រូបថតចាស់របស់អតីតអ្នករិះគន់លោក ហ៊ុន សែន ត្រូវបានបង្ហោះឡើងភ្ជាប់នឹងការបោះឆ្នោតម្សិលមិញនេះ
បន្ទាប់ពីការបោះឆ្នោតកាលពីថ្ងៃម្សិលមិញនេះ រូបថតមួយសន្លឹករបស់អតីតអ្នកគាំទ្របក្សប្រឆាំងមួយរូបដែលអមដោយសំណេររៀបរាប់ថាលោកមិនចូលរួមបោះឆ្នោត ហើយប្រជាពលរដ្ឋតិចតួចចេញទៅបោះឆ្នោតនោះ ត្រូវបានគេបង្ហោះលើបណ្ដាញសង្គមកាលពីថ្ងៃម្សិលមិញនេះ។ រូបថតដែលមានសំណេរបែបនេះ ត្រូវបានចែករំលែកបន្តជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា រូបថតដែលមានសំណេររៀបរាប់បែបនេះ ត្រូវបានបង្ហោះដោយភ្ជាប់ជាមួយព័ត៌មានមិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញអតីតអ្នកគាំទ្របក្សប្រឆាំង លោក នី ណាក់ បង្ហាញចង្អុលដៃគ្មានជ្រលក់ទឹកខ្មៅ និងសរសេររៀបរាប់ថា ប្រជាពលរដ្ឋចេញទៅបោះឆ្នោតមានចំនួនតិចតួចនោះ ត្រូវបានអ្នកប្រើប្រាស់ហ្វេសប៊ុកឈ្មោះ ឈាមខ្មែរ សង្គ្រោះជាតិ បង្ហោះនៅលើបណ្ដាញសង្គមកាលពីថ្ងៃម្សិលមិញនេះ។
រូបថតដែលមានសំណេរបែបនេះ ត្រូវបានយកទៅបង្ហោះក្នុងន័យថា ប្រជាពលរដ្ឋចេញទៅបោះឆ្នោតជ្រើសតាំងតំណាងរាស្ត្រកាលពីថ្ងៃម្សិលមិញនេះ មានចំនួនកាន់តែតិចទៅៗ។
រូបថតដែលមានសំណេរបែបនេះ ត្រូវបានចែករំលែកបន្តជាច្រើនដង រួមជាមួយការបញ្ចេញមតិយោបល់ និងប្រតិកម្មចម្រុះបែបពីអ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមដែលសរសេររៀបរាប់ថា «ពីមួយអាណត្តិទៅមួយអាណត្តិ ស្ងាត់ទៅៗ បោះឆ្នោតកាន់តែលែងមានន័យ កាន់តែបោះ គំនរទុក្ខសោកប្រជារាស្ត្រ កើតមានកាន់តែធ្ងន់ឡើងៗ»។
ការអះអាងដដែលនេះ ត្រូវបានចែករំលែកបន្តទៅកាន់ក្រុមបណ្ដាញសង្គមហ្វេសប៊ុកជាច្រើន។ សូមមើលការអះអាងនេះតាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived) ឬតំណភ្ជាប់មួយទៀតនៅទីនេះ (archived)។
ការត្រួតពិនិតុ្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការស្នើសុំការបកស្រាយពីលោក នី ណាក់ ដែលនាំឱ្យយើងរកឃើញការពិតដូចខាងក្រោមនេះ។
ឆ្លើយតបនឹងការស្នើសុំពី Fact Crescendo Cambodia លោក នី ណាក់ បានបញ្ជាក់ប្រាប់តាមបណ្ដាញសង្គមតេឡេក្រាមនៅថ្ងៃនេះថា លោកបានថតរូបនេះ និងបង្ហោះលើបណ្ដាញសង្គមហ្វេសប៊ុកនៅថ្ងៃបោះឆ្នោតជ្រើសតាំងតំណាងរាស្ត្រឆ្នាំ២០១៨ ដែលនៅពេលនោះក្រុមមេដឹកនាំបក្សប្រឆាំងរស់នៅឯក្រៅប្រទេស បានអំពាវនាវដល់ប្រជាពលរដ្ឋកុំឱ្យចេញទៅបោះឆ្នោត។
