- >>
- FALSE
ព័ត៌មានក្លែងក្លាយមួយថា លោក ហ៊ុន សែន ត្រូវបានបញ្ជូនទៅសង្គ្រោះបន្ទាន់នៅសិង្ហបុរី
ខណៈដែលកម្ពុជាឈានកាន់តែជិតដល់ការបោះឆ្នោតសកលនៅខែកក្កដាខាងមុខនេះ ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា លោកនាយករដ្ឋមន្ត្រី ហ៊ុន សែន ត្រូវបានបញ្ជូនទៅសង្គ្រោះបន្ទាន់នៅក្នុងមន្ទីរពេទ្យប្រទេសសិង្ហបុរី។ ការអះអាងនេះ ត្រូវបានគេចែករំលែកបន្តជាច្រើនដង និងមានការបញ្ចេញមតិយោបល់ចម្រុះបែប បន្ទាប់ពីវាត្រូវបានបង្ហោះលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ គឺជាព័ត៌មានក្លែងក្លាយ។
ការអះអាងលើបណ្ដាញសង្គម
ចាប់តាំងពីថ្ងៃពុធកន្លងមកនេះ ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា លោកនាយករដ្ឋមន្ត្រី ហ៊ុន សែន កំពុងស្ថិតនៅក្រោមការសង្គ្រោះបន្ទាន់នៅឯមន្ទីរពេទ្យមួយនៅក្នុងប្រទេសសិង្ហបុរី។
ការអះអាងនេះ ត្រូវបានចែករំលែកជាច្រើនដងនៅលើបណ្ដាញសង្គមហ្វេសប៊ុកចាប់តាំងពីថ្ងៃពុធសប្ដាហ៍នេះមក ហើយមានការបញ្ចេញមតិជាច្រើនពីសំណាក់អ្នកប្រើប្រាស់បណ្ដាញសង្គម ដោយជឿថា ព័ត៌មាននេះជាការពិត។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមហ្វេសប៊ុកកាលពីថ្ងៃទី២១ ខែមិថុនា ឆ្នាំ២០២៣ ដែលរៀបរាប់ថា «ហ៊ុន សែន កំពុងសង្គ្រោះបន្ទាន់នៅមន្ទីរពេទ្យសាំងហ្គាពួរ [សិង្ហបុរី] តែអត់ផ្ទេរសិទ្ធិអោយ ស ខេង ទេ»។
ការអះអាងក្នុងន័យដូចគ្នានេះ ក៏ត្រូវបានបង្ហោះនៅលើបណ្ដាញសង្គមពីសកម្មជនគណបក្សប្រឆាំងមានមូលដ្ឋាននៅឯក្រៅប្រទេសផងដែរកាលពីថ្ងៃម្សិលមិញនេះ ហើយក៏ត្រូវបានចែករំលែកបន្តជាច្រើនដង និងមានការបញ្ចេញមតិយោបល់ជាច្រើនពីសំណាក់អ្នកប្រើប្រាស់បណ្ដាញសង្គមផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមដោយសកម្មជនបក្សប្រឆាំងរស់នៅក្រៅប្រទេស លោក ឆាំ ឆានី កាលពីថ្ងៃទី២៣ ខែមិថុនា ឆ្នាំ២០២៣ ដែលរៀបរាប់ថា «ច្បាស់ហើយ សម្ដេចទៅសម្ពោធមន្ទីរពេទ្យនៅសាំងហ្កាពួ»។
សកម្មជនគាំទ្របក្សប្រឆាំងម្នាក់ទៀតដែលកំពុងរស់នៅឯក្រៅប្រទេស ក៏បានបង្ហោះការអះអាងក្នុងន័យដូចគ្នាផងដែរកាលពីថ្ងៃពុធកន្លងមកនេះ ដែលនាំឱ្យមានការចែករំលែកបន្តជាច្រើនដង និងការបញ្ចេញមតិយោបល់ជាច្រើន។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃទី២២ ខែមិថុនា ឆ្នាំ២០២៣ ដែលរៀបរាប់ថា «លឺដំណឹងមកថា ហ៊ុន សែន ទៅលេងមន្ទីរពេទ្យប្រទេសសាំងហ្គារពួរ?»។
ការត្រួតពិនិតុ្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការសាកសួរទៅមន្ត្រីខុទ្ទកាល័យរបស់លោកនាយករដ្ឋមន្ត្រី ហ៊ុន សែន និងការពិនិត្យមើលឡើងវិញការបង្ហាញខ្លួនជាសាធារណៈរបស់គាត់រយៈពេលប៉ុន្មានថ្ងៃចុងក្រោយនេះ ដែលនាំឱ្យយើងរកឃើញការពិតដូចខាងក្រោមនេះ។
