ការអះអាងមិនត្រឹមត្រូវថា លោក សាន សុជា សឹកភ្លាមមានប្រពន្ធភ្លែត
បន្ទាប់ពីព្រះសង្ឃ សាន សុជា បានលាចាកសិក្ខាបទកាលពីខែឧសភាកន្លងមកនេះ ការអះអាងមួយ បានលើកឡើងថា លោកមានភរិយាភ្លាមៗក្រោយពីលាចាកភ្នួស។ ការអះអាងនេះ បានបង្ហោះរូបថតស្ត្រីម្នាក់ឱបលោក សាន សុជា ដែលស្ថិតក្នុងសម្លៀកបំពាក់ជាគ្រហស្ថម្នាក់។ ការអះអាងនេះ ត្រូវបានអ្នកប្រើប្រាស់បណ្ដាញសង្គមចែករំលែកបន្តព្រោងព្រាត និងបញ្ចេញមតិចម្រុះបែប។ ទោះជាយ៉ាងណា បន្ទាប់ពីកិច្ចសម្ភាសជាមួយស្ត្រីដែលឱបលោក សាន សុជា យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយ បានអះអាងកាលពីចុងសប្ដាហ៍មុនថា អតីតព្រះសង្ឃ សាន សុជា បានរៀបការប្រពន្ធភ្លាមៗ ក្រោយពីលាចាកភ្នួសមកជាគ្រហស្ថធម្មតានៅក្នុងប្រទេសអូស្ត្រាលីកាលពីថ្ងៃទី២១ ខែឧសភាកន្លងមកនេះ។
ទំព័រហ្វេសប៊ុកដដែលនេះ បានបង្ហោះផងដែរនូវវីដេអូដែលបង្ហាញរូបថតលោក សាន សុជា និងស្ត្រីម្នាក់បានឱបគ្នាទៅវិញទៅមក។
ការអះអាងនេះ ត្រូវបានអ្នកប្រើប្រាស់ហ្វេសប៊ុកមួយចំនួនចែករំលែកបន្ត ហើយអ្នកប្រើប្រាស់បណ្ដាញសង្គមមួយចំនួន បានបញ្ចេញមតិយោបល់ និងប្រតិកម្មចម្រុះផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមហ្វេសប៊ុកកាលពីថ្ងៃទី២៧ ខែឧសភា ឆ្នាំ២០២៣ ដែលរៀបរាប់ថា «ហេតុតែគេមានសិល្ប៍សឹកភ្លាមមានប្រពន្ធភ្លែត។ បួសសន្សំទ្រព្យជិតចេញ MV ហើយបងប្អូន។ និពន្ធចម្រៀង និងទំនុកភ្លេងដោយរូបខ្ញុំបាទផ្ទាល់ អ្នកច្រៀងដោយប្អូនប្រុស យ៉ាង ជីង កែសម្រួលដោយក្រុម…Troll»។
ការប្រហាក់ប្រហែលគ្នានេះ ក៏ត្រូវបានបង្ហោះលើបណ្ដាញដោយអ្នកប្រើប្រាស់ហ្វេសប៊ុកដទៃទៀតដែរ បន្ទាប់ពីលោក សាន សុជា បានក្លាយជាឧបាសកដូចមនុស្សទូទៅនោះ។
ខាងក្រោមនេះ គឺជាការអះអាងមួយទៀតដែលរៀបរាប់ថា ស្ត្រីម្នាក់ដែលឱបលោក សាន សុជា គឺជាសង្សាលួចលាក់របស់លោក ហើយបានបើកចំហរទំនាក់ទំនងនេះ បន្ទាប់ពីលោកបានសឹកពីភេទជាសង្ឃ។
ការត្រួតពិនិតុ្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់លើការអះអាងតាមរយៈការពិនិត្យមើលសេចក្ដីបកស្រាយរបស់លោក សាន សុជា នៅលើទំព័រហ្វេសប៊ុកផ្លូវការរបស់គាត់ ដែលនាំឱ្យយើងរកឃើញការពិតដូចខាងក្រោមនេះ។
