- >>
- Social
រូបថតការប្រកួតប្រដាល់នៅអាមេរិកត្រូវបានអ្នកប្រើប្រាស់បណ្ដាញសង្គមកម្ពុជាយល់ច្រឡំ
ខណៈមានការជជែកគ្នាច្រើនអំពីកីឡាគុនខ្មែរ និងកីឡាមួយថៃនោះ រូបថតសខ្មៅមួយសន្លឹកដែលបង្ហាញមនុស្សច្រើនកុះករទស្សនាការប្រកួតប្រដាល់នោះ ត្រូវបានបង្ហោះព្រោងព្រាតលើបណ្ដាញសង្គមជាមួយការអះអាងថា វាជាការប្រកួតប្រដាល់គុនខ្មែរកាលពីឆ្នាំ១៩២៦។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងលើរូបថតនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតសខ្មៅមួយសន្លឹក ដែលបង្ហាញមនុស្សដ៏ច្រើនកុះករទស្សនាការប្រកួតប្រដាល់នោះ ត្រូវបានបង្ហោះព្រោងព្រាតនៅលើបណ្ដាញសង្គមកាលពីសប្ដាហ៍មុន ដោយមានការអះអាងថា រូបថតនេះគឺជាព្រឹត្តិការណ៍ប្រកួតប្រដាល់គុនខ្មែរកាលពីជិត ១០០ឆ្នាំមុន។
ការអះអាងនេះ ត្រូវបានចែករំលែកបន្តដល់ទៅរាប់ពាន់ដងនៅលើបណ្ដាញសង្គម ខណៈអ្នកប្រើប្រាស់ហ្វេសប៊ុកជាច្រើន បានបញ្ចេញមតិយោបល់ និងចោទសួរអំពីភាពត្រឹមត្រូវនៃរូបថតចាស់មួយសន្លឹកនេះ។
ខាងក្រោមនេះ គឺជារូបភាពផ្ដាមពីការបង្ហោះរូបថតសខ្មៅមួយសន្លឹកកាលពីថ្ងៃទី២១ ខែមេសា ឆ្នាំ២០២៣ ជាមួយសំណេររៀបរាប់ថា «តើបងប្អូនជឿឬអត់? ប្រវត្តិសាស្ត្រប្រដាល់គុនខ្មែរល្បីតាំងពីឆ្នាំ១៩២៦ ចំនួនមនុស្ស ១២០,៥៥៧។ ដូចមិនដែលឃើញសារព័ត៌មានចេញផ្សាយផង (ប្រភពហ្វេសប៊ុក)»។
រូបថតដដែលនេះ ក៏ត្រូវបានទំព័រហ្វេសប៊ុកមួយទៀតយកទៅបង្ហោះផងដែរ ហើយក៏ទទួលបានការចែករំលែកបន្តដល់ទៅជាង ១ពាន់ដង និងមតិយោបល់ជាច្រើនពីអ្នកប្រើប្រាស់បណ្ដាញសង្គមផងដែរ។
ខាងក្រោមនេះ គឺជារូបភាពផ្ដាមពីការបង្ហោះរូបថតចាស់មួយសន្លឹកដោយទំព័រហ្វេសប៊ុក King Fighter កាលពីថ្ងៃទី២២ ខែមេសា ឆ្នាំ២០២៣។
រូបថតនេះ ក៏ត្រូវបានបង្ហោះលើបណ្ដាញសង្គមដោយអ្នកប្រើប្រាស់ហ្វេសប៊ុកផ្សេងទៀតដែរនៅក្នុងរយៈពេលប៉ុន្មានថ្ងៃកន្លងមកនេះ។ សូមមើលខ្លឹមសារតាមរយៈតំណភ្ជាប់នៅទីនេះ ១, ២, ៣។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញរូបថតនេះនៅក្នុងគេហទំព័រ Getty Images និងខ្លឹមសារលម្អិតរបស់រូបថតនេះផងដែរ។
បើតាម Getty Images រូបថតសខ្មៅមួយសន្លឹកនេះ បង្ហាញការប្រកួតប្រដាល់សកលរវាងកីឡាករអាមេរិក Jack Dempsey និងកីឡាករបារាំង George Carpentier ដែលត្រូវបានរៀបចំធ្វើឡើងនៅទីក្រុង Jersey ក្នុងរដ្ឋ New Jersey សហរដ្ឋអាមេរិក កាលពីខែកក្កដា ឆ្នាំ១៩២១ ពោលគឺជាង ១០០ឆ្នាំកន្លងមកហើយ។
ការប្រកួតប្រដាល់ទម្ងន់ធ្ងន់រវាងកីឡាករអាមេរិក និងកីឡាករបារាំងនេះ ត្រូវបានសារព័ត៌មានអង់គ្លេស The Guardian ចុះផ្សាយកាលពីឆ្នាំ២០២១កន្លងមកនេះ ដោយបានបញ្ជាក់ថា កីឡាករអាមេរិក Jack Dempsey បានយកឈ្នះទៅលើកីឡាករបារាំង Georges Carpentier ហើយរក្សាតំណែងជាម្ចាស់ខ្សែក្រវ៉ាត់ទម្ងន់ធ្ងន់ដដែល។ សូមមើលខ្លឹមសារទាំងស្រុងនៅទីនេះ។
យើងក៏បានរកឃើញវីដេអូនៃការប្រកួតរវាងកីឡាករអាមេរិក Jack Dempsey និងកីឡាករបារាំង Georges Carpentier នៅលើបណ្ដាញ YouTube ផងដែរ។
សន្និដ្ឋាន
Fact Crescendo Cambodia រកឃើញថា ការអះអាងលើរូបថតសខ្មៅមួយសន្លឹកនេះ មិនត្រឹមត្រូវនោះឡើយ។ រូបថតសខ្មៅមួយសន្លឹកនេះ មិនមែនជាការប្រកួតប្រដាល់គុនខ្មែរកាលពីឆ្នាំ១៩២៦នោះឡើយ។ រូបថតមួយសន្លឹកនេះ គឺជាព្រឹត្តិការណ៍ប្រកួតប្រដាល់រវាងកីឡាករអាមេរិក Jack Dempsey និងកីឡាករបារាំង Georges Carpentier នៅទឹកដីសហរដ្ឋអាមេរិក ក្នុងឆ្នាំ១៩២១។
Title:រូបថតការប្រកួតប្រដាល់នៅអាមេរិកត្រូវបានអ្នកប្រើប្រាស់បណ្ដាញសង្គមកម្ពុជាយល់ច្រឡំ
Fact Check By: Jay UdomResult: Misleading
