- >>
- FALSE
វីដេអូចាស់ពិធីបុណ្យខួបនៃការកកើតស្រុកប្រាសាទ ត្រូវបានបង្ហោះលើបណ្ដាញសង្គមដោយមិនត្រឹមត្រូវ
ថ្មីៗនេះ វីដេអូមួយដែលបង្ហាញពីក្បួនដង្ហែដ៏វែងមួយនៅខេត្តសុរិន្ទ្រ ត្រូវបានគេបង្ហោះនៅលើបណ្ដាញសង្គមជាមួយនឹងការអះអាងថា វាជាពិធីរំលឹកខួបនៃការបាត់បង់ទឹកដីស្រុកប្រាសាទទៅខាងប្រទេសថៃ ដែលរៀបចំធ្វើឡើងដោយប្រជាជនខ្មែរលើនៅខេត្តសុរិន្ទ្រ។ វីដេអូនៃការអះអាងនេះ ត្រូវបានចែករំលែកបន្តយ៉ាងផុសផុល ហើយមានអ្នកប្រើប្រាស់បណ្ដាញសង្គមជាច្រើន បានជឿថា ការអះអាងនេះពិតជាត្រឹមត្រូវ។ បន្ទាប់ពីត្រួតពិនិត្យ និងផ្ទៀងផ្ទាត់រួច យើងរកឃើញថា ការអះអាងនេះមិនត្រឹមត្រូវទេ។
ការអះអាងលើបណ្ដាញសង្គម
វីដេអូនៃការដង្ហែក្បួនដ៏ធំមួយរបស់ប្រជាជនថៃ ត្រូវបានគេបង្ហោះនៅលើបណ្ដាញសង្គមកាលពីចុងសប្ដាហ៍កន្លងមកនេះ ដោយគេអះអាងថា ក្បួនដង្ហែដ៏ធំនោះ គឺជាពិធីរំលឹកខួប ៨០ឆ្នាំនៃការបាត់បង់ទឹកដីខេត្តសុរិន្ទ្ររបស់ប្រជាជនខ្មែរនៅខេត្តមួយនេះ។
វីដេអូជាមួយសំណេររៀបរាប់បែបនេះ ទទួលបានការចែករំលែកបន្តរហូតដល់ទៅ ១ម៉ឺនដង ខណៈដែលអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញប្រតិកម្ម និងមតិយោបល់ទៅនឹងវីដេអូនេះ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០៤ ខែឧសភា ឆ្នាំ២០២៤ ជាមួយសំណេររៀបរាប់ថា “ពិធីគម្រប់ខួប ៨០ឆ្នាំនៃការបាត់បង់ខេត្តសុរិន្ទ្ររបស់បងប្អូនខ្មែរលើស្ថិតក្នុងស្រុកប្រាសាទ ខេត្តសុរិន្ទ្រ”។
វីដេអូជាមួយការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតផងដែរកាលពីចុងសប្ដាហ៍កន្លងមកនេះ ហើយក៏ត្រូវបានចែករំលែកបន្តយ៉ាងច្រើនទៀតផង។
ខាងក្រោមនេះគឺជាវីដេអូទាំងស្រុងដែលត្រូវបានបង្ហោះនៅលើបណ្ដាញសង្គមកាលពីថ្ងៃទី០៤ ខែឧសភា ឆ្នាំ២០២៤ ជាមួយសំណេររៀបរាប់ថា “ពិធីគម្រប់ខួប ៨០ឆ្នាំនៃការបាត់បង់ខេត្តសុរិន្ទ្ររបស់បងប្អូនខ្មែរលើ ស្ថិតក្នុងស្រុកប្រាសាទ ខេត្តសុរិន្ទ្រ ០៤ ០៥ ២០២៤”។
វីដេអូជាមួយការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយទំព័រហ្វេសប៊ុកដទៃទៀតផងដែរ ហើយក៏ត្រូវបានចែករំលែកបន្តជាច្រើនដង។ សម្រាប់វីដេអូ និងការអះអាងដូចគ្នានេះ សូមចូលទៅមើលតាមរយៈតំណភ្ជាប់នៅទីនេះ ១, ២, ៣, ៤, ៥, និង ៦។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈពាក្យគន្លឹះជាភាសាថៃ ដែលនាំឱ្យយើងរកឃើញការពិតដូចខាងក្រោមនេះ។
នៅក្នុងដំណើរត្រួតពិនិត្យ និងផ្ទៀងផ្ទាត់លើវីដេអូនេះ យើងបានកត់សម្គាល់លេខ ៨០ ដែលត្រូវបានដាក់តាំងនៅលើរថយន្តនៃក្បួនដង្ហែនេះ ហើយយើងក៏បានកត់សម្គាល់ទីតាំងនៃវីដេអូនេះ ដែលត្រូវបានគេបញ្ជាក់ថា វាស្ថិតនៅក្នុងស្រុកប្រាសាទ នៃខេត្តសុរិន។
តាមរយៈពាក្យគន្លឹះ “អាំភើប្រាសាទ” (อำเภอปราสาท) នេះ យើងក៏បានរកឃើញវីដេអូក្បួនដង្ហែដ៏ធំមួយនេះដែលត្រូវបានបង្ហោះនៅលើបណ្ដាញសង្គម និងនៅលើបណ្ដាញ YouTube តាំងពីប៉ុន្មានឆ្នាំមុនមកម៉្លេះ។
