ខណៈដែលការឆបោកតាមអនឡាញត្រូវបានធ្វើឡើងតាមរូបភាពផ្សេងនោះ ការផ្សព្វផ្សាយមួយលើកឡើងថា អាកាសយានដ្ឋានអន្តរជាតិភ្នំពេញ កំពុងរៀបចំលក់ឡៃឡុងប្រចាំឆ្នាំនូវឥវ៉ាន់គ្មានម្ចាស់នៅឯព្រលានយន្តហោះ។ ការផ្សព្វផ្សាយនេះ ទាក់ទាញការចាប់អារម្មណ៍យ៉ាងច្រើនពីអ្នកប្រើប្រាស់បណ្ដាញសង្គមកម្ពុជា។ ទោះជាយ៉ាងណា យើងបានរកឃើញថា ការផ្សព្វផ្សាយនេះ គឺជាការបោកបញ្ឆោតតាមអនឡាញតែប៉ុណ្ណោះ។
ការអះអាងលើបណ្ដាញសង្គម
ការផ្សព្វផ្សាយមួយនៅលើបណ្ដាញសង្គមកាលពីថ្មីៗនេះ បានប្រកាសថា អាកាសយានដ្ឋានអន្តរជាតិភ្នំពេញកំពុងរៀបចំការលក់ឥវ៉ាន់ ក្នុងតម្លៃ ៨៤០០រៀល។
ការផ្សព្វផ្សាយការដាក់លក់បែបនេះ ត្រូវបានចែករំលែកបន្តជាច្រើនដងនៅលើបណ្ដាញសង្គម និងទាក់ទាញការចាប់អារម្មណ៍ពីអ្នកប្រើប្រាស់ហ្វេសប៊ុកដែរ។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយខាងលើ ដែលបានរៀបរាប់ថា «អាកាសយានដ្ឋានអន្តរជាតិភ្នំពេញកំពុងរៀបចំការលក់ឥវ៉ាន់ប្រចាំឆ្នាំរបស់ខ្លួនដោយមិនទាមទារសំណង»។
ការត្រួតពិនិត្យការពិត
Fact Crescendo Cambodia បានចោទសួរថា តើនេះគឺជាការពិតឬយ៉ាងណា ហើយចាប់ផ្ដើមផ្ទៀងផ្ទាត់ការពិតតាមរយៈព័ត៌មាននានាចុងក្រោយ និងការបកស្រាយរបស់នាយកដ្ឋានប្រឆាំងបទល្មើសបច្ចេកវិទ្យានៃកម្ពុជា។
កាលពីថ្ងៃទី២១ ខែកុម្ភៈ ឆ្នាំ២០២៥កន្លងទៅ ទំព័រហ្វេសប៊ុករបស់នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department បានផ្សព្វផ្សាយទៅដល់អ្នកប្រើប្រាស់អំពីករណីការឆបោកបញ្ឆោតតាមរយៈ ប្រព័ន្ធសារអនឡាញមួយ (Phishing Link)។
ការផ្សព្វផ្សាយបែបនេះ បានកើតឡើងស្របពេលមានការផ្សព្វផ្សាយយ៉ាងផុសផុលអំពីការដាក់លក់ប្រចាំឆ្នាំរបស់ អាកាសយានដ្ឋានអន្តរជាតិភ្នំពេញនៅក្នុងតម្លៃទាបមួយ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «ថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា បានសង្កេតឃើញថា មានជនអនាមិកបានបង្ហោះផ្សព្វផ្សាយ តាមប្រព័ន្ធទំនាក់ទំនងសង្គមហ្វេសប៊ុក ខ្លឹមបោកបញ្ឆោត ក្នុងគោលបំណងទាញយកព័ត៌មានសម្ងាត់របស់យើង និងលួចយកគណនីនោះទៅប្រព្រឹត្តិបទល្មើសផ្សេងៗ ដោយមិនដឹងខ្លួន»។
Anti Cyber Crime Department | Archived Link
ការផ្សព្វផ្សាយ និងអះអាងខាងលើ ក៏ត្រូវបានច្រានចោល និងជូនដំណឹងដោយក្រុមការងារផ្នែកទំនាក់ទំនងនៃក្រុមហ៊ុនខេមបូឌាអ៊ែរផត (Cambodia Airports) ផងដែរ កាលពីថ្ងៃទី០៤ ខែមីនា ឆ្នាំ២០២៥កន្លងទៅ ដោយបានបញ្ជាក់ថា ការផ្សព្វផ្សាយទាំងនោះ គឺជាព័ត៌មានមិនពិត និងបង្កការយល់ច្រឡំដល់អ្នកប្រើប្រាស់។
