- >>
- Political
រូបមេបក្សប្រឆាំងកាន់ទង់តំណាងក្រុមម៉ុងតាញ៉ាជារូបភាពកាត់តតែប៉ុណ្ណោះ
បន្ទាប់ពីមេដឹកនាំបក្សប្រឆាំងចាស់វស្សា លោក សម រង្ស៊ី និយាយរិះគន់គម្រោងព្រែកជីកហ្វូនណនតេជោដែលផ្ដួចផ្ដើមដោយរដ្ឋាភិបាលរបស់បក្សកាន់អំណាចនោះមក រូបថតមួយសន្លឹកដែលបង្ហាញមេបក្សប្រឆាំងរូបនេះកាន់ទង់តំណាងក្រុមជនជាតិភាគតិចម៉ុងតាញ៉ា ត្រូវបានគេបង្ហោះលើបណ្ដាញសង្គម។ រូបភាពនេះ ត្រូវបានចែករំលែកបន្តជាច្រើនដងទៅកាន់ក្រុមបណ្ដាញសង្គមនានា។ ទោះជាយ៉ាងណា យើងបានរកឃើញថា រូបថតនេះត្រូវបានកាត់ត។
ការអះអាងលើបណ្ដាញសង្គម
រូបថតមេដឹកនាំបក្សប្រឆាំង លោក សម រង្ស៊ី កាន់ទង់មួយនៅខាងមុខក្រុមអ្នកគាំទ្រ ត្រូវបានគេបង្ហោះនៅលើបណ្ដាញសង្គមជាមួយសំណេររៀបរាប់ថា មេបក្សប្រឆាំងរូបនេះកាន់ទង់តំណាងឱ្យក្រុមជនជាតិភាគតិចម៉ុងតាញ៉ានៅប្រទេសវៀតណាម។
រូបថតជាមួយនឹងសំណេរបែបនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់បណ្ដាញសង្គម ដែលបានបញ្ចេញប្រតិកម្ម និងមតិយោបល់ផ្សេងៗទៅនឹងការបង្ហោះរូបថតនេះ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមដោយគណនីហ្វេសប៊ុកមួយកាលពីថ្ងៃទី២១ ខែឧសភា ឆ្នាំ២០២៤ ជាមួយសំណេររៀបរាប់ថា “បាតុកម្មនៅអាមេរិកលើកទង់យួនម៉ុងតាញ៉ា ដល់ពេលកូនចៅបាតុកម្មនៅកូរ៉េលើកទង់កម្ពុជាក្រោម ម្ដាយរង្ស៊ីយាយអេមយួន អញ្ចឹងតើបានតារង្ស៊ីប្រឆាំងគម្រោងព្រែកជីកហ្វូណនតេជោ”។
ការអះអាងដដែលនេះ ក៏ត្រូវបានចែករំលែកចូលទៅក្នុងក្រុមបណ្ដាញសង្គមនានា ដែលមានគណនីហ្វេសប៊ុកជាច្រើនជាសមាជិកនៅក្នុងក្រុមទាំងនោះ។
ខាងក្រោមនេះ គឺជារូបភាពផ្ដាមចេញពីការចែករំលែករូបថត និងខ្លឹមសារសំណេរនេះទៅក្នុងក្រុមបណ្ដាញសង្គមឈ្មោះ អ្នកឧកញ៉ា ហុង ពីវ កាលពីថ្ងៃទី២១ ខែឧសភា ឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីការចែករំលែករូបថត និងសំណេរនេះទៅក្រុមបណ្ដាញសង្គមមួយទៀតឈ្មោះ RFA Khmer វិទ្យុអាស៊ីសេរី កាលពីថ្ងៃទី២១ ខែឧសភា ឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីការចែករំលែកនូវរូបថត និងខ្លឹមសារសំណេរដូចគ្នានៅក្នុងក្រុមបណ្ដាញសង្គមមួយទៀតឈ្មោះ TV Sorn Dara កាលពីថ្ងៃទី២១ ខែឧសភា ឆ្នាំ២០២៤។
ខាងក្រោមនេះ គឺជារូបភាពផ្ដាមចេញពីការចែករំលែករូបថត និងខ្លឹមសារសំណេរដូចគ្នាក្នុងក្រុមបណ្ដាញសង្គមមួយទៀតឈ្មោះ Dara Sorn កាលពីថ្ងៃទី២១ ខែឧសភា ឆ្នាំ២០២៤។
