ព័ត៌មានចាស់ស្ដីពីមរណភាពពិធីករម្នាក់ត្រូវបានផ្សាយឡើងវិញនាំឱ្យយល់ច្រឡំ
ព័ត៌មាន និងទិដុ្ឋភាពសិល្បៈករទ្រហោយំជាច្រើនអំឡុងពិធីបុណ្យបូជាសពមួយ ត្រូវបានបង្ហោះលើបណ្ដាញសង្គមព្រោងព្រាតកាលពីសប្ដាហ៍មុន ដោយនាំឱ្យអ្នកប្រើប្រាស់បណ្ដាញសង្គមជាច្រើនយល់ច្រឡំថា នោះគឺជាទិដ្ឋភាពដែលបានកើតឡើងនាពេលថ្មីៗនេះ។ ទោះជាយ៉ាងណា Fact Crescendo Cambodia រកឃើញថា ការផ្សព្វផ្សាយខាងលើ មិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២៩ ខែមីនា ឆ្នាំ២០២៣ថ្មីៗនេះ ទំព័រហ្វេសប៊ុកមួយ ដែលមានឈ្មោះថា «Komsan Sabay» បានចែកចាយព័ត៌មានមួយ ដែលបានបង្ហាញក្រុមសិល្បៈករ និងតារាជាច្រើនរូបទ្រហោយំ។
ព័ត៌មាននេះ ត្រូវបានភ្ជាប់នឹងការអះអាងនាពេលថ្មីៗនេះថា គឺជាទិដ្ឋភាពកូនប្រុសស្រី និងសិល្បៈករ សិល្បៈការនី ពេលបូជាសពលោក អ៊ិត សេដ្ឋា។
ការផ្សព្វផ្សាយព័ត៌មានមួយនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានរៀបរាប់ភ្ជាប់ថា នេះគឺជា ទិដ្ឋភាពសម្រែកទ្រហោយំ របស់កូនប្រុសស្រី និងសិល្បៈករ សិល្បៈការនី ពេលបូជាសពលោក…។
ការអះអាងដូចគ្នានេះ ក៏ត្រូវបានរកឃើញ និងផ្សព្វផ្សាយដោយគេហទំព័រ 24 Hot Topic កាលពីថ្ងៃទី០៦ ខែមីនា ឆ្នាំ២០២៣កន្លងទៅផងដែរ។
24 Hot Topic Link | Archived Link
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីប ដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញនៅលើបណ្ដាញ YouTube ដែលត្រូវបានបង្ហោះតាំងពីថ្ងៃទី០៥ ខែមិថុនា ឆ្នាំ២០១៧កន្លងទៅ។
វីដេអូខាងលើ បានបង្ហាញទិដ្ឋភាពការស្រែកទ្រហោយំពីសំណាក់ក្រុមគ្រួសារ និងសិល្បៈករជាច្រើន ដោយមានការសោកស្ដាយចំពោះការបាត់បង់នូវពិធីករដ៏ល្បីឈ្មោះមួយ។
ព័ត៌មាននៃការមរណភាព និងបូជាសពរបស់លោក គឺជាព័ត៌មានចាស់ ដែលបានកើតឡើង ៥ឆ្នាំកន្លងមកហើយ។
ករណីមរណភាពរបស់ពិធីករល្បីឈ្មោះលោក អ៊ិត សេដ្ឋា ខាងលើនេះ បានបង្កើតឲ្យមានការសោកស្តាយជាខ្លាំងពីសំណាក់មហាជន ព្រោះតែជារឿងដែលមិននឹកស្មានដល់។
លោកបានទទួលមរណភាពនៅថ្ងៃទី០៤ ខែមិថុនា ឆ្នាំ២០១៧កន្លងទៅ ក្នុងអាយុ ៤៧ឆ្នាំ បន្ទាប់ពីមានជំងឺប្រចាំកាយធ្ងន់ធ្ងរ។ សូមមើលខ្លឹមសារលម្អិតនៅទីនេះ ឬតាមរយៈតំណភ្ជាប់ត្រូវបានរក្សាទុកនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើនេះ គឺធ្វើឱ្យមានការយល់ច្រឡំ។ ការពិត ការមរណភាពរបស់ពិធីករដ៏ល្បីឈ្មោះលោក អ៊ិត សេដ្ឋា កាលពីឆ្នាំ២០១៧កន្លងទៅ គឺជាព័ត៌មានចាស់ ដែលត្រូវបានផ្សព្វផ្សាយឡើងវិញ។
Title:ព័ត៌មានចាស់ស្ដីពីមរណភាពពិធីករម្នាក់ត្រូវបានផ្សាយឡើងវិញនាំឱ្យយល់ច្រឡំ
Fact Check By: Kakada SimResult: Missing Context
