- >>
- Political
វីដេអូមួយត្រូវបានកាត់តបង្ហាញលោក ហ៊ុន ម៉ាណែត ស្រែកឡូឡាពេលច្រៀងឆ្លើយឆ្លង
បន្ទាប់ពីលោក ហ៊ុន ម៉ាណែត បានកាន់តំណែងនាយករដ្ឋមន្ត្រីកម្ពុជាបន្តពីឪពុករបស់លោកអស់រយៈពេល ៤ខែមកហើយនោះ វីដេអូមួយដែលបង្ហាញលោកស្រែកឡូឡាអំឡុងពេលច្រៀងឆ្លើយឆ្លងជាមួយអ្នកចម្រៀងនារីម្នាក់ ត្រូវបានបង្ហោះនៅលើបណ្ដាញសង្គម។ វីដេអូនេះ ត្រូវបានចែករំលែកបន្តជាច្រើនដង ហើយមានអ្នកបញ្ចេញមតិជាច្រើន។ ទោះជាយ៉ាងណា យើងបានរកឃើញថា វីដេអូនេះ គឺជាវីដេអូកាត់តតែប៉ុណ្ណោះ។
ការអះអាងលើបណ្ដាញសង្គម
វីដេអូរយៈពេល២៧វិនាទីមួយដែលបង្ហាញលោកនាយករដ្ឋមន្ត្រី ហ៊ុន ម៉ាណែត ច្រៀងចម្រៀងជាមួយនារី ២នាក់ ត្រូវបានបង្ហោះនៅលើបណ្ដាញសង្គមកាលពីថ្ងៃម្សិលមិញនេះ។
ក្នុងវីដេអូនោះ អ្នកចម្រៀងស្រីដែលជាដៃគូចម្រៀងឆ្លើយឆ្លងជាមួយលោក ហ៊ុន ម៉ាណែត នោះ បានច្រៀងចម្រៀង«តាមអើយតាម» ប៉ុន្តែ លោក ម៉ាណែត បែរស្រែកឡូឡាតបដៃគូចម្រៀងទៅវិញ។
ទំព័រហ្វេសប៊ុកដែលបង្ហោះវីដេអូឃ្លីប បានអះអាងថា លោក ហ៊ុន ម៉ាណែត មិនដឹងជាច្រៀងបទចម្រៀងអ្វីនោះឡើយ។
ខាងក្រោមនេះ គឺជាវីដេអូទាំងស្រុងនៃការបង្ហោះវីដេអូនៅលើបណ្ដាញសង្គមកាលពីថ្ងៃទី២៦ ខែធ្នូ ឆ្នាំ២០២៣ ជាមួយសំណេររៀបរាប់ថា «ហ៊ុន ម៉ាណែត ឡើងច្រៀងមិនដឹងថាច្រៀងបទអី?»។
វីដេអូដដែលនេះ ក៏ត្រូវបានបង្ហោះនៅលើបណ្ដាញសង្គម TikTok ផងដែរកាលពីថ្ងៃទី២៦ ខែធ្នូ ឆ្នាំ២០២៣ ដែលទទួលបានការចូលទស្សនាជាច្រើនដង និងមានការចែករំលែកបន្តក៏ដូចជាការបញ្ចេញមតិយោបល់ជាច្រើនផងដែរ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធី Image Reverse Search និងពាក្យគន្លឹះនៅលើប្រព័ន្ធរុករក និងបណ្ដាញសង្គម ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Image Reverse Search និងការស្វែងរកដោយប្រើពាក្យគន្លឹះ យើងបានរកឃើញវីដេអូដូចគ្នានេះត្រូវបានបង្ហោះនៅលើបណ្ដាញសង្គមហ្វេសប៊ុកកាលពីឆ្នាំ២០២០កន្លងមកដោយអ្នកប្រើប្រាស់ហ្វេសប៊ុកម្នាក់។
វីដេអូដែលយើងបានរកឃើញនេះ មានរយៈពេលជិត ២នាទី ហើយបង្ហាញលោកនាយករដ្ឋមន្ត្រី ហ៊ុន ម៉ាណែត ច្រៀងចម្រៀងមួយបទមានចំណងជើងថា «ស្រអែមផល្លា»ជាមួយអ្នកចម្រៀងនារីម្នាក់ នៅក្នុងកម្មវិធីជួបជុំមួយ។
Fact Crescendo Cambodia បានព្យាយាមផ្ញើសារតាមបណ្ដាញសង្គមហ្វេសប៊ុកទៅកាន់អ្នកប្រើប្រាស់ហ្វេសប៊ុកម្នាក់ដែលបង្ហោះវីដេអូនេះកាលពី ៣ឆ្នាំមុននោះ ប៉ុន្តែ មិនទទួលបានការឆ្លើយតបនោះឡើយ។