ដោយបានពិនិត្យទៅលើរូបថតរបស់អ្នកប្រើប្រាស់ហ្វេសប៊ុកនេះ យើងកត់សម្គាល់ឃើញថា អ្នកប្រើប្រាស់បណ្ដាញសង្គមរូបនេះបង្ហាញរូបថតជាច្រើនរបស់ខ្លួន ដែលបានថតរួមជាមួយមេដឹកនាំរដ្ឋាភិបាលក សកម្មជនគាំទ្របក្សកាន់អំណាច និងក្រុមអ្នកប្រើប្រាស់បណ្ដាញសង្គមមាននិន្នាការគាំទ្របក្សកាន់អំណាច និងរដ្ឋាភិបាលសព្វថ្ងៃ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធីផ្ទៀងផ្ទាត់រូបថតនៅលើប្រព័ន្ធអ៊ិនធឹណិត ដែលនាំឱ្យយើងរកឃើញការពិតដូចខាងក្រោមនេះ។
តាមរយៈកម្មវិធីផ្ទៀងផ្ទាត់រូបថតនៅបណ្ដាញអ៊ិនធឹណិត យើងបានរកឃើញរូបថតមេដឹកនាំបក្សប្រឆាំង លោក សម រង្ស៊ី កាន់ទង់ជាតិ ដើរពីមុខក្រុមអ្នកគាំទ្រ ដែលត្រូវបានចុះផ្សាយដោយសារព័ត៌មានអន្តរជាតិមួយកាលពី ២ឆ្នាំមុន។
នៅក្នុងអត្ថបទមួយចុះផ្សាយដោយសារព័ត៌មាន The Diplomat កាលពីថ្ងៃទី១២ ខែតុលា ឆ្នាំ២០២២ យើងឃើញថា លោក សម រង្ស៊ី កាន់ទង់ជាតិកម្ពុជា ដើរនៅមុខក្រុមអ្នកគាំទ្រលោកនៅក្នុងបាតុកម្មមួយនៅសហរដ្ឋកាលពីខែសីហា ឆ្នាំ២០២២ ប្រឆាំងរបបលោក ហ៊ុន សែន។
ខាងក្រោមនេះ គឺជារូបភាពផ្ដាមចេញពីអត្ថបទសារព័ត៌មានមួយរបស់ The Diplomat ចុះផ្សាយកាលពីថ្ងៃទី១២ ខែតុលា ឆ្នាំ២០២២ ដោយបញ្ជាក់ថា រូបថតនេះត្រូវបានយកពីទំព័រហ្វេសប៊ុករបស់លោក សម រង្ស៊ី។
បន្ទាប់ពីចូលទៅពិនិត្យនៅក្នុងទំព័រហ្វេសប៊ុករបស់លោក សម រង្ស៊ី យើងបានឃើញរូបថតមួយចំនួនដែលបង្ហាញមេដឹកនាំបក្សប្រឆាំងរូបកាន់ទង់ជាតិកម្ពុជា ពោលគឺមិនមែនជាទង់តំណាងក្រុមជនជាតិភាគតិចម៉ុងតាញ៉ាដូចដែលអ្នកប្រើប្រាស់បណ្ដាញសង្គមមួយបានបង្ហោះនោះឡើយ។
ខាងក្រោមនេះ គឺជារូបថតដែលបង្ហោះដោយទំព័រហ្វេសប៊ុកលោក សម រង្ស៊ី កាលពីថ្ងៃទី៣០ ខែសីហា ឆ្នាំ២០២២ ដែលបង្ហាញមេបក្សប្រឆាំងរូបនេះ កាន់ទង់ជាតិកម្ពុជាដើរជាមួយក្រុមអ្នកគាំទ្ររបស់លោកនៅក្នុងបាតុកម្មមួយនៅទីក្រុងឡូវ៉ែល (Lowell) រដ្ឋម៉ាសាឈូហ្សេត សហរដ្ឋអាមេរិក កាលពីថ្ងៃទី២៨ ខែសីហា ឆ្នាំ២០២២។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតដែលបង្ហាញលោក សម រង្ស៊ី កាន់ទង់តំណាងជនជាតិភាគតិចម៉ុងតាញ៉ានេះ គឺជារូបភាពកាត់តែប៉ុណ្ណោះ។ រូបថតពិតប្រាកដ បង្ហាញលោក សម រង្ស៊ី កាន់ទង់ជាតិកម្ពុជាដើរជាមួយក្រុមអ្នកគាំទ្រលោកនៅក្នុងបាតុកម្មមួយនៅសហរដ្ឋអាមេរិកកាលពីខែសីហា ឆ្នាំ២០២២កន្លងមក។
Title:រូបភាពមេបក្សប្រឆាំងកាន់ទង់តំណាងជនជាតិភាគតិចម៉ុងតាញ៉ា គឺជារូបភាពកាត់តតែប៉ុណ្ណោះ
Written By: Jay UdomResult: Altered