លោកនាយករដ្ឋមន្ត្រី ហ៊ុន សែន មិនបានបង្ហាញវត្តមានជាសាធារណៈចាប់តាំងពីថ្ងៃទី២១ រហូតដល់ថ្ងៃទី២៣ ខែមិថុនា ឆ្នាំ២០២៣នេះ បន្ទាប់ពីលោកបានបង្ហាញវត្តមានជាសាធារណៈនៅក្នុងពិធីរំលឹកខួប ៤៦ឆ្នាំនៃដំណើររបស់លោកឆ្ពោះទៅរកការផ្ដួលរំលំរបបខ្មែរក្រហម។
ខាងក្រោមនេះ គឺជាវីដេអូដែលបង្ហាញលោក ហ៊ុន សែន ថ្លែងនៅក្នុងពិធីរំលឹកខួប ៤៦ឆ្នាំនៃដំណើរឆ្ពោះទៅផ្ដួលរំលំរបបខ្មែរក្រហម។
ឆ្លើយតបនឹងការស្នើសុំការបញ្ជាក់ពី Fact Crescendo Cambodia នៅថ្ងៃសៅរ៍នេះ លោក សេង ទៀង ដែលជាជំនួយការផ្ទាល់របស់លោកនាយករដ្ឋមន្ត្រី ហ៊ុន សែន បានប្រាប់ថា លោកមិនបកស្រាយអ្វីច្រើននោះឡើយ ប៉ុន្តែ លោកបានចង្អុលទៅវត្តមានរបស់លោកនាយករដ្ឋមន្ត្រី ហ៊ុន សែន ដែលបានជួបជុំសំណេះសំណាលជាមួយកម្មករកម្មការិនីជិត ២ម៉ឺននាក់នៅព្រឹកថ្ងៃនេះ។
លោកនាយករដ្ឋមន្ត្រី ហ៊ុន សែន បានបង្ហាញវត្តមាននៅក្នុងវេទិកាសាធារណៈមួយនៅព្រឹកថ្ងៃនេះ ជួបសំណេះសំណាលជាមួយក្រុមកម្មករកម្មការិនីជិត ២ម៉ឺននាក់ ដែលពិធីសំណេះសំណាលនេះ ត្រូវបានរៀបចំឡើងនៅពហុកីឡដ្ឋានជាតិមរតកតេជោ ស្ថិតក្នុងខណ្ឌជ្រោយចង្វារ រាជធានីភ្នំពេញ។
ពិធីសាធារណៈនេះ ក៏ត្រូវបានផ្សាយផ្ទាល់នៅលើទំព័រហ្វេសប៊ុកផ្លូវការរបស់លោកផងដែរ ដោយបង្ហាញលោកនាយករដ្ឋមន្ត្រីឈរថ្លែងទៅកាន់មហាជនរយៈពេលជិត ១ម៉ោង ហើយលោកថតរូបជាមួយកម្មករកម្មការិនីដែលបានចូលរួមក្នុងវេទិកានោះផងដែរ។
ខាងក្រោមនេះ គឺជាវីដេអូទាំងស្រុងនៃការថ្លែងជាសាធារណៈរបស់លោក ហ៊ុន សែន នៅក្នុងពិធីសំណេះសំណាលនៅព្រឹកថ្ងៃទី២៤ ខែមិថុនា ឆ្នាំ២០២៣ ហើយត្រូវបានផ្សាយផ្ទាល់លើទំព័រហ្វេសប៊ុករបស់លោក។
រូបថត និងវីដេអូដែលត្រូវបានបង្ហោះនៅលើទំព័រហ្វេសប៊ុកផ្លូវការរបស់លោកនៅព្រឹកនេះ បង្ហាញលោកនាយករដ្ឋមន្ត្រី ហ៊ុន សែន ដើរចាប់ដៃកម្មករកម្មការិនី និងអនុញ្ញាតឱ្យពួកគេថតរូបជាមួយ ហើយបង្ហាញលោកថ្លែងសារនយោបាយដូចធម្មតា។
សូមមើលវីដេអូខាងក្រោមនេះដែលបង្ហាញសកម្មភាពលោក ហ៊ុន សែន ជួបចាប់ដៃ និងថតរូបជាមួយក្រុមកម្មករកម្មការិនី នៅព្រឹកថ្ងៃទី២៤ ខែមិថុនា ឆ្នាំ២០២៣។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ ជាព័ត៌មានក្លែងក្លាយ។ លោកនាយករដ្ឋមន្ត្រី ហ៊ុន សែន មិនត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យក្នុងប្រទេសសិង្ហបុរីដូចការអះអាងលើបណ្ដាញសង្គមនោះឡើយ។ លោក ហ៊ុន សែន មានសុខភាពធម្មតា និងបានចុះជួបសំណេះសំណាលជាមួយកម្មករកម្មការិនីនៅព្រឹកថ្ងៃនេះ។
Title:ព័ត៌មានក្លែងក្លាយមួយថា លោក ហ៊ុន សែន ត្រូវបានបញ្ជូនទៅសង្គ្រោះបន្ទាន់នៅសិង្ហបុរី
Written By: Jay UdomResult: False
