ការអះអាងដ៏ផុសផុលនៅលើបណ្ដាញសង្គមនាសប្ដាហ៍នេះ បាននិយាយថា អត្រាឆ្លងមេរោគអេដស៍នៅកម្ពុជាកំពុងកើនឡើងខ្លាំង ហើយខេត្តព្រះសីហនុ និងតាកែវ ស្ថិតនៅលំដាប់លេខ១ និងលេខ២ ជាតំបន់មានអ្នកផ្ទុក និងឆ្លងមេរោគអេដស៍ច្រើនជាងគេ។ ការអះអាងនេះ ត្រូវបានចែករំលែកព្រោងព្រាតលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង បង្ហាញថា ការអះអាងនេះ មិនត្រឹមត្រូវឡើយ។
ការអះអាងលើបណ្ដាញសង្គម
ការអះអាងដ៏ផុសផុលនៅលើបណ្ដាញសង្គមនាពេលថ្មីៗនេះ បានលើកឡើងថា ករណីឆ្លងមេរោគអេដស៍កំពុងកើនឡើងខ្លាំង ដោយខេត្តព្រះសីហនុ ស្ថិតនៅលំដាប់ទី១ ហើយខេត្តតាកែវស្ថិតនៅលំដាប់ទី២ ខណៈដែលមនុស្ស ៧,០០០នាក់ដែលបានឆ្លងមេរោគនេះ បានរត់គេចពីការផ្ដល់សេវាព្យាបាល។
ការអះអាងនេះ ត្រូវបានចែករំលែកព្រោងព្រាតនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ហើយក៏មានការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននៅលើបណ្ដាញសង្គមកាលពីថ្ងៃទី០៨ ខែធ្នូ ឆ្នាំ២០២៤ ដែលសរសេររៀបរាប់ថា “HIV-មេរោគអេដស៍កំពុងកើនឡើងខ្លាំង [ខេត្ត]ព្រះសីហនុ Top 1[លំដាប់ទី១] តាកែវ Top 2 [លំដាប់ទី២]។ ៧ម៉ឺននាក់ផ្ទុកមេរោគ ប្រុងប្រយ័ត្ន ៧ពាន់នាក់រត់គេចមិនទទួលការព្យាបាល”។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតដែរ ដែលនាំឱ្យមានការចែករំលែកបន្តជាច្រើន និងប្រតិកម្មចម្រុះបែបពីសំណាក់អ្នកប្រើប្រាស់បណ្ដាញសង្គមកម្ពុជា។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គមដោយទំព័រហ្វេសប៊ុក “គ្រូបង្រៀនអក្សរសាស្ត្រខ្មែរ” កាលពីថ្ងៃទី០៨ ខែធ្នូ ឆ្នាំ២០២៤។
ដោយសារតែវាកំពុងតែផុសផុលនៅលើបណ្ដាញសង្គម គេអាចរកមើលការអះអាងនេះតាមរយៈការបង្ហោះរបស់អ្នកប្រើប្រាស់បណ្ដាញសង្គមផ្សេងទៀតតាមរយៈតំណភ្ជាប់មាននៅទីនេះ (archived) ឬតំណភ្ជាប់មួយទៀតនៅទីនេះ (archived)។
ការត្រួតពិនិត្យការពិត
Fact Crescendo បានចាប់ផ្ដើមផ្ទៀងផ្ទាត់ទៅលើការអះអាងខាងលើនេះតាមរយៈការស្វែងរកការបកស្រាយពីអាជ្ញាធរជាតិទទួលបន្ទុកការងារប្រយុទ្ធប្រឆាំងនឹងមេរោគអេដស៍ ដែលនាំឱ្យយើងរកឃើញការពិតដូចខាងក្រោមនេះ។
បន្ទាប់ពីផ្ទុះនូវព័ត៌មាននេះនៅលើបណ្ដាញសង្គម មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ បានច្រានចោលនូវព័ត៌មាននេះ ដោយចាត់ទុកជាព័ត៌មាន “មិនពិត” និង “គ្មានមូលដ្ឋានច្បាស់លាស់”។
