រឿងរ៉ាវជាច្រើនទាក់ទងនឹងព្រះពុទ្ធសាសនា ត្រូវបានបង្ហោះនៅលើបណ្ដាញសង្គមព្រោងព្រាត ដោយសារតែពលរដ្ឋកម្ពុជាភាគច្រើនប្រតិបត្តិតាមព្រះពុទ្ធសាសនា។ ក្នុងចំណោមនោះ រូបថតមួយសន្លឹកដែលបង្ហាញឆ្អឹងមួយដុំនៅក្នុងទូកញ្ចក់ ត្រូវបានបង្ហោះនៅលើបណ្ដាញសង្គមជាមួយការរៀបរាប់ថា ជាឆ្អឹងដងកាំបិតរបស់ព្រះពុទ្ធ។ រូបថតជាមួយសំណេរបែបនេះ ទទួលបានការចែករំលែកព្រោងព្រាតនៅលើបណ្ដាញសង្គមចាប់តាំងពីដើមខែមករានេះមក។ ទោះជាយ៉ាងណា យើងរកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតឆ្អឹងដ៏ធំមួយដែលត្រូវបានរក្សាទុកនៅក្នុងទូរកញ្ចក់មួយ ត្រូវបានគេបង្ហោះព្រោងព្រាតនៅលើបណ្ដាញសង្គមជាមួយការអះអាងថា វាជាឆ្អឹងដងកាំបិតរបស់ព្រះសម្មាសម្ពុទ្ធ ដែលជាស្ថាបនិកនៃព្រះពុទ្ធសាសនា។
រូបថតជាមួយសំណេរអះអាងបែបនេះ ត្រូវបានចែករំលែកផុសផុលនៅលើបណ្ដាញសង្គមហ្វេសប៊ុកនៅដើមឆ្នាំ២០២៤នេះ ហើយមានអ្នកប្រើប្រាស់ហ្វេសប៊ុកនិយាយភាសាខ្មែរជាច្រើន បានបញ្ចេញប្រតិកម្មចម្រុះ និងមតិយោបល់យ៉ាងច្រើន ដោយជឿថា វាជាការពិត។
ខាងក្រោមនេះ គឺជារូបភាពផ្ដាមចេញពីការអះអាងខាងលើដោយទំព័រហ្វេសប៊ុកមួយកាលពីថ្ងៃទី០២ ខែមករា ឆ្នាំ២០២៤ ដែលបានបង្ហោះរូបថតជាមួយសំណេររៀបរាប់ថា «ឆ្អឹងដងកាំបិតរបស់ព្រះសម្មាសម្ពុទ្ធគួរជាទីជ្រះថ្លាណាស់ សូមអនុមោទនាបុណ្យ»។
រូបថត និងការអះអាងដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀតផងដែរ ដែលនាំឱ្យមានការចែករំលែកបន្តយ៉ាងច្រើន និងការបញ្ចេញមតិយោបល់ជាច្រើន។
ខាងក្រោមនេះ គឺជារូបភាពផ្ដាមចេញពីការអះអាងដែលបង្ហោះដោយទំព័រហ្វេសប៊ុក ដែលទទួលបានការចែករំលែកបន្តជាច្រើនផងដែរ និងមានអ្នកប្រើប្រាស់ហ្វេសប៊ុកជាច្រើនបានបញ្ចេញមតិតបនឹងការបង្ហោះនេះ។
ខាងក្រោមនេះ គឺជារូបភាពផ្ដាមចេញពីការអះអាងដែលបង្ហោះដោយទំព័រហ្វេសប៊ុកមួយផ្សេងទៀត ហើយទទួលបានការចែករំលែកបន្តជាច្រើនផងដែរ និងមានអ្នកប្រើប្រាស់ហ្វេសប៊ុកជាច្រើនបានបញ្ចេញមតិតបនឹងការបង្ហោះនេះ។