នៅក្នុងទំព័រហ្វេសប៊ុកផ្លូវការ ព្រះសង្ឃ សាន សុជា បានលាចាកសិក្ខាបទកាលពីល្ងាចថ្ងៃទី២១ ខែឧសភា ឆ្នាំ២០២៣ ដែលពិធីសឹកនេះត្រូវបានធ្វើឡើងនៅក្នុងប្រទេសអូស្ត្រាលី។
ភ្លាមៗក្រោយប្ដូរស្បងជីវចេញ ហើយស្លៀកពាក់ខោអាវជាឧបាសកនោះ លោក សាន សុជា ទទួលបានការស្វាគមន៍ និងការឱបក្រសោបពីម្ដាយរបស់លោក និងសាច់ញាតិផងដែរ។
Fact Crescendo Cambodia បានស្នើសុំការបកស្រាយពីលោក សាន សុជា តាមរយៈប្រអប់សារក្នុងបណ្ដាញសង្គមផងដែរ ប៉ុន្តែ ពុំទទួលបានការឆ្លើយតបនៅឡើយទេ។
ទន្ទឹមគ្នានេះ យើងក៏បានរកឃើញទំព័រហ្វេសប៊ុកមួយឈ្មោះ San Chanthy បានថតផ្សាយវីដេអូដោយផ្ទាល់ពីធីលាចាកសិក្ខាបទរបស់លោក សាន សុជា នាថ្ងៃនោះ។
ទំព័រហ្វេសប៊ុកដដែលនេះ ក៏បានបង្ហោះផងដែរនូវរូបថតជាច្រើនសន្លឹកនៃពិធីលាចាកសិក្ខាបទនោះ ហើយសរសេររៀបរាប់ថា គាត់សុំឱបលោក សាន សុជា ដែលជាបងប្រុសរបស់គាត់។
ទំព័រគណនីហ្វេសប៊ុកដដែលនេះ បានរៀបរាប់បន្តថា គាត់ទើបតែបានឱបបងប្រុសរបស់គាត់ជាលើកដំបូងនៅថ្ងៃលាសិក្ខាបទចាប់តាំងពីថ្ងៃចាប់កំណើតមក។
ខាងក្រោមនេះ គឺជារូបភាពផ្ដាមចេញពីការរៀបរាប់របស់ម្ចាស់គណនីហ្វេសប៊ុក San Chanthy កាលពីថ្ងៃទី២១ ខែឧសភា ឆ្នាំ២០២៣។
អ្នកស្រី សាន ចន្ធី បានបញ្ជាក់ប្រាប់ Fact Crescendo Cambodia កាលពីថ្ងៃអង្គារម្សិលមិញថា លោក សាន សុជា និងអ្នកស្រី គឺជាបងប្អូនបង្កើតនឹងគ្នា។ អ្នកស្រី ចន្ធី បានបញ្ជាក់បន្ថែមថា លោក សាន សុជា គឺជាបងទី២ ហើយអ្នកស្រីផ្ទាល់ គឺជាកូនទី៥ នៅក្នុងចំណោមបងប្អូនបង្កើតទាំងអស់ ៨នាក់ ក្នុងនោះមានបងប្អូនស្រីចំនួន ៥នាក់។
អ្នកស្រី សាន ចន្ធី មានស្វាមី និងកូនប្រុសម្នាក់អាយុ ៩ឆ្នាំ ហើយកំពុងរស់ និងធ្វើការនៅក្នុងប្រទេសអូស្ត្រាលី
ទំព័រហ្វេសប៊ុក San Chanthy បានបង្ហោះវីដេអូមួយមានរយៈពេលជាង ៦នាទី ដោយលោក សាន សុជា បងប្អូនស្រី និងម្ដាយរបស់ពួកគេ បានរៀបរាប់ពីបងប្អូនខ្លួនឯងកាលពីកុមារភាព។ សូមទស្សនាវីដេអូខាងក្រោមនេះ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ស្ត្រីម្នាក់ដែលឱបលោក សាន សុជា ក្រោយពេលលាចាកសិក្ខាបទនោះ គឺជាប្អូនស្រីបង្កើតម្នាក់របស់លោកនៅក្នុងចំណោមបងប្អូនសរុប ៨នាក់។
Title:ការអះអាងមិនត្រឹមត្រូវថា លោក សាន សុជា មានប្រពន្ធភ្លាមៗក្រោយលាចាកសិក្ខាបទ
Written By: Jay UdomResult: False