បន្ទាប់ពីអតីតយុវតីគាំទ្របក្សប្រឆាំង អ្នកនាង ធី សុវណ្ណថា ត្រូវបានតែងតាំងជាអភិបាលរងក្រុងអរិយក្សត្រមួយ រូបថតមួយសន្លឹកដែលបង្ហាញរូបនាងអង្គុយជាប់លោកនាយករដ្ឋមន្ត្រី ហ៊ុន សែន នៅលើសាឡុងតែមួយ ត្រូវបានបង្ហោះលើបណ្ដាញសង្គមជាមួយការអះអាងថា អ្នកទាំងពីរបានជួបគ្នាដោយសម្ងាត់។ ទោះជាយ៉ាងណា ការផ្ទៀងផ្ទាត់របស់យើង រកឃើញថា រូបភាពនេះ ត្រូវបានកាត់តតែប៉ុណ្ណោះ។
SOCIAL MEDIAL CLAIM
រូបថតមួយសន្លឹកដែលបង្ហាញលោកនាយករដ្ឋមន្ត្រី ហ៊ុន សែន និងអ្នកនាង ធី សុវណ្ណថា អង្គុយក្បែរគ្នានៅលើសាឡុងមួយ ត្រូវបានបង្ហោះនៅលើបណ្ដាញសង្គមដោយគណនីហ្វេសប៊ុកមួយកាលពីសប្ដាហ៍មុន។
រូបថតមួយសន្លឹកនេះ ត្រូវបានគេអះអាងថា អ្នកនាង ធី សុវណ្ណថា អតីតយុវតីគាំទ្រគណបក្សប្រឆាំងដែលបានប្ដូរទៅគាំទ្រគណបក្សកាន់អំណាចវិញនោះ បានលួចជួបជាមួយលោកនាយករដ្ឋមន្ត្រី ហ៊ុន សែន មុននឹងត្រូវបានប្រកាសតំណែងអភិបាលរងក្រុងអរិយក្សត្រ។
ខាងក្រោមនេះ គឺជារូបភាពផ្ដាមចេញពីការបង្ហោះការអះអាងនៅលើបណ្ដាញសង្គមកាលពីថ្ងៃទី០៨ ខែឧសភា ឆ្នាំ២០២៣ ដែលរៀបរាប់ថា «បែកធ្លាយរូបថតលួចជួបគ្នា ហ៊ុន សែន-ធី សុវណ្ណថា មុនប្រកាសតំណែងអភិបាលរងក្រុងអរិយក្សត្រ»។
FACT CHECK
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញរូបថតដែលបង្ហាញលោកនាយករដ្ឋមន្ត្រី ហ៊ុន សែន កាន់កែវទឹក និងអង្គុយជាប់នឹងនារីម្នាក់នៅលើសាឡុងតែមួយ ប៉ុន្តែ មិនមែនជាអ្នកនាង ធី សុវណ្ណថា ដូចការអះអាងនោះឡើយ។
រូបថតមួយសន្លឹកនេះ ត្រូវបានរកឃើញនៅក្នុងអត្ថបទមួយរបស់សារព័ត៌មាន Fresh News ចុះផ្សាយកាលពីខែមិថុនា ឆ្នាំ២០១៩កន្លងមក។
បើតាមសារព័ត៌មានដដែលនេះ នារីម្នាក់ដែលអង្គុយជាប់លោក ហ៊ុន សែន នោះ គឺជាចៅស្រីរបស់លោក ដែលបានជួបលោកនៅអំឡុងពេលលោកបំពេញទស្សនកិច្ចផ្លូវការនៅប្រទេសហុងគ្រីកាលពីខែមិថុនា ឆ្នាំ២០១៩កន្លងមក។ សូមមើលរូបថតនៅទីនេះ (archived)។
រូបថតនេះ ក៏ត្រូវបានរកឃើញផងដែរនៅក្នុងទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន ដែលបង្ហោះកាលពីខែមិថុនា ឆ្នាំ២០១៩កន្លងមក ដោយមានការរៀបរាប់ថា ចៅស្រីរបស់លោកបានស្កាត់ទៅជួបលោកនៅឯប្រទេសហុងគ្រី។
ខាងក្រោមនេះ គឺជាការប្រៀបធៀបរវាងរូបភាពកាត់ត និងរូបថតច្បាប់ដើម ដែលត្រូវបានរកឃើញនៅលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន។
CONCLUSION
Fact Crescendo Cambodia រកឃើញថា រូបថតដូចដែលត្រូវបានរៀបរាប់ខាងលើនេះ ត្រូវបានកាត់ត។ រូបថតច្បាប់ដើម បង្ហាញលោកនាយករដ្ឋមន្ត្រី ហ៊ុន សែន អង្គុយជាប់ជាមួយចៅស្រីរបស់លោកនៅលើសាឡុងតែមួយកាលពីខែមិថុនា ឆ្នាំ២០១៩ នៅពេលលោកបំពេញទស្សនកិច្ចនៅប្រទេសហុងគ្រី។
Title: រូបថតលោក ហ៊ុន សែន អង្គុយកៀក ធី សុវណ្ណថា គឺជារូបភាពកាត់តតែប៉ុណ្ណោះ
Fact Check By: Jay UdomResult: Altered