ខាងក្រោមនេះ គឺជាលិខិតជូនដំណឹងដែលធ្វើឡើងដោយក្រុមការងារផ្នែកទំនាក់ទំនងនៃក្រុមហ៊ុនខេមបូឌាអ៊ែរផត។
ខាងក្រោមនេះ គឺជារូបភាពផ្ដាមពីទំព័រហ្វេសប៊ុក ដែលអះអាងមិនត្រឹមត្រូវថា «អាកាសយានដ្ឋានអន្តរជាតិភ្នំពេញ សម្អាតឃ្លាំង និងលក់ឥវ៉ាន់ក្នុងតម្លៃ ៨៤០០រៀល»។
ដូចគ្នានេះ ករណីខាងលើ ក៏ត្រូវបានផ្សព្វផ្សាយផងដែរ នៅលើគេហទំព័រព័ត៌មានក្នុងស្រុកនានា ដូចជា Fresh News (archived link), AMS (archived link) និងបណ្ដាសារព័ត៌មាន Khmer Times (archived link) ដែលការផ្សព្វផ្សាយថា អាកាសយានដ្ឋានអន្តរជាតិភ្នំពេញ សម្អាតឃ្លាំង និងលក់ឥវ៉ាន់ក្នុងតម្លៃ ៨៤០០រៀល គឺមិនពិតនោះឡើយ។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានរកឃើញផ្សព្វផ្សាយនៅលើបណ្ដាញសង្គម និងរូបថតច្បាប់ដើម។
កន្លងមក នាយកដ្ឋានប្រឆាំងបទល្មើសបច្ចេកវិទ្យា បានជូនដំណឹងអំពីករណីបោកបញ្ឆោតជាច្រើនតាមប្រព័ន្ធអនឡាញ ហើយក្នុងនោះថ្មីៗនេះ ក៏បានជូនដំណឹង និងផ្សព្វផ្សាយអំពីទម្រង់ឆបោកបញ្ឆោតតាមរយៈសារ (Phishing Link) ដើម្បីឱ្យអ្នកប្រើប្រាស់ប្រព័ន្ធបច្ចេកវិទ្យាទាំងអស់មានការប្រុងប្រយ័ត្នបានខ្ពស់។
វិធីសាស្ត្រក្នុងការពារខ្លួនអ្នកពីការឆបោកតាមប្រព័ន្ធអនឡាញ៖
- កុំចែករំលែកពាក្យសម្ងាត់របស់អ្នកជាមួយនរណាម្នាក់
- រក្សាព័ត៌មានផ្ទាល់ខ្លួនរបស់អ្នកឱ្យមានសុវត្ថិភាព
- កុំចុចលើតំណភ្ជាប់ដែលគួរឱ្យសង្ស័យ។
សូមអានព័ត៌មានលម្អិតអំពីការផ្ទៀងផ្ទាត់របស់យើងដទៃទៀត តាមរយៈតំណភ្ជាប់នៅខាងក្រោមនេះ៖
- ការបោកបញ្ឆោតតាមអនឡាញផ្សព្វផ្សាយថា Samsung លក់បញ្ចុះតម្លៃធំតាមអនឡាញ
- ទង្វើឆបោកតាមអនឡាញកំពុងរីករាលដាលក្នុងបណ្ដាញតេឡេក្រាម
- សារដែលស្នើសុំអ្នកប្រើប្រាស់ផ្ទៀងផ្ទាត់គណនីធនាគារ គឺជាទម្រង់ការឆបោកបញ្ឆោត
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook | Twitter | Telegram | Google News | TikTok | WhatsApp
សន្និដ្ឋានFact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះទេ។ ការពិត អាកាសយានដ្ឋានអន្តរជាតិភ្នំពេញ មិនមានការរៀបចំកម្មវិធីលក់ឥវ៉ាន់ប្រចាំឆ្នាំរបស់ខ្លួននោះទេ ហើយនាយកដ្ឋានប្រឆាំងបទល្មើសបច្ចេកវិទ្យាបានរកឃើញថា ការផ្សព្វផ្សាយបែបនេះ គឺជាល្បិចបោកបញ្ឆោត។
Title:អាកាសយានដ្ឋានអន្តរជាតិភ្នំពេញ ពុំមានការរៀបចំកម្មវិធីលក់ឥវ៉ាន់ប្រចាំឆ្នាំរបស់ខ្លួននោះទេ
Written By: Kakada SimResult: False
