វីដេអូនៃហេតុការណ៍ផ្ទុះឃ្លាំងផ្ទុកសារធាតុគីមីនៅលីបង់៤ឆ្នាំមុន ត្រូវបានអះអាងដោយមិនត្រឹមត្រូវ
ខណៈដែលវីដេអូចម្លែកៗជាច្រើនត្រូវបានបង្ហោះនៅលើបណ្ដាញសង្គមនោះ វីដេអូមួយបង្ហាញហេតុការណ៍ផ្ទុះដ៏ខ្លាំងក្លាយមួយ ត្រូវបានគេអះអាងថា វាជាហេតុការណ៍វាយប្រហារបណ្ដាលមកពីសង្គ្រាម។ វីដេអូជាមួយសំណេរបែបនេះ ត្រូវបានចែករំលែកជាច្រើនដងនៅលើបណ្ដាញសង្គម។ ទោះជាយ៉ាងណា យើងរកឃើញថា ការបង្ហោះវីដេអូនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូនៃការផ្ទុះដ៏មហិមាមួយ ត្រូវបានគេបង្ហោះនៅលើបណ្ដាញសង្គមជាមួយនឹងសំណេររៀបរាប់ថា ការផ្ទុះនោះជាលទ្ធផលនៃសង្គ្រាម ប៉ុន្តែ ពុំបានផ្ដល់ព័ត៌មានលម្អិតបន្ថែមទៀតនោះឡើយ។
វីដេអូជាមួយសំណេរបែបនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់ហ្វេសប៊ុក ក្នុងមានទាំងការបញ្ចេញប្រតិកម្មផ្សេង និងមតិយោបល់ផងដែរ។
ខាងក្រោមនេះ គឺជាវីដេអូទាំងស្រុងនៃការផ្ទុះដ៏ធំសម្បើមនោះដែលត្រូវបានបង្ហោះលើបណ្ដាញសង្គមកាលពីថ្ងៃទី២៧ ខែកុម្ភៈ ឆ្នាំ២០២៤ ជាមួយសំណេររៀបរាប់ថា “នេះហើយសង្គ្រាម”។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញវីដេអូនៃការផ្ទុះដ៏ខ្លាំងក្លានេះ ត្រូវបានចុះផ្សាយដោយបណ្ដាញសារព័ត៌មានអន្តរជាតិកាលពី ៤ឆ្នាំមុនមកម៉្លេះ។
នៅក្នុងសេចក្ដីរាយការណ៍របស់ខ្លួនកាលពីខែសីហា ឆ្នាំ២០២០ ទស្សនាវដ្ដីអនឡាញ TMZ បាននិយាយថា វីដេអូនៃការផ្ទុះដ៏ខ្លាំងនេះ គឺជាហេតុការណ៍ផ្ទុះឃ្លាំងផ្ទុះសារធាតុគីមីនៅតំបន់កំពង់ផែមួយនៃទីក្រុងបៃរ៉ូត (Beirut) ប្រទេសលីបង់ ដែលបានសម្លាប់មនុស្សយ៉ាងតិច ១៣៥នាក់ និងបង្កឱ្យមនុស្ស ៥,០០០នាក់រងរបួសកាលពីដើមខែសីហាក្នុងឆ្នាំ២០២០។
បើតាមសេចក្ដីរាយការណ៍ដដែលនេះ វីដេអូមួយផ្នែកត្រូវបានអ្នកជិះម៉ូតូទឹកផ្ដិតយកបាននៅឯតំបន់មាត់សមុទ្រ ជាទីដែលការផ្ទុះឃ្លាំងគីមីនោះបានកើតឡើង។
ខាងក្រោមនេះ គឺជារូបភាពផ្ដាមចេញពីអត្ថបទរបស់ទស្សនាវដ្ដី TMZ មានចំណងជើងជាភាសាអង់គ្លេស “BEIRUT EXPLOSION: JET SKI DRIVER GETS MOST DRAMATIC VIDEO OF BLAST.”