គេអាចរកមើលរូបថតជាមួយការអះអាងដូចគ្នានេះដែលត្រូវបានបង្ហោះនៅលើបណ្ដាញសង្គមហ្វេសប៊ុកតាមរយៈតំណភ្ជាប់នៅទីនេះ ១ (archived), ២ (archived), និង ៣ (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញរូបថតដូចគ្នានេះ និងរូបថតអំពីឆ្អឹងនៅក្នុងប្រអប់កញ្ចក់នេះ ដែលត្រូវបានបង្ហោះនៅលើបណ្ដាញសង្គមហ្វេសប៊ុកដោយអ្នកប្រើប្រាស់ហ្វេសប៊ុកនៅប្រទេសស្រីលង្កា កាលពីចុងឆ្នាំ២០២៣កន្លងមកនេះ។
ទំព័រហ្វេសប៊ុកនោះបានសរសេររៀបរាប់ជាភាសាស៊ីនហាឡេនៅលើបណ្ដាញសង្គមហ្វេសប៊ុកកាលពីថ្ងៃទី២៨ ខែធ្នូ ឆ្នាំ២០២៣ ហើយការប្រែសម្រួលតាម Google Translate បានឱ្យដឹងថា ឆ្អឹងនៅក្នុងប្រអប់កញ្ចក់នោះ គ្រាន់តែជាចម្លាក់ដែលចម្លងតាមឆ្អឹងដកកាំបិតរបស់ព្រះពុទ្ធតែប៉ុណ្ណោះ។
សំណេរបង្ហោះនៅលើទំព័រហ្វេសប៊ុកដដែលនេះ បានឱ្យដឹងទៀតថា ចម្លាក់ចម្លងតាមឆ្អឹងដងកាំបិតខាងស្ដាំរបស់ព្រះពុទ្ធនេះ ត្រូវបានប្រារព្ធពិធីដង្ហែនៅឯព្រះវិហារ Thuparama ដែលវិហារពុទ្ធសាសនាដ៏ចំណាស់បំផុតនៅក្នុងប្រទេសស្រីលង្កា ពោលគឺមានអាយុកាលដំណាលគ្នានឹងការនាំយកពុទ្ធសាសនាទៅកាន់ដែនដីកោះមួយនេះ។
បើតាមខ្លឹមសារសំណេរបង្ហោះនៅលើបណ្ដាញសង្គមហ្វេសប៊ុកដដែលនេះ ការឆ្លាក់ចម្លងតាមឆ្អឹងដងកាំបិតស្ដាំរបស់ព្រះពុទ្ធនេះ ត្រូវបានធ្វើឡើងក្នុងគោលបំណងផ្ដល់នូវការយល់ដឹងដ៏ត្រឹមត្រូវអំពីភិនភាគ និងរូបរាងឆ្អឹងដងកាំបិតរបស់ព្រះពុទ្ធដែលមនុស្សភាគច្រើនមិនបានដឹង។
បើតាមការរៀបរាប់នៅលើវេបសាយ NEKHOR ឆ្អឹងដងកាំបិតខាងស្ដាំពិតប្រាកដរបស់ព្រះពុទ្ធ ត្រូវបានរក្សាទុកនៅក្នុងព្រះវិហារ Thuparama ដែលត្រូវបានកសាងឡើងលើកដំបូងនៅទីក្រុងអនុរធបុរៈ (Anuradhapura) ហើយមានទំនាក់ទំនងជិតស្និទ្ធនឹងការហូរចូលរបស់ព្រះពុទ្ធសាសនាទៅក្នុងប្រទេសស្រីលង្កា។ អានលម្អិតនៅទីនេះ (archived)
NEKHOR ORGANIZAION | Archived Link
សន្និដ្ឋាន
Fact Crescendo Cambodia បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ ឆ្អឹងនៅក្នុងប្រអប់កញ្ចក់នោះ មិនមែនជាឆ្អឹងដងកាំបិតពិតប្រាកដរបស់ព្រះពុទ្ធទេ ប៉ុន្តែ ឆ្អឹងនេះគ្រាន់តែចម្លាក់ចម្លងតាមឆ្អឹងដងកាំបិទរបស់ព្រះពុទ្ធ។
Title:តើឆ្អឹងក្នុងប្រអប់កញ្ចក់នេះជាឆ្អឹងដងកាំបិទរបស់ព្រះពុទ្ធមែនឬទេ?
Written By: Jay UdomResult: Misleading