Fact Crescendo Cambodia បានស្វែងរករូបថតដែលមានសំណេរបែបនេះរបស់លោក នី ណាក់ នៅលើបណ្ដាញសង្គមរបស់លោកផងដេរ ប៉ុន្តែ ពុំបានរកឃើញនោះឡើយ។
លោក នី ណាក់ ដែលត្រូវបានកាត់ទោសឱ្យពន្ធនាគារពាក់ព័ន្ធនឹងការសរសេររិះគន់រដ្ឋាភិបាលលោកនាយករដ្ឋមន្ត្រី ហ៊ុន សែន នៅលើបណ្ដាញសង្គមហ្វេសប៊ុកនោះ បានបញ្ជាក់ថា លោកបានលុបរូបថត និងសំណេរនោះចេញពីបណ្ដាញសង្គមហើយ។
អតីតអ្នកគាំទ្របក្សប្រឆាំងរូបនេះ បានបញ្ជាក់ថា លោកបានចេញទៅបោះឆ្នោតកាលពីថ្ងៃម្សិលមិញនេះ ហើយលោកក៏បានផ្ញើរូបថតមួយសន្លឹកដែលបង្ហាញម្រាមដៃលោកប្រលាក់ដោយទឹកខ្មៅ។
កាលពីថ្ងៃម្សិលមិញនេះ នៅក្នុងហ្វេសប៊ុកផ្ទាល់ខ្លួនរបស់លោកដែលដាក់ឈ្មោះ iMan-KH លោក នី ណាក់ បានសរសេររៀបរាប់ថា លោកបានទៅចូលរួមបោះឆ្នោតដែលឈ្មោះរបស់លោកស្ថិតនៅក្នុងបរិវេណសាលាបឋមសិក្សាវត្តសន្សំកុសល ក្នុងរាជធានីភ្នំពេញ។
លោក នី ណាក់ បានបញ្ចាក់បន្ថែមថា លោកបានសង្កេតឃើញប្រជាពលរដ្ឋជាច្រើនបានចេញទៅបោះឆ្នោតសម្រាប់ការបោះឆ្នោតជ្រើសតាំងតំណាងរាស្ត្រកាលពីថ្ងៃម្សិលមិញ បើទោះបីជាគណបក្សភ្លើងទៀនដែលជាបក្សប្រឆាំងធំជាងគេនៅកម្ពុជា មិនត្រូវបានអនុញ្ញាតឱ្យចូលរួមការបោះឆ្នោតនេះក៏ដោយ។
សេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប.) បានឱ្យដឹងថា ប្រជាពលរដ្ឋរហូតដល់ជាង ៨.២១លាននាក់ បានចេញទៅបោះឆ្នោតកាលពីថ្ងៃម្សិលមិញនេះ ដែលស្មើនឹង ៨៤.៥៨ភាគរយនៃចំនួនពលរដ្ឋមានឈ្មោះបោះឆ្នោតក្នុងបញ្ជីបោះឆ្នោតសរុបជាង ៩.៧១លាននាក់។
ខាងក្រោមនេះ គឺជារបាយការណ៍ស្ដីពីចំនួនប្រជាពលរដ្ឋចេញទៅបោះឆ្នោតដែលត្រូវបានផ្សព្វផ្សាយដោយ គ.ជ.ប. នៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃម្សិលមិញនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សាមីខ្លួន លោក នី ណាក់ ដែលជាអតីតអ្នកគាំទ្របក្សប្រឆាំង បានបញ្ជាក់ថា រូបថតនេះមួយសន្លឹកដែលមានរូបលោកនោះ មិនពាក់ព័ន្ធនឹងការបោះឆ្នោតជ្រើសតាំងតំណាងរាស្ត្រអាណត្តិទី៧ ឆ្នាំ២០២៣នោះឡើយ។ លោក នី ណាក់ បញ្ជាក់ថា លោកបានចូលរួមបោះឆ្នោតកាលពីថ្ងៃម្សិលមិញនេះ។
Title:រូបថតចាស់របស់អតីតអ្នករិះគន់លោក ហ៊ុន សែន ត្រូវបានបង្ហោះឡើងភ្ជាប់នឹងការបោះឆ្នោតម្សិលមិញនេះ
Written By: Jay UdomResult: False