នាដការីគ្រងឈុតអប្សរាកាន់ទង់ជាតិខ្មែរម្នាក់ត្រូវបានកាត់តដោយដាក់ទង់ជាតិថៃវិញ
ខណៈដែលអ្នកប្រើប្រាស់បណ្ដាញសង្គមកម្ពុជា និងថៃ តែងតែមានមតិមិនស្របគ្នាជុំវិញភាពប្រហាក់ប្រហែលគ្នាខាងសិល្បៈ និងវប្បធម៌រវាងប្រទេសទាំងពីរនោះ រូបថតចំនួន ២សន្លឹកដែលបង្ហាញនាដការីរបាំអប្សរាម្នាក់ឈរកាន់ទង់ជាតិថៃ ត្រូវបានបង្ហោះដោយអ្នកប្រើប្រាស់បណ្ដាញសង្គមនិយាយភាសាថៃជាច្រើននាពេលថ្មីៗនេះ។ ការបង្ហោះខាងលើ ត្រូវបានចែកចាយ និងបញ្ចេញមតិជាច្រើនដងពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី១២ ខែកញ្ញា ឆ្នាំ២០២៣កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតចំនួន ២សន្លឹក ចូលទៅក្នុងក្រុមហ្វេសប៊ុកមួយឈ្មោះថា «Amazing Krabey Khmer Cambo» ដែលបានបង្ហាញនាដការីគ្រងឈុតអប្សរាម្នាក់នៅតំបន់ភ្នំទឹកកកមួយកន្លែង និងឈរកាន់ទង់ជាតិនៃប្រទេសថៃ។
អ្នកប្រើប្រាស់ខាងលើ បានភ្ជាប់រូបថតទាំង២ជាមួយសំណេរជាភាសាថៃ ឬប្រែសម្រួលជាភាសាខ្មែរដែលមានអត្ថន័យថា «ពួកយើងស្រលាញ់ស្រុកថៃ»។
រូបថតភ្ជាប់ជាមួយនឹងសំណេរបែបនេះ ទទួលបានប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គមហ្វេសប៊ុកយ៉ាងផុសផុល។
ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ ដែលបានបង្ហាញទិដ្ឋភាពនាដការីម្នាក់ បានឈរកាន់ទង់ជាតិនៃប្រទេសថៃ។
រូបថតបែបនេះ ក៏ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុកជាច្រើនផ្សេងទៀតផងដែរ។ សូមមើលខ្លឹមសារអះអាងទាំងស្រុង តាមរយៈតំណភ្ជាប់មាននៅទីនេះ (archived link), ឬតំណភ្ជាប់មួយនៅទីនេះ (archived link) និងតំណភ្ជាប់មួយទៀតនៅទីនេះ (archived link)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងរូបថតខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
រូបថតដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញ និងបង្ហោះនៅលើទំព័រហ្វេសប៊ុក «Sokea Kimleang» កាលពីថ្ងៃទី០១ ខែកញ្ញា ឆ្នាំ២០២៣កន្លងទៅ។
ទំព័រហ្វេសប៊ុករបស់តារាសម្ដែង និងជានាដការីរបាំបុរាណកញ្ញា សុគា គីមលាង បានបញ្ជាក់នៅក្នុងសំណេរអត្ថបទរបស់ខ្លួនថា កញ្ញាបានសម្ដែងរបាំព្រះរាជទ្រព្យ ឬរបាំអប្សរា ដែលជាសម្បត្តិបេតិកភណ្ឌជាតិរបស់កម្ពុជា នៅលើទឹកដីនៃប្រទេសនូវែលសេឡង់។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលពុំបានបង្ហាញទិដ្ឋភាពនាដការីរបាំអប្សរា បានឈរកាន់ទង់ជាតិថៃនោះឡើយ។
ខាងក្រោមនេះ គឺជាវីដេអូឃ្លីបទាំងស្រុងរបស់តារាសម្ដែង និងជានាដការីរបាំបុរាណកញ្ញា សុគា គីមលាង ហៅ Kon Ant ដែលបានគ្រងឈុតអប្សរា ផ្សព្វផ្សាយនៅលើទឹកដីប្រទេសនូវែលសេឡង់កាលពីដើមខែកញ្ញាកន្លងទៅ។
https://web.facebook.com/reel/6484211988365869
រូបថតនៃការគ្រងឈុតអប្សរារបស់នាដការីរបាំបុរាណកញ្ញា សុគា គីមលាង នៅប្រទេសនូវែលសេឡង់កាលពីថ្មីៗនេះ ក៏ត្រូវបានចុះផ្សព្វផ្សាយនៅលើគេហទំព័រសារព័ត៌មានក្នុងស្រុក ខ្មែរប៉ុស្ដិ៍ ផងដែរ កាលពីថ្ងៃទី០២ ខែកញ្ញា ឆ្នាំ២០២៣កន្លងទៅ ដោយពុំបានបង្ហាញទិដ្ឋភាពរូបថតរបស់កញ្ញាបានឈរកាន់ទង់ជាតិនៃប្រទេសថៃនោះឡើយ។
Khmer Post Link | Archived Link
ខាងក្រោមនេះ គឺជាការប្រៀបធៀបរវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្ដាញសង្គមកាលពីពេលថ្មីៗនេះ។
(រូបថតទី១)
(រូបថតទី២)
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ ដោយអ្នកប្រើប្រាស់ខាងលើនេះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺជាតារាសម្ដែង និងនាដការីរបាំបុរាណ សុគា គីមលាង ដែលបានគ្រងឈុតអប្សរា និងកាន់ទង់ជាតិកម្ពុជា នៅប្រទេសនូវែលសេឡង់។
Title:នាដការីគ្រងឈុតអប្សរាកាន់ទង់ជាតិខ្មែរម្នាក់ត្រូវបានកាត់តដោយដាក់ទង់ជាតិថៃវិញ
Written By: Kakada SimResult: Altered