចិនចូលទៅក្នុងទីផ្សារប្រទេសមួយនេះ។ ព័ត៌មាននេះ ត្រូវបានចែកចាយ និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថាព័ត៌មាននេះមិនត្រឹមត្រូវនោះឡើយ។
កាលពីពេលថ្មីៗនេះ ព័ត៌មានផ្សព្វផ្សាយព្រោងព្រាតនៅលើបណ្ដាញសង្គម បាននិយាយថា ក្រុមហ៊ុនផលិតរថយន្តរបស់ជប៉ុន Suzuki នឹងបិទរោងចក្ររបស់ខ្លួននៅក្នុងប្រទេសថៃ ដោយសារការលក់ធ្លាក់ចុះដែលបណ្ដាលមកពីការហូរចូលដ៏ច្រើននៃរថយន្តចិនចូលទៅក្នុងទីផ្សារប្រទេសមួយនេះ។ ព័ត៌មាននេះ ត្រូវបានចែកចាយ និងបញ្ចេញមតិជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថាព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី១៨ ខែកក្កដា ឆ្នាំ២០២៤កន្លងទៅនេះ ទំព័រហ្វេសប៊ុកមួយ បានបង្ហោះសារ ដែលបានអះអាងជាភាសាខ្មែរថា រោងចក្រ និងក្រមហ៊ុនផលិតរថយន្តជប៉ុន Suzuki នឹងបញ្ឈប់ប្រតិបត្តិការរបស់ខ្លួននៅក្នុងប្រទេសថៃឆ្នាំក្រោយ (២០២៥)។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ផងដែរថា មូលហេតុនៃការបិទរោងចក្រផលិតនៅក្នុងប្រទេសថៃនេះ គឺដោយសារតម្រូវការលក់របស់ខ្លួនបានធ្លាក់ចុះ និងមានការប្រកួតប្រជែងទីផ្សាររថយន្តចិនច្រើន។
សារអះអាងស្រដៀងគ្នាបែបនេះ ត្រូវបានរកឃើញ និងចែកចាយយ៉ាងផុសផុលនៅលើ បណ្ដាញសង្គមហ្វេសប៊ុកដទៃទៀតផងដែរ ដោយបានលើកឡើងថា ក្រុមហ៊ុនផលិតរថយន្តរបស់ជប៉ុន គ្រោងនឹងបិទរោងចក្ររបស់ខ្លួននៅក្នុងប្រទេសថៃ។
ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ដូចគ្នានេះ ការអះអាងខាងលើ ក៏ត្រូវបានផ្សព្វផ្សាយយ៉ាងទូលំទូលាយក្នុងចំណោមគេហទំព័រសារព័ត៌មានផងដែរ។
Penh Chet Media News Report | Archived Link
ការត្រួតពិនិត្យការពិត
Fact Crescendo Cambodia បានធ្វើការត្រួតពិនិត្យ និងផ្ទៀងផ្ទាត់ការពិតរបស់ខ្លួន តាមរយៈព័ត៌មានថ្មីៗចុងក្រោយ និងការប្រកាសច្រានចោលរបស់ក្រុមហ៊ុន Suzuki ផ្ទាល់។
កាលពីថ្ងៃទី១៨ ខែឧសភា ឆ្នាំ២០២៤កន្លងទៅនេះ ក្រុមហ៊ុន Suzuki Motors Thailand បានចេញសេចក្ដីប្រកាសជូនដំណឹងជាផ្លូវការមួយ នៅលើបណ្ដាញសង្គមហ្វេសប៊ុករបស់ខ្លួន ដើម្បីធ្វើការឆ្លើយតបទៅនឹងការអះអាងមិនត្រឹមត្រូវមួយ ដែលបានធ្វើឡើង និងចែកចាយជាច្រើននាពេលថ្មីៗនេះ។
