- >>
- Social
រូបថតតារាចម្រៀងរ៉េបខ្មែរ២នាក់ ត្រូវបានកាត់តដោយឈរទន្ទឹមគ្នា
ការចេញបទចម្រៀងឌឺដងគ្នារវាងតារារ៉េប វណ្ណដា និងលោក ដេវីត បានធ្វេីឲ្យមានការជជែកយ៉ាងផុសផុលយ៉ាងខ្លាំងពីសំណាក់ក្មេងយុវវ័យ និងប្រជាជនខ្មែរ។ ក្នុងចំណោមនោះ រូបថតមួយសន្លឹក បង្ហាញទិដ្ឋភាពតារាចម្រៀងរ៉េបខ្មែរចំនួន២រូប គឺលោក វណ្ណដា និងដេវីត បានឈរថតរូបទន្ទឹមគ្នា។ រូបថតនេះ ត្រូវបានចែកចាយ និងការបញ្ចេញមតិប្រតិកម្មចម្រុះពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរជាច្រើនពាន់ដង។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះដោយទំព័រហ្វេសប៊ុកខាងលើនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី៣១ ខែតុលា ឆ្នាំ២០២២កន្លងទៅថ្មីៗនេះ ទំព័រហ្វេសប៊ុកមួយ ឈ្មោះថា KimLeang - គឹមលៀង បានបង្ហោះរូបមួយសន្លឹក បង្ហាញទិដ្ឋភាពតារាចម្រៀង វណ្ណដា ឈរថតរូបក្បែរនឹងលោក ដេវីត។ រូបថតនេះ ត្រូវបានភ្ជាប់ជាមួយនឹងអត្ថន័យថា ទោះខាងក្រៅពួកគាត់មិនបើកចំហ មិនត្រូវគ្នា តែខាងក្នុងគាត់ត្រូវគ្នាធម្មតា។
រូបថតភ្ជាប់ជាមួយនឹងការអះអាងខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។ ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «ខាងក្រៅគេ Private តែខាងក្នុងគេ Public សោះ VANNDA FT. G-DEVITH»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នានេះ ត្រូវបានរកឃើញ និងបង្ហោះនៅលើគេហទំព័រសារព័ត៌មានកម្ពុជាថ្មី ចេញផ្សាយកាលពីថ្ងៃទី៣០ ខែមីនា ឆ្នាំ២០២២កន្លងទៅនេះ។ ក្នុងអត្ថបទសេចក្តីរាយការណ៍ខាងលើនេះ បានបង្ហាញ និងបញ្ជាក់ថាតារាចម្រៀងរ៉េបកម្ពុជាលោក វណ្ណដា បានថតរូបជាមួយនឹងតារាចម្រៀងរ៉េបថៃ Sprite ដែលនេះមិនមែនជាទិដ្ឋភាពលោក ដេវីត នោះឡើយ។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ ដែលបានបង្ហាញទិដ្ឋភាពតារារ៉េបថៃ Sprite ឈរទន្ទឹមគ្នានឹងតារារ៉េបកម្ពុជាលោក វណ្ណដា។
Kampuchea Thmey News Report | Archived Link
ខាងក្រោមនេះ គឺជាច្បាប់ដើមនៃរូបថត ដែលត្រូវបានបង្ហោះនៅលើគណនី Instagram ផ្ទាល់ខ្លួនរបស់តារាចម្រៀងរ៉េបថៃ Sprite កាលពីថ្ងៃទី៣០ ខែមីនា ឆ្នាំ២០២២កន្លងទៅនេះ។
Instagram Post | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថារូបថត និងការលើកឡើងដោយទំព័រហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺជាទិដ្ឋភាពតារាចម្រៀងប្រុសថៃ Sprite ឈរក្បែរនឹងតារាចម្រៀងរ៉េបកម្ពុជាលោក វណ្ណដា កាលពីថ្ងៃទី៣០ ខែមីនា ឆ្នាំ២០២២កន្លងទៅនេះ។
Title:រូបថតតារាចម្រៀងរ៉េបខ្មែរ២នាក់ ត្រូវបានកាត់តដោយឈរទន្ទឹមគ្នា
Fact Check By: Kakada SimResult: Altered