មជ្ឈមណ្ឌលជាតិមួយនេះដែលស្ថិតនៅក្រោមក្រសួងសុខាភិបាល បានបញ្ជាក់នៅក្នុងសេចក្ដីបំភ្លឺរបស់ខ្លួនចេញកាលពីថ្ងៃទី១១ ខែធ្នូ ឆ្នាំ២០២៤ ហើយត្រូវបានផ្សព្វផ្សាយនៅលើទំព័រហ្វេសប៊ុករបស់ខ្លួន និងត្រូវបានផ្សព្វផ្សាយដោយសារព័ត៌មាននានានៅក្នុងស្រុក។
បើតាមស្ថាប័នដដែលនេះ កម្ពុជាមានប្រជាជនរស់នៅជាមួយមេរោគអេដស៍សរុប ៧៦,០០០នាក់គិតត្រឹមឆ្នាំ២០២៣ ក្នុងនោះ ៦៩,៤១៣នាក់ កំពុងទទួលបានការព្យាបាលដោយឱសថប្រឆាំងមេរោគអេដស៍គិតត្រឹមត្រីមាសទី៣ នៃឆ្នាំ២០២៤នេះ ខណៈដែលប្រជាជនខ្ទង់ ៧,០០០នាក់ទៀត មិនទាន់ដឹងខ្លួនថាមានផ្ទុកមេរោគអេដស៍ និងមិនទាន់ទទួលបានសេវាព្យាបាលនៅឡើយ។
សម្រាប់ខេត្តតាកែវ មជ្ឈមណ្ឌលជាតិមួយនេះ បានបញ្ជាក់ថា ខេត្តមួយនេះមានប្រជាជនរស់នៅជាមេរោគអេដស៍ចំនួន ២,៨១៤នាក់ ក្នុងនោះមាន ១៤នាក់ បានចាកចេញពីការទទួលសេវាព្យាបាល ហើយថា មន្ត្រីមានសមត្ថកិច្ចកំពុងទាក់ទងដើម្បីនាំពួកគាត់ទៅទទួលសេវាព្យាបាលវិញ។
សូមមើលខ្លឹមសារទាំងស្រុងនៃសេចក្ដីបំភ្លឺរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ ដែលត្រូវបានផ្សព្វផ្សាយនៅលើទំព័រហ្វេសប៊ុករបស់ខ្លួនកាលពីថ្ងៃទី១១ ខែធ្នូ ឆ្នាំ២០២៤។
ប្រធានអាជ្ញាធរជាតិប្រយុទ្ធនឹងជំងឺអេដស៍ លោក អៀង ម៉ូលី បានប្រាប់ Fact Crescendo តាមតេឡេក្រាមនៅថ្ងៃនេះថា ការវាយតម្លៃតាមលក្ខណៈវិទ្យាសាស្ត្រ បង្ហាញថា មនុស្សចំនួន ៧៦,០០០នាក់ ត្រូវបានសង្ស័យថា មានផ្ទុកមេរោគអេដស៍នៅអំឡុងឆ្នាំ២០២៣ ប៉ុន្តែ តួលេខជាក់លាក់នៅឆ្នាំ២០២៤នេះ បង្ហាញថា កម្ពុជាមានអ្នករស់នៅជាមួយជំងឺអេដស៍ ៦៩,៤១៣នាក់ ដែលកំពុងទទួលសេវាព្យាបាល។
លោក អៀង ម៉ូលី បានឱ្យដឹងបន្ថែមទៀតថា មនុស្សជាង ៦,០០០នាក់ទៀត មិនទាន់បានធ្វើតេស្តរកមេរោគនៅឡើយ និងស្ថិតនៅក្រោមការសង្ស័យ ក្នុងនោះមានមួយចំនួនអាចធ្វើចំណាកស្រុក មួយចំនួនទៀតសម្ងំព្យាបាលតាមគ្លីនិក ឬមន្ទីរពេទ្យឯកជន ឬមួយចំនួនទៀត អាចបាត់បង់ជីវិត។
លោក ឈឹម ឃិនដារ៉េត អគ្គលេខាធិការ និងជាអ្នកនាំពាក្យនៃអាជ្ញាធរជាតិប្រយុទ្ធនឹងជំងឺអេដស៍ បានប្រាប់ដឹងថា ខេត្តព្រះសីហនុ និងខេត្តតាកែវ មិនមែនជាតំបន់មានប្រជាជនផ្ទុកមេរោគអេដស៍ច្រើនជាងគេឡើយ។
លោកបញ្ជាក់ថា ការផ្សព្វផ្សាយថា ខេត្តទាំងពីរនេះជាប់លំដាប់លេខ ១ និងលេខ ២ ជាខេត្តមានអត្រាឆ្លងមេរោគអេដស៍ខ្ពស់នោះ មិនមែនជាការពិតនោះឡើយនៅក្នុងចំណោមខេត្ត និងរាជធានីរបស់ប្រទេសកម្ពុជា។
តួលេខដែលផ្ដល់ឱ្យដោយមន្ត្រីនាំពាក្យរូបនេះ បង្ហាញថា រាជធានីភ្នំពេញ ជាប់ជាតំបន់មានអ្នកផ្ទុកមេរោគអេដស៍ខ្ពស់ជាងគេរហូតដល់ ២៧ភាគរយបើធៀបនៃតួលេខសរុប ខណៈខេត្តបាត់ដំបង សៀមរាប កណ្ដាល បន្ទាយមានជ័យ និងកំពង់ចាម គឺស្ថិតក្នុងតំបន់ទាំង ៦ ដែលមានអ្នកផ្ទុកមេរោគអេដស៍ច្រើនជាងគេ។ តួលេខសរុបនៃអ្នកផ្ទុកមេរោគអេដស៍នៅតំបន់ទាំង ៦នេះ គឺមានរហូតទៅដល់ ៦២ភាគរយនៃតួលេខសរុបទូទាំងប្រទេស។
សម្រាប់ករណីឆ្លងថ្មីវិញ តួលេខដដែលនេះ បង្ហាញថា រាជធានីភ្នំពេញ ស្ថិតនៅលំដាប់ខ្ពស់ជាងគេរហូតដល់ ៣៨ភាគរយ និងតាមពីក្រោយដោយខេត្តបាត់ដំបង សៀមរាប បន្ទាយមានជ័យ តាកែវ និងខេត្តព្រះសីហនុ។ អត្រាឆ្លងថ្មីនៅតំបន់ទាំង ៦នេះ គ្របដណ្ដប់ដល់ទៅ ៧២ភាគរយនៃតួលេខឆ្លងថ្មីសរុបនៅទូទាំងប្រទេស។
ខាងក្រោមនេះ គឺជាតួលេខដែលបង្ហាញដោយលោក ឈឹម ឃិនដារ៉េត បង្ហាញរាជធានី និងខេត្តចំនួន ៦ ដែលមានមនុស្សរស់នៅជាមួយមេរោគអេដស៍ច្រើនជាងគេ និងមានអត្រាឆ្លងថ្មីច្រើនជាងគេ។
គោលការណ៍ណែនាំរួមស្ដីពីសេវាធ្វើតេស្តរកមេរោគអេដស៍នៅកម្ពុជាដែលចេញដោយមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៅឆ្នាំ២០២៤នេះ បង្ហាញថា អត្រាឆ្លងថ្មីនៃមេរោគអេដស៍នៅកម្ពុជា បានធ្លាក់ចុះ ៣៣ភាគរយនៅចន្លោះឆ្នាំ២០១០ ដល់ឆ្នាំ២០២២ ពោលគឺបានធ្លាក់ចុះពី ២,០០០ករណីនៅឆ្នាំ២០១០ មកនៅត្រឹម ១,៤០០ករណីនៅឆ្នាំ២០២២។
សេចក្ដីរាយការណ៍របស់កាសែតភ្នំពេញ ប៉ុស្តិ៍កាលពីខែកក្កដាកន្លងមកនេះ បានឱ្យដឹងថា ករណីឆ្លងថ្មីនៅកម្ពុជា បានធ្លាក់ចុះ ១១ភាគរយនៅឆ្នាំ២០២៣ បើធៀបនឹងតួលេខឆ្នាំ២០២២កន្លងមក ដោយធ្លាក់ពីចំនួន ១,៣០០ករណី មកនៅត្រឹម ១,២០០ករណី។
Follow Us and Stay Up to Date with Our Latest Fact-Checks
Facebook | Twitter | Telegram | TikTok | WhatsApp | Instgram
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ តួលេខផ្ដល់ឱ្យដោយអ្នកនាំពាក្យអាជ្ញាធរជាតិប្រយុទ្ធនឹងជំងឺអេដស៍ បង្ហាញថា ខេត្តព្រះសីហនុ និងខេត្តតាកែវ មិនមែនជាតំបន់មានប្រជាជនផ្ទុគមេរោគអេដស៍ច្រើនជាងគេនោះឡើយ ហើយក៏មិនមែនជាតំបន់មានអត្រាឆ្លងថ្មីខ្ពស់ជាងគេដែរ។ តំបន់ទាំង ៦ដែលមានអ្នកផ្ទុកមេរោគអេដស៍ច្រើនជាងគេ មានរាជធានីភ្នំពេញ ខេត្តបាត់ដំបង សៀមរាប កណ្ដាល បន្ទាយមានជ័យ និងកំពង់ចាម។ ចំណែកតំបន់ទាំង ៦ដែលមានអត្រាឆ្លងថ្មីខ្ពស់ជាងគេ មានរាជធានីភ្នំពេញ ខេត្តបាត់ដំបង សៀមរាប បន្ទាយមានជ័យ តាកែវ និងខេត្តព្រះសីហនុ។
Title:ព័ត៌មានក្លែងក្លាយថា ខេត្តព្រះសីហនុ និងតាកែវ មានអ្នកឆ្លង និងផ្ទុកមេរោគអេដស៍ច្រើនជាងគេ
Written By: Jay UdomResult: Misleading