នៅក្នុងអត្ថបទនេះ ទស្សនាវដ្ដី TMZ ក៏បានភ្ជាប់មកជាមួយនូវវីដេអូបង្ហាញពីការផ្ទុះឃ្លាំងផ្ទុះសារធាតុគីមីនោះដែរ ដែលវីដេអូនោះថតដោយអ្នកបើកបរម៉ូតូទឹកម្នាក់។ ទស្សនាវដ្ដីមួយនេះបញ្ជាក់ថា វីដេអូដែលថតបាននេះ ត្រូវបានយកពីបណ្ដាញ YouTube ឈ្មោះ ViralHog។
ក្រៅពីវីដេអូមួយជ្រុងនៃការផ្ទុះឃ្លាំងផ្ទុកសារធាតុគីមីនៅទីក្រុងបៃរូតត្រូវបានថតដោយអ្នកជិះម៉ូតូទឹក វីដេអូមួយផ្នែកទៀត បង្ហាញពីការផ្ទុះដ៏ខ្លាំងក្លានោះពីជ្រុងម្ខាងទៀត ហើយត្រូវបានផ្ទៀងផ្ទាត់រួចហើយដោយក្រុមការពារត្រួតពិនិត្យព័ត៌មានក្លែងក្លាយរបស់ទីភ្នាក់ងារព័ត៌មានបារាំង AFP។ សូមមើលអត្ថបទទាំងស្រុងនៅទីនេះ។
ខាងក្រោមនេះ គឺជាវីដេអូផ្គុំចេញពីប្រភពនានា ដែលបង្ហាញពីកម្លាំងផ្ទុះឃ្លាំងផ្ទុកសារធាតុគីមីនៅកំពង់ផែក្នុងទីក្រុងបៃរូត ប្រទេសលីបង់ កាលពីខែសីហា ឆ្នាំ២០២០កន្លងមក។
លោកអ្នកអាចរកមើលបាននូវវីដេអូដទៃទៀតនៃហេតុការណ៍ផ្ទុះនោះតាមរយៈពាក្យគន្លឹះ “Beirut Explosion” ឬពាក្យប្រហាក់ប្រហែលនឹងពាក្យគន្លឹះនេះផងដែរ។
ខាងក្រោមនេះ គឺជាវីដេអូមួយទៀតដែលបង្ហាញពីហេតុការណ៍ផ្ទុះនោះ ដែលត្រូវបានបង្ហោះនៅលើបណ្ដាញ YouTube ដោយប្រព័ន្ធផ្សព្វផ្សាយព័ត៌មានអង់គ្លេស Guardian News នៅថ្ងៃទី០៥ ខែសីហា ឆ្នាំ២០២០។
ហេតុករណ៍ផ្ទុះនេះ ក៏ត្រូវបានគេយល់ផ្សព្វផ្សាយមិនត្រឹមត្រូវដែរកាលពីខែសីហា ឆ្នាំ២០២៣កន្លងមក ហើយក្រុមការងារផ្ទៀងផ្ទាត់ការពិតនៃស្ថាប័ន Fact Crescendo Cambodia បានត្រួតពិនិត្យទៅលើរឿងនេះរួចហើយដែរ។ សូមមើលខ្លឹមសារទាំងស្រុងនៅទីនេះ។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូបង្ហាញការផ្ទុះដ៏ខ្លាំងក្លានេះ មិនមែនជាហេតុការណ៍វាយប្រហារដោយកម្លាំងយោធានៅក្នុងសង្គ្រាមណាមួយនោះឡើយ។ វីដេអូនេះ បង្ហាញពីទិដ្ឋភាពពីជ្រុងផ្សេងៗនៃហេតុការណ៍ផ្ទុះឃ្លាំងផ្ទុកសារធាតុគីមីមួយនៅកំពង់ផែក្នុងទីក្រុងបៃរូត ប្រទេសលីបង់ កាលពី ៤ឆ្នាំមុន។
Title:វីដេអូនៃហេតុការណ៍ផ្ទុះឃ្លាំងផ្ទុកសារធាតុគីមីនៅលីបង់៤ឆ្នាំមុន ត្រូវបានអះអាងដោយមិនត្រឹមត្រូវ
Written By: Jay UdomResult: Misleading
