កាលពីថ្ងៃម្សិលមិញនេះ លោក ឡេង ណាវ៉ាត្រា បានធ្វើបកស្រាយអំពីបញ្ហាដីនៅតំបន់ព្រៃភ្នំតាម៉ៅ ហើយមួយថ្ងៃបន្ទាប់មក វីដេអូនៃសេចក្ដីថ្លែងការណ៍របស់លោក ត្រូវបានបង្ហោះនៅលើបណ្ដាញសង្គមហ្វេសប៊ុក ដោយមានការអះអាងថា លោកច្រៀងរ៉េបនៅក្នុងសេចក្ដីថ្លែងការណ៍ទៅកាន់សារព័ត៌មាន។ វីដេអូនោះរួមជាមួយការអះអាងបែបនេះ ទទួលបានការបញ្ចេញមតិជាច្រើន និងប្រតិកម្មផ្សេងៗពីសំណាក់អ្នកប្រើប្រាស់ហ្វេសប៊ុក។ ទោះជាយ៉ាងណា ការផ្ទៀងផ្ទាត់របស់យើង រកឃើញថា វីដេអូភ្ជាប់ជាមួយការអះអាងបែបនេះ ត្រូវបានកាត់ត។
ការអះអាងលើបណ្ដាញសង្គម
អ្នកប្រើប្រាស់ហ្វេសប៊ុកម្នាក់ បានបង្ហោះវីដេអូមួយមានរយៈពេលប្រហែល ១នាទីនៅថ្ងៃនេះ ដែលជាសំឡេងនៃកិច្ចសម្ភាសរវាងប្រព័ន្ធផ្សព្វផ្សាយក្នុងស្រុក និងលោក ឡេង ណាវ៉ាត្រា ឧកញ៉ាពាក់ព័ន្ធនឹងការឈូសឆាយព្រៃតំបន់ឧទ្យានសួនសត្វភ្នំតាម៉ៅ។
អ្នកប្រើប្រាស់បណ្ដាញសង្គមដដែលនេះ អះអាងថា លោកឧកញ៉ារូបនេះបានផ្ដល់បទសម្ភាសជាលក្ខណៈចម្រៀងរ៉េបទៅដល់អ្នកសារព័ត៌មាន ហើយសំឡេងលោក ឡេង ណាវ៉ាត្រា នៅក្នុងវីដេអូដែលបង្ហោះដោយអ្នកប្រើប្រាស់បណ្ដាញសង្គមរូបនេះ មានលក្ខណៈញាប់ខុសពីលក្ខណៈធម្មតា។
វីដេអូនេះរួមជាមួយការអះអាងបែបនេះ ទទួលបានការបញ្ចេញមតិជាច្រើន និងប្រតិកម្មចម្រុះបែបពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺវីដេអូដែលត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុកមួយឈ្មោះ «Chham Chhany» ដែលសរសេររៀបរាប់ថា «omg ហេតុតែគេជាអ្នកសិល្បៈ សម្បីផ្ដល់បទសម្ភាសន៍ឱ្យអ្នកព័ត៌មាន ក៏រ៉េបដែរ … ឡេង ណាវ៉ាត្រា រ៉េបព្រមានចាត់ការតាមច្បាប់ចំពោះអ្នកថាខ្លួនកាប់ឈើលក់»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើវីដេអូមួយនេះតាមរយៈការស្វែងរកសំឡេងដើមរបស់លោក ឡេង ណាវ៉ាត្រា ដែលត្រូវបានចុះផ្សាយដោយសារព័ត៌មានក្នុងស្រុក។ ជាលទ្ធផល យើងបានរកឃើញការពិតដូចខាងក្រោមនេះ។
វីដេអូសំឡេងរបស់លោក ឡេង ណាវ៉ាត្រា ត្រូវបានរកឃើញផ្សព្វផ្សាយដោយទំព័រហ្វេសប៊ុករបស់សារព័ត៌មាន Fresh News កាលពីថ្ងៃម្សិលមិញនេះ។ វីដេអូដែល Fresh News ចែករំលែកនៅលើបណ្ដាញសង្គមនោះ គឺជាសំឡេងរបស់លោក ឡេង ណាវ៉ាត្រា ដែលមានរយៈពេលដល់ទៅ ៤:៤០នាទី។
ដោយស្ដាប់នៅត្រង់នាទី ៣:៤០ ដែលលោក ឡេង ណាវ៉ាត្រា បានថ្លែងបដិសេធចំពោះការចោទប្រកាន់ ៣ចំណុចទៅលើរូបលោកនោះ យើងបានស្ដាប់លឺសំឡេងលោកឧកញ៉ារូបនេះ និយាយរបៀបធ្វើសេចក្ដីថ្លែងការណ៍។
វីដេអូនៃសេចក្ដីថ្លែងការណ៍របស់លោក ឡេង ណាវ៉ាត្រា ក៏ត្រូវបានសារព័ត៌មាន Fresh News ដាក់បង្ហោះនៅក្នុងឆាណែលរបស់លើខ្លួននៅលើ YouTube ផងដែរ។
សន្និដ្ឋាន
Fact Crescendo Cambodia រកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ វីដេអូសេចក្ដីថ្លែងការណ៍របស់លោក ឡេង ណាវ៉ាត្រា មិនត្រូវបានធ្វើឡើងជាចម្រៀងរ៉េបនោះឡើយ។ វីដេអូច្បាប់ដើម បង្ហាញថា លោក ឡេង ណាវ៉ាត្រា បានអានសេចក្ដីថ្លែងការណ៍របស់ខ្លួនតាមលក្ខណៈធម្មតា។
Title:ឡេង ណាវ៉ាត្រា ច្រៀងរ៉េបនៅក្នុងសេចក្ដីថ្លែងការណ៍ទៅកាន់អ្នកសារព័ត៌មានមែនឬទេ?
Fact Check By: Jay UdomResult: Altered
