វីដេអូចាស់ស៊ូណាមិវាយប្រហារជប៉ុនកាលឆ្នាំ២០១១ ត្រូវបានអះអាងថា ទឹកជំនន់នៅឌូបៃ
ខណៈដែលទីក្រុងឌូបៃត្រូវលិចលង់ក្នុងទឹកជំនន់បង្កឡើងដោយភ្លៀងធ្លាក់ខ្លាំងក្លានោះ វីដេអូមួយដែលបង្ហាញរថយន្តជាច្រើនគ្រឿងអណ្ដែតតាមទឹកជំនន់នោះ ត្រូវបានគេបង្ហោះលើបណ្ដាញសង្គមជាមួយការអះអាងថា ជាហេតុការណ៍ទឹកជំនន់នៅទីក្រុងឌូបៃ។ ការអះអាងនេះ ត្រូវបានចែករំលែកបន្តព្រោងព្រាតលើបណ្ដាញសង្គមនាពេលថ្មីៗនេះ។ ទោះជាយ៉ាងណា យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូទឹកជំនន់វាយប្រហារទីក្រុងមួយ ត្រូវបានគេបង្ហោះលើបណ្ដាញសង្គមជាមួយសំណេររៀបរាប់ថា វាជាទឹកជំនន់វាយប្រហារទីក្រុងឌូបៃ ប្រទេសអារ៉ាប់រួម កាលពីថ្ងៃទី២៦ ខែកុម្ភៈ ឆ្នាំ២០២៤។
វីដេអូដែលភ្ជាប់ជាមួយសំណេរបែបនេះ ត្រូវបានចែករំលែកបន្តព្រោងព្រាតរហូតដល់រាប់ពាន់ដងពីសំណាក់អ្នកប្រើប្រាស់បណ្ដាញសង្គមហ្វេសប៊ុក ក្នុងនោះមានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញប្រតិកម្ម និងមតិយោបល់ទៅនឹងវីដេអូនេះ។
ខាងក្រោមនេះ គឺជាវីដេអូទាំងស្រុងដែលត្រូវបានបង្ហោះលើបណ្ដាញសង្គមហ្វេសប៊ុកកាលពីថ្ងៃទី២៦ ខែកុម្ភៈ ឆ្នាំ២០២៤ ជាមួយសំណេររៀបរាប់ថា “ទឹកជំនន់នៅទីក្រុងឌូបៃ”។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញវីដេអូទឹកជំនន់នេះនៅលើបណ្ដាញ YouTube ដែលបង្ហោះដោយឆាណែល EURONEWS កាលពី ១២ឆ្នាំមុន។
ឆាណែលមួយនេះ បញ្ជាក់ថា វីដេអូមួយនេះគឺជាការវាយប្រហារដោយរលកយក្សស៊ូណាមិទៅលើទីក្រុង Sendai ដែលបានសម្លាប់មនុស្សរាប់រយនាក់ និងបានបោកបក់យកគ្រប់យ៉ាងទៅតាមទឹក។
ខាងក្រោមនេះ គឺជាវីដេអូទាំងស្រុងដែលផ្សព្វផ្សាយដោយឆាណែល EURONEWS កាលពីថ្ងៃទី១២ ខែមីនា ឆ្នាំ២០១១។
វីដេអូព័ត៌មានមួយនេះ ក៏ត្រូវបានផ្សព្វផ្សាយនៅលើបណ្ដាញ YouTube ជាភាសាអេស្ប៉ាញ់ដោយឆាណែល EURONEWS ដដែលផងដែរកាលពី ១២ឆ្នាំមុន។
តំបន់ភាគខាងកើតប្រទេសជប៉ុនក្នុងនោះមានទាំងទីក្រុង Sendai នៃខេត្ត Miyagi បានរងការវាយប្រហារពីរលកយក្សស៊ូណាមិកម្ពស់រហូតដល់ ៤០ម៉ែត្រ ដែលបង្កឡើងដោយរញ្ជួយដីកម្រិត ៩រ៉ិកទ័រនៅបាតសមុទ្រក្នុងមហាសមុទ្រប៉ាស៊ីហ្វិកកាលពីថ្ងៃទី១១ ខែមីនា ឆ្នាំ២០១១។
របាយការណ៍របស់រដ្ឋាភិបាលជប៉ុន បានឱ្យដឹងថា គ្រោះមហន្តរាយដ៏សម្បើមនេះ បានសម្លាប់ជីវិតមនុស្សខ្ទង់ ២ម៉ឺននាក់ មនុស្សជាង ៦ពាន់បានរងរបួស និងជាង ២,៥៥៣នាក់ទៀតបាត់ខ្លួន។
ដោយសារតែវីដេអូនេះ គឺជាការវាយប្រហារដោយរលកយក្សស៊ូណាមិកើតនៅប្រទេសជប៉ុននោះ វាមិនពាក់ព័ន្ធទៅនឹងជំនន់ទឹកភ្លៀងដែលកើតឡើងនៅក្នុងប្រទេសអារ៉ាប់រួមនោះឡើយនាពេលថ្មីៗនេះឡើយ។
ទីភ្នាក់ងារព័ត៌មានអាមេរិក AP បានផ្សាយថា ភ្លៀងធ្លាក់ខ្លាំងក្លាបានបង្កជាទឹកជំនន់ជន់លិចទីក្រុង Dubai និងតំបន់ជាច្រើនរបស់ប្រទេសអារ៉ាប់រួមអស់រយៈពេល ៣សប្ដាហ៍មកហើយ។
ខាងក្រោមនេះ គឺជាវីដេអូនិយាយអំពីភ្លៀងធ្លាក់នៅទីក្រុងឌូបៃ ដែលរាយការណ៍ដោយ AP នៅថ្ងៃទី០៩ ខែមីនា ឆ្នាំ២០២៤។
ខាងក្រោមនេះ គឺជាវីដេអូសេចក្ដីរាយការណ៍របស់ AP ដែលនិយាយអំពីទឹកជំនន់នៅទីក្រុងឌូបៃ ក្រោយពីមានភ្លៀងធ្លាក់ខ្លាំងក្លាកាលពី ៣សប្ដាហ៍មុន។
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូដែលបង្ហាញទឹកជំនន់វាយបោកបក់យករថយន្តជាច្រើនគ្រឿងនោះ មិនមែនជាហេតុការណ៍ទឹកជំនន់កើតឡើងនៅទីក្រុងឌូបៃនោះឡើយ។ វាគឺជាវីដេអូចាស់នៃការវាយប្រហារដោយរលកយក្សស៊ូណាមិទៅលើទីក្រុង Sendai ប្រទេសជប៉ុនកាលពី ១២ឆ្នាំមុន។
Title:វីដេអូចាស់ស៊ូណាមិវាយប្រហារជប៉ុនកាលឆ្នាំ២០១១ ត្រូវបានអះអាងថា ទឹកជំនន់នៅឌូបៃ
Written By: Jay UdomResult: Misleading