យើងបានរកឃើញវីដេអូមួយមានរយៈពេលជិត ៣០នាទី ដែលបង្ហោះដោយទំព័រហ្វេសប៊ុក Surin Live Stream កាលពីដើមឆ្នាំ២០១៩កន្លងមកជាមួយសំណេររៀបរាប់ថា វាជាការដង្ហែក្បួនពិធីបុណ្យគម្រប់ខួប ៨០ឆ្នាំនៃកំណើតស្រុកប្រាសាទរបស់ខេត្តសុរិន្ទ្រ។
ខាងក្រោមនេះ គឺជាវីដេអូទាំងស្រុងបង្ហោះដោយទំព័រហ្វេសប៊ុក Surin Live Stream កាលពីថ្ងៃទី១០ ខែមករា ឆ្នាំ២០១៩ ដែលសរសេររៀបរាប់ជាភាសាថៃក្នុងន័យថា វាជាទិដ្ឋភាពពិធីបុណ្យគម្រប់ខួប ៨០ឆ្នាំរបស់ស្រុកប្រាសាទ និងពិធីបុណ្យកាកបាទក្រហម ខេត្តសុរិន្ទ្រ ប្រចាំឆ្នាំ២៥៦១ (២០១៨) ផ្ដិតយករូបភាពដោយក្រុមការងារគ្រូទីវីដេអូ។
ក្រៅពីវីដេអូខាងលើនេះ យើងក៏បានរកឃើញវីដេអូនៃការដង្ហែក្បួនពិធីបុណ្យនេះដែលត្រូវបានបង្ហោះនៅលើបណ្ដាញ YouTube កាលពីចុងឆ្នាំ ២០១៨កន្លងមកផងដែរ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះនៅលើបណ្ដាញ YouTube កាលថ្ងៃទី១១ ខែធ្នូ ឆ្នាំ២០១៨ ដោយឆាណែល physics kroosunday ដែលរៀបរាប់ជាភាសាថៃក្នុងន័យថា វីដេអូនេះ គឺជាក្បួនដង្ហែសិល្បៈវប្បធម៌របស់ឃុំតាបៅ នៅក្នុងពិធីបុណ្យគម្រប់ខួប ៨០ឆ្នាំ នៃស្រុកប្រាសាទ ឆ្នាំ២៥៦១ (២០១៨)។
បើទោះបីជាវីដេអូនេះបង្ហាញមុំផ្សេងពីវីដេអូដែលត្រូវបានគេអះអាងលើបណ្ដាញសង្គមក្ដី ប៉ុន្តែ យើងបានមើលឃើញរូបភាពដូចគ្នាជាច្រើននៅក្នុងវីដេអូទាំងពីរនេះ ដូចជា បុរសនារីមួយគូកាន់ផ្ទាំងអក្សរ “สืบสานงานประเพณี” (ថែរក្សាពិធីបុណ្យប្រពៃណី)។
ខាងក្រោមនេះ គឺជាការប្រៀបធៀបរវាងរូបភាពផ្ដាមចេញពីវីដេអូនៃការអះអាងខាងលើ និងរូបភាពផ្ដាមចេញពីវីដេអូដែលត្រូវបានបង្ហោះលើបណ្ដាញ YouTube កាលពីចុងឆ្នាំ២០១៨កន្លងមក។
ខាងក្រោមនេះ គឺជាការប្រៀបធៀបគ្នារវាងរូបភាពផ្ដាមចេញពីវីដេអូនៃការអះអាងលើបណ្ដាញសង្គមនាពេលថ្មីៗនេះ និងរូបភាពនៃវីដេអូដែលត្រូវបានបង្ហោះនៅលើបណ្ដាញ YouTube កាលពី ៥ឆ្នាំមុន។
សេចក្ដីជូនដំណឹងមួយ បានឱ្យដឹងថា ពិធីបុណ្យគម្រប់ ៨០ឆ្នាំនៃកំណើតស្រុកប្រាសាទ ត្រូវបានរៀបចំធ្វើឡើងចន្លោះថ្ងៃទី៨ ដល់ថ្ងៃទី១២ ខែធ្នូ ឆ្នាំ២០១៨ នៅឯស្រុកប្រាសាទ ស្ថិតក្នុងខេត្តសុរិន្ទ្រ ដែលជាខេត្តជាប់នឹងព្រំដែនកម្ពុជា។
រដ្ឋាភិបាលថៃបានរៀបចំបង្កើតរដ្ឋបាលស្រុកប្រាសាទនៅក្នុងឆ្នាំ១៩៣៨ ដោយស្ថិតនៅក្នុងផ្នែកមួយនៃដែនដីរដ្ឋបាលខេត្តសុរិន្ទ្រ ដែលស្ថិតនៅជាប់ព្រំដែនជាមួយកម្ពុជា។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ក្បួនដង្ហែដ៏វែងនៅក្នុងវីដេអូនេះ មិនមែនជាពិធីរំលឹកខួបនៃការបាត់បង់ទឹកដីស្រុកប្រាសាទរបស់ខេត្តសុរិន្ទ្រទៅប្រទេសថៃនោះឡើយ។ វីដេអូនេះ គឺជាពិធីបុណ្យគម្រប់ខួប ៨០ឆ្នាំនៃការកកើតស្រុកប្រាសាទរបស់ខេត្តសុរិន្ទ្រ ដែលពិធីបុណ្យនេះត្រូវបានរៀបចំធ្វើឡើងនៅចុងឆ្នាំ២០១៨។
Title:វីដេអូចាស់ពិធីបុណ្យខួបនៃការកកើតស្រុកប្រាសាទ ត្រូវបានបង្ហោះលើបណ្ដាញសង្គមដោយមិនត្រឹមត្រូវ
Fact Check By: Jay UdomResult: False
