- >>
- Social
រូបភាពតារាចម្រៀងអាមេរិកបីរូបស្លៀកឈុតដ៏លេចធ្លោនៅ Met Gala បង្កើតឡើងដោយ AI
ខណៈពេលដែល Met Gala ត្រូវបានចាត់ទុកជាកម្មវិធីជួបជុំតារាល្បីៗ តែងខ្លួនជាមួយសម្លៀកបំពាក់ប្លែកៗទាន់សម័យនោះ រូបថតរបស់កំពូលតារាចម្រៀងស្រីអាមេរិកចំនួន ៣រូប ត្រូវបានបង្ហោះឡើងដោយបង្ហាញឈុតម៉ូតសម្លៀកបំពាក់គួរឱ្យចាប់អារម្មណ៍។ ការបង្ហោះខាងលើ ត្រូវបានចែកចាយជាច្រើនដង ពីសំណាក់អ្នកប្រើប្រាស់បណ្ដាញសង្គមនានា។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៧ ខែឧសភា ឆ្នាំ២០២៤កន្លងទៅនេះ អ្នកប្រើប្រាស់បណ្ដាញសង្គម X (Twitter) បង្ហោះរូបថតតារាស្រី Rihanna មួយសន្លឹកដែលបង្ហាញតារាអាមេរិករូបនេះស្ថិតក្នុងឈុតសម្លៀកបំពាក់យ៉ាងប្លែកមួយនៅក្នុងកម្មវិធីសប្បុរសធម៌ Met Gala ឆ្នាំ២០២៤។
ការលើកឡើងបែបនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់សង្គម។
ខាងក្រោមនេះ គឺជារូបភាពផ្ដាម បង្ហាញតារាស្រី Rihanna ជាមួយនឹងការអះអាងថា នោះជាទិដ្ឋភាពពេលតារាស្រីរូបនេះ បានចូលរួមនៅក្នុងកម្មវិធី Met Gala។
ដូចគ្នានេះ រូបថតតារាស្រី Lady Gaga ក៏ត្រូវបានបង្ហោះដោយអ្នកប្រើប្រាស់បណ្ដាញសង្គមផ្សេងទៀតផងដែរ ជាមួយនឹងឈុតម៉ូតសម្លៀកបំពាក់ដ៏លេចធ្លោមួយនៅឯកម្មវិធី Met Gala។
រូបថតមួយសន្លឹកផ្សេងទៀត ដែលបានបង្ហាញទិដ្ឋភាពតារាស្រី Katy Perry ចូលរួមនៅក្នុងកម្មវិធី Met Gala ឆ្នាំ២០២៤នេះ ក៏ត្រូវបានបង្ហោះ និងចែកចាយផងដែរដោយអ្នកប្រើប្រាស់បណ្ដាញសង្គម X កាលពីពេលថ្មីៗនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពទាំងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈគេហទំព័រ Hive Moderation ដែលជាគេហទំព័រ និងជាកម្មវិធីផ្ទៀងផ្ទាត់អត្ថបទ ឬរូបភាពទាំងឡាយណា ផលិតឡើងដោយបចេ្ចកវិទ្យាបញ្ញាសិប្បនិម្មិត បានបង្ហាញនូវលទ្ធផលបញ្ជាក់ថាទិដ្ឋភាពទាំងឡាយនោះ គឺ៧៩.៦ភាគរយ ដែលបង្កើតដោយកម្មវិធី (AI) តែប៉ុណ្ណោះ។
Hive Moderation Link | Archived Link
ព័ត៌មាននៃការអវត្តមានរបស់តារាស្រី Rihanna នៅក្នុងកម្មវិធី Met Gala ត្រូវបានចុះផ្សព្វផ្សាយយ៉ាងព្រោងព្រាតនាពេលថ្មីៗនេះ។
តាមរយៈគេហទំព័រ People ចុះផ្សាយកាលពីខែឧសភាកន្លងទៅ បានបញ្ជាក់ថា អវត្តមានរបស់តារាស្រីរូបខាងលើ គឺបណ្ដាលមកពីរូបនាងមានជំងឺផ្ដាសាយ ដែលមិនអាចចូលរួមកម្មវិធីធំប្រចាំឆ្នាំនេះបាន។
ដូចគ្នានេះ តាមរយៈគណនី Instagram របស់តារាស្រី Katy Perry ក៏បានបញ្ជាក់ជាភាសាអង់គ្លេសក្នុងន័យថា នាងមិនបានបង្ហាញខ្លួននៅក្នុងកម្មវិធី Met Gala នោះឡើយ ដោយសារតែមានធុរៈការងារ។
ខាងក្រោមនេះ គឺជារូបភាពផ្ដាមចេញពីគណនី Instagram របស់តារាស្រី Katy Perry។
Instagram Post | Archived Link
តាមរយៈអត្ថបទរបស់ទស្សនាវដ្ដី Harper's Bazaar កាលពីថ្ងៃទី០៦ ខែឧសភា ឆ្នាំ២០២៤ បានបញ្ជាក់ផងដែរថា តារាស្រីមួយផ្សេងទៀត នាង Lady Gaga ក៏មិនបានចូលរួមនៅក្នុងកម្មវិធី Met Gala ឆ្នាំ២០២៤នោះដែរ។
Harper's Bazaar Link | Archived Link
ក្រុមការងាររបស់ Fact Crescendo Cambodia ក៏បានរកឃើញផងដែរនូវរូបថតច្បាប់ដើមទាំងឡាយខាងលើនោះ ត្រូវបានបង្ហោះ និងចែកចាយដោយគណនីរបស់អ្នកប្រើប្រាស់បណ្ដាញសង្គម Instagram របស់លោក RICKDICK ដែលត្រូវបានគេស្គាល់ថា គឺជាវិចិត្រករមួយរូប។
ខាងក្រោមនេះ គឺជារូបភាពផ្ដាមចេញពីទំព័រគណនីរបស់លោក RICKDICK និងរូបភាព ដែលផលិតឡើងដោយបចេ្ចកវិទ្យាបញ្ញាសិប្បនិម្មិត (AI)។
Instagram Post | Archived Link
ករណីរូបថតខាងលើនេះ ក៏ត្រូវបានផ្ទៀងផ្ទាត់ និងត្រួតពិនិត្យការពិតដោយក្រុមការងារ Fact Crescendo របស់ប្រទេសថៃផងដែរ កាលពីពេលថ្មីៗនេះ ដោយបានរកឃើញថា រូបថតទាំងឡាយនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia
បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតទាំងឡាយនេះ គឺត្រូវបានផលិតឡើងដោយបចេ្ចកវិទ្យាបញ្ញាសិប្បនិម្មិត (AI) តែប៉ុណ្ណោះ មិនមែនជាទិដ្ឋភាពជាក់ស្ដែងនោះទេ។
Title:រូបភាពតារាចម្រៀងអាមេរិកបីរូបស្លៀកឈុតដ៏លេចធ្លោនៅ Met Gala បង្កើតឡើងដោយ AI
Written By: Kakada SimResult: Altered