ខាងក្រោមនេះ គឺជាវីដេអូទាំងស្រុងបង្ហាញលោក ហ៊ុន ម៉ាណែត ច្រៀងឆ្លើយឆ្លងជាមួយអ្នកចម្រៀងនារីម្នាក់ ហើយវីដេអូនេះ ត្រូវបានបង្ហោះលើបណ្ដាញសង្គមកាលពីថ្ងៃទី០២ ខែសីហា ឆ្នាំ២០២០ ពោលគឺ ៣ឆ្នាំមុនលោកឡើងកាន់តំណែងជានាយករដ្ឋមន្ត្រីកម្ពុជា។
ឆ្លើយតបនឹង Fact Crescendo Cambodia អ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានបញ្ជាក់ថា វីដេអូមានរយៈ២០វិនាទីដែលត្រូវបានបង្ហោះដោយទំព័រហ្វេសប៊ុក News Fresh ត្រូវបានកាត់តបញ្ចូលសំឡេងបន្ថែមពីវីដេអូច្បាប់ដើម។
ខាងក្រោមនេះ គឺជាការប្រៀបធៀបរវាងវីដេអូដែលបង្ហោះដោយទំព័រហ្វេសប៊ុក News Fresh និងវីដេអូដែលបង្ហោះដោយអ្នកប្រើប្រាស់ហ្វេសប៊ុកកាលពី ៣ឆ្នាំមុន។
ទោះជាយ៉ាងណា អ្នកនាំពាក្យរូបនេះ ប្រាប់ថា លោកមិនអាចបញ្ជាក់បានថា វីដេអូនេះត្រូវបានថតតាំងពីពេលណា និងនៅទីកន្លែងណាពិតប្រាកដនោះ ហើយលោកបញ្ជាក់ថា ត្រូវការពេលវេលាសម្រាប់ពិនិត្យមើលឡើងវិញ។
លោក មាស សុភ័ណ្ឌ អ្នកនាំពាក្យខុទ្ទកាល័យនាយករដ្ឋមន្ត្រី ហ៊ុន ម៉ាណែត បញ្ជាក់ប្រាប់ Fact Crescendo Cambodia នៅថ្ងៃនេះថា វីដេអូដែលបង្ហោះដោយទំព័រហ្វេសប៊ុក News Fresh គឺជាវីដេអូ«ក្លែងក្លាយ»។
នៅក្នុងវីដេអូនេះ យើងបានឃើញមនុស្សស្គាល់មុខមួយចំនួនដូចជាលោក ម៉ឹង ពន្លក ដែលឈរនៅខាងឆ្វេងដៃក្បែរលោក ហ៊ុន ម៉ាណែត នៅលើវេទិកាចម្រៀង ខណៈអ្នកចូលរួមជាច្រើនទៀតរាំលេងកម្សាន្តតាមចង្វាក់ភ្លេងរាំវង់។
លោក ម៉ឹង ពន្លក ត្រូវបានរដ្ឋាភិបាលដឹកនាំដោយលោក ហ៊ុន ម៉ាណែត តែងតាំងជាអគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុរបស់ក្រសួងការពារជាតិ។
Fact Crescendo Cambodia បានស្នើសុំព័ត៌មានលម្អិតពីផ្នែករដ្ឋបាលរបស់លោក ម៉ឹង ពន្លក ប៉ុន្តែ ពុំទទួលបានការឆ្លើយតបនោះឡើយរហូតមកដល់ថ្ងៃចេញផ្សាយអត្ថបទនេះ។
លោក ហ៊ុន ម៉ាណែត អាយុ ៤៧ឆ្នាំ ដែលជាកូនប្រុសច្បងរបស់លោក ហ៊ុន សែន អតីតនាយករដ្ឋមន្ត្រីកម្ពុជាដែលបានកាន់អំណាចជិត ៤០ឆ្នាំនោះ បានឡើងកាន់តំណែងនាយករដ្ឋមន្ត្រីបន្តពីឪពុករបស់លោកកាលពីខែសីហាកន្លងមកនេះ។
សន្និដ្ឋាន
Fact Crescendo Cambodia បានរកឃើញថា វីដេអូដូចដែលត្រូវបានរៀបរាប់ខាងលើនេះ គឺជាវីដេអូកាត់ត។ វីដេអូច្បាប់ដើមពិតប្រាកដ បង្ហាញលោកនាយករដ្ឋមន្ត្រី ហ៊ុន ម៉ាណែត មិនបានស្រែកឡេឡូនោះឡើយ។ វីដេអូច្បាប់ដើម បង្ហាញលោក ហ៊ុន ម៉ាណែត ច្រៀងបទ«ស្រអែមផល្លា»ឆ្លើយឆ្លងជាមួយអ្នកចម្រៀងស្រីម្នាក់នៅក្នុងកម្មវិធីជួបជុំមួយ។
Title:វីដេអូមួយត្រូវបានកាត់តបង្ហាញលោក ហ៊ុន ម៉ាណែត ស្រែកឡូឡាពេលឡើងច្រៀង
Written By: Jay UdomResult: Altered
