រូបថតលោកនាយករដ្ឋមន្ត្រី ហ៊ុន សែន និងក្រុមគ្រួសារលោក ត្រូវបានកាត់តជារឿយៗ និងចែកចាយនៅលើបណ្ដាញសង្គម។ ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពលោក ហ៊ុន សែន និងលោកស្រី ប៊ុន រ៉ានី ដែលត្រូវជាភរិយារបស់លោក ស្ថិតនៅក្នុងឈុតអ្នកជាប់ពន្ធនាគារ ត្រូវបានបង្ហោះឡើងដោយអ្នកប្រើប្រាស់ហ្វេសប៊ុកម្នាក់។ រូបថតនេះ ត្រូវបាន ចែកចាយតៗគ្នា និងប្រតិកម្មចម្រុះជាច្រើន។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកាត់ត។
ការអះអាងលើបណ្តាញសង្គម
កាលពីថ្ងៃទី២២ ខែធ្នូ ឆ្នាំ២០២១កន្លងទៅ អ្នកប្រើប្រាស់ហ្វេសប៊ុកម្នាក់ បង្ហោះរូបថតមួយសន្លឹក បង្ហាញអំពីទិដ្ឋភាពលោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី នៅក្នុងសម្លៀកបំពាក់ជនជាប់ពន្ធនាគារ។ រូបថតនេះ បានភ្ជាប់ដោយសំណេរថា «ទឹកឡើងត្រីស៊ីស្រមោច ទឹកហោចស្រមោចស៊ីត្រី» ដោយត្រូវបានប្រតិកម្មចម្រុះពីសំណាក់អ្នកប្រើប្រាស់ និងចែកចាយតៗគ្នាជាច្រើនដង នៅលើបណ្តាញសង្គមហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើហ្វេសប៊ុក ក៏បានសរសេររៀបរាប់នៅក្នុងសំណេររបស់ខ្លួនផងថា «ឈ្នះជាស្តេច ចាញ់ជាចោរ ទឹកឡើងត្រីស៊ីស្រមោច ទឹកហោចស្រមោចស៊ីត្រី ចេះឯងអោយ [ឲ្យ] ក្រែងចេះគេ វាគ្មានអ្វីស្ថិតស្ថេរទេ ថ្ងៃនេះអ្នកឯងមានអំណាចដើរធើ [ធ្វើ] បាបគេ ថ្ងៃក្រោយគេនិងធើ [ធ្វើ] បាបឯង និងគ្រួសារវិញហើយ អាគុក!»។
ការត្រួតពិនិត្យការពិត
Fact Crescendo Cambodia បានចាប់ផ្ដើមធ្វើការត្រួតពិនិត្យ និងផ្ទៀងផ្ទាត់លើរូបថតនេះតាមរយៈ ការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងប្រទះនូវប្រភពមួយចំនួន។
រូបថតមួយសន្លឹកដែលមានទម្រង់ និងសណ្ឋានដូចគ្នានេះ ត្រូវបានរកឃើញនៅលើ គេហទំព័រសារព័ត៌មានដើមត្នោត ផ្សព្វផ្សាយកាលពីថ្ងៃទី១៩ ខែមករា ឆ្នាំ២០១៨កន្លងទៅ។ ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ ពុំបានបង្ហាញនូវទិដ្ឋភាពលោកនាយករដ្ឋមន្ត្រី ហ៊ុន សែន និងភរិយារបស់លោកនោះឡើយ។
Deum Tnot News Report | Archived Link
កាលពីថ្ងៃទី២៦ ខែមេសា ឆ្នាំ២០១៧កន្លងទៅ គេហទំព័រសារព័ត៌មាន ខ្មែរតែមួយ ក៏បានចុះផ្សព្វផ្សាយ អំពីទិដ្ឋភាពការនាំខ្លួនរបស់លោក មាជ សុវណ្ណារ៉ា និងលោក អ៊ុក ពេជ្រសំណាង ទៅកាន់សាលាឧទ្ធរណ៍កាលពីថ្ងៃទី២៥ ខែមេសា ឆ្នាំ២០១៧ និងពុំបានបង្ហាញនូវទិដ្ឋភាពរូបលោក ហ៊ុន សែន និងភរិយារបស់លោកនោះទេ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ បានសរសេររៀបរាប់ថា «លោក មាជ សុវណ្ណារ៉ា និងសកម្មជនCNRPទាំង១០នាក់ រួមមានឈ្មោះ អឿ ណារិន, ឃិន រឿន ហៅ ឃិន ចំរើន,នាង សុឃុន, សាន គឹមហេង, ស៊ុ ពុទ្ធី, កែ ឃីម ហៅ វិន ឌី, ទេព ណារិន, អាន បឋម ហៅ សុខុម, សាន សីហៈ និងលោក អ៊ុក ពេជ្រសំណាង កាលពីថ្ងៃទី២១ ខែកក្កដា ឆ្នាំ២០១៥ ត្រូវបានសាលាដំបូងរាជធានីភ្នំពេញ ផ្ដន្ទាទោសឲ្យជាប់ពន្ធនាគារពី៧ឆ្នាំដល់២០ឆ្នាំ ពាក់ព័ន្ធនឹងហិង្សា នៅក្បែរទីលានប្រជាធិបតេយ្យកាលពីខែកក្កដាឆ្នាំ២០១៤»។
Khmer Unity Link | Archived Link
ជាមួយគ្នានេះដែរ តាមរយៈគេហទំព័រសារព័ត៌មាន Grand News Asia ចុះផ្សាយកាលពីថ្ងៃទី២៦ ខែមេសា ឆ្នាំ២០១៧ ក៏បានបង្ហាញនូវទិដ្ឋភាពលោក មាជ សុវណ្ណារ៉ា លើកដៃពីរ និងលោក អ៊ុក ពេជ្រសំណាង នៅក្នុងឈុតអ្នកជាប់ពន្ធនាគារផងដែរ។
ខាងក្រោមនេះ គឺជារូបភាពផ្តាមចេញពីគេហទំព័រខាងលើ បានសរសេររៀបរាប់ថា «សាលាឧទ្ធរណ៍បានសម្រេចលើកពេលសវនាការ កាត់ទោសលោក មាជ សុវណ្ណារ៉ា រួមទាំងសកម្មជនគណបក្សប្រឆាំង១០នាក់ផ្សេងទៀត ពាក់ព័ន្ធនឹងសំណុំរឿង ហិង្សានៅលើស្ពាននាគ ក្បែរទីលានប្រជាធិបតេយ្យ កាលពីឆ្នាំ២០១៤»។
Grand News Asia Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើ គឺពិតជាមិនត្រឹមត្រូវទេ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិតច្បាប់ដើមនៃរូបថតនេះ គឺត្រូវបានស្គាល់ថាជារូបលោក មាជ សុវណ្ណារ៉ា និងលោក អ៊ុក ពេជ្រសំណាង នៅពេលដែលពួកគាត់ត្រូវបានអនុរក្សពន្ធនាគារ បញ្ជូនទៅកាន់សាលាឧទ្ធរណ៍កាលពីថ្ងៃទី២៥ ខែមេសា ឆ្នាំ២០១៧។
Title:រូបថតបង្ហាញលោក ហ៊ុន សែន និងភរិយាស្ថិតនៅក្នុងឈុតអ្នកជាប់ពន្ធនាគារ ជារូបថតកាត់ត
Fact Check By: Kakada SimResult: Altered