នៅក្នុងសេចក្តីប្រកាសបដិសេធ ក្រុមហ៊ុន Suzuki Motors បានបញ្ជាក់ផងថា កាលពីថ្មីៗនេះ មានព័ត៌មានផ្សព្វផ្សាយនៅលើបណ្ដាញសង្គមទាក់ទងទៅនឹងប្រតិបត្តិការរបស់ខ្លួន ដែលត្រូវបានប្រកាសបិទទ្វារនៅក្នុងប្រទេសថៃ។
ក្រុមហ៊ុនដដែលខាងលើ ក៏បានបញ្ជាក់ថា ព័ត៌មាននោះ គឺមិនមែនជាការពិតនោះឡើយ។ ក្រុមហ៊ុន Suzuki Motors Thailand នៅតែមានផែនការរយៈពេលវែង ដើម្បីណែនាំរថយន្តស៊េរីថ្មី ឆ្នាំ២០២៥ និងឆ្នាំបន្តបន្ទាប់ទៀត។
ខាងក្រោមនេះ គឺជាការច្រានចោល និងបកស្រាយទាំងស្រុងរបស់ក្រុមហ៊ុន។
ដូចគ្នានេះ ទាក់ទិនទៅនឹងការបិទជាបន្តបន្ទាប់របស់ហាងលក់រថយន្ត Suzuki មួយចំនួន គឺដោយសារតែដំណើរការអាជីវកម្មរបស់ឈ្មួញនីមួយៗ បានជួបប្រទះ និងមានបញ្ហាហរិញ្ញវត្ថុ ការធ្លាក់ចុះនៃការលក់ ឬ ការផ្លាស់ប្ដូរទៅរកស៊ីលក់រថយន្តអគ្គិសនីរបស់ចិន។
HeadLight Magazine | Archived Link
តើក្រុមហ៊ុន Suzuki ចាប់ផ្ដើមប្រតិបត្តិការរបស់ខ្លួននៅក្នុងប្រទេសថៃតាំងពីពេលណា?
ក្រុមហ៊ុន Suzuki Motor Corporation ដែលជាក្រុមហ៊ុនផលិតរថយន្តមួយ មកពីប្រទេសជប៉ុន បានបង្កើត និងចុះបញ្ជីក្រុមហ៊ុនខ្លួន Suzuki Motor (Thailand) Co., Ltd នៅថ្ងៃទី០១ ខែសីហា ឆ្នាំ២០១១កន្លងទៅ។
ក្រុមហ៊ុននេះ បានកំណត់គោលដៅនៅក្នុងទីផ្សារប្រទេសថៃ សម្រាប់រថយន្តគុណភាពខ្ពស់ជាច្រើនប្រភេទ ហើយបានចាប់ផ្តើមរោងចក្រផលិតរបស់ខ្លួននៅក្នុងស្រុក Pluak Daeng ខេត្ត Rayong ដែលជាការកត់សម្គាល់ការចាប់ផ្តើមនៃប្រតិបត្តិការរបស់ក្រុមហ៊ុនមួយនេះ នៅក្នុងប្រទេសថៃ។
Suzuki Motors Link | Archived Link
ករណីនៃការអះអាងខាងលើ ក៏ត្រូវបានផ្ទៀងផ្ទាត់ និងត្រួតពិនិត្យការពិត ដោយក្រុមការងាររបស់យើង Fact Crescendo នៅក្នុងប្រទេសថៃផងដែរ ដោយបានរកឃើញថា ការអះអាងខាងលើនេះ គឺមិនត្រឹមត្រូវនោះឡើយ។
Fact Crescendo Thailand | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញ ការអះអាងដូចដែលត្រូវបានរៀបរាប់ខាងលើនេះ គឺមិនត្រឹមត្រូវនោះឡើយ។ ក្រុមហ៊ុន Suzuki Motors បានច្រានចោលចំពោះការលើកឡើងថាខ្លួននឹង បិទប្រតិបត្តិការនៅក្នុងប្រទេសថៃ និងថែមទាំងមានផែនការរយៈពេលវែងជាច្រើនឆ្នាំបន្តបន្ទាប់ទៀត។
Title:Suzuki ច្រានចោលព័ត៌មានថា ក្រុមហ៊ុនគ្រោងបញ្ឈប់ប្រតិបត្តិការនៅថៃ
Fact Check By: Kakada SimResult: Misleading